Tagħlim Veru li Jogħġob lil Alla

SABIEX l-​abitanti taʼ l-​art ikunu jafu liema tagħlim huwa veru u li jogħġob lil Alla, hemm bżonn li hu jikxef il-​ħsibijiet tiegħu lill-​bnedmin. Għandu wkoll jagħmel din ir-​rivelazzjoni disponibbli għal kulħadd. Għax kieku l-​bnedmin kif se jsiru jafu dak li japprova Alla rigward id-​duttrina, il-​qima, u l-​kondotta? Tana Alla din l-​informazzjoni? Jekk iva, b’liema mod?

Jistaʼ bniedem b’ħajja taʼ ftit għexur taʼ snin jikkomunika personalment maʼ l-​umanità kollha u jaqdi bħala medjatur bejnna u bejn Alla? Le. Imma rekord permanenti bil-​miktub jistaʼ. Għalhekk, ma jkunx xieraq li r-​rivelazzjoni mingħand Alla tkun disponibbli f’forma taʼ ktieb? Wieħed mill-​kotba tal-​qedem li ħafna jemmnu li hu ispirat minn Alla huwa l-​Bibbja. Wieħed mill-​kittieba tagħha qal: “L-​Iskrittura kollha hi mnebbħa minn Alla u tiswa biex tgħallem, twiddeb, tikkoreġi, tiddixxiplina fis-​sewwa.” (2 Timotju 3:​16) Ejja nħarsu iktar fil-​viċin lejn il-​Bibbja u naraw jekk hijiex is-​sors tat-​tagħlim veru.

Kemm Għandha Żmien?

Fost il-​kotba prinċipali tar-​reliġjon, il-​Bibbja hija waħda mill-​iktar antiki. L-​ewwel kotba tagħha nkitbu 3,500 sena ilu. Dan il-​ktieb tlesta fis-​sena 98 E.K.a Għalkemm xi 40 raġel kitbuha matul perijodu taʼ 1,600 sena, il-​Bibbja hija ġabra taʼ kitbiet li huma f’armonija flimkien. Dan huwa minnu għaliex l-​Awtur veru tagħha hu Alla.

Il-​Bibbja hija l-​iktar ktieb mifrux u tradott fl-​istorja kollha. Kull sena, jitqassmu xi 60 miljun kopja tal-​Bibbja sħiħa jew porzjonijiet minnha. Il-​Bibbja kompleta jew partijiet minnha ġew tradotti f’iktar minn 2,300 lingwa u djalett. Iktar minn 90 fil-​mija mill-​familja umana għandhom aċċess għall-​Bibbja, jew għallinqas parti minnha, bil-​lingwa tagħhom. Dan il-​ktieb għeleb fruntieri nazzjonali, diviżjonijiet razzjali, u ostakli etniċi.

Kif Inhi Mqassma?

Jekk għandek Bibbja, għala ma tiftaħhiex u tara kif inhi mqassma?b L-​ewwel, ħares lejn il-​werrej. Il-​maġġuranza tal-​Bibbji għandhom wieħed fil-​bidu. Fil-​werrej ikun hemm lista tal-​kotba u n-​numru tal-​paġna fejn jinsabu. Se tinnota li l-​Bibbja hija kollezzjoni kbira taʼ kotba individwali, kull wieħed b’isem uniku. L-​ewwel ktieb hu l-​Ġenesi, u l-​aħħar ir-​Rivelazzjoni, jew l-​Apokalissi. Il-​kotba huma mqassmin f’żewġ sezzjonijiet. L-​ewwel 39 ktieb huma msejħin l-​Iskrittura Ebrajka, ladarba l-​maġġuranza minnhom inkitbu bil-​lingwa Ebrajka. L-​aħħar 27 ktieb inkitbu bil-​lingwa Griega u flimkien jagħmlu l-​Iskrittura Griega. Xi wħud jirreferu għal dawn iż-​żewġ sezzjonijiet bħala t-​Testment il-​Qadim u t-​Testment il-​Ġdid.

