Il-​Linji tal-​Ferrovija taʼ l-​Indja Ġgant Mifrux fuq Nazzjon

MINN KITTIEB GĦAL STENBAĦ! FL-​INDJA

Iktar minn 4,000 sena ilu, kien hemm xi bennejja jagħmlu l-​brikks fit-​tramuntana taʼ l-​Indja. Madankollu, qatt ma kienu jobsru li dawk il-​brikks kienu se jispiċċaw f’sistema ġganteska u komplessa taʼ linji tal-​ferrovija fis-​sottokontinent Indjan.

L-​INDIAN RAILWAYS (Il-Linji tal-​Ferrovija taʼ l-​Indja) hija sistema ġganteska! Il-​ferroviji tagħha huma l-​mezz ewlieni taʼ trasport fl-​Indja, pajjiż b’iktar minn biljun ruħ. Biex tkompli żżid maʼ l-​ivvjaġġar normali taʼ kuljum tal-​popolazzjoni in ġenerali, il-​kultura tradizzjonali taʼ l-​Indja tirrikjedi li l-​miljuni li joqogħdu ’l bogħod minn qrabathom ikollhom jivvjaġġaw taʼ spiss għal okkażjonijiet tal-​familja, bħalma huma t-​twelid, il-​mewt, il-​festi, iż-​żwieġ, jew il-​mard.

Bejn wieħed u ieħor, iktar minn 8,350 ferrovija kuljum jagħmlu rotta taʼ kważi 80,000 kilometru u jġorru iktar minn tnax-il miljun u nofs passiġġier. Ferroviji tal-​merkanzija jgħabbu iktar minn miljun tunnellata. Flimkien, dawn jivvjaġġaw id-​distanza taʼ bejn l-​art u l-​qamar għal tliet darbiet u nofs kuljum!

Ġib quddiem għajnejk 6,867 stazzjon, 7,500 lokomottiva, iktar minn 280,000 vagun għall-​passiġġieri u għall-​merkanzija, u rotta twila taʼ 107,969 kilometru inklużi l-​binarji, u malajr tifhem għalfejn I-Indian Railways għandha bżonn tħaddem madwar 1.6 miljun ruħ, l-​akbar korp taʼ impjegati fi kwalunkwe kumpanija fid-​dinja. Iva, ġgant veru!

Kif Twieled il-​Ġgant?

X’wassal biex jinbnew il-​linji tal-​ferrovija fl-​Indja? Meta nbeda dan il-​proġett vast ?  U xi ngħidu għal dawk il-​brikks li għandhom 4,000 sena? Ara l-​kaxxa fil-​paġna li jmiss.

F’nofs is-​seklu 19, l-​Indja kienet tipproduċi kwantità kbira taʼ qoton mhux maħdum, li kien jinġarr bit-​triq lejn il-​portijiet sabiex jiġi esportat. Madankollu, l-​Indja ma kinitx il-​waħda prinċipali li tforni l-​qoton lill-​imtieħen tat-​tessuti tal-​Britannja; dawn, l-​iktar li kienu jġibu qoton kien min-​naħa t’isfel taʼ l-​Istati Uniti. Però, in-​nuqqas taʼ ħsad tal-​qoton Amerikan fl-​1846, segwit mill-​Gwerra Ċivili mill-​1861 sa l-​1865, ġab miegħu bżonn urġenti għal provvisti minn xi mkien ieħor. L-​Indja kienet is-​soluzzjoni. Imma sabiex l-​imtieħen taʼ Lancashire fl-​Ingilterra jibqgħu jaħdmu, it-​trasport ried isir iktar bil-​ħeffa. Għalhekk, ġew stabbiliti l-​East India Railway Company (1845) u l-​Great Indian Peninsula Railway (1849). Ġew iffirmati wkoll kuntratti maʼ l-​English East India Company, l-​akbar negozjanti fis-​sottokontinent Indjan. Ix-​xogħol sar b’ħeffa kbira, u d-​data tas-​16 t’April, 1853, rat l-​ewwel ferrovija fl-​Indja tivvjaġġa distanza taʼ 34 kilometru mill-​istazzjon tal-​ferrovija magħruf bħala Bori Bunder f’Bombay (illum magħruf bħala Mumbai), sal-​belt taʼ Thāne.

