Il-​Kelma t’Alla hi Verità

“Qaddishom permezz tal-​verità; kelmtek hi verità.”—ĠWANN 17:17.

1. Is-​salmista Ebrew kif kien iħares lejn il-​Bibbja iżda ħafna kif iħarsu lejha llum?

“IL-​KELMA tiegħek hi musbieħ għal sieqi, u dawl għal triqti.” (Salm 119:105) Hekk qal is-​salmista Ebrew. Minoranza biss illum għandhom rispett bħal dak lejn il-​Kelma t’Alla. F’dan is-​seklu 20, il-​Kelma t’Alla teżisti f’għamla miktuba bħala l-​Bibbja Mqaddsa. Ġiet tradotta f’iktar lingwi u mqassma f’għadd bil-​wisq iktar minn kwalunkwe ktieb ieħor fl-​istorja. Madankollu, il-​biċċa l-​kbira tan-​nies jirrifjutaw li jaċċettawha bħala musbieħ għal saqajhom. Saħansitra dawk li jgħidu li huma Kristjani jippreferu, fil-​parti l-​kbira, li jsegwu l-​idejat tagħhom stess minflok ma jħallu lill-​Bibbja ddawlilhom triqithom.—2 Timotew 3:5.

2, 3. Ix-​Xhieda taʼ Jehovah kif iħarsu lejn il-​Bibbja, u liema benefiċċji ġabilhom dan?

² F’kuntrast qawwi, aħna x-​Xhieda taʼ Jehovah naqblu mas-​salmista. Għalina, il-​Bibbja hija gwida mogħtija minn Alla. Aħna nafu li “l-​Iskrittura kollha hija mnebbħa minn Alla u taʼ benefiċċju għat-​tagħlim, għat-​twiddib, biex tiddritta l-​affarijiet, biex tiddixxiplina fit-​tjieba.” (2 Timotew 3:16) Kuntrarju għal ħafna llum, aħna ma rridux nesperimentaw fi kwistjonijiet taʼ moralità u kondotta. Aħna nafu x’inhu tajjeb għaliex il-​Bibbja tgħidilna.

³ Dan ġabilna benefiċċji kbar. Aħna sirna nafu lil Jehovah, u tgħallimna dwar l-​iskopijiet tiegħu tal-​għaġeb għall-​art u għall-​umanità, u għalhekk aħna fiduċjużi li futur jiddi hu possibbli għalina u għall-​familji tagħna. Aħna naqblu b’qalbna kollha mas-​salmista li qal: “Kemm inħobbha l-​liġi tiegħek! Il-​jum kollu naħseb dwarha. Iktar għaref mill-​egħdewwa tiegħi l-​kmandament tiegħek jagħmilni, għaliex għal żmien indefinit hu tiegħi.”−Salm 119:97, 98.

Nagħtu Xiehda Bil-​Kondotta

4. Li nirrikonoxxu l-​Bibbja bħala l-​Kelma t’Alla jpoġġi liema obbligu fuqna?

⁴ Għandna, għalhekk, kull raġun biex naqblu mal-​kliem taʼ Ġesù indirizzat lil Missieru: “Kelmtek hi verità.” (Ġwann 17:17) Imma li nirrikonoxxu dan il-​fatt iqiegħed obbligu fuqna. Aħna rridu ngħinu lil oħrajn jirrealizzaw li l-​Kelma t’Alla hija l-​verità. B’dan il-​mod huma wkoll se jkunu jistgħu jgawdu l-​barkiet li nġarrbu aħna. Kif nistgħu ngħinuhom b’dak il-​mod? Mod wieħed hu billi nagħmlu kull sforz biex napplikaw prinċipji bibliċi fil-​ħajjiet tagħna taʼ kuljum. B’dak il-​mod, uħud taʼ qalb tajba se jaraw li t-​triq tal-​Bibbja hija verament l-​aqwa.

