Il-​Ħarsa tal-​Bibbja

Il-​Pornografija—Hija Biss Passatemp li Ma Jagħmilx Ħsara?

META xi arkeoloġi taʼ żmien ir-​renju tar-​Reġina Vittorja bdew iħaffru b’mod sistematiku fil-​fdalijiet antiki taʼ Pompej, baqgħu xxokkjati b’dak li sabu. Imxerrda bl-​addoċċ qalb l-​affreski u t-​tpinġijiet mill-​isbaħ kien hemm ħafna pitturi u skulturi li juru atti sesswali sfaċċati. Maħsudin min-​natura degradanti tagħhom, l-​awtoritajiet ħbewhom ġo mużewijiet sigrieti. Biex jikklassifikaw dawn ix-​xogħlijiet sfaċċati, huma fformaw it-​terminu “pornografija”​—miż-​żewġ kelmiet Griegi pornē u graphos, li jfissru “kitba dwar il-​prostituti.” Illum il-​pornografija qed tiġi definita bħala “r-​rappreżentazzjoni taʼ mġiba erotika f’kotba, stampi, statwi, films, eċċ., magħmula bil-​ħsieb li tqanqal eċċitament sesswali.”

Illum, il-​pornografija hija mifruxa maʼ kullimkien u tidher li hi aċċetta fil-​biċċa l-​kbira tas-​soċjetà moderna. Fejn qabel kont issibha biss f’ċerti teatri taċ-​ċinema taʼ reputazzjoni ħażina u f’distretti tad-​dwal ħomor taʼ fama ħażina, issa hi aċċettata ħafna maʼ kullimkien. Huwa stmat li fl-​Istati Uniti biss, il-​pornografija tiġġenera iktar minn għaxar biljun dollaru (Lm4.5 biljuni)!

Xi wħud li huma favur il-​pornografija jirriklamawha bħala mod li bih jistgħu jagħtu l-​ħajja lil żwieġ mejjet. Kittieba tgħid: “Din tistimula ħajja attiva mimlija fantasija. Toffri istruzzjoni għall-​pjaċir sesswali.” Oħrajn isostnu li din tinkuraġġixxi lin-​nies biex ikunu moħħhom miftuħ dwar is-​sess. “Il-​pornografija tagħmel ġid lin-​nisa,” tgħid il-​kittieba Wendy McElroy.

Imma mhux kulħadd jaqbel maʼ dan. Spiss il-​pornografija ġiet assoċjata m’ammont kbir taʼ riżultati u attitudnijiet taʼ ħsara. Xi wħud jissuġġerixxu li l-​pornografija hija marbuta maʼ l-​istupru kif ukoll maʼ forom oħra taʼ vjolenza fuq in-​nisa u t-​tfal. Ted Bundy, qattiel infami li qatel sensiela taʼ nies, jammetti li kellu “aptit qawwi għall-​pornografija vjolenti.” Hu jgħid: “Din il-​kundizzjoni ma tidhirx mill-​ewwel mill-​individwu u lanqas tiġi identifikata bħala problema serja. . . . Imma dan l-​interess . . . isir miġbud lejn inklinazzjonijiet taʼ natura sesswali li tinvolvi l-​vjolenza. Ma nistax nenfasizza biżżejjed kif dan jiżviluppa bil-​mod il-​mod. Ma jseħħx fi żmien qasir.”

Meta tqis id-​dibattitu li ma jieqaf qatt u l-​għadd taʼ materjal pornografiku li hawn illum, tistaʼ tistaqsi, ‘Il-​Bibbja toffri xi tip taʼ gwida dwar dan is-​suġġett?’

Il-​Bibbja Hija Ċara dwar is-​Sess

Fil-​Bibbja, is-​sess jiġi trattat b’sinċerità u mingħajr mistħija. (Dewteronomju 24:5; 1 Korintin 7:​3, 4) Mart żgħożitek “ifraħ biha,” jagħti lparir Salamun. “Jimliek dejjem bl-​għaxqa ż-​żegħil tagħha.” (Proverbji 5: 18, 19) Jingħataw pariri u gwida ċara rigward relazzjonijiet sesswali, inkluż il-​limiti safejn dawn għandhom jitgawdew. Sess barra mill-​arranġament taż-​żwieġ huwa projbit. Hekk ukoll huma l-​forom kollha taʼ prattiċi sesswali mhux normali u perversi.​—Levitiku 18:​22, 23; 1 Korintin 6:9; Galatin 5:19.

