Il-​Ħsara li Tikkaġuna l-​Pornografija

IL-​MATERJAL sesswali taʼ kull tip jistaʼ jinkiseb faċilment permezz tat-​televixin, il-​films, il-​vidjos tad-​diski, u l-​Internet. Huma dawn l-​istampi mentali pornografiċi u sesswalizzati, li bla ma rridu, ninsabu mdawrin bihom il-​ħin kollu, tassew bla ħsara, kif iriduna nemmnu ħafna wħud?a

L-​Effett tal-​Pornografija fuq il-​Kbar

Jgħidu x’jgħidu dawk li jiddefendu l-​pornografija, din għandha effett negattiv ħafna fuq il-​ħarsa tan-​nies lejn is-​sess u l-​imġiba sesswali. Riċerkaturi tal-​Fondazzjoni Nazzjonali għar-​Riċerka dwar il-​Familji u l-​Edukazzjoni kkonkludew li “min jara l-​pornografija għandu ċans akbar li jiżviluppa tendenzi żbaljati fl-​imġiba sesswali.” Skond ir-​rapport, “il-​ħrafa taʼ l-​istupru (it-twemmin li n-​nisa jikkaġunaw l-​istupru u jieħdu gost bih, u li dawk li jistupraw huma normali) hija komuni ħafna fost l-​irġiel li għandhom il-​vizzju li jaraw il-​pornografija.”

Xi riċerkaturi jgħidu li l-​użu frekwenti tal-​pornografija jistaʼ jtellef lil dak li jkun milli jgawdi u jieħu sehem fl-​intimità normali taż-​żwieġ. Dr. Victor Cline, speċjalista fil-​kura mill-​vizzju tas-​sess, innota żvilupp taʼ kundizzjoni kronika f’min juża l-​pornografija. Jekk ma jikkontrollawhiex, dawk li jibdew billi b’kumbinazzjoni jaraw il-​pornografija jistgħu fl-​aħħar jispiċċaw jibdew jaraw materjal iktar goff u mhux normali. Hu jisħaq li dan jistaʼ jwassal għal atti sesswali perversi. Ix-​xjenzati li jistudjaw l-​imġiba tal-​bniedem jaqblu miegħu. Dr. Cline jirrapporta li “b’dan il-​mod wieħed jistaʼ jibda jippreferi atti sesswali perversi u ma jkunx jistaʼ jeħles minnhom lanqas jekk iħossu ħati ferm.” Eventwalment, dak li jaraha jistaʼ jipprova jwettaq fantasiji immorali bbażati fuq il-​pornografija, spiss b’riżultati diżastrużi.

Cline kkonkluda li din il-​problema tistaʼ tiġi bil-​mod u mingħajr ma jinduna l-​individwu. Hu jgħid: “Bħall-​kankru, tibqaʼ tikber u tinxtered. Kważi qatt ma tieqaf tikber, u huwa wkoll diffiċli ħafna li tikkuraha u tfejjaqha. Ħafna drabi jiġri li r-​raġel li jkollu l-​vizzju jiċħad il-​problema u ma jkunx irid jiffaċċjaha u dan tistennieh. Spiss ir-​riżultat ikun nuqqas taʼ qbil fiż-​żwieġ jew bejn il-​koppja, xi drabi għad-​divorzju, u kultant anki jwassal għal firda f’relazzjonijiet intimi oħra.”

Il-​Ħsara liż-​Żgħażagħ

L-​istatistiċi juru li l-​iktar uħud li jaraw il-​pornografija huma s-​subien taʼ bejn it-​12 u s-​17-il sena. Fil-​fatt, għal ħafna, il-​pornografija hija s-​sors primarju minfejn jitgħallmu dwar is-​sess. Dan għandu konsegwenzi verament allarmanti. Rapport wieħed jinnota: “It-​tqala fost l-​adolexxenti u l-​mard trasmess sesswalment bħall-​AIDS ma jidhrux b’nemes fil-​pornografija, u għalhekk jagħtu l-​impressjoni falza li ma hemm ebda konsegwenzi għall-​imġiba li tidher fil-​pornografija.”

Xi riċerkaturi jgħidu wkoll li meta t-​tfal jiġu esposti għall-​pornografija din tistaʼ teffettwalhom l-​iżvilupp naturali taʼ moħħhom. Dr. Judith Reisman, li hija l-​presidentessa taʼ Istitut għall-​Edukazzjoni fil-​Mezzi tax-​Xandir, tikkonkludi billi qalet li saru xi studji tas-​sistema nervuża u taʼ kif tiġi effettwata, fil-​mod kif il-​moħħ iwieġeb awtomatikament għal xeni u ħsejjes pornografiċi. Dawn jindikaw li meta wieħed jara l-​pornografija jkun qed iqanqal reazzjoni li tibdel il-​moħħ bijoloġikament. Din ir-​reazzjoni tfixkel il-​proċess normali fejn wieħed jirraġuna qabel jaċċetta xi ħaġa—u dan hu taʼ ħsara għall-​imħuħ [flessibbli] tal-​‘plastik’ li jkollhom it-​tfal għaliex jipperikola l-​mod kif huma jaraw ir-​realtà u għalhekk jeffettwa s-​saħħa mentali u fiżika tagħhom, il-​benesseri tagħhom u l-​ferħ li jixtiequ.

