Iż-​Żgħażagħ Jistaqsu . . .

Kif Nistaʼ Nevita l-​Pornografija?

“Tifel fl-​iskola kellu stampa taʼ tfajla għarwiena mwaħħla mal-​bieba tal-​loker tiegħu. Il-​loker tiegħu kien viċin dak tiegħi.” —Robert.a

“Kont qed nagħmel riċerka fuq l-​Internet għal proġett li kelli l-​iskola meta f’daqqa waħda tfaċċat quddiemi ‘Web site’ pornografika.”—Annette.

META l-​ġenituri tiegħek kellhom l-​età tiegħek, in-​nies li kienu jridu jaraw il-​pornografija kellhom ifittxuha huma. Minn dak li naraw illum, il-​pornografija tfittxek hi. Forsi int, bħal Robert li ssemma qabel, bla ma trid għajnejk jaqgħu fuq xi stampa pornografika li jkollu xi ħadd minn sħabek taʼ l-​iskola. Jew, bħal Annette tistaʼ taraha bla ma trid fuq l-​Internet. Tfajla taʼ 19-il sena tgħid, “Kultant meta nkun qed infittex, jew nixtri, jew sempliċement niċċekkja l-​kont tal-​bank tiegħi fuq l-​Internet, f’daqqa waħda titfaċċa quddiemi l-​pornografija!”b

Din xi ħaġa li tiġri spiss. Fi studju li sar, 90 fil-​mija miż-​żgħażagħ, li l-​età tagħhom tvarja minn 8 snin sa 16-il sena, qalu li meta kienu fuq l-​Internet, bla ma kienu jafu kif, tfaċċat quddiemhom il-​pornografija—fil-​biċċa l-​kbira dan kien waqt li kienu qed jagħmlu l-​ħowmwerk! Il-​fatt hu li, b’miljuni taʼ Web sites li fihom mijiet taʼ miljuni taʼ xeni sesswali sfaċċati, qatt ma kien daqshekk faċli li tara l-​pornografija. Tistaʼ taraha saħansitra fuq it-​telefon ċellulari. “Din hi xi ħaġa komuni fl-​iskola tiegħi,” tgħid Denise, tfajla taʼ 16-il sena. “Nhar taʼ Tnejn il-​konversazzjoni tkun, ‘Xi stampi niżżilt fuq il-​mobile fi tmiem il-​ġimgħa?’”

Il-fatt li tkun taf li tant nies qed jaraw il-​pornografija għandu mnejn iġiegħlek taħseb, ‘Veru li din daqshekk ħażina?’ It-​tweġiba hija iva, għal diversi raġunijiet. Ikkunsidra sempliċement tlieta minnhom:

◼ Il-​pornografija tbaxxi kemm lil dawk li jipproduċuha kif ukoll lil dawk li jarawha.—1 Tessalonikin 4:3-5.

◼ L-​interess fil-​pornografija huwa imitazzjoni taʼ l-​ossessjoni sesswali mhux normali li kellhom l-​ispirti ħżiena taʼ żmien Noè.—Ġenesi 6:2; Ġuda 6, 7.

◼ Spiss, xi ħadd li jara l-​pornografija jasal biex iwettaq dnubiet sesswali.—Ġakbu 1:14, 15.

Il-​pornografija tagħmel ħsara kbira lil dawk li jaqgħu fin-​nassa tagħha. Ikkunsidra sempliċement żewġ eżempji:

“L-​ewwel darba li rajt il-​pornografija kont għadni żgħira ħafna, u sibtha iebsa ħafna biex naqtaʼ dan il-​vizzju. Għaddew ħafna snin minn dakinhar, imma dawk ix-​xeni baqgħu stampati fil-​fond f’moħħi. Dawn il-​ħsibijiet donnhom jibqgħu dejjem maħżunin f’moħħok, u l-​kuxjenza tiegħek qatt ma tħossha tassew nadifa. Il-​pornografija teqridlek l-​istima tiegħek innifsek u tibda tħossok maħmuġ u bla siwi. Dejjem tħoss li għandek tagħbija sigrieta xi ġġorr.”—Erica.

