Il-​Hanbok il-​Kostum Nazzjonali tal-​Korea

Minn kittieb għal Stenbaħ! fir-​Repubblika tal-​Korea

GĦALL-​KOREANI, il-​ħwejjeġ m’humiex sempliċement għata għall-​ġisem. Eżempju taʼ dan huwa l-​kostum tradizzjonali Korean imsejjaħ hanbok.

Tifsila Unika

Il-​hanbok huwa fformat minn ġakketta forma taʼ bolero u dublett twil taʼ proporzjonijiet uniċi.a F’xi każi, id-​dublett hu erbaʼ darbiet itwal mill-​ġakketta. Minħabba f’hekk, anki mara qasira tidher itwal meta tilbes il-​hanbok.

Il-hanbok għandu tondjaturi sottili u tifsila sempliċi. Il-​kmiem tal-​ġakketta jinfetħu bħal ġwienaħ, filwaqt li d-​dublett jibda minn taħt id-​dirgħajn u jiftaħ ftit ftit u jibqaʼ nieżel b’mod eleganti sa l-​art. Fuq is-​sider hemm tip taʼ ċoff mhux tas-​soltu, li t-​truf tiegħu jibdew mill-​għoqda u jibqgħu neżlin minn fuq il-​ġakketta sa kważi l-​għekiesi. Ħafna hanboks għandhom ukoll disinji ġeometriċi sbieħ jew disinji taʼ fjuri rrakkmati mad-​dawra taʼ l-​għonq u fuq il-​pulzieri tal-​ġakketta kif ukoll fuq id-​dublett. Iva, il-​proporzjonijiet, it-​tifsila, u l-​kuluri tal-​hanbok kollha jingħaqdu flimkien biex jagħmluh verament eleganti!

Kostum Adattabbli

Il-​ġmiel tal-​hanbok jiżdied meta tqis kemm għandu għamla prattika. Peress li ġeneralment il-​hanbok hu magħmul minn fibri naturali, jistaʼ faċilment jintlibes is-​sena kollha. Per eżempju, hanbok li jkun magħmul minn fibri tal-​pjanti bħall-​qanneb ikollu ventilazzjoni tajba u jgħin lil min jilbsu biex iżomm frisk fis-​sajf, avolja l-​hanbok jgħatti kważi l-​ġisem kollu. Tipi oħrajn taʼ materjal iżommu s-​sħana tal-​ġisem, u b’hekk ikunu iktar addattati għax-​xitwa.

Il-​hanbok huwa wkoll komdu. Dan l-​aspett m’għandux x’jaqsam mal-​moda iżda ġej minn bżonn prattiku li kien jeżisti sekli ilu meta ż-​żwiemel kienu jintużaw ħafna f’dan ir-​reġjun. Ir-​rivista Culture & I tgħid: “Dan l-​ilbies ġie żviluppat biex ikun addattat għall-​klima kiesħa u għall-​attivitajiet tal-​kaċċa u tal-​ħajja tan-​nomadi.” Għalhekk, ir-​rikkieba Koreani taż-​żwiemel kienu jevitaw kwalunkwe lbies li kien itellifhom fix-​xogħol tagħhom. Tabilħaqq, il-​Koreani li jieħdu gost jilbsu l-​hanbok illum għandhom ikunu grati lejn l-​antenati tagħhom għall-​kumdità fiżika li dan jagħtihom!

Fattur interessanti ieħor tal-​hanbok hu t-​tradizzjoni antika taʼ l-​użu taʼ kuluri għal skopijiet simboliċi. Fil-​passat, il-​klassi taʼ ħakkiema Koreani spiss kienu jilbsu kuluri attraenti, filwaqt li normalment ir-​raħħala kienu jilbsu l-​abjad. Ukoll, xebba kienet tingħaraf billi tilbes taħlita taʼ isfar u aħmar. Wara li tiżżewweġ, il-​kulur tal-​hanbok tagħha kien jirrifletti l-​istat soċjali taʼ żewġha. Illum, meta jiżżewweġ xi ħadd, omm l-​għarusa suppost tilbes libsa roża, filwaqt li omm l-​għarus normalment tilbes libsa blu. Ċertament li b’din id-​drawwa jkun faċli li tidentifikahom.

Il-​Hanbok Illum

Wara l-​Gwerra tal-​Korea (1950​-53), saret kampanja taʼ modernizzazzjoni. Bħala riżultat, sa l-​1970 il-​hanbok ma baqax moda u l-​istil taʼ lbies tal-​Punent ħadlu postu. Minħabba f’hekk, dak li kien ilbies li jintlibes kuljum spiċċa fil-​gwardarobba, u sar jintlibes biss f’xi okkażjoni speċjali bħal xi tieġ.

Iżda, fis-​snin reċenti, il-​hanbok qed jerġaʼ jsir popolari. Per eżempju, fl-​1996 sar sforz biex iħajru lin-​nies jerġgħu jibdew jilbsu dan l-​ilbies meta l-​ewwel Sibt tax-​xahar ġie dikjarat bħala “l-​jum li fih jintlibes il-​hanbok.” Il-​manifatturi tal-​ħwejjeġ introduċew hanboks ġodda disinjati b’mod speċjali biex jappellaw għaż-​żgħażagħ. Milli jidher huwa taʼ sodisfazzjon emozzjonali li terġaʼ tibda ssegwi t-​tradizzjonijiet antiki, għax il-​hanbok modern għamel suċċess kbir. F’era meta ħafna mill-​istili moderni taʼ lbies jenfasizzaw is-​senswalità, il-​hanbok huwa eżempju pjaċevoli taʼ lbies sabiħ u modest.​—1 Timotju 2:9.

[Nota taʼ taħt]