Għala Hija l-​Pornografija Daqshekk Mifruxa?

IL-​MATERJAL erotiku mħejji biex iqanqal emozzjonijiet sesswali ilu jeżisti għal eluf taʼ snin. Iżda fil-​maġġor parti taʼ l-​istorja tagħha, il-​pornografija kienet diffiċli biex issir u għalhekk kienet disponibbli primarjament għall-​klassi taʼ l-​għonja u l-​ħakkiema. L-​istampar fi kwantità kbira u l-​invenzjoni tal-​fotografija u l-​films biddlu dan kollu. Il-​pornografija saret irħisa u disponibbli għal dawk li m’humiex daqshekk tal-​flus.

L-iżvilupp tal-​vidjokasett rikorder kabbar din id-​drawwa. Kuntrarju għar-​rukkell taċ-​ċinema jew ir-​ritratti antiki, kien faċli li taħżen, tikkopja, u tqassam il-​vidjos. Dawn setgħu jittieħdu wkoll biex dak li jkun jarahom fil-​privatezza taʼ daru. Dan l-​aħħar, iż-​żjieda fis-​sistemi tat-​televixin bil-​cable u taʼ l-​Internet għamlet il-​pornografija disponibbli saħansitra iktar malajr. Dak li jibżaʼ li l-​ġar se jarah fis-​sezzjoni tal-​vidjos taʼ l-​adulti għand tal-​ħanut, issa jistaʼ “jibqaʼ d-​dar u jordnahom billi jagħfas buttuna fis-​sistema tat-​televixin bil-​cable jew bis-​satellita,” jgħid Dennis McAlpine, analista tal-​mezzi tax-​xandir. Il-​fatt li dawn il-​programmi jistgħu jinkisbu faċilment, skond McAlpine, ikkontribwixxa biex il-​pornografija “tiġi aċċettata minn ħafna iktar nies.”

Il-​Pornografija Ssir Aċċettata minn Ħafna

Ħafna jħossuhom imħawdin dwar il-​pornografija għaliex issa saret aċċettata minn ħafna. “Diġà għandha effett qawwi fuq il-​kultura tagħna iktar mill-​opera, il-​balè, it-​teatru, il-​mużika u l-​arti kollha kemm huma flimkien,” tgħid il-​kittieba Germaine Greer. L-​attitudnijiet moderni lejn il-​pornografija jistaʼ jkun li huma riflessi fil-​moda taʼ l-​ilbies tal-​prostituti li jilbsu ħafna nies famużi, il-​vidjos tal-​mużika li dejjem juru ħafna xeni sesswali, u r-​reklamar li jagħmel referenza għall-​pornografija. McAlpine jikkonkludi: “Is-​soċjetà qed taċċetta dak li qed jingħatalha bl-​imgħarfa. . . . Dan qed jgħin biex tinħoloq l-​idea li dan kollu huwa aċċettabbli.” Bħala riżultat, “in-​nies donnhom li m’għadhomx jinħasdu,” tilmenta l-​awtriċi Andrea Dworkin. “Donnu lanqas jimpurtahom.”

X’Hemm Wara l-​Pornografija

B’kummenti simili għal taʼ Dworkin, l-​aġent irtirat taʼ l-​FBI, Roger Young, isemmi li ħafna nies “lanqas biss jaraw il-​konsegwenzi kollha u l-​problemi li tikkaġuna.” Xi wħud jiġu żvijati minn dawk li jiddefendu l-​pornografija, għaliex dawn jisħqu li m’hemm ebda prova li xeni pornografiċi għandhom effett negattiv fuq in-​nies. “Wara kollox, il-​pornografija hija biss fantasija,” jikteb l-​awtur F. M. Christensen, “fatt li min jopponiha jsibu diffiċli biex jifhmu.” Imma jekk il-​fantasija ma tinfluwenzax lil dak li jkun, allura fuqiex hija bbażata l-​industrija tar-​reklamar? Il-​korporazzjonijiet għala jonfqu miljuni taʼ dollari biex jipproduċu r-​reklami, il-​vidjos, u r-​reklami stampati jekk dawn m’għandhomx effett li jdum fuq in-​nies?