5. Pietru liema parir ta rigward li nagħtu xiehda bil-​kondotta tagħna?

⁵ Dan kien is-​sugu tal-​parir tal-​appostlu Pietru lil nisa Kristjani li kellhom żwieġhom ma jemmnux. Hu qalilhom: “Intom in-​nisa miżżewġin, kunu sottomessi lejn żwieġkom stess, sabiex, jekk xi wħud m’humiex ubbidjenti għall-​kelma, jistgħu jintrebħu mingħajr kelma permezz tal-​kondotta tan-​nisa tagħhom.” (1 Pietru 3:1) Kien ukoll il-​prinċipju wara l-​parir tiegħu lill-​Kristjani kollha—irġiel, nisa, u tfal—meta qal: “Żommu l-​kondotta tagħkom mill-​aħjar fost il-​ġnus, biex, fil-​ħaġa li qed jitkellmu kontrikom bħala nies ħżiena, huma jistgħu bħala riżultat tax-​xogħlijiet mill-​aħjar tagħkom li tagħhom huma xhieda li raw b’għajnejhom jigglorifikaw lil Alla fil-​jum għall-​ispezzjoni tiegħu.”−1 Pietru 2:12; 3:16.

Il-​Għerf Superjuri tal-​Bibbja

6. Pietru kif igħinna naraw li għandna nassistu lil oħrajn biex japprezzaw il-​Bibbja?

⁶ Jerġaʼ, Kristjani jistgħu jgħinu lil oħrajn biex japprezzaw il-​Bibbja jekk jagħmlu bħalma jwissi wkoll Pietru: “Qaddsu lill-​Kristu bħala Mulej fi qlubkom, dejjem lesti biex tagħmlu difiża quddiem kulmin jitlobkom raġuni għat-​tama fikom, imma billi tagħmlu hekk bil-​ħlewwa u b’rispett profond.” (1 Pietru 3:15) Ministri Kristjani għandhom ikunu kapaċi jiddefendu l-​Bibbja u jispjegaw lill-​oħrajn li hija l-​Kelma t’Alla. Kif jistgħu jagħmlu hekk?

7. Liema fatt dwar il-​Bibbja juri li bil-​fors li hi l-​Kelma t’Alla?

⁷ Linja persważiva taʼ raġunar tinsab fil-​ktieb taʼ Proverbji. Hemm naqraw: “Ibni, jekk se tirċievi l-​qwiel tiegħi u taħżen bħal teżor il-​kmandamenti tiegħi stess, biex toqgħod attent għall-​għerf . . . , int se ssib il-​għarfien innifsu t’Alla. Għax Jehovah innifsu jagħti l-​għerf; minn fommu hemm għarfien u dehen.” (Proverbji 2:l-6) Il-​għerf innifsu t’Alla jinsab fil-​paġni tal-​Bibbja. Meta persuna sinċiera tara dak il-​għerf profond, ma tistax tonqos li tirrealizza li l-​Bibbja hija iżjed milli sempliċi kelma taʼ bniedem.

8, 9. Il-​parir tal-​Bibbja dwar li nżommu ħarsa bbilanċjata lejn l-​akkwistar tal-​għana kif intwera li huwa korrett?

⁸ Ikkunsidra ftit eżempji. Illum, suċċess fil-​ħajja hu normalment imkejjel b’termini finanzjarji. Iktar ma wieħed jaqlaʼ, iktar jitqies bħala li rnexxa. Il-​Bibbja, madankollu, twissi kontra li wieħed ipoġġi wisq enfasi fuq affarijiet materjali. L-​appostlu Pawlu kiteb: “Dawk li huma determinati li jkunu għonja jaqgħu f’tentazzjoni u nasba u ħafna xewqat bla sens u li jweġġgħu, li jixħtu lill-​bnedmin fil-​qerda u fir-​rovina. Għax l-​imħabba għall-​flus hija għerq għal kull xorta taʼ affarijiet li jweġġgħu, u billi rsistew għal din l-​imħabba xi wħud ġew żvijati mill-​fidi u nifdu lilhom infushom minn fuq s’isfel b’ħafna weġgħat.”−1 Timotew 6:9, 10; qabbel Mattew 6:24.