“Kont ili 10 snin bil-​vizzju tal-​pornografija, u issa ili li qtajtu 14-il sena. Iżda anki issa għad għandi battalja kuljum. Ix-​xewqa, għalkemm imrażżna sew, għadha hemm. Il-​kurżità wkoll għadha hemm. Ix-​xeni għadhom f’moħħi. Kemm nixtieq li qatt ma bdejt dan il-​vizzju tant ikrah. Għall-​ewwel ma kienx jidher taʼ ħsara. Imma issa naf li hekk hu. Il-​pornografija tagħmel il-​ħsara, hija perversa, u tbaxxi lil kulmin ikun involut fiha. Minkejja dak li jsostnu dawk li oriġinawha, m’hemm xejn—assolutament xejn—li hu pożittiv dwar il-​pornografija.”—Jeff.

Eżamina Lilek Innifsek

Kif tistaʼ tevita li titfaċċa għal għarrieda quddiemek il-​pornografija? L-​ewwel, analizza s-​sitwazzjoni.

Kemm-il darba titfaċċa għal għarrieda quddiemek il-​pornografija?

□ Qatt □ Kultant

□ Darba fil-​ġimgħa □ Kuljum

Fejn jiġri l-​iktar dan?

□ L-​Internet □ L-​iskola

□ It-​televixin □ Post ieħor

Titfaċċa quddiemek għax qed tirrepeti l-​istess proċedura?

Ikkunsidra l-​eżempji li ġejjin:

Ġieli sħabek taʼ l-​iskola jibagħtulek il-​pornografija permezz taʼ xi e-mail jew messaġġ (attachment) fuq il-​mobile? Il-​fatt li taf dan se jgħinek tħassar dawn il-​messaġġi mingħajr ma tiftaħhom.

Ġieli meta tkun fuq l-​Internet daħħalt ċertu kliem biex tfittex xi ħaġa u f’daqqa waħda jitfaċċa quddiemek messaġġ li jistiednek tiftaħ xi Web site? Il-​fatt li tkun taf li dan hu possibbli se jgħinek tkun iktar speċifiku fil-​kliem li tuża biex tfittex.

Hawn taħt niżżel xi ċirkustanzi li setgħu wasslu biex titfaċċa

quddiemek il-​pornografija.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Meta tqis dan li ddiskutejna hawn fuq, x’tistaʼ tagħmel biex tnaqqas id-​drabi li titfaċċa bla ma trid quddiemek il-​pornografija? (Ikteb x’taħseb hawnhekk.)

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Kif tirreaġixxi int meta bla ma trid tiġi quddiemek il-​pornografija?

□ Indawwar wiċċi fil-​pront.

□ Il-​kurżità ġġegħelni niċċassa lejha għal ftit.

□ Inkompli nħares lejha u saħansitra nfittex iktar.

Jekk ir-​risposta tiegħek kienet it-​tieni jew it-​tielet waħda, liema mira tistaʼ tagħmel rigward dan?

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Kif Taqtaʼ l-​Vizzju

Xi wħud li bla ħsieb ġiet quddiemhom il-​pornografija kienu kurjużi u maż-​żmien qabdu l-​vizzju li jarawha. Vizzju bħal dan m’huwiex faċli taqtgħu. Jeff, li ġie kwotat qabel, jgħid: “Qabel ma bdejt nistudja l-​Bibbja, esperimentajt mhux ħażin b’kull tip taʼ droga komuni. Imma mill-​vizzji koroh kollha li kelli, il-​pornografija kienet ċertament l-​iktar vizzju li sibt diffiċli biex naqtaʼ.”

Jekk qbadt il-​vizzju li tara l-​pornografija, tiddisprax. Jistaʼ jkollok l-​għajnuna. Kif?

◼ Ifhem eżatt x’inhi l-​pornografija. M’hi xejn ħlief attentat taʼ Satana biex ibaxxi xi ħaġa li Ġeħova ħalaqha biex tkun onorabbli. Il-​fatt li tifhem x’inhi l-​pornografija minn dan l-​angolu se jgħinek biex ‘tobgħod il-​ħażen.’—Salm 97:10.

