It-​talba Għal Riforma

MINN KITTIEB GĦAL STENBAĦ! FIL-​ĠERMANJA

“Kieku għadni żgħira kont nibda moviment tar-​riforma!”qalet Anna, mara taʼ 80 sena fil-​Ġermanja.“X’kont tibdel?”staqsieha Robert. “Kollox!” wiġbitu Anna.

ĦAFNA jaqblu maʼ Anna. Stħarriġ li sar fil-​Ġermanja f’nofs is-​snin 90 wera li 2 minn kull 3 persuni li sar l-​istħarriġ fuqhom ħassew li kien hemm bżonn taʼ ‘riformi estensivi u bidliet soċjali importanti.’ Forsi s-​sitwazzjoni hija simili f’pajjiżek.

Meta l-​pubbliku jinsisti għall-​bidla, ġeneralment jiġi mwiegħed li se jkun hemm riforma. Dwar ir-​riforma fl-​edukazzjoni, Frederick Hess, assistent professur taʼ l-​edukazzjoni u l-​gvern, kiteb: “Ir-​riforma spiss tkun sforz li jsir taparsi sabiex il-​komunitajiet bla sabar jikkalmaw.” Naqraw ħafna titli fil-​gazzetti li jwiegħdu pjanijiet taʼ riformi fit-​taxxi, fil-​kura tas-​saħħa, fl-​agrikultura, u fis-​sistema legali. Nisimgħu wkoll dwar riformi proposti għas-​sistemi taʼ l-​edukazzjoni, tal-​benefiċċji soċjali, u penali.a Naqraw ukoll li l-​membri taʼ xi knejjes qed jitolbu riformi fit-​tagħlim.

Ir-​Riforma Kontra l-​Istat Preżenti taʼ l-​Affarijiet

Xi jqanqal din id-​domanda għall-​bidla? Il-​bniedem dejjem jipprova jtejjeb id-​dinja taʼ madwaru. Dan ipprova jagħmlu billi uża l-​votazzjoni, billi nefaq il-​flus, bil-​leġislazzjoni, jew billi uża l-​forza b’mod aħrax. Jiġri hekk minħabba li l-​bniedem għandu xewqa kbira li jtejjeb ħajtu, li jikseb futur aħjar għal uliedu, jew li jġib is-​soċjetà fi qbil maʼ dak li jaħseb li hu ideali għall-​benesseri, il-​moralità, u l-​ġustizzja. Sakemm jibqgħu jeżistu n-​nies li jissieltu biex jevitaw il-​konsegwenzi koroh taʼ l-​injoranza, il-​mard, il-​faqar, u l-​ġuħ, se jibqaʼ jkun hawn talba għal riforma.

Waqt li ħafna jieħdu pjaċir bir-​riforma, oħrajn ma jaqblux mar-​riformisti u maʼ dak li jipprovaw jiksbu. Xi wħud jippreferu jħallu s-​soċjetà kif inhi, biex jippreservaw l-​istat preżenti taʼ l-​affarijiet. Huma jqisu lir-​riformisti bħala li m’humiex prattiċi għaliex iridu jibdlu d-​dinja iżda m’għandhomx idea x’inhi r-​realtà. Il-​Handbuch der deutschen Reformbewegungen 1880-1933 (Manwâl tal-​Movimenti Ġermaniżi tar-​Riforma 1880-1933) jinnota li r-​riformisti “faċilment isiru vittmi tal-​kritika, it-​tpinġijiet politiċi tad-​daħq, il-​karikaturi, u l-​ironija.” Il-​kittieb tad-​drammi Franċiż Molière darba stqarr: “Mill-​ħmerijiet kollha li jeżistu, ebda waħda m’hija akbar minn dik li tipprova ttejjeb id-​dinja.”

Int x’taħseb? Tistaʼ r-​riforma ttejjeb id-​dinja? Jew huma r-​riformisti sempliċi nies mhux prattiċi li joħolmu? Xi ngħidu għar-​riformi li saru fil-​passat? Dawk li kienu responsabbli għalihom laħqu l-​mira li kellhom? L-​artikli li jmiss se jitħaddtu dwar dawn il-​kwistjonijiet.

[Nota taʼ taħt]