Biex minn Bombay tasal sal-​qalba tal-​pajjiż fejn jiġi prodott il-​qoton kien hemm bżonn li taqsam minn ġol-​muntanji Ghats tal-​Punent, katina taʼ muntanji kollha ħotob u ħofor. Inġiniera u ħaddiema Britanniċi, flimkien maʼ eluf taʼ ħaddiema Indjani​—kultant 30,000 f’daqqa​—tħabtu fit-​tul mingħajr l-​għajnuna tat-​teknoloġija moderna. Billi użaw toroq imserrpin fit-​tlajjaʼ għall-​ewwel darba fid-​dinja, huma poġġew linja li fiha kien hemm tlugħ taʼ 555 metru f’24 kilometru biss. Huma ħaffru 25 mina b’tul totali taʼ 3,658 metru. Meta waslu fil-​biċċa art għolja taʼ Deccan, il-​linji setgħu mbagħad jitkomplew. Ix-​xogħol kompla għaddej bil-​ħeffa mal-​pajjiż kollu, imħeġġeġ mhux biss min-​negozju imma wkoll mill-​bżonn biex truppi u ħaddiema jmorru minn post għall-​ieħor malajr hekk kif l-​Ingliżi żiedu l-​interessi kummerċjali u politiċi tagħhom fis-​sottokontinent.

Għal dawk il-​ftit li kienu jaffordjawh, l-​ivvjaġġar tal-​Prima Klassi fis-​seklu 19 għamilha possibbli li jissaportu s-​sħana u t-​trab. Vagun privat kellu sodda komda, tojlit u banju, servjenti biex jipprovdu ikel u xorb minn ħin il-​kolazzjon sa l-​ikla taʼ fil-​għaxija, fann b’kontenitur tas-​silġ taħtu għall-​arja friska, barbier, u letteratura mis-​serje tal-​Wheeler Railway Library li kienet tinkludi l-​aħħar novelli taʼ Rudyard Kipling, awtur imwieled l-​Indja. Louis Rousselet, li kien jivvjaġġa fis-​snin sittin tas-​seklu 19, qal li hu setaʼ “jivvjaġġa din id-​distanza enormi kollha bi ftit li xejn strapazz.”

Il-​Ġgant Ikompli Jikber

Sa l-​1900, is-​sistema tal-​linji tal-​ferrovija fl-​Indja saret il-​ħames l-​akbar waħda fid-​dinja. Lokomottivi​—magni li jaħdmu bl-​istim, bid-​diesel, u bl-​elettriku—u inġenji oħra tal-​ferrovija bħalma huma l-​vaguni tal-​passiġġieri, li qabel kollha kienu jiġu importati, issa bdew jiġu prodotti lokalment. Ftit mill-​magni kienu ġganti tassew​—lokomottivi li jiżnu iktar minn 230 tunnellata, magni taʼ l-​elettriku b’potenza taʼ 6,000 żiemel (horsepower), u magna diesel li tiżen 123 tunnellata b’potenza taʼ 3,100 żiemel. Fl-​1862 ġiet introdotta l-​ewwel ferrovija b’żewġ sulari fid-​dinja. L-​Indja tiftaħar li għandha l-​itwal pjattaforma tal-​ferrovija fid-​dinja li hi twila 833 metru, ġo Kharagpur fil-​Bengal tal-​Punent, u l-​itwal pjattaformi mgħottijin f’Sealdah ġewwa Calcutta, li huma twal 305 metri kull waħda.

L-​ewwel ferroviji kienu jiġru fuq linji wesgħin. Iktar tard, biex jiffrankaw il-​flus, introduċew linji li kellhom wisaʼ taʼ metru biss bejniethom, kif ukoll linji idjaq għall-​għoljiet. Fl-​1992, inbeda l-​Project Unigauge, u sa llum kważi 7,800 kilometru taʼ linji dojoq jew tal-​metru nbidlu maʼ linji wesgħin.