⁹ L-​esperjenza wriet kemm hija xierqa din it-​twissija. Psikologu taʼ klinika nnota: “Li ssir in-​numru 1 u sinjur ma jġagħlekx tħossok kuntent, sodisfatt, irrispettat u maħbub b’mod awtentiku.” Iva, dawk li jaħlu l-​enerġiji kollha tagħhom fil-​ġiri wara l-​għana taʼ spiss jispiċċaw iħossuhom imdejqin u frustrati. L-​Iskrittura, fil-​waqt li tirrikonoxxi l-​valur tal-​flus, tipponta lejn xi ħaġa bil-​wisq iżjed importanti: “Il-​għerf hu għal protezzjoni, l-​istess bħalma l-​flus huma għal protezzjoni; iżda l-​vantaġġ tal-​għarfien hu li l-​għerf innifsu jżomm ħajjin lis-​sidien tiegħu.”−Ekkleżjasti 7:12.

10. Għala għandna nagħtu kas il-​pariri tal-​Bibbja biex ingħassu s-​sħubijiet tagħna?

¹⁰ Il-​Bibbja fiha ħafna prinċipji bħal dawn. Ieħor hu: “Dak li qed jimxi mal-​għorrief se jsir għaref, iżda dak li qed jagħmilha mal-​istupidu se jaħbatha ħażin.” (Proverbji 13:20) Dan ukoll ġie ppruvat veru mill-​esperjenza. Pressjoni minn sħabhom wasslet lil xi żgħażagħ għas-​sokor, abbuż tad-​drogi, u immoralità. Kulmin jitħallat maʼ nies li jitkellmu baxx maż-​żmien isib lilu nnifsu juża kliem simili li jiddiżgustak. Ħafna jisirqu lill-​imgħallmin tagħhom għaliex ‘kulħadd hekk jagħmel.’ Verament, kif tgħid ukoll il-​Bibbja: “Sħubijiet ħżiena jħassru drawwiet utili.”−1 Korintin 15:33.

11. Studju psikoloġiku kif wera l-​għerf f’li wieħed isegwi r-​Regola tad-​Deheb?

¹¹ Wieħed mill-​iktar pariri famużi fil-​Bibbja hu dik li hi msejħa r-​Regola tad-​Deheb: “L-​affarijiet kollha, mela, li tridu l-​bnedmin jagħmlu lilkom, intom ukoll tridu tagħmluhom bl-​istess mod lilhom.” (Mattew 7:12) Li kieku l-​umanità segwiet din ir-​regola, id-​dinja kienet b’mod ċar tkun post aħjar. Iżda saħansitra jekk il-​bnedmin inġenerali ma jsegwux ir-​regola, huwa aħjar għalik individwalment li tagħmel dan. Għala? Għaliex aħna ġejna magħmulin biex nieħdu ħsieb taʼ oħrajn u nagħtu kas tagħhom. (Atti 20:35) Studju psikoloġiku magħmul fl-​Istati Uniti biex jistħarreġ kif in-​nies jirreaġixxu meta jkunu għenu oħrajn wasal għal din il-​konklużjoni: “Jidher, mela, illi li nieħdu ħsieb taʼ oħrajn huwa parti min-​natura umana daqs li nieħdu ħsieb tagħna nfusna.”−Mattew 22:39.

Il-​Parir tal-​Bibbja—Għaref b’Mod Uniku

12. Liema hi ħaġa waħda li tagħmel lill-​Bibbja unika?

¹² Illum, m’għandniex xi ngħidu, hemm ħafna sorsi taʼ pariri minbarra l-​Bibbja. Gazzetti jġorru kolonni taʼ pariri, u l-​ħwienet tal-​kotba mimlijin b’kotba taʼ għajnuna applikata mill-​individwu nnifsu. Barra minn dan, hemm psikologi, ‘counselors’ professjonali, u oħrajn li joffru parir f’oqsma differenti. Iżda l-​Bibbja hija unika f’minn tal-​inqas tliet aspetti. L-​ewwel, il-​parir tagħha hu dejjem taʼ benefiċdju. Qatt m’hu sempliċi teorija, u qatt ma jaħdem kontrina. Kulmin isegwi l-​pariri tal-​Bibbja jrid jaqbel mas-​salmista meta qal f’talba lil Alla: “It-​tfakkiriet tiegħek urew li huma taʼ min jafdahom ferm.”−Salm 93:5.

