Fejn Jeżistu l-​Morali?

AĦNA ngħixu f’dinja fejn il-​morali qed jinbidlu. Prattiċi qarrieqa li fl-​imgħoddi kienu jiġu kundannati, illum spiss jiġu injorati. Il-​mezzi tax-​xandir taʼ sikwit jagħtu importanza kbira lill-​ħallelin u limbroljuni, u dawn jiġu trattati bħala eroj. B’riżultat taʼ dan, ħafna nies jixbhu din id-​deskrizzjoni li nsibu fil-​Bibbja: “Jekk tiltaqaʼ maʼ ħalliel, tissieħeb miegħu.”—Salm 50:18.

Madankollu, l-​imbroljuni m’humiex taʼ min jammirahom. Wieħed kittieb qal: “Karatteristika unika taʼ l-​impusturi hi l-​abbiltà naturali li jimmanipulaw lin-​nies taʼ madwarhom. Din l-​abbiltà taʼ spiss jiskopruha minn meta jkunu għadhom żgħar ħafna. Barra minn hekk, hemm il-​fatt li dan l-​immanipular ma jġagħalhomx iħossu xi ħtija jew rimors. Għall-​kuntrarju, iħossuhom sodisfatti għall-​aħħar; iħossu ċertu ferħ li jinkuraġġihom biex ikomplu jimmanipulaw ħa jiksbu dak li jridu, u ma jimpurtahomx mill-​konsegwenzi li jġarrab min jaqaʼ vittma tagħhom.”

M’għandniex xi ngħidu, il-​pubbliku jissimpatizza maʼ l-​armla li tiġi ingannata u xi ħadd jisirqilha dak li tkun faddlet bl-​għaraq taʼ ġbinha, imma ftit huma dawk li jiddispjaċihom meta xi ħadd ibagħbas fil-​flus taʼ xi negozju kbir jew jieħu flus b’ingann minn xi kumpanija taʼ l-​assigurazzjoni. Ħafna nies jirraġunaw li l-​kumpaniji kummerċjali ma jħossuhx is-​serq; xorta jibqgħu sinjuri. Imma dan lingann m’huwiex biss il-​problema tal-​kumpaniji nfushom; huma jġagħlu lill-​konsumatur iħallas għat-​telf li jġarrbu. Per eżempju, fl-​Istati Uniti, il-​familja medja tħallas iktar minn 1,000 dollaru (Lm257) fis-​sena iżjed f’assigurazzjoni biex tpatti għat-​telf li jiġi kawżat mill-​frodi.

Ukoll, ħafna nies jieħdu vantaġġ minn opportunitajiet biex jixtru bi rħis imitazzjonijiet taʼ prodotti tad-​ditta, bħalma huma ħwejjeġ, arloġġi, fwejjaħ, kosmetiċi, u basktijiet. Forsi jirrealizzaw li l-​prodotti foloz iġagħlu lill-​kumpaniji jitilfu mijiet taʼ miljuni taʼ liri kull sena, imma huma jaħsbu li lilhom dan ma jeffettwahomx. Iżda, fl-​aħħar mill-​aħħar, il-​konsumaturi jridu jħallsu iktar għal prodotti u servizzi ġenwini. Iktar minn hekk, meta tixtri prodotti mhux ġenwini tkun qed titfaʼ l-​flus fil-​bwiet tal-​kriminali.

Wieħed kittieb li fix-​xogħol tiegħu jiġġieled kontra l-​frodi qal: “Jien konvint li r-​raġuni prinċipali għala għandna daqstant frodi llum hi għax ngħixu f’soċjetà bla prinċipji għall-​aħħar. Kien hemm telfien kbir taʼ prinċipji li wassal għal kultura taʼ ingann. . . . Ngħixu f’soċjetà li ma tgħallimx il-​prinċipji fid-​dar. Ngħixu f’soċjetà li ma tgħallimx il-​prinċipji fl-​iskola, għax kieku l-​għalliema jiġu akkużati li qed jgħallmu l-​morali.”

F’kuntrast, ix-​Xhieda taʼ Jehovah tassew jgħallmu u jipprovaw jgħixu fi qbil mal-​livelli morali tal-​Kelma t’Alla. Huma jiġu gwidati minn prinċipji bħal dawn li ġejjin:

● “Ħobb lil għajrek bħalek innifsek.”​—Mattew 22:39.

● “La timbroljax.”​—Mark 10:​19, Karm Żammit.

● “Iqis il-​ħalliel li ma jisraqx aktar; imma jaħdem bl-​onestà b’idejh biex ikun jistaʼ jgħin lil min ikun fil-​bżonn.”—Efesin 4:28.

● “Irridu ngħixu onestament f’kollox.”​—Lhud 13:​18, KŻ.

Għalkemm ix-​Xhieda m’għandhomx attitudni taʼ kburija u ma jqisux lilhom infushom aħjar minn ħaddieħor, huma jemmnu li jekk kulħadd japplika dawn il-​prinċipji, id-​dinja tkun post ħafna aħjar fejn tistaʼ tgħix. Jemmnu wkoll fil-​wegħda t’Alla li xi darba hekk se tkun.​—2 Pietru 3:​13.

[Kumment f’paġna 11]

Kieku kulħadd jgħix fi qbil mal-​livelli morali tal-​Kelma t’Alla, id-​dinja tkun post ħafna aħjar fejn tistaʼ tgħix

[Stampa f’paġna 10]

Il-​Kristjani veri josservaw il-​prinċipji tal-​Bibbja, bħal “Ħobb lil għajrek bħalek innifsek”