Il-ferroviji taʼ barra l-​belt taʼ Mumbai, li jġorru miljuni taʼ nies deħlin u ħerġin mill-​belt, dejjem jidhru li huma ppakkjati bin-​nies iktar milli jesgħu. Il-​ferroviji taʼ taħt l-​art taʼ Calcutta kuljum jifilħu jġorru 1.7 miljun passiġġier. Chennai (qabel magħrufa bħala Madras) għandha l-​ewwel sistema taʼ linji tal-​ferroviji fl-​Indja mibnija fuq pilastri. Dan l-​aħħar inbeda wkoll l-​ibbukkjar permezz taʼ l-​internet kif ukoll permezz taʼ kjoskijiet elettroniċi li jagħtu l-​informazzjoni. Din is-​sistema taʼ linji tal-​ferrovija hija verament ġgant bieżel ferm li kulma jmur qiegħed jimxi ’l quddiem.

“Il-​Ferroviji Nani” Ferriħija

Biex jaħarbu mis-​sħana, il-​kolonisti Ingliżi kienu jħobbu jmorru fuq il-​muntanji. Bil-​ħsieb li jaslu hemmhekk iktar malajr, inbnew linji tal-​ferrovija fuq il-​muntanji bil-​“ferroviji nani” tagħhom. B’hekk, il-​vjaġġi bdew jieħdu inqas ħin​—meta tqis li qabel kienu jmorru riekba fuq iż-​żwiemel jew inkella jinġarru fuq xi palankin. Per eżempju, il-​“ferrovija nana” fin-​nofsinhar taʼ l-​Indja, tieħu l-​passiġġieri tagħha ġo l-​Għoljiet taʼ Nilgiri, jew il-​Blue Mountains. Bejn wieħed u ieħor tagħmel 10.4 kilometri fis-​siegħa u probabbilment hija l-​iktar ferrovija li timxi bil-​mod fl-​Indja. Imma xi vjaġġ impressjonanti hu dan minn qalb il-​muntanji fejn ikabbru t-​te u l-​kafè sa Coonoor, għoli taʼ 1,712-il metru! Din il-​linja, li togħla metru kull tnax-il metru, inbniet lejn l-​aħħar tas-​seklu 19 u għandha 208 liwjiet u 13-il mina. Din taħdem bis-​sistema Abt, sistema taʼ linji tal-​ferrovija bl-​ingranaġġ. Biċċiet tal-​ħadid qishom snien iservu taʼ sellum biex il-​magna, li tinsab fuq in-​naħa taʼ wara, tingrana magħhom, u b’hekk timbotta l-​ferrovija ’l fuq. Din il-​linja, li tuża din it-​teknoloġija taʼ l-​ingranaġġ, hija fost l-​eqdem u l-​iktar wieqfa tad-​dinja.

Id-Darjeeling Himalayan Railway titlaʼ fuq linji li huma biss 61 ċentimetru ’l bogħod minn xulxin, bi tlugħ taʼ metru għal kull tnejn u għoxrin metru u nofs, sa Ghoom, l-​iktar stazzjon li qiegħed fl-​għoli fl-​Indja, 2,258 metru ’l fuq mil-​livell tal-​baħar. Il-​linja għandha tliet linji mserrpin u sitt linji forma taʼ żigżag. L-​iktar sezzjoni famuża, il-​linja mserrpa taʼ Batasia, tħajjar lill-​passiġġieri biex jaqbżu minn ġol-​ferrovija, jitilgħu maʼ l-​għoljiet kollha ħaxix, u jerġgħu jirkbu fil-​ferrovija wara li tlesti mid-​dawra. L-​iktar parti eċċitanti tal-​vjaġġ hija l-​veduta taʼ Kanchenjunga, it-​tielet l-​ogħla muntanja fid-​dinja. Fl-​1999, il-​futur taʼ din il-​linja tal-​ferrovija tqiegħed iktar fis-​sod meta ngħatat l-​istat taʼ Wirt Dinji (World Heritage) mill-​UNESCO.