13. X’juri li l-​Bibbja hija fil-​wisgħa superjuri għal sorsi taʼ għerf uman?

¹³ It-​tieni, il-​Bibbja żammet fil-​prova taż-​żmien. (1 Pietru 1:25; Isaija 40:8) Pariri minn sorsi umani huma b’mod magħruf suġġetti għal tibdil, u dak li hu moda f’sena waħda taʼ spiss jiġi kkritikat fis-​sena taʼ wara. Madankollu, għalkemm il-​Bibbja tlestiet kważi 2,000 sena ilu, għad fiha l-​iktar pariri għorrief li jistgħu jinkisbu, u l-​kliem tagħha jistaʼ jiġi applikat universalment. Japplika bl-​istess effett kemm jekk ingħixu fl-​Afrika, fl-​Asja, fl-​Amerka t’Isfel jew taʼ Fuq, fl-​Ewropa, jew fil-​gżejjer tal-​baħar.

14. Il-​parir tal-​Kelma t’Alla b’liema mod jisboq lill-​oħrajn kollha?

¹⁴ Finalment, il-​firxa vasta tal-​pariri tal-​Bibbja ma ssibx bħalha. Proverbju fil-​Bibbja jgħid: “Jehovah innifsu jagħti l-​għerf,” u hi x’inhi l-​problema jew deċiżjoni li niffaċċjaw, hemm għerf fil-​Bibbja li jgħinna nsolvuha. (Proverbji 2:6) Tfal, adolexxenti, ġenituri, xjuħ, ħaddiema, imgħallmin, nies fl-​awtorità, kollha jsibu li l-​għerf fil-​Bibbja japplika għalihom. (Proverbji 4:11) Saħansitra meta niffaċċjaw sitwazzjonijiet li ma kinux magħrufin fi żmien Ġesù u l-​appostli tiegħu, il-​Bibbja tagħtina pariri li jirnexxu. Per eżempju, lura fl-​ewwel seklu, it-​tipjip tat-​tabakk ma kienx jeżisti fil-​Lvant Nofsani. Illum, huwa mifrux maʼ kullimkien. Madankollu, kulmin jagħti kas tal-​pariri tal-​Bibbja biex jevita milli jaqaʼ “taħt awtorità [jew kontroll] minn kwalunkwe ħaġa” u biex iżomm nadif minn “kull ħmieġ tal-​laħam u tal-​ispirtu” se jevita din id-​drawwa, li ssir vizzju li jeqred is-​saħħa.—1 Korintin 6:12; 2 Korintin 7:1.

Għall-​Ġid Dejjiemi Tagħna

15. Għala ħafna jgħidu li l-​Bibbja hi antikwata?

¹⁵ Veru, ħafna jgħidu li l-​Bibbja hi antikwata u ma tgħoddx għal dan is-​seklu 20. Madankollu, ir-​raġuni wisq probabbli hi li l-​Bibbja ma tgħidx dak li jridu jisimgħu huma. Li nsegwu pariri Skritturali jirriżulta f’benefiċċju dejjiemi għalina, iżda taʼ spiss jirrikjedi paċenzja, dixxiplina, u ċaħda tagħna nfusna—xeħtiet li m’humiex popolari f’dinja li tinkuraġġina biex infittxu gratifikazzjoni immedjata.—Proverbji 1:l-3.

16, 17. X’livelli għolja taʼ moralità sesswali twaqqaf il-​Bibbja, u kif ġew injorati fi żminijiet moderni?