◼ Aħseb fil-​konsegwenzi. Il-​pornografija tkisser iż-​żwiġijiet. Tnaqqas ir-​rispett lejn in-​nisa u l-​irġiel. Tbaxxi lil min joqgħod jaraha. Mhux taʼ b’xejn li l-​Bibbja tgħid: “Min hu bil-​għaqal jara l-​għawġ u jwarrab.” (Proverbji 22:3) Niżżel hawn taħt eżempju wieħed taʼ xi gwaj li jistaʼ jiġi fuqek jekk taqbad il-​vizzju tal-​pornografija.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

◼ Intrabat b’wegħda. “Għamilt wegħda solenni li qatt ma nħares b’xenqa lejn tfajla,” qal ir-​raġel leali Ġob. (Ġob 31:1, Today’s English Version) Dawn li ġejjin huma xi wħud mill-​‘wegħdi solenni’ li tistaʼ tagħmel miegħek innifsek:

□ M’iniex se nuża l-​Internet meta nkun waħdi fil-​kamra.

□ Meta titfaċċa quddiemi xi xena sesswali sfaċċata se nagħlaqha mill-​ewwel.

□ Nitkellem maʼ ħabib matur jekk nerġaʼ naqaʼ fit-​tentazzjoni.

Tistaʼ taħseb dwar xi riżoluzzjonijiet oħrajn li jistgħu jgħinuk fil-​battalja tiegħek kontra lpornografija? Jekk iva, agħmel lista tagħhom hawn taħt.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

◼ Itlob dwar din il-​kwistjoni. Is-​salmista talab lil Ġeħova: “Tħallix lil għajnejja jħarsu lejn il-​frugħa.” (Salm 119:37) Veru, jistaʼ jkun diffiċli tirreżisti xi ħaġa li tant togħġob lill-​ġisem midneb tagħna. Imma Alla Ġeħova jridek tirnexxi, u jistaʼ jagħtik “qawwa iktar min-​normal” sabiex tagħmel dak li hu sewwa!—2 Korintin 4:7.

◼ Tkellem maʼ xi ħadd. Tħossok imbarazzat? X’aktarx li iva! Madankollu, aħseb kemm se tħossok tistrieħ meta tneħħi din it-​tagħbija minn fuqek. Dik il-​persuna li tiftaħ qalbek magħha tkun bħal “ħuk imwieled għal żmien l-​hemm.” (Proverbji 17:17) Pass importanti biex taqtaʼ dan il-​vizzju hu li ssib lil xi ħadd biex tiftaħ qalbek miegħu.

Jekk għandek il-​vizzju li tara l-​pornografija, ikteb hawn taħt l-​isem taʼ persuna matura li tħoss li tkun komdu titkellem magħha dwar il-​problema.

․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Kun ċert li tistaʼ tirnexxi fil-​ġlieda tiegħek kontra l-​pornografija. Fil-​fatt, kull darba li tirrifjuta li taraha tkun wettaqt rebħa sinifikanti. Għid lil Ġeħova b’din ir-​rebħa, u rringrazzjah għas-​saħħa li jkun tak. Dejjem ftakar li meta tevita l-​pornografija, li tikkaġuna tant inkwiet u tbatija, tkun qed tferraħ qalb Ġeħova!—Proverbji 27:11.

Iktar artikli mis-​serje “Iż-​Żgħażagħ Jistaqsu . . . ” jistgħu jinstabu fuq il-​Web site www.watchtower.org/ype

AĦSEB DWAR DAN

◼ Il-​pornografija kif tbaxxi xi ħaġa li hi onorabbli?

◼ Liema miżuri prattiċi jistgħu jipproteġuk mill-​pornografija?

◼ Kif tistaʼ tgħin lil xi ħadd minn ħutek li għandu l-​problema tal-​pornografija?

[Noti taʼ taħt]

[Stampa f’paġni 12, 13]

Ġieli sħabek taʼ l-​iskola jibagħtulek il-​pornografija permezz taʼ xi messaġġ (“attachment”) fuq il-​“mobile”?