Il-​Ħarsa tal-​Bibbja

Hemm Xi Dnub li Ma Jinħafirx?

HEMM xi kastig agħar mill-​mewt? Iva, mewt mingħajr it-​tama taʼ rxoxt minħabba li persuna tkun ikkommettiet dnub li ma jistax jinħafer. Ġesù qal li hemm tip taʼ dnub li “ma jinħafirx.”​—Mattew 12:31.

Madankollu, il-​Bibbja tiddeskrivi lil Alla bħala wieħed li jaħfer. Għalkemm il-​bnedmin jistaʼ jkollhom it-​tendenza li jżommu f’qalbhom u ma jaħfrux, Alla “jaħfer ħafna.” (Isaija 55:​7-9) Tant hu hekk, li għalkemm swielu ħafna, hu bagħat lil Ibnu l-​għażiż fuq l-​art bħala sagrifiċċju tant prezzjuż li setaʼ jħassar jew ipatti għad-​dnubiet tagħna.​—Ġwann 3:​16, 17; Atti 3:​19; 1 Ġwann 2:​1, 2.

Meta jasal il-​waqt, Alla se jirxoxta lil ħafna wħud li kienu ħatja taʼ dnubiet serji imma li mhux se jkollhom iktar għalfejn jagħtu kont għall-​azzjonijiet tagħhom tal-​passat. (Atti 24:15; Rumani 6:​23) Fil-​fatt, Ġesù qal li “d-​dnubiet kollha u d-​dagħa kollu jinħafrilhom lill-​bnedmin,” ħlief dak id-​dnub li ma jinħafirx. (Mattew 12:31) Għalhekk int għandek mnejn tistaqsi, ‘X’jistaʼ jkun daqshekk ħażin li ma jinħafirx minn Alla?’

Meta l-​Indiema Ma Tkunx Iktar Possibbli

It-​twissija taʼ Ġesù rreferiet għal “dagħwa kontra l-​Ispirtu” li nagħmlu minn rajna u apposta. M’hemm l-​ebda ħelsien għal min jagħmel dan it-​tip taʼ dnub. “La f’did-dinja, u lanqas fid-​dinja li ġejja,” hu jżid. (Mattew 12:​31, 32, Karm Żammit) Dawk li huma ħatja taʼ dnub bħal dan ma jiġux irxoxtati.

X’inhi d-​dagħwa kontra l-​ispirtu? Din toħroġ mill-​qalb, tikxef attitudni u intenzjoni ħażina. L-​intenzjoni li topponi l-​ispirtu t’Alla apposta jagħmel id-​dnub iktar gravi. Biex inġibu eżempju: F’ċerti pajjiżi, il-​liġi tagħmel differenza bejn qtil taʼ l-​ewwel grad u qtil tat-​tieni grad fuq il-​bażi taʼ l-​intenzjoni li kien hemm u l-​mod kif twettaq il-​qtil, u tillimita l-​piena kapitali (il-mewt) biss f’każ taʼ qtil li jsir b’intenzjoni jew li jkun premeditat.

Qabel, l-​appostlu Pawlu kien midgħi, imma qal: “Sibt il-​ħniena, għax dak li għamilt għamiltu bla ma kont naf.” (1 Timotju 1:13) Li tidneb kontra l-​ispirtu qaddis ifisser li topponih apposta. Dan jinvolvi kundizzjoni tal-​qalb mill-​agħar li tasal sal-​punt li ma tkunx tistaʼ terġaʼ lura.

Jidher ċar li Pawlu kien qed jirreferi għal dan it-​tip taʼ dnub meta kiteb: “Ma jistax ikun li traġġaʼ lura għall-​indiema lil dawk li, wara li darba sfaw imdawwla; wara li daqu d-​don tas-​sema fl-​Ispirtu s-​Santu; wara li daqu t-​tjubija tal-​kelma taʼ Alla u l-​qawwa taż-​żmien li għad irid jiġi, mbagħad reġgħu waqgħu.” (Lhud 6:​4-6) L-​appostlu qal ukoll: “Għax jekk wara li ħadna t-​tagħrif sħiħ tal-​verità nidinbu minn rajna, ma hemmx sagrifiċċju ieħor għad-​dnub xi jsir.”—Korsiv tagħna; Lhud 10:26.

Kienet l-​imġiba taʼ xi wħud mill-​mexxejja reliġjużi taʼ żmien Ġesù li ġagħlitu jwissi kontra d-​dnub li ma jinħafirx. Imma huma ma tawx kas it-​twissija tiegħu. Fil-​fatt, waslu biex qatluh. Iktar tard, semgħu evidenza li ħadd ma jistaʼ jiċħadha li l-​ispirtu qaddis kien għamel xi ħaġa mirakoluża. Intqalilhom li Ġesù kien ġie mqajjem mill-​mewt! Dan għamilha ċara li Ġesù kien il-​Kristu! Minkejja dan, huma aġixxew b’mod li kien verament mill-​agħar kontra l-​ispirtu qaddis billi ħallsu lis-​suldati Rumani biex jigdbu dwar il-​qawmien taʼ Ġesù.​—Mattew 28:​11-15.

Twissija għall-​Kristjani Veri

Il-​Kristjani veri għala jagħtu kas sew tat-​twissija rigward id-​dnub li ma jinħafirx? Għaliex għalkemm għandna għarfien eżatt dwar Alla u dwar l-​attività taʼ l-​ispirtu tiegħu, xorta tistaʼ tiżviluppa fina qalb mill-​agħar. (Lhud 3:12) Irridu noqogħdu attenti li ma naħsbux li dan qatt ma jistaʼ jiġri lilna. Ikkunsidra dak li ġara lil Ġuda l-​Iskarjota. Darba, hu kien segwaċi leali taʼ Ġesù. Kien magħżul bħala wieħed mit-​12-il appostlu, allura bilfors li kellu kwalitajiet tajbin. Imma f’ċertu punt wasal biex beda jħalli l-​ħsibijiet u x-​xewqat mill-​agħar jikbru, sakemm fl-​aħħar għelbuh għalkollox. Fl-​istess żmien li Ġuda kien xhud tal-​mirakli inkredibbli li beda jagħmel Ġesù, hu kien qiegħed jisraq. Imbagħad, għall-​flus, ittradixxa lill-​Iben t’Alla apposta.

Xi wħud li darba kienu Kristjani leali tbiegħdu minn Alla apposta, forsi minħabba xi offiża, kburija, jew regħba, u issa saru apostati li jiġġieldu kontra l-​ispirtu t’Alla. Huma jopponu apposta dak li l-​ispirtu qiegħed iwettaq b’mod ċar. Ikkommettew dawn l-​individwi d-​dnub li ma jinħafirx? Jehovah biss hu l-​Imħallef.​—Rumani 14:12.

Minflok ma niġġudikaw lil oħrajn, nagħmlu tajjeb li noqogħdu attenti li aħna stess ma nikkommettux dnubiet bil-​moħbi li, bil-​mod il-​mod, jistgħu jħassrulna qlubna. (Efesin 4:30) Nistgħu niksbu faraġ mill-​fatt li jekk nindmu, Jehovah dejjem lest li jaħfrilna saħansitra dnubiet serji li nkunu kkommettejna.​—Isaija 1:​18, 19.

[Stampa f’paġna 28, 29]

Xi Fariżej ikkommettew id-​dnub li ma jinħafirx