¹⁶ Nieħdu l-​kwistjoni taʼ moralità sesswali. Livelli Skritturali huma stretti ħafna. L-​uniku post għal intimità sesswali hu fiż-​żwieġ, u kull intimità bħal din barra miż-​żwieġ hi pprojbita. Naqraw: “La ż-​żienja, la l-​idolatri, la l-​adulteri, la rġiel miżmumin għal għanijiet mhux naturali, la rġiel li jimteddu maʼ rġiel . . . ma se jirtu s-​saltna t’Alla.” (1 Korintin 6:9, 10) Barra minn dan, għall-​Kristjani l-​Bibbja tirrikjedi l-​monogamija, raġel wieħed għal mara waħda. (1 Timotew 3:2) U fil-​waqt li hemm każi estremi fejn id-​divorzju u s-​separazzjoni jistgħu jitħallew, il-​Bibbja tgħid li inġenerali r-​rabta taż-​żwieġ hija tul il-​ħajja kollha. Ġesù nnifsu qal: “Dak li ħalaqhom mill-​bidu għamilhom raġel u mara u qal, ‘Għal din ir-​raġuni raġel se jħalli lil missieru u lil ommu u se jingħaqad maʼ martu, u t-​tnejn se jkunu laħam wieħed’ . . . Mela m’humiex iżjed tnejn, imma laħam wieħed. Għalhekk, dak li Alla rabat f’madmad flimkien ħa ma jifirdu ebda bniedem.”−Mattew 19:4-6, 9; 1 Korintin 7:12-16.

¹⁷ Illum, dawn il-​livelli huma injorati minn ħafna nies. Prattiċi sesswali laxki huma ttollerati. Relazzjonijiet sesswali bejn “teenagers” li joħorġu flimkien huma meqjusin bħala normali. Li jgħixu flimkien mingħajr il-​benefiċċju taż-​żwieġ huwa aċċettat. Fost koppji miżżewġin, relazzjonijiet sesswali illeċiti minn xi ħadd mill-​miżżewġin huma ħaġa komuni. U d-​divorzju huwa epidemija kbira f’din id-​dinja moderna. Dawn il-​livelli laxki, madankollu, ma ġabux kuntentizza. Ir-​riżultati ħżiena taw prova li l-​Bibbja kellha raġun f’li tinsisti fuq livelli morali stretti.

18, 19. X’irriżulta għax maʼ kullimkien ġew injorati l-​livelli taʼ moralità taʼ Jehovah?

¹⁸ Ladies’ Home Journal qal: “L-​enfasi fuq is-​sess li kienet tipika fis-​snin sittin u fis-​snin sebgħin ġabet mhux kuntentizza umana infinita iżda miżerja umana serja.” Il-​“miżerja umana serja” li hu rreferut għaliha hawn tinkludi dik taʼ tfal feruti mentalment bid-​divorzju tal-​ġenituri tagħhom u dik taʼ adulti li jsofru wġigħ emozzjonali profond. Tinkludi wkoll żjieda fil-​familji b’ġenitur wieħed u epidemija taʼ tfajliet li jkollhom it-​trabi meta huma nfushom bil-​kemm ikunu għadhom ħarġu mit-​tfulija. Barra minn dan, tħaddan epidemija kbira taʼ mard trażmess sesswalment, bħalma huma infjammazzjoni ġenitali, gonorrhea, syphillis, chlamydia, u AIDS.

¹⁹ Minħabba dan kollu, professur tas-​soċjoloġija nnota: “Forsi aħna immaturajna biżżejjed biex nikkunsidraw jekk ikunx aħjar għalina lkoll li navvanzaw l-​astinenza qabel iż-​żwieġ bħala pjan taʼ azzjoni li hu l-​iktar favorevoli għall-​ħtiġijiet taċ-​ċittadini tagħna u għad-​dritt tagħhom għall-​ħelsien: ħelsien mill-​mard, ħelsien minn tqala mhix mixtieqa.” Il-​Bibbja b’mod korrett tistqarr: “Hieni l-​bniedem b’saħħtu li qiegħed lil Jehovah bħala l-​fiduċja tiegħu u li ma dawwarx wiċċu lejn nies li jisfidaw, u lanqas lejn dawk li jaqgħu għall-​gideb.” (Salm 40:4) Dawk li jafdaw fil-​għerf tal-​Bibbja ma jitqarrqux mill-​gideb taʼ dawk li jisfidaw il-​Bibbja u jgħidu li kodiċi morali iżjed laxka ġġib il-​kuntentizza. Il-​livelli għaqlin, għalkemm stretti, tal-​Bibbja huma l-​aqwa.