Biex tasal sa Simla, li kienet il-​kapitali sajfija, taħt il-​ħakma Ingliża, li hi għolja 2,200 metru, il-​ferrovija tgħaddi minn 102 mini, taqsam 869 pont, u ddur 919-il liwja f’medda taʼ 95 kilometru biss! Wieħed jistaʼ jara xenarju mill-​isbaħ mit-​twieqi kbar u mis-​saqaf tal-​fibreglass trasparenti. Iva, il-​“ferroviji nani” huma verament taʼ gost. Madankollu, peress li l-​prezzijiet inżammu baxxi mhux ħażin, il-​linji tal-​ferrovija tal-​muntanja sfortunatament qegħdin imorru minn taħt. Uħud entużjasti jittamaw li tinsab soluzzjoni biex dawn il-​ferroviji ferrieħa jiġu salvati.

Il-​Vjaġġ it-​Twil

Intqal li l-​wasla tal-​ferrovija fl-​Indja mmarkat “it-​tmiem taʼ era waħda u l-​bidu taʼ oħra” u li “l-​ferrovija għaqqdet lill-​Indja flimkien, xi ħaġa li l-​ebda skema taʼ xi integrazzjoni oħra ma rnexxielha tagħmel qabel.” Kemm hu veru dan! Jekk trid tistaʼ tirkeb il-​ferrovija minn Jammu, fil-​bażi tal-​muntanji Himalayas, u titlaq lejn Kanyakumari, l-​iktar post imbiegħed fin-​nofsinhar taʼ l-​Indja, fejn jiltaqgħu l-​Baħar Għarbi, l-​Oċean Indjan, u l-​Bajja taʼ Bengal. Se tkun ivvjaġġajt 3,751 kilometru minn ġo 12-il stat differenti u tkun qattajt madwar 66 siegħa fuq il-​ferrovija. Anki jekk tikri kabina għall-​irqad, tistaʼ tkun infaqt inqas minn $15 (Lm7.00) għall-​biljett tiegħek. Se jkollok l-​opportunità li ssir taf nies dħulin li jħobbu jitkellmu u li ġejjin minn kulturi differenti u tara ħafna xenarji taʼ dan il-​pajjiż li jsaħħrek. Irriserva post issa​—u l-​vjaġġ it-​tajjeb!

[Kaxxa f’paġna 14]

Dawk il-​Brikks l-​Antiki

Matul il-​ħakma Ingliża (1757-1947), il-​linji tal-​ferrovija fis-​sottokontinent Indjan kienu ideali biex it-​truppi jivvjaġġaw minn post għall-​ieħor għal distanzi twal. Tliet snin wara l-​inawgurazzjoni taʼ l-​ewwel ferrovija fl-​Indja, kien hemm inġinieri li bdew iqiegħdu l-​linji bejn Karachi u Lahore, fejn illum hemm il-​Pakistan. Ma kienx hemm żrar għas-​saborra​—is-​sodda taʼ żrar bejn il-​linji tal-​ferrovija​—biex fuqha jitpoġġew it-​traversi tat-​triq tal-​ferrovija. Imma qrib il-​villaġġ taʼ Harappa, il-​ħaddiema sabu brikks li kienu ġew moħmijin fil-​kalkara. L-​inġinieri John u William Brunton ħassew li dawn setgħu jkunu sostitut xieraq u ekonomiku. Waqt li l-​ħaddiema kienu qed jaqilgħu l-​ammonti kbar ferm taʼ brikks mill-​art, instabu statwetti tat-​tafal u siġilli b’lingwa mhix magħrufa, imma dan ma tellifx ix-​xogħol importanti ferm tal-​bini tal-​linja tal-​ferrovija. Mija u sittin kilometru taʼ linji tal-​ferrovija kienu mibnijin bil-​brikks taʼ Harappa. Ħamsa u sittin sena wara, l-​arkeoloġi b’mod sistematiku skavaw is-​sît taʼ Harappa u sabu l-​fdalijiet taċ-​ċiviltà taʼ l-​għaġeb tal-​Wied Indu. Din iċ-​ċiviltà tmur lura iktar minn 4,000 sena u hi kontemporanja mal-​Mesopotamja antika!