Il-​kotba tal-​Bibbja għandhom kapitli u versi biex issibhom malajr. Meta tara skritturi ċitati f’din ir-​rivista, wara l-​isem tal-​ktieb Bibliku, l-​ewwel numru jindika l-​kapitlu tal-​ktieb u taʼ warajh jindika l-​vers. Per eżempju, it-​“2 Timotju 3:​16” ifisser il-​ktieb tat-​Tieni Timotju, kapitlu 3, u l-​vers 16. Ara jekk tistax issib dan il-​vers fil-​Bibbja.

Ma taqbilx li l-​aħjar mod biex insiru familjari mal-​Bibbja hu li naqrawha regolarment? Xi wħud sabuh t’għajnuna li jaqraw l-​Iskrittura Griega l-​ewwel, billi jibdew mill-​ktieb taʼ Mattew. Jekk taqra tliet sa ħames kapitli kuljum, tistaʼ taqra l-​Bibbja kollha kemm hi f’sena. Imma kif tistaʼ tkun ċert li dak li taqra fil-​Bibbja hu fil-​fatt imnebbaħ minn Alla?

Tistaʼ Tafdaha l-​Bibbja?

Jekk hu ktieb ispirat minn Alla għan-​nies kollha, m’għandux ikun fih pariri li ma jinbidlux maż-​żmien dwar kif għandna ngħixu? Il-​Bibbja tirrifletti fehma tan-​natura umana li tapplika għal kull ġenerazzjoni taʼ l-​umanità, u l-​prinċipji tagħha huma prattiċi llum daqskemm kienu meta nkitbu. Dan jistaʼ jidher ċar f’taħdita famuża li ta Ġesù Kristu, il-​Fundatur tal-​Kristjanità. Hi mniżżla f’Mattew kapitlu 5 sa 7. Din it-​taħdita, magħrufa bħala l-​Priedka taʼ fuq il-​Muntanja, turina mhux biss dwar kif insibu ferħ veru imma wkoll dwar kif insolvu argumenti, kif nitolbu, kif inħarsu lejn il-​bżonnijiet materjali, u ħafna iktar. F’din it-​taħdita, u fil-​paġni kollha tagħha, il-​Bibbja tgħidilna b’mod ċar x’għandna nagħmlu u x’għandna nevitaw sabiex nogħġbu lil Alla u ntejbu s-​sitwazzjoni tagħna fil-​ħajja.

Raġuni oħra għala tistaʼ tpoġġi l-​fiduċja tiegħek fil-​Bibbja hija li meta din titkellem dwar kwistjonijiet xjentifiċi, dak li hemm miktub hu minnu. Per eżempju, fi żmien li l-​maġġuranza min-​nies kienu jemmnu li l-​art kienet ċatta, il-​Bibbja kienet titkellem dwar “ħnejjet [jew, l-​isfera taʼ] l-​art.”c (Isaija 40:22) U iktar minn 3,000 sena qabel ma x-​xjenzat famuż Sir Isaac Newton spjega li l-​pjaneti jinżammu fl-​ispazju minħabba l-​gravità, il-​Bibbja bi stil poetiku qalet li “l-​art imdendla fuq ix-​xejn.” (Ġob 26:7) Ikkunsidra wkoll din id-​deskrizzjoni poetika taċ-​ċiklu taʼ l-​ilma taʼ l-​art, miktuba xi 3,000 sena ilu: “Ix-​xmajjar kollha lejn il-​baħar jiġru, iżda ma jimteliex il-​baħar bihom; mnejn ikunu bdew il-​mixja tagħhom, ’l hemmhekk ix-​xmajjar jerġgħu jmorru.” (Koħèlet 1:7) Iva, il-​Ħallieq taʼ l-​univers hu wkoll l-​Awtur tal-​Bibbja.

L-​eżattezza storika tal-​Bibbja taqbel mal-​fatt li hi ispirata minn Alla. Ġrajjiet imsemmijin fil-​Bibbja m’humiex sempliċement ħrejjef. Huma relatati maʼ dati, nies, u postijiet speċifiċi. Per eżempju, Luqa 3:1 b’eżattezza jirreferi għas-​“sena ħmistax tar-​renju taʼ Tiberju Ċesari, meta Ponzju Pilatu kien gvernatur tal-​Lhudija, Erodi kien ħakkiem tad-​distrett tal-​Galilija.”

