“Nobdu Aktar lil Alla Milli l-​Bnedmin”

Taʼ sbatax-il sena, Adam kien wieħed mit-​tliet rebbieħa taʼ konkors sponsorjat mill-​Mużew tat-​Tifkira taʼ l-​Olokawst fl-​Istati Uniti. Dawk li ħadu sehem—kważi 500 b’kollox—użaw l-​arti jew il-​kitba biex jiddeskrivu l-​kuraġġ li wrew dawk li ġew maħqurin taħt it-​tmexxija tan-​Nazi. Adam huwa wieħed mix-​Xhieda taʼ Jehovah, u ddeċieda li joħloq proġett li jagħti stampa taʼ l-​għawġ li ffaċċjaw il-​membri tar-​reliġjon tiegħu taħt ir-​reġim tan-​Nazi. Adam jgħid li l-​arti ma kinitx tirrifletti t-​telfa jew l-​istmerrija, imma l-​ferħ li gawdew ix-​Xhieda taʼ Jehovah għaliex ħarġu rebbieħa fuq l-​attakk brutali taʼ dak li ħaqarhom b’kattiverija. Tidher stampa taʼ tifla fil-​proġett. Għala? “Biex nuri li anki t-​tfal baqgħu sodi kontra l-​persekuzzjoni tan-​Nazi,” jgħid Adam.

Huwa fatt magħruf li matul l-​era tan-​Nazi, ix-​Xhieda taʼ Jehovah irrifjutaw li jsellmu lil Hitler jew li jappoġġaw lill-​partit politiku tiegħu. Il-​waqfa li ħadu hija murija fuq il-​lemin fin-​naħa taʼ fuq tal-​proġett taʼ Adam. Hemmhekk issib kwotata ittra mibgħuta lill-​gvern Ġermaniż fis-​7 t’Ottubru, 1934, mill-​kongregazzjonijiet kollha tax-​Xhieda taʼ Jehovah. Parti mill-​ittra kienet tgħid: “Hemm konflitt dirett bejn il-​liġi tiegħek u l-​liġi t’Alla, u, minħabba li nsegwu t-​tmexxija taʼ l-​appostli leali, ‘jeħtieġ nobdu aktar lil Alla milli l-​bnedmin,’ u aħna hekk se nagħmlu. (Atti 5:29) . . . Peress li l-​gvern tiegħek u l-​uffiċjali tiegħu jkomplu jipprovaw jisforzawna biex ma nobdux l-​ogħla liġi fl-​univers, aħna issa obbligati nuruk li, bil-​grazzja tiegħu, se nobdu lil Alla Jehovah u se nafdaw Fih kompletament biex jeħlisna mill-​moħqrija u minn min jaħqarna.”

Adam huwa kburi bil-​wirt spiritwali tiegħu. “Ix-​Xhieda taʼ Jehovah kienu jemmnu bis-​sħiħ li m’għandhomx jagħmlu ħsara lil għajrhom u li m’għandhom jagħtu qima lil ħadd ħlief lil Alla, anki jekk dan ifisser li jinqatlu,” jgħid hu. Il-​waqfa li ma titħarrikx tax-​Xhieda taʼ Jehovah tidher fit-​titlu tal-​proġett taʼ Adam: “Se Nobdu Iktar lil Alla Milli l-​Bnedmin!”