Għandek Bżonn Torqod Biżżejjed!

Hemm xi ħadd li jistaʼ jisfida din l-​istqarrija u jgħid li lejl taʼ mistrieħ tajjeb m’huwiex fundamentali għal saħħa tajba? Probabbilment li le. Madankollu, għal ħafna wħud, l-​irqad m’huwiex daqshekk importanti. “Iżda mbagħad tpatti għalih l-​għada,” jgħid Shawn Currie, psikologu kliniku u assistent professur fl-​Università taʼ Calgary, il-​Kanada. Meta ma torqodx biżżejjed, għandek iċ-​ċans li ssir iktar nervuż u xi drabi jistgħu saħansitra jaqbduk id-​dwejjaq.

“Ix-​xjenzati jaħsbu li l-​irqad jgħin biex iġedded il-​moħħ, u li matul l-​irqad il-​moħħ jibqaʼ jitgħallem,” tgħid il-​gazzetta Calgary Herald. Il-​professur Currie jinnota: “Matul il-​lejl issaħħaħ il-​memorja u kwalunkwe tagħlim li tkun ksibt matul il-​ġurnata jitpoġġa f’postu mal-​lejl. Mingħajr dak il-​ħin taʼ mistrieħ, tistaʼ titlef mill-​abbiltà li titgħallem.” Iktar minn hekk, hu jgħid li “meta torqod biżżejjed, wisq probabbli se tiġi megħjun isserraħ l-​emozzjonijiet tiegħek.”

Allura, kemm irqad huwa biżżejjed? Waqt li ħafna esperti jagħtu tmien sigħat bħala r-​regola ġenerali, Currie jgħid: “Kull individwu għandu bżonnijiet differenti taʼ rqad.” Għalhekk, hu jissuġġerixxi li tagħmel sforz biex torqod fil-​fond u fil-​paċi. Iżda dan kif tistaʼ tagħmlu, speċjalment jekk tbati bl-​insomnja? Dawn huma xi suġġerimenti:

◼ Ħu banju jew doċċa sħuna qabel torqod.

◼ Matul il-​ġimgħa agħmel eżerċizzju moderat għal diversi drabi; iżda tagħmilx eżerċizzju li jgħajjik qabel tidħol torqod.

◼ Ara li l-​kamra tiegħek tkun fil-​kwiet, mudlama, u daqsxejn friska.

◼ Ipprova qum fl-​istess ħin kull fil-​għodu sabiex tistabbilixxi rutina regulari taʼ l-​irqad.

Meta tqis il-​benefiċċji li jidhru għas-​saħħa, għandek tkun prudenti u tara li l-​irqad ikun prijorità għalik.