Hija l-​Evoluzzjoni Loġika?

ILLUM, dawk li jappoġġaw it-​teorija taʼ l-​evoluzzjoni jgħidu li din hija fatt. Madankollu, kemm huma loġiċi l-​istqarrijiet li taʼ spiss jagħmlu? Ikkunsidra dan li ġej.

Il-ħarir li jipproduċu l-​brimb huwa wieħed mill-​iktar materjali b’saħħithom li jafu bih. Skond in-​New Scientist, “kull ħajta tistaʼ tiġġebbed daqs 40 fil-​mija tat-​tul tagħha u tiflaħ enerġija mitt darba iktar mill-​ħadid mingħajr ma tinqataʼ.” Kif isir dan il-​ħarir taʼ l-​għaġeb? Likwidu li jdellek, li huwa proteina, jgħaddi minn tubi żgħar ħafna fil-​ġisem tal-​brimba, u l-​likwidu jinbidel f’ħajta solida billi jerġgħu jitranġaw il-​molekuli tal-​proteini fil-​likwidu, tispjega l-​Encyclopædia Britannica.

In-New Scientist jikkonkludi: “Il-​brimba evolviet tekniki li huma bil-​wisq akbar minn dawk taʼ l-​aqwa mgħallem fil-​kimika.” Jistaʼ wieħed jimmaġina kif brimba evolviet teknika taʼ manifattura li tant hija komplikata li l-​bniedem għad irid jifhem kif taħdem?

Artiklu li deher f’The Wall Street Journal, minn Phillip E. Johnson, professur tal-​liġi fl-​Università taʼ Kalifornja, jinnota li evidenza favur l-​evoluzzjoni m’hemmx, imma taʼ spiss jiġri li dawk li jappoġġaw l-​evoluzzjoni jwaqqgħu għaċ-​ċajt lil dawk li jiddubitawha. L-​artiklu jgħid: “It-​teorija taʼ l-​evoluzzjoni qed ikollha problemi serji rigward l-​evidenza—imma dawk li jappoġġawha ma jridux dibattitu onest li jistaʼ jdgħajfilhom il-​mod kif jaħsbuha huma.”

Eżempju ieħor li juri n-​nuqqas taʼ loġika fl-​idea taʼ l-​evoluzzjoni għandu x’jaqsam mal-​pjanti. Xjenzati li għamlu riċerki fil-​Marokk sabu 150 fossila taʼ archaeopteris. The Daily Telegraph taʼ Londra tgħid li l-​archaeopteris huma l-​iktar fossili li nstabu s’issa li jixbhu lill-​ewwel pjanti biż-​żerriegħa, l-​antenati tal-​biċċa l-​kbira tas-​siġar li għandna llum. F’din il-​gazzetta, l-​editur rigward ix-​xjenza ddikjara li din il-​pjanta “għenet biex tifforma d-​dinja moderna billi vvintat il-​weraq u l-​friegħi.” Li “tivvinta” jfisser li “ssawwar permezz tal-​ħsieb.” Huwa loġiku li ngħidu li pjanta kellha l-​abbiltà li taħseb u li tivvinta?

Salamun, wieħed mill-​iktar nies għorrief, iwissina biex ‘nagħrfu naħsbu,’ biex nużaw moħħna. Qatt ma kien daqshekk bżonnjuż li nagħmlu hekk daqskemm hu llum.—Proverbji 5:2, Karm Żammit.