Għalkemm kittieba taʼ l-​istorja tal-​qedem kważi dejjem irrapportaw biss ir-​rebħiet u l-​kwalitajiet tajbin tal-​ħakkiema, il-​kittieba tal-​Bibbja kienu onesti, billi stqarrew bil-​miftuħ id-​dnubiet tagħhom stess. Per eżempju, is-​Sultan David taʼ Iżrael stqarr: “Dnibt bil-​kbir b’li għamilt. . . . tbellaht bil-​bosta.” Din l-​istqarrija onesta hija miktuba fil-​Bibbja. (2 Samwel 24:10) U l-​kittieb Bibliku Mosè nnifsu kiteb dwar l-​inċident fejn hu ma weriex fidi fl-​Alla l-​veru.​—Numri 20:12.

Il-Bibbja għandha prova oħra taʼ ispirazzjoni divina. Din il-​prova hi l-​profeziji mwettqin​—l-​istorja miktuba minn qabel. Xi wħud minn dawn huma profeziji rigward Ġesù Kristu. Per eżempju, iktar minn 700 sena qabel it-​twelid taʼ Ġesù, l-​Iskrittura Ebrajka b’eżattezza bassret li dan il-​Wieħed Imwiegħed kien se jitwieled “f’Betlehem tal-​Lhudija.”​—Mattew 2:​1-6; Mikea 5:2.

Ikkunsidra eżempju ieħor. Fit-​2 Timotju 3:​1-5, il-​Bibbja tgħid: “Fl-​aħħar jiem ikun hawn żminijiet kritiċi li diffiċli biex issib tarfhom. Għax in-​nies ikunu jħobbu lilhom infushom, iħobbu l-​flus, minfuħin bihom infushom, suppervi, midgħija, diżubbidjenti lejn il-​ġenituri, ingrati, żleali, mingħajr imħabba naturali, ma jkunux iridu jiftiehmu, kalunnjaturi, mingħajr rażna, feroċi, mingħajr imħabba għat-​tajjeb, tradituri, rashom iebsa, imkabbrin, iħobbu l-​pjaċiri minflok ma jħobbu lil Alla, ikollhom għamla taʼ devozzjoni lejn Alla imma ma jurux bil-​fatti l-​qawwa tagħha.” Ma tiddeskrivix din l-​attitudni tan-​nies in ġenerali llum? Dan il-​kliem inkiteb fis-​sena 65 E.K., iktar minn 1,900 sena ilu!

X’Tgħallimna l-​Bibbja?

Hekk kif taqra l-​Bibbja, se tkun tistaʼ tara li hi sors t’għerf iktar għoli. Tipprovdi tweġibiet sodisfaċenti għal mistoqsijiet bħal: Min hu Alla? Huwa reali x-​Xitan? Min hu Ġesù Kristu? Għala hawn is-​sofferenza? X’jiġrilna meta mmutu? It-​tweġibiet li għandek mnejn tismaʼ mingħand oħrajn huma varjati daqs it-​tagħlim u d-​drawwiet tan-​nies li jagħtuhom. Imma l-​Bibbja tikxef il-​verità dwar dawn u ħafna suġġetti oħra. Iżjed minn hekk, fil-​kwistjoni taʼ kondotta u attitudni lejn bnedmin oħra u awtoritajiet għoljin, l-​aħjar gwida hija tal-​Bibbja.d

Il-​Bibbja x’tikxef dwar l-​iskop t’Alla għall-​art u l-​umanità? Twiegħed: “Ftit ieħor, u l-​ħażin ma jkunx aktar . . . Imma l-​ġwejdin għad jirtu l-​art, u bi sliem kotran jitgħaxxqu.” (Salm 37:​10, 11) “Alla stess ikun [maʼ l-​umanità]. U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.” (Rivelazzjoni 21:​3, 4) “Il-​ġusti jirtu l-​art, u jgħammru fiha għal dejjem.”​—Salm 37:29.

