Alla ħalaq l-ewwel raġel u mara

Ġeħova għamel ġnien f’post jismu Għeden. Dan il-​ġnien kien mimli fjuri, siġar, u annimali. Imbagħad Alla għamel l-​ewwel raġel mit-​trab u nefaħ fi mnifsejh, u semmieh Adam. Taf x’ġara mbagħad? Ir-​raġel sar persuna ħajja! Ġeħova ried lil Adam jieħu ħsieb il-​ġnien, u Hu qallu biex jagħti isem lil kull annimal.

Ġeħova ta lil Adam kmand importanti. Hu qal lil Adam: ‘Mill-​frott tas-​siġar kollha tistaʼ tiekol, ħlief minn siġra waħda speċjali. Jekk tiekol mill-​frott taʼ dik is-​siġra, int tmut żgur.’

Iktar tard Ġeħova qal: ‘Se nagħmel lil xi ħadd biex jgħin lil Adam.’ Hu ġiegħel lil Adam jorqod fil-​fond, u mbagħad Alla ħadlu waħda mill-​kustilji biex joħloq mara għal Adam. Isimha kien Eva. Adam u Eva saru l-​ewwel familja. Kif ħassu Adam dwar il-​mara tiegħu? Hu tant ħassu ferħan li qal: ‘Ara x’għamel Ġeħova mill-​kustilja tiegħi! Sa fl-​aħħar! Għandi lil xi ħadd bħali.’

Ġeħova qal lil Adam u Eva biex ikollhom it-​tfal u jimlew l-​art. Hu riedhom jieħdu pjaċir jaħdmu flimkien f’li jagħmlu l-​art kollha ġenna, jew ġnien sabiħ, bħall-​ġnien tal-​Għeden. Imma mhux hekk ġara. Taf għala? Se nitgħallmu iktar fil-​lezzjoni li jmiss.