“Is-​Sena tal-​Bibbja”

Fl-​Awstrija, Franza, il-​Ġermanja, u l-​Isvizzera, is-​sena 2003 ġiet magħżula bħala s-​“Sena tal-​Bibbja.” Il-​ġurnal taʼ kuljum Ġermaniż Frankfurter Allgemeine Zeitung jistqarr: “Mill-​ewwel u l-​aħħar darba li ġiet ċelebrata fl-​1992, [il-knejjes] qed jipprovaw jiġbdu l-​attenzjoni tan-​nies lejn dan il-​‘ktieb tal-​ħajja’ u jenfasizzaw il-​valur kulturali taʼ l-​Iskrittura Mqaddsa.”

Skond il-​Bibelreport taʼ Ġunju 2002, il-​Bibbja ġiet tradotta b’2,287 lingwa—għallinqas parti minnha. Il-​kalkoli juru li sa issa, tqassmu xi ħames biljun Bibbja. Dawn l-​isforzi enormi juru ċar kemm in-​nies jistmaw dan il-​ktieb.

Illum, ħafna nies għandhom mnejn m’humiex konvinti li l-​Bibbja hija prattika. Tabilħaqq, ħafna jħossu li l-​livelli tal-​Bibbja huma antikwati u li m’humiex relatati mar-​realtajiet tal-​ħajja. Madankollu, bis-​Sena tal-​Bibbja l-​knejjes fil-​Ġermanja qed jittamaw li jiksbu żewġ affarijiet—li jinkuraġġixxu lin-​nies jgħixu iktar skond il-​Bibbja u li jqanqlu l-​entużjażmu għaliha f’dawk li tbiegħdu mill-​knisja.

Żgur li m’huwiex faċli taqra l-​Bibbja minn qoxra sa qoxra, imma dan żgur li huwa mod tajjeb kif dak li jkun jislet il-​punti prinċipali taʼ l-​Iskrittura. Madankollu, min irid jieħu l-​akbar benefiċċju mill-​Bibbja għandu jżomm f’moħħu l-​istqarrija tat-​2 Timotju 3:​16, 17: “L-​Iskrittura kollha hija mnebbħa minn Alla, u tiswa biex wieħed jgħallem, iċanfar, iwiddeb u jrawwem fis-​sewwa, biex hekk il-​bniedem taʼ Alla jkun perfett, mħejji għal kull ħidma tajba.”

Il-​poeta Ġermaniż Johann Wolfgang von Goethe (1749-1832) esprima ruħu b’dan il-​mod: “Jien konvint li l-​Bibbja ssir isbaħ iktar ma wieħed jifhimha.” Tabilħaqq, fil-​Kelma t’Alla biss insibu spjegazzjoni dwar minfejn ġejjin, għala qegħdin hawn, u x’hemm lest għalina fil-​futur!—Isaija 46:​9, 10.

[Sors taʼ l-​Istampa f’paġna 31]

Mill-​ktieb Bildersaal deutscher Geschichte