Dak li “l-Uniku Alla Veru” Jwegħedna
ALLA ĠEĦOVA poġġa lill-ewwel koppja umana f’ġenna fuq l-art—il-ġnien taʼ lGħeden. Hu qalilhom biex ikollhom it-tfal u ‘jaħkmu l-art,’ u dan kien jinvolvi li jifirxu mad-dinja l-Ġenna li kienet id-dar tagħhom hekk kif il-familja tikber. (Ġenesi 1:26-28; 2:15) Qatt se jitwettaq l-iskop li Alla għandu għall-bnedmin, jiġifieri li jgawdu Ġenna taʼ l-art?
Dażgur! Skond il-profezija tal-Bibbja, “[Ġeħova se] jeqred il-mewt għal dejjem” u se ‘jixxotta d-dmugħ minn fuq kull wiċċ.’ Meta dan iseħħ, in-nies se “jgħidu: ‘Dan hu Alla tagħna: fih ittamajna li jsalvana; dan hu l-Mulej li fih ittamajna: nifirħu u nithennew bis-salvazzjoni tiegħu.’”—Isaija 25:8, 9.
L-aħħar ktieb tal-Bibbja jiddeskrivi l-kundizzjonijiet taʼ l-art wara li titneħħa din is-sistema dinjija, jew is-sistema taħt il-ħakma taʼ Satana. Rigward l-“art ġdida” magħmula minn uħud li jħobbu lil Alla, il-Bibbja tgħid: “It-tinda t’Alla hi mal-bnedmin, u hu jgħammar magħhom, u huma jkunu l-popli tiegħu. U Alla stess ikun magħhom. U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ.”—Rivelazzjoni 21:1-4.
X’wegħdi meraviljużi! Nistgħu aħna nemmnuhom? Ikkunsidra kif il-mewt taʼ Ġesù bħala sagrifiċċju u l-mirakli li wettaq jipprovdu bażi biex ikollna fiduċja li Alla se jwettaq dak kollu li Hu jwiegħed.—2 Korintin 1:20.
Il-Ħajja taʼ Ġesù Bħala Fidwa
Meta Satana influwenza lil Adam biex ikun diżubbidjenti lejn Alla u jidneb, nisel Adam kollha wirtu d-dnub tiegħu. “Bħalma permezz taʼ bniedem wieħed id-dnub daħal fid-dinja, u permezz tad-dnub il-mewt,” tgħid il-Bibbja, “il-mewt infirxet fuq il-bnedmin kollha għax kollha dinbu.” Madankollu, ir-rakkont Bibliku jkompli jgħid: “Bl-ubbidjenza taʼ persuna waħda [ir-raġel perfett Ġesù] ħafna se jsiru ġusti.” (Rumani 5:12, 19) Bħalma wera l-ewwel artiklu f’din is-serje, Ġesù huwa “l-aħħar Adam,”—il-wieħed li ‘ġie mis-sema’—il-wieħed li ta ħajtu bħala “fidwa għal ħafna.”—1 Korintin 15:45, 47; Mattew 20:28.
Għalhekk, dawk kollha li jeżerċitaw fidi f’Ġesù jkollhom “il-ħelsien [mid-dnub] bil-fidwa” u jistgħu jgawdu ħajja taʼ dejjem. (Efesin 1:7; Ġwanni 3:36) Żgur li nistgħu nifirħu li Alla Ġeħova ħabb lid-dinja t’umanità tant li ta lil Ibnu bħala s-Salvatur tagħna! (Luqa 2:10-12; Ġwanni 3:16) Jekk neżaminaw dak li Ġesù għamel fl-ewwel seklu għall-umanità li kienet qed tbati, se nifhmu iktar x’se jagħmel fil-futur. U dak li Ġesù għamel huwa tassew meraviljuż!
Dehriet bil-Quddiem taʼ Dinja Ġdida
Ġesù setaʼ jfejjaq lil dawk kollha li kienu morda u muġugħin li kienu jittieħdu għandu. Kien x’kien il-mard li kellhom, ma kien hemm xejn li hu ma setax ifejjaq. Iktar minn hekk, hu temaʼ mirakolożament lil eluf taʼ nies bi ftit ħut u ħobż, u hu għamel dan iktar minn darba.—Mattew 14:14-22; 15:30-38.
Meta Ġesù reġaʼ ta d-dawl lil wieħed raġel li twieled agħma, il-ġirien u l-ħbieb taʼ dan ir-raġel irrikonoxxew li dan kien miraklu, imma l-mexxejja reliġjużi Lhud kienu xettiċi. Għalhekk, ir-raġel li reġaʼ ngħata d-dawl irraġuna magħhom b’dan il-mod: “Mill-qedem qatt ma nstemaʼ li xi ħadd fetaħ għajnejn wieħed imwieled agħma. Kieku dan ir-raġel ma kienx ġej minn Alla, ma kien ikun jistaʼ jagħmel xejn.”—Ġwanni 9:32, 33.
Matul il-ministeru taʼ Ġesù, il-kuġin tiegħu Ġwanni l-Għammied, li kien qiegħed il-ħabs, bagħat messaġġiera sabiex ikunu jistgħu jikkonfermaw ir-rapporti dwar Ġesù. “Dak il-ħin,” tgħid il-Bibbja, Ġesù “fejjaq lil ħafna li kienu morda jew magħdurin jew maħkumin minn spirti mill-agħar, u lil ħafna għomja tahom il-favur li jaraw.” Imbagħad Ġesù qal lill-messaġġiera: “Morru u għidu lil Ġwanni dak li rajtu u smajtu: l-għomja qed jingħataw id-dawl, iz-zopop qed jimxu, l-imġiddmin qed jiġu mnaddfin u t-torox qed jisimgħu, il-mejtin qed jitqajmu.”—Luqa 7:18-22.
Aħseb ftit dwar dan: Jekk fil-passat ġrat xi ħaġa tajba, ma tagħtikx din fiduċja li tistaʼ terġaʼ tiġri? Permezz tal-mirakli tiegħu, Ġesù wera fuq skala żgħira dak li jistaʼ jagħmel fuq skala akbar meta jkun qed jaħkem bħala s-Sultan tas-Saltna t’Alla. Il-mirakli tiegħu servew bħala prova li hu kien mibgħut minn Alla u li hu kien verament Iben Alla.
Matul il-ħakma tas-Saltna t’Alla, se jkun hemm twettiq letterali tal-profeziji dwar affarijiet meraviljużi. Bħalma ġie mbassar, għajnejn l-għomja u widnejn it-torox se jinfetħu, iz-zopop se jaqbżu bħal għażżiela, u ħadd m’hu se jkun marid. Ukoll se jkun hemm paċi u sigurtà fid-dinja kollha. Anki l-annimali li issa huma perikolużi se jkunu f’paċi mal-bnedmin.—Isaija 9:5, 6 (9:6, 7, NW); 11:6-9; 33:24; 35:5, 6; 65:17-25.
Tixtieq int tgħix għal dejjem taħt il-ħakma tas-Saltna t’Alla, imdawwar b’kundizzjonijiet bħal dawn? Ġesù wera dak li għandek tagħmel meta f’talba lil missieru qal: “Il-ħajja taʼ dejjem tfisser dan: li jieħdu għarfien dwarek, l-uniku Alla veru, u dwar Ġesù Kristu li int bgħatt.” (Ġwanni 17:3) Jalla qatt ma tħalli xejn iżommok milli tkompli tieħu l-għarfien li jagħti l-ħajja.
[Stampa f’paġna 10]
Dan hu dak li Alla jwiegħed għall-art