L-​Effetti fuq ir-​Relazzjonijiet

Il-​pornografija tifforma l-​attitudnijiet u tinfluwenza l-​imġiba taʼ dak li jkun. Il-​messaġġi li tagħti jħajru lill-​individwu primarjament għaliex huma fantasija u għalhekk jidhru ħafna iktar eċċitanti mir-​realtà. (Ara l-​kaxxa “Liema Messaġġ Se Taċċetta?”) Rapport wieħed jinnota li “dawk li jużaw il-​pornografija jiżviluppaw stennijiet mhux realistiċi li jħassru r-​relazzjonijiet.”

Il-​pornografija tistaʼ tkisser il-​fiduċja u l-​onestà, kwalitajiet essenzjali fiż-​żwieġ. Peress li ġeneralment min jaraha jagħmel dan bil-​moħbi, il-​pornografija spiss twassal għall-​qerq u l-​gideb. L-​imseħbin fiż-​żwieġ iħossuhom traduti. Ma jifhmux għala l-​parti l-​oħra ma tibqax miġbuda lejhom.

Ħsara Spiritwali

L-​użu tal-​pornografija jikkaġuna ħsara spiritwali kbira. Din tistaʼ ssir xkiel verament kbir għal individwu li jkun qed ifittex li jkollu relazzjoni m’Alla.b Il-​Bibbja torbot il-​ġibdiet sesswali mar-​regħba u l-​idolatrija. (Kolossin 3:5) Min ikun rgħib għal xi ħaġa tant ikun jixxennaq għaliha li ssir l-​iktar ħaġa importanti f’ħajtu, waqt li jwarrab fil-​ġenb l-​affarijiet l-​oħra kollha. Fir-​realtà, dawk li għandhom il-​vizzju tal-​pornografija jqiegħdu x-​xewqa sesswali tagħhom qabel Alla. Għal din ir-​raġuni huma jagħmluha qisha l-​idolu tagħhom. Alla Jehovah ikkmanda: “Ma jkollokx allat oħra għajri.”—Eżodu 20:3.

Il-pornografija teqred relazzjonijiet kollhom imħabba. L-​appostlu Pietru, li hu stess kien raġel miżżewweġ, ħeġġeġ lill-​Kristjani rġiel miżżewġin biex jonoraw lin-​nisa tagħhom. Raġel li jonqos milli jagħmel hekk se jsib tfixkil fit-​talb tiegħu ’l Alla. (1 Pietru 3:7) Ikun l-​individwu qed jonora lil martu meta jara stampi mhux xierqa taʼ nisa? Kif se tħossha jekk tinduna? U x’se jaħseb l-​Alla li se “jġib għall-​ħaqq tiegħu l-​għemejjel kollha” u li jiżen il-​qlub? (Koħèlet 12:14; Proverbji 16:2) Jistaʼ min juża l-​pornografija jistenna li Alla jismaʼ t-​talb tiegħu?

Karatteristika li tispikka f’min juża l-​pornografija hi li l-​individwu jkun irid akkost taʼ kollox ipaxxi lilu nnifsu b’mod egoistiku. Għalhekk, min jara l-​pornografija huwa nieqes mill-​imħabba. Din iddgħajjef il-​ġlieda tal-​Kristjan biex jibqaʼ safi u jżomm reputazzjoni morali nadifa m’Alla. L-​appostlu Pawlu kiteb: “Dan irid Alla minnkom: il-​qdusija tagħkom, li titbiegħdu miż-​żína, u li kull wieħed minnkom iżomm ’il ġismu fil-​qdusija u l-​ġieħ, u ma jħallix il-​passjoni tegħlbu . . . F’din il-​ħaġa ħadd ma għandu jagħmel tort jew ħsara lil ħuh.”—1 Tessalonikin 4:​3-7.

Il-pornografija tisfrutta speċjalment lin-​nisa u t-​tfal. Din tbaxxihom u tisirqilhom id-​dinjità u d-​drittijiet tagħhom. Min juża l-​pornografija jieħu sehem f’dan l-​isfruttar u jappoġġah. Ir-​riċerkaturi Steven Hill u Nina Silver jgħidu: “Raġel, jaħseb kemm jaħseb li hu . . . tajjeb, jekk juża l-​pornografija, u għalhekk jappoġġaha, juri jew li fl-​aħjar każ hu [insensittiv], jew li fl-​agħar każ għandu mibegħda għan-​nisa, u dan għall-​persuna stess li hu jgħid li jħobb.”