Problemi Diffiċli Fil-​Ħajja

20. Liema prinċipji tal-​Bibbja servew taʼ għajnuna għal dawk li jridu jiffaċċjaw faqar kbir fil-​ħajjiet tagħhom?

²⁰ Il-​għerf tal-​Bibbja jgħinna wkoll biex nittrattaw il-​problemi diffiċli li niffaċċjaw fil-​ħajja. Per eżempju, f’għadd taʼ pajjiżi, hemm Kristjani li jgħixu f’faqar kbir. Madankollu huma kapaċi jgħixu bil-​faqar tagħhom u xorta waħda jsibu l-​kuntentizza. Kif? Billi jsegwu l-​Kelma mnebbħa t’Alla. Huma jieħdu bis-​serjetà l-​kliem taʼ faraġ taʼ Salm 55:22: “Itfaʼ t-​tagħbija tiegħek fuq Jehovah innifsu, u hu nnifsu se jsostnik.” Huma jiddependu minn Alla għas-​saħħa biex jissaportu. Imbagħad huma japplikaw prinċipji Bibliċi u jevitaw drawwiet taʼ ħsara u taʼ ħala, bħat-​tipjip u s-​sokor. Huma beżlin, bħalma tirrikkmanda l-​Bibbja, u b’hekk taʼ spiss isibu li jistgħu jitimgħu l-​familji tagħhom meta nies għażżenin jew dawk li jċedu għad-​disperazzjoni ma jirnexxilhomx. (Proverbji 6:6-11; 10:26) Jerġaʼ, huma jagħtu kas tat-​twissija tal-​Bibbja: “Tgħirx għal dawk li jagħmlu n-​nuqqas taʼ tjieba.” (Salm 37:1) Huma ma jirrikorrux għal-​logħob tal-​azzard jew għal attivitajiet kriminali, bħall-​bejgħ tad-​drogi. Dawn l-​affarijiet jistgħu joffru “soluzzjoni” taʼ malajr għall-​problemi tagħhom, iżda l-​frott dejjiemi hu qares.

21, 22. (a) Waħda mara Kristjana kif ħadet għajnuna u faraġ mill-​Bibbja? (b) Liema fatt ieħor dwar il-​Bibbja jgħinna nirrealizzaw li hija l-​Kelma t’Alla?

²¹ Li tiġi segwita l-​Bibbja veru jgħin lil dawk li huma fqar ħafna? Iva, bħalma juru ħafna u ħafna esperjenzi. Armla Kristjana fl-​Asja tikteb: “Għalkemm ngħix f’xifer il-​faqar, jien m’inix irrabjata jew imdejqa. Il-​verità tal-​Bibbja timlini b’ħarsa pożittiva.” Hi tgħid li wegħda notevoli mogħtija minn Ġesù ġiet imwettqa fil-​każ tagħha. Ġesù qal: “Ibqgħu, mela, fittxu l-​ewwel is-​saltna u t-​tjieba tiegħu, u dawn l-​affarijiet l-​oħra kollha se jiżdidulkom.” (Mattew 6:33) Hi tixhed li billi tpoġġi s-​servizz tagħha lejn Alla l-​ewwel fil-​ħajja tagħha, hi dejjem tirċievi, f’xi mod jew ieħor, in-​neċessitajiet materjali tal-​ħajja. U s-​servizz Kristjan tagħha jagħtiha dinjità u mira fil-​ħajja li tgħinha tissaporti l-​faqar tagħha.

²² Verament, il-​profondità tal-​għerf tagħha turi li l-​Bibbja tassew hija ll-Kelma t’Alla. L-​ebda ktieb magħmul biss mill-​bnedmin qatt ma jistaʼ jkopri tant aspetti differenti tal-​ħajja u jkollu tant dehen profond u jkun tant eżatt b’mod konsistenti. Iżda hemm fatt ieħor dwar il-​Bibbja li juri l-​oriġini divina tagħha. Għandha l-​qawwa li tbiddel in-​nies għall-​aħjar. Se niddiskutu dan fl-​artiklu li jmiss.

Tistaʼ Tispjega?

◻ B’liema mod ix-​Xhieda taʼ Jehovah huