‘Id-Dinja Tagħna Kienet Tkun Differenti’
L-isforz biex titħassar konvenzjoni tax-Xhieda taʼ Jehovah f’Moska f’Awissu li għadda ġibed attenzjoni konsiderevoli. (Għad-dettalji ara paġni 27 u 28.) Andrei Zolotov, Jr., irrapporta f’The Moscow Times tal-21 t’Awissu, 1999, li “Vladimir Kozyrev, id-direttur deputat tal-kumpless sportiv, qal li l-amministrazzjoni ma kinitx kontra li jinżamm il-kungress tax-Xhieda taʼ Jehovah. Hu qal li ma kienx jaf minfejn kienet ġejja l-ordni [biex jiġi mħassar].”
F’ittra pubblikata f’The Moscow Times ġimgħa wara, wieħed qarrej faħħar lill-gazzetta talli ppubblikat l-artiklu “tassew imparzjali” u qal li dan “tabilħaqq kien jixraqlu l-attenzjoni tal-qarrejja.” Hu osserva: “L-artiklu tagħkom fuq id-diffikultajiet tremendi li kellhom jiffaċċjaw ix-Xhieda taʼ Jehovah huma u jippreparaw għall-konvenzjoni annwali tagħhom [kixef] it-trattament inġust [li ġarrbu].”
Imbagħad il-kittieb taʼ l-ittra nnota li x-Xhieda taʼ Jehovah “huma magħrufin sew fid-dinja (u issa wkoll fir-Russja) . . . Huma . . . magħrufin sew bħala nies mill-aħjar, qalbhom tajba, umlin u faċli biex tittratta magħhom, qatt ma jagħmlu pressjoni fuq nies oħra u dejjem ifittxu l-paċi fir-relazzjonijiet tagħhom m’oħrajn, ikun x’ikun it-twemmin reliġjuż tagħhom, sew jekk Kristjani Ortodossi, Musulmani jew Buddisti. M’hemm ħadd fosthom li jaċċetta tixħim, jisker jew jieħu d-drogi, u r-raġuni hija sempliċi ħafna: Huma sempliċement jipprovaw jimxu skond il-konvinzjonijiet tagħhom ibbażati fuq il-Bibbja f’kulma jagħmlu jew jgħidu. Li kieku n-nies kollha tad-dinja kellhom għallinqas jipprovaw jgħixu skond il-Bibbja l-mod kif jagħmlu x-Xhieda taʼ Jehovah, id-dinja krudili tagħna kienet tkun differenti għal kollox.”
L-awtoritajiet li investigaw lix-Xhieda taʼ Jehovah u li għandhom x’jaqsmu magħhom direttament jikkonfermaw id-deskrizzjoni t’hawn fuq. Awtoritajiet bħal dawn, per eżempju, taw il-permessi lix-Xhieda biex jibnu din is-Sala taʼ l-Assemblea ġdida u mill-isbaħ f’San Pietruburgu, fir-Russja. Fid-dedikazzjoni li saritilha fit-18 taʼ Settembru, is-sala kienet mimlija b’2,257 osservatur ferħan, u 2,228 ruħ oħra semgħu il-programm fi Swali tas-Saltna f’San Pietruburgu u fl-uffiċċju tal-fergħa tax-Xhieda taʼ Jehovah f’Solnechnoye fil-viċin.