Kif Teħles mill-​Vizzju tal-​Pornografija

Xi ngħidu jekk int bħalissa qed tissielet kontra l-​vizzju tal-​pornografija? Tistaʼ tagħmel xi ħaġa biex tinħeles minnha? Il-​Bibbja tagħtik tama! Qabel ma saru jafu lil Kristu, xi wħud mill-​Kristjani tal-​bidu kienu żienja, adulteri, u rgħiba. Pawlu nnota, “Imma issa tnaddaftu.” Dan kif kien possibbli? Hu wieġeb: “Tqaddistu . . . fl-​Ispirtu taʼ Alla tagħna.”—1 Korintin 6:​9-11.

Qatt tnaqqas il-​valur tal-​qawwa taʼ l-​ispirtu qaddis t’Alla. “Alla hu fidil,” tgħid il-​Bibbja, “u ma jħallikomx tiġġarrbu aktar milli tifilħu.” Tabilħaqq, hu se jagħtik il-​qawwa u l-​għajnuna. (1 Korintin 10:13) Talb bil-​ħrara—billi b’mod persistenti tiddiskuti l-​problema tiegħek m’Alla—se jipproduċi r-​riżultati. Il-​Kelma tiegħu tinkuraġġixxi: “Ħalli xortik [“it-​tagħbija tiegħek,” Karm Żammit] f’idejn il-​Mulej, u hu jgħinek u jwieżnek; hu qatt ma jħalli l-​ġust jitfixkel.”—Salm 55:23 (55:​22, NW).

M’għandniex xi ngħidu, int trid taġixxi fi qbil mat-​talb tiegħek. Trid tiddeċiedi minn jeddek u minn qalbek li tiċħad il-​pornografija. Tistaʼ ssib għajnuna prezzjuża mingħand ħabib jew membru tal-​familja li tafdah, għaliex se jagħtik l-​appoġġ u l-​inkuraġġiment li għandek bżonn biex iżżomm mad-​deċiżjoni tiegħek. (Ara l-​kaxxa “Kif Tikseb l-​Għajnuna.”) Se tiġi megħjun tibqaʼ determinat jekk iżżomm f’moħħok li din l-​azzjoni żgur se togħġob lil Alla. (Proverbji 27:11) Barra minn hekk, il-​fatt li taf li jekk tara l-​pornografija se toffendi ’l Alla żgur li se jkompli wkoll jinkuraġġik biex ma tibqax taraha. (Ġenesi 6:​5, 6) Mhix se tkun ġlieda faċli, iżda hija waħda li tistaʼ tirnexxi. Il-​vizzju tal-​pornografija jistaʼ jinqataʼ!

Il-perikli taʼ l-​użu tal-​pornografija huma reali. Il-​pornografija hija taʼ ħsara u diżastruża. Din tikkorrompi lil dawk li jipproduċuha u lil dawk li jużawha. Tinsulta kemm lill-​irġiel kif ukoll lin-​nisa, hija perikoluża għat-​tfal, u hija prattika li għandha tiġi miċħuda.

[Noti taʼ taħt]

[Kaxxa/Stampa f’paġna 10]

Kif Tikseb l-​Għajnuna

M’għandniex naħsbu li l-​ġlieda biex dak li jkun jeħles mill-​pornografija hija xi waħda faċli; din tistaʼ tkun ġlieda iebsa. Dr. Victor Cline, li kkura mijiet taʼ nies ossessjonati bis-​sess, jgħid: “Il-​wegħdi ma jaħdmux. L-​intenzjonijiet tajbin m’huma xejn. [Min hu ossessjonat bis-​sess] letteralment ma jistax jirnexxi waħdu.” Skond Cline, biex il-​kura tirnexxi jkun aħjar li tinvolvi l-​parti l-​oħra fiż-​żwieġ, jekk l-​individwu jkun miżżewweġ. “Iktar taħdem malajr jekk it-​tnejn li huma jkunu involuti,” jisħaq hu. “It-​tnejn li huma jkunu mweġġgħin. It-​tnejn li huma għandhom bżonn l-​għajnuna.”

Jekk l-​individwu m’huwiex miżżewweġ, spiss ħabib jew membru tal-​familja li jafdah jistaʼ jkun t’għajnuna kbira. Ikun min ikun involut fil-​kura, Cline għandu regola waħda li ma titbiddilx: Tkellem bl-​onestà dwar il-​problema u anki jekk terġaʼ taqaʼ. Hu jgħid, “Is-​sigrieti ‘joqtluk.’ . . . Dawn joħolqu l-​mistħija u s-​sens taʼ ħtija.”

[Tabella f’paġna 9]

Liema Messaġġ Se Taċċetta?

Il-​Messaġġ tal-​Pornografija Il-​Ħarsa tal-​Bibbja

[Stampa f’paġna 7]

Xi riċerkaturi jgħidu li meta t-​tfal jaraw il-​pornografija din tistaʼ teffettwalhom l-​iżvilupp naturali taʼ moħħhom

[Stampa f’paġna 8]

Il-​pornografija tistaʼ tkisser il-​fiduċja u l-​onestà fiż-​żwieġ

[Stampa f’paġna 10]

It-​talb bil-​ħrara se jipproduċi r-​riżultati