Anki f’dawn il-​limiti, ir-​rażan u r-​rispett huma mistennija. “Ħalli jkun iż-​żwieġ tagħkom miżmum fil-​ġieħ minn kulħadd,” kiteb l-​appostlu Pawlu, “u s-​sodda taż-​żwieġ bla tinġis.” (Lhud 13:4) Dan il-​parir huwa f’kuntrast qawwi maʼ l-​intenzjoni u l-​messaġġ tal-​pornografija.

Il-​Pornografija Ċċajpar is-​Sess

Minflok ma tippreżenta r-​relazzjonijiet sesswali bħala espressjoni taʼ mħabba intima u mill-​isbaħ bejn raġel u mara fi żwieġ onorabbli, il-​pornografija tbaxxi u ċċajpar l-​att sesswali. Sess każwali u pervers huwa preżentat bħala li huwa eċċitanti u mixtieq. L-​enfasi tkun fuq li wieħed jissodisfa lilu nnifsu u ftit li xejn jimpurtah mill-​persuna l-​oħra.

Nisa, irġiel, u tfal jiġu preżentati bħala oġġetti li jeżistu biss għal sodisfazzjon sesswali. “Is-​sbuħija titkejjel skond il-​ġisem taʼ dak li jkun, toħloq stennijiet mhux realistiċi,” jgħid rapport wieħed. “Li tiddeskrivi lin-​nisa bħala anonimi, dejjem jixxennqu u jistennew, oġġetti bla skop biex jilagħbu bihom l-​irġiel, jinżgħu u jikxfu ġisimhom għall-​qligħ taʼ flus u bħala divertiment ma jistax jiġi tradott f’messaġġ li jistaʼ jkun f’armonija maʼ l-​ugwaljanza, id-​dinjità u l-​umanità,” jikkonkludi rapport ieħor.

Għall-kuntrarju, l-​imħabba “ma tagħmilx dak li m’hux xieraq,” kiteb l-​appostlu Pawlu. “Ma tfittixx dak li hu tagħha.” (1 Korintin 13:5) Il-​Bibbja tħeġġeġ lill-​irġiel biex “iħobbu n-​nisa tagħhom bħallikieku ġisimhom stess” u biex ‘jagħtuhom il-​ġieħ li ħaqqhom,’ mhux biex iqisu lin-​nisa bħala sempliċi oġġetti biex jissodisfawhom sesswalment. (Efesin 5:28; 1 Pietru 3:7) Qiegħed xi ħadd, kemm maskil kif ukoll femminil, li regolarment jara xeni sesswalment sfaċċati taʼ nies oħra, tassew iġib ruħu kif jixraq? U qiegħed dan ix-​xi ħadd juri unur u rispett? Minflok l-​imħabba, il-​pornografija trawwem xenqa egoista u li tpaxxi lilek innifsek.

Hemm ukoll fattur ieħor. Malajr, bħal kull ħaġa oħra li mhix xierqa u li tistimulak, dak li jqanqlek fil-​bidu jsir rutina u ma jibqax jistimulak. “Maż-​żmien,” jgħid wieħed kittieb, “[dawk li jużaw il-​pornografija] ikunu jridu materjal iktar espliċitu u pervers . . . Jistgħu jġagħlu lis-​sieħeb jew sieħba tagħhom biex jagħmlu attivitajiet sesswali perversi . . . , billi jnaqqsu l-​kapaċità tagħhom [stess] li jesprimu affezzjoni vera.” Jistaʼ dan jitqies bħala passatemp li ma jagħmilx ħsara? Imma hemm raġuni importanti oħra għala għandna nevitaw il-​pornografija.

Il-​Bibbja u x-​Xenqa

Filwaqt li ħafna llum iħossu li m’hemm xejn ħażin u taʼ periklu f’li jqanqlu fantasiji sesswali, il-​Bibbja ma taqbilx. Din tispjega b’mod ċar li hemm konnessjoni bejn dak li ndaħħlu f’moħħna u l-​mod kif naġixxu. “Kull bniedem imġarrab jinġibed u jitħajjar mill-​passjoni tiegħu stess,” jindika d-​dixxiplu Kristjan Ġakbu. “Mbagħad il-​passjoni, meta tnissel, tiled id-​dnub.” (Ġakbu 1:​14, 15) Ġesù qal: “Kull min iħares lejn mara biex jixtieqha jkun ġa għamel adulterju magħha f’qalbu.”​—Mattew 5:​28.