[Kaxxa f’paġna 16]

IL-​LINJA TAL-​FERROVIJA TAʼ KONKAN—Meravilja Moderna

Konkan, biċċa art li l-​iktar parti wiesgħa tagħha hija madwar 75 kilometru, qiegħda fuq ix-​xatt tal-​punent taʼ l-​Indja, bejn il-​Baħar Għarbi u l-​muntanji taʼ Sahyadri. Billi jibda minn Mumbai, iċ-​ċentru kummerċjali taʼ l-​Indja, u jmur lejn in-​nofsinhar sal-​port maġġuri taʼ Mangalore, Konkan għandu ħafna x’joffri f’dak li hu negozju. Għal sekli sħaħ il-​portijiet fix-​xtut ħadu ħsieb dan in-​negozju, kemm ġo l-​Indja kif ukoll maʼ pajjiżi oħra. Imma l-​ivvjaġġar bil-​baħar kien perikoluż​—speċjalment waqt l-​istaġun tal-​monsun, meta x-​xmajjar ma kinux ikunu navigabbli​—u t-​toroq u l-​linji tal-​ferrovija kienu jidħlu ’l ġewwa wisq mix-​xatt biex ikunu jistgħu jiġu evitati ħafna ostakli naturali. In-​nies tal-​post xtaqu ħafna li jkollhom aċċess dirett fuq l-​art mal-​kosta biex jittrasportaw il-​merkanzija malajr lejn is-​swieq il-​kbar, speċjalment affarijiet li jiskadu. X’kienet is-​soluzzjoni?

Il-​Linja tal-​Ferrovija taʼ Konkan kienet l-​akbar proġett taʼ linji tas-​sottokontinent fis-​seklu 20. X’kien involut? Bini taʼ rotta taʼ 760 kilometru b’sisien għoljin sa 25 metru u qtugħ taʼ 28 metru fond. Bini taʼ iktar minn 2,000 pont, inkluż il-​vjadott għoli 64 metru taʼ Panval Nadi, l-​ogħla pont fl-​Asja, li qiegħed fuq wied wiesaʼ 500 metru, u l-​pont twil naqra iktar minn 2 kilometri fuq ix-​Xmara Sharavati. Infid fil-​muntanji bit-​tħaffir taʼ 92 mina, 6 minnhom twal iktar minn 3.2 kilometri, biex il-​linja tkun dritta kemm jistaʼ jkun. Fil-​fatt, waħda minn dawn hija l-​itwal mina fl-​Indja sa llum, il-​mina taʼ Karbude li hija twila 6.5 kilometri.

Il-​problemi kienu enormi​—xita li ġġorr kollox magħha, mases taʼ tajn u ġebel li jinqatgħu u jiżżerżqu ’l isfel mill-​muntanji, kif ukoll it-​tħaffir taʼ blat iebes, u iktar diffiċli, ħamrija litomarġika ratba, deskritta bħala li qisha toothpaste. Dawn l-​ostakli naturali kollha kellhom jingħelbu permezz tas-​sengħa fl-​inġinerija u t-​teknoloġija. Sistemi differenti taʼ ventilazzjoni fil-​mini, kif ukoll fatturi oħra taʼ sigurtà, kienu proġetti enormi fihom infushom. L-​art riedet tiġi akkwistata mingħand iktar minn 42,000 sid differenti, biċċa xogħol legali kolossali.

