“Grazzi għall-​Imħabba Kbira Tagħkom għan-​Nies”

MINN KITTIEB GĦAL STENBAĦ! FIR-​RUSSJA

◼ Fil-​belt taʼ Chita fil-​Lvant tas-​Siberja, il-​membri tal-​kongregazzjoni tax-​Xhieda taʼ Ġeħova użaw klassi fi skola għal-​laqgħat Kristjani sakemm tlestiet is-​Sala tas-​Saltna l-​ġdida tagħhom. Peress li x-​Xhieda żammew il-​klassi nadifa, għamlu xi tiswijiet, u kienu qalbhom tajba u edukati, id-​diretturi taʼ l-​iskola kitbu ittra taʼ ringrazzjament lill-​kongregazzjoni.

Parti mill-​ittra kienet tgħid: “Grazzi għall-​imħabba kbira tagħkom għan-​nies, li kulmin jiltaqaʼ magħkom jaraha, u għall-​attivitajiet missjunarji u umanitarji tagħkom fost il-​popolazzjoni ġenerali. Qatt m’aħna se ninsew dak kollu li tgħallimna minnkom matul is-​snin li ħdimna flimkien, għaliex urejtuna li dawk li jemmnu f’Alla huma nies deċenti, ħabrieka, qalbhom tajba u, fuq kollox, nies li juru fidi u għandhom skop fil-​ħajja.” Ix-​Xhieda taʼ Ġeħova japprezzaw dawn il-​kummenti.

◼ Xi 5,500 kilometru fil-​punent taʼ Chita, rappreżentant tal-​fergħa tax-​Xhieda taʼ Ġeħova tar-​Russja ġie mistieden għal ċerimonja speċjali organizzata mill-​amministrazzjoni tad-​distrett taʼ San Pietruburgu. X’kienet ir-​raġuni? Kull sena wara li tinħall il-​borra, ix-​Xhieda lokali jgħinu biex jitnaddaf l-​iskart li jakkumula fi triq twila xi 60 kilometru viċin il-​fergħa. Bħala turija t’apprezzament għax-​xogħol fi ħdan il-​komunità, uffiċjal ippreżenta b’mod formali ċertifikat taʼ mertu lir-​rappreżentant tal-​fergħa. L-​udjenza ċapċpet b’entużjażmu. Huwa taʼ interess li meta wieħed mill-​organizzaturi tkellem fiċ-​ċerimonja u ppronunzja ħażin l-​isem divin, Ġeħova, diversi wħud fl-​attendenza li ma kinux Xhieda mill-​ewwel ikkoreġewh, u dan wera li kienu familjari kemm maʼ l-​isem t’Alla kif ukoll man-​nies li huma magħrufin b’dan l-​isem.

Il-​ministeru pubbliku tax-​Xhieda taʼ Ġeħova, li jgħoddu madwar 150,000 fir-​Russja, hu r-​raġuni prinċipali għala kienu familjari maʼ dan l-​isem. Hija l-​mira tagħhom li jibqgħu juru “mħabba kbira għan-​nies” billi jaqsmu l-​messaġġ taʼ faraġ mill-​Bibbja maʼ dawk kollha li lesti jisimgħu.—Mattew 22:39.

[Stampa f’paġna 29]

Il-​fergħa tar-​Russja rċiviet ċertifikat taʼ mertu