Il-fatt hu li bħal kull reklam li jirnexxi, l-​iskop prinċipali tal-​pornografija hu li joħloq xewqat li qabel ma kinux jeżistu. “Il-​pornografija ssir biss minħabba l-​profitti, u xejn iktar,” jiktbu r-​riċerkaturi Steven Hill u Nina Silver. “U f’dan in-​negozju li ma jistax jiġi kontrollat, kollox huwa kunsidrat bħala li jistaʼ jintuża għall-​profitt, speċjalment ġisem in-​nisa u r-​relazzjonijiet sesswali bejn il-​bnedmin.” Greer tqabbel il-​pornografija maʼ l-​ikel taʼ malajr li ssir tiddependi minnu, nieqes min-​nutriment u mħallat b’affarijiet u kimiċi li jżidu t-​togħma. Hi tgħid: “Is-​sess kummerċjali taʼ malajr m’huwiex sess ġenwin. . . . Ir-​reklami taʼ l-​ikel iħajruk tixtri ikel mhux tajjeb għalik u r-​reklamar tas-​sess iħajrek għal sess mhux tajjeb għalik.”

Xi tobba jgħidu li l-​pornografija tistaʼ tqabbdek vizzju li hu ħafna iktar diffiċli biex tegħlbu mill-​vizzju tad-​droga. It-​trattament għal dawk li jkollhom il-​vizzju tad-​droga jibda b’kura flimkien maʼ perijodu t’astinenza biex id-​droga toħroġ mill-​ġisem. Iżda Dr. Mary Anne Layden, taʼ l-​Università taʼ Pennsylvania, tispjega li l-​vizzju tal-​pornografija “jipproduċi stampa mentali li tibqaʼ b’mod permanenti f’moħħ min jaraha u ssir parti mill-​moħħ.” Huwa għalhekk li xi individwi jistgħu jibqgħu jiftakru ċar u tond xi stampi pornografiċi saħansitra ħafna snin wara. Hi tikkonkludi: “Din hi l-​ewwel droga li m’għandekx ċans toħroġha mis-​sistema tiegħek.” Iżda jfisser dan li impossibbli teħles mis-​setgħa tal-​pornografija? U xi ħsara speċifika tikkaġuna l-​pornografija?

[Kaxxa f’paġna 5]

Fatti dwar il-​Pornografija fuq l-​Internet

◼ Madwar 75 fil-​mija tal-​pornografija fuq l-​Internet tiġi mill-​Istati Uniti. Kważi 15 fil-​mija tiġi mill-​Ewropa.

◼ Huwa stmat li kull ġimgħa 70 miljun ruħ iżuru l-​Web sites pornografiċi. Xi 20 miljun minnhom huma mill-​Kanada u mill-​Istati Uniti.

◼ Studju li sar wera li dan l-​aħħar fi żmien xahar wieħed, il-​Ġermanja kellha l-​akbar udjenza għall-​pornografija fuq l-​Internet mill-​Ewropa kollha, segwita mill-​Gran Britannja, Franza, l-​Italja, u Spanja.

◼ Fil-​Ġermanja, dawk li jaraw il-​pornografija fuq l-​Internet iqattgħu bħala medja mas-​70 minuta kull xahar jaraw s-​sites pornografiċi.

◼ Fost l-​Ewropej li jaraw il-​pornografija fuq l-​Internet, dawk li għandhom ’il fuq minn 50 sena jqattgħu l-​iktar ħin imqabbdin maʼ Web sites tal-​kbar.

◼ Skond sors wieħed, 70 fil-​mija minn dawk li jaraw il-​pornografija fuq l-​Internet jagħmlu dan matul il-​jum.

◼ Huwa stmat minn xi wħud li 100,000 site taʼ l-​Internet jinkludu materjal dwar il-​pornografija bit-​tfal.

◼ Xi 80 fil-​mija tal-​pornografija kummerċjali bit-​tfal fuq l-​Internet jiġi mill-​Ġappun.

[Stampi f’paġna 4]

Il-​pornografija saret iktar faċli biex taraha