Il-Bibbja tbassar ukoll li l-​gwerer, il-​kriminalità, il-​vjolenza, u l-​ħażen dalwaqt se jispiċċaw. Il-​mard, ix-​xjuħija, u l-​mewt mhux se jibqgħu jeżistu. Ħajja taʼ dejjem fuq art magħmula ġenna se ssir realtà. Xi prospetti mill-​isbaħ! Kemm juri dan kollu l-​imħabba t’Alla għall-​bnedmin!

Int X’Se Tagħmel?

Il-​Bibbja hija rigal meraviljuż mingħand il-​Ħallieq. Kif għandek tirreaġixxi għal dan il-​ktieb? Raġel li kellu sfond Ħindu kien jemmen li biex rivelazzjoni mingħand Alla tkun taʼ benefiċċju għall-​umanità, trid tkun ilha mill-​bidu taċ-​ċivilizzazzjoni. X’ħin sar jaf li partijiet mill-​Bibbja huma iktar antiki mill-​iktar kitbiet antiki tal-​Ħindu, il-​Veda, hu ddeċieda li jaqra l-​Bibbja u jeżamina dak li fiha.e Professur taʼ l-​università fl-​Istati Uniti wkoll ra l-​bżonn li jaqra l-​iktar ktieb imqassam madwar id-​dinja qabel ma jifforma opinjoni dwaru.

Jekk taqra l-​Bibbja u tapplika dak li tgħallem se tikseb barkiet kbar. Il-​Bibbja tgħid: “Hieni l-​bniedem li . . . fil-​liġi tal-​Mulej hi l-​għaxqa tiegħu, lejl u nhar [“jaqra minn taħt l-​ilsien,” NW] fil-​liġi tiegħu. Hu bħal siġra mħawwla ħdejn nixxigħat taʼ l-​ilma li tagħmel il-​frott fi żmienha, u l-​weraq tagħha ma jidbielx; hu jirnexxi f’kull ma jagħmel.”f (Salm 1:​1-3) Il-​fatt li tistudja u tirrifletti fuq dak li tgħid il-​Bibbja se jġiblek il-​ferħ għax tkun qed tissodisfa l-​bżonn spiritwali tiegħek. (Mattew 5:3) Il-​Bibbja se turik kif tgħix ħajja produttiva u kif tkampa mal-​problemi b’suċċess. Iva, “ħlas tajjeb għandu min iħarishom [il-liġijiet t’Alla mniżżlin fil-​Bibbja].” (Salm 19:12 [19:​11, NW]) Iżjed minn hekk, jekk tafda fil-​wegħdi t’Alla se tikseb barkiet issa u se jkollok tama sabiħa għall-​futur.

Il-​Bibbja tħeġġiġna: “Bħal trabi tat-​twelid, ifformaw xenqa għall-​ħalib safi tal-​kelma.” (1 Pietru 2:2) Tarbija tiddependi min-​nutrimenti u tinsisti li tissodisfa dak il-​bżonn. Bl-​istess mod, aħna dipendenti mill-​għarfien mingħand Alla. Għalhekk, ‘ifforma xenqa,’ jew xewqa qawwija, għall-​Kelma tiegħu. Il-​Bibbja hija ktieb taʼ tagħlim veru mingħand Alla. Agħmilha l-​mira tiegħek li tistudjaha regolarment. Ix-​Xhieda taʼ Ġeħova fil-​komunità tiegħek huma lesti li jgħinuk tikseb l-​aħjar mill-​istudju tiegħek. Nistidnuk minn qalbna biex tikkuntattjahom, jew tistaʼ tikteb lill-​pubblikaturi taʼ din ir-​rivista.

[Noti taʼ taħt]

[Stampa f’paġna 7]

‘Ifforma xenqa’ għall-​Kelma t’Alla. Studja l-​Bibbja regolarment

[Sors tal-​Istampa f’paġna 5]

Ritratt taʼ NASA