Bħalma juru Ġakbu u Ġesù, il-​bnedmin jaġixxu skond ix-​xewqat ġewwinija tagħhom. Dawn ix-​xewqat, meta jiġu mitmugħa u msaħħin, jistgħu maż-​żmien isiru ossessjonijiet qawwijin. L-​ossessjonijiet huma diffiċli ħafna biex tirreżistihom u maż-​żmien jistgħu jġagħlu lil dak li jkun jieħu azzjoni. B’hekk, dak li ndaħħlu f’moħħna jistaʼ jkollu effett qawwi fuq dak li nispiċċaw biex nagħmlu.

Il-​fantasiji sesswali jistgħu jeffettwaw direttament il-​qima tagħna lejn Alla. Huwa għalhekk li Pawlu kiteb: “Mewwtu ġo fikom . . . żína, faħx, ġibdiet, xewqat ħżiena, u r-​regħba [xenqa], li hi idolatrija.”​—Kolossin 3:5.

Hawnhekk Pawlu jorbot il-​ġibdiet max-​xenqa, li hija xewqa eċċessiva għal xi ħaġa li wieħed ma jkollux.a Ix-​xenqa hija forma taʼ idolatrija. Għala? Għaliex min jixxennaq ipoġġi l-​ħaġa mixtieqa qabel kollox, inkluż qabel Alla. Il-​pornografija tistimula x-​xenqa għal xi ħaġa li dak li jkun m’għandux. “Tkun trid il-​ħajja sesswali taʼ xi ħadd ieħor. . . . Ma jistaʼ jkollok xejn f’moħħok ħlief l-​aptit għal dak li m’għandekx. . . . Dak li nixxennqu għalih, inqimuh,” jgħid kittieb reliġjuż.

Il-​Pornografija Tikkorrompi

“F’kull ma hu safi, f’kull ma jiġbed l-​imħabba, f’kull ma jistħoqqlu l-​ġieħ, f’kull ma hu virtù . . . ; f’dan kollu aħsbu,” tħeġġeġ il-​Bibbja. (Filippin 4:8) Xi ħadd li jpaxxi lil għajnejh u jitmaʼ lil moħħu bil-​pornografija, ikun qed jirrifjuta t-​twiddiba taʼ Pawlu. Il-​pornografija m’hijiex modesta minħabba l-​fatt li bla mistħija tesponi l-​iktar atti intimi u privati għall-​pubbliku. Hi taʼ min jobgħodha għaliex iċċekken lin-​nies u tneżżagħhom mill-​kwalitajiet sbieħ tagħhom. Ma fihiex imħabba għaliex ma tippromwovix it-​tenerezza u l-​mogħdrija. Ma tippromwovix ħlief xenqa egoistika.

Billi tippreżenta l-​atti immorali u żienja bl-​iktar mod liberu, il-​pornografija ddgħajjef u ġġib fix-​xejn l-​isforzi taʼ Kristjan biex ‘jobgħod il-​ħażin.’ (Għamos 5:​15, Saydon) Din tenfasizza l-​prattika tad-​dnub u hija totalment kontra l-​inkuraġġiment li Pawlu ta lill-​Efesin biex ‘iż-​żína u kull xorta taʼ faħx jew regħba, ebda waħda minnhom ma għandha biss tissemma fosthom, kif jixraq lill-​qaddisin. U anqas kliem baxx . . . kollha ħwejjeġ li ma jixirqux.’—Efesin 5:​3, 4.

Żgur li l-​pornografija tagħmel il-​ħsara. Hija korrotta u tieħu vantaġġ minnek. Tistaʼ tkisser ir-​relazzjonijiet, u tbiddel l-​espressjoni naturali taʼ l-​intimità sesswali maʼ li wieħed joqgħod inemmes biex jikseb sodisfazzjon sesswali. Tħassar il-moħħ u l-​ispiritwalità tan-​nemmies. Tippromwovi attitudnijiet egoistiċi u regħba, u tgħallem lin-​nies iħarsu lejn oħrajn bħala li huma tajbin biss biex jissodisfawlhom ix-​xenqa tagħhom. Iddgħajjef l-​isforzi taʼ dak li jkun biex jagħmel il-​ġid u jkollu kuxjenza nadifa. U l-​iktar gravi, tistaʼ tfixkel jew saħansitra teqred ir-​relazzjoni spiritwali m’Alla. (Efesin 4:​17-19) Verament, il-​pornografija hija pesta li trid tiġi evitata.​—Proverbji 4:​14, 15.

[Nota taʼ taħt]

[Stampa f’paġna 20]

Il-​pornografija ċċajpar il-​ħarsa taʼ dak li jkun lejn is-​sess oppost