Madankollu, fis-​26 taʼ Jannar, 1998, wara sebaʼ snin taʼ bini​—rekord għal proġett enormi bħal dan​—ixxejret il-​bandiera biex titlaq l-​ewwel ferrovija fuq il-​Linja taʼ Konkan. Il-​vjaġġ minn Mumbai sa Mangalore kien 1,127 kilometru iqsar mir-​rotta kollha tidwir taʼ qabel, u l-​ħin taʼ l-​ivvjaġġar naqas b’26 siegħa. Għan-​nies li jivvjaġġaw bil-​ferrovija, din il-​Linja taʼ Konkan offritilhom veduti ġodda taʼ xenarju mill-​isbaħ, lit-​turisti postijiet ġodda u eċċitanti biex jesploraw, u lil miljuni taʼ nies ekonomija aħjar.

[Map]

(Għall-formazzjoni sħiħa tat-​test, ara pubblikazzjoni)

MUMBAI

Mangalore

[Stampa]

Il-​vjadott taʼ Panval Nadi, l-​ogħla pont fl-​Asja

[Sors]

Dipankar Banerjee/STSimages.com

[Kaxxa/Stampa f’paġna 16]

IL-​FAIRY QUEEN

L-​eqdem lokomottiva taʼ l-​istim fid-​dinja li kienet taħdem hija l-​Fairy Queen. Mibnija ġo Leeds, l-​Ingilterra, fl-​1855, mid-​ditta taʼ l-​inġinerija taʼ Kitson, Thompson u Hewitson, din ġibdet ferroviji tal-​posta mill-​istazzjon taʼ Howrah, ħdejn Calcutta, sa Raniganj ġewwa Bengal. Meta waqqfuha minn xogħolha fl-​1909, inżammet fil-​Mużew Nazzjonali tal-​Linji tal-​Ferrovija, ġo New Delhi, tpaxxi lil uħud entużjasti tal-​ferroviji. Għaċ-​ċelebrazzjoni taʼ l-​għeluq il-​50 sena taʼ indipendenza taʼ l-​Indja, din ix-​xwejħa leali nqalgħet mill-​irtir tagħha. Mill-​1997, il-​Fairy Queen Express ilha għaddejja ċċeklem, iġġorr it-​turisti tul il-​143 kilometru minn Delhi sa Alwar, ġo Rajasthan.

[Kaxxa/Stampi f’paġna 17]

IL-​LUSSU U L-​VELOĊITÀ​—Qegħdin fl-​Indja Wkoll!

LUSSU L-​Indja għandha passat antik u ħafna drabi rikk ukoll. Vjaġġi esklużivi bil-​ferrovija joffru titwila f’dak il-​passat bil-​kumdità kollha, għalkemm bi prezz għoli. Il-​Palace on Wheels, miġbuda minn lokomottiva taʼ l-​istim, ġiet inawgurata fl-​1982. Vaguni rranġati b’lussu, li qabel kienu jintużaw minn xi prinċep imsejjaħ maħaraġa jew minn xi viċirè, għadhom jikkonservaw l-​atmosfera tal-​wirt irjali tagħhom. Bl-​estern tagħhom lewn il-​perla bajda, b’kisja minn ġewwa bl-​injam tat-​tikk, b’linef tal-​kristall, u bi drapp lussuż kollu disinni mqabbżin, verament ikun hemm atmosfera taʼ splendur. Kumpartimenti għall-​irqad bħal dawk taʼ palazz, kmamar tal-​pranzu, salott u librerija, tisjir internazzjonali eċċellenti, u servizz bis-​servjenti lebsin uniformi jġagħlu l-​passiġġieri jħossuhom vera mfissdin.

Fl-​1995, minħabba li nbidlu l-​linji għal dawk wesgħin, inbniet Palace oħra u l-​vaguni l-​antiki ma baqgħux jintużaw. Ferrovija lussuża ġdida li jisimha The Royal Orient għadha għaddejja fuq il-​linja tal-​metru antika fl-​istati tal-​punent taʼ Gujarat u Rajasthan. Il-​ferroviji jivvjaġġaw l-​iktar bil-​lejl, u l-​passiġġieri jqattgħu l-​ġranet tagħhom iduru f’postijiet taʼ interess. Dawk li jkunu qed jivvjaġġaw jgħaddu minn ġod-​deżert kbir bl-​isem taʼ Thar, bil-​fortizzi, ċittadelli, u tempji antiki tiegħu. Wieħed jistaʼ jirkeb l-​iġmla fuq l-​għoljiet tar-​ramel jew rikba fuq l-​iljunfant sal-​famuża Fortizza t’Amber. Fil-​qrib hemm Jaipur, il-​Belt ir-​Roża, sinjura fl-​istorja u magħrufa għall-​ħaġar u għall-​affarijiet maħdumin bl-​idejn. Inklużi fil-​mawra hemm santwarji taʼ l-​għasafar, riserva tat-​tigri, u d-​dar taʼ l-​uniċi ljuni Asjatiċi li għadhom jgħixu fl-​ambjent naturali tagħhom. Titlifx il-​palazz taʼ Udaipur mibni fuq lag u, m’għandniex xi ngħidu, it-​Taj Mahal! Dan kollu u iktar jikkontribwixxu għall-​avventuri eċċitanti fuq il-​ferrovija.

VELOĊITÀ Il-​ferroviji taʼ l-​Indja ma jistgħux jikkompetu mal-​ferroviji taʼ veloċità enormi taʼ Franza u l-​Ġappun. Però vvjaġġar fit-​tul, komdu, u malajr, huwa possibbli fuq il-​106 pari taʼ ferroviji b’veloċità qawwija taʼ l-​Indian Railways fil-​bliet. Il-​ferroviji Rajdhani u Shatabdi, li jiġru kważi 160 kilometru fis-​siegħa, jikkompetu maʼ l-​ivvjaġġar bl-​ajru f’dik li hi kumdità u faċilitajiet. Vaguni bl-​arja kundizzjonata għandhom seats li jinżlu lura jew kabini komdi għall-​irqad. Ikliet u snacks, friex għas-​sodda, ilma tajjeb għax-​xorb, u assistenza medika huma inklużi fil-​prezz tal-​biljett fuq dawn il-​ferroviji prestiġjużi.

[Mappa]

(Ghall-formazzjoni shiha tat-​test, ara pubblikazzjoni)

Jaipur

Udaipur

[Stampi]

Hawa Mahal, Jaipur

It-​Taj Mahal, Agra

The Royal Orient

Ġewwa l-​“Palace on Wheels”

[Sors]

Hira Punjabi/STSimages.com

[Mappa/Stampi f’paġna 13]

(Ghall-formazzjoni shiha tat-​test, ara pubblikazzjoni)

NEW DELHI

[Stampi]

Ftit mil-​linji maġġuri tal-​ferrovija

Stim, Zawar

Stim, Darjeeling Himalayan Railway (DHR)

Elettrika, Agra

Elettrika, Mumbai

Diesel, Hyderabad

Diesel, Simla

[Sors]

Mappa: © www.MapsofIndia.com

[Mappa/Stampa f’paġna 15]

(Ghall-formazzjoni shiha tat-​test, ara pubblikazzjoni)

MUMBAI

[Stampa]

L-​Istazzjon taʼ Churchgate, Mumbai

[Sors]

Sandeep Ruparel/STSimages.com

[Mappa/Stampa f’paġna 15]

(Ghall-formazzjoni shiha tat-​test, ara pubblikazzjoni)

L-​Għoljiet taʼ Nilgiri

[Stampa]

Il-​magna taʼ l-​istim timbotta lill-​“ferrovija nana” taʼ Nilgiri ’l fuq lejn l-​għolja l-​wieqfa

[Mappa/Stampi f’paġna 18]

(Ghall-formazzjoni shiha tat-​test, ara pubblikazzjoni)

Darjeeling

[Stampi]

Il-​linja mserrpa taʼ Batasia, fejn il-​linja tal-​ferrovija tgħaddi minn fuqha nfisha

Veduta tal-​Muntanja Kanchenjunga mil-​linja mserrpa taʼ Batasia

[Sors taʼ l-​Istampa f’paġna 14]

Ferroviji f’paġna 2, 13, 15 fin-​nofs, 16-18: Riproduzzjoni bil-​permess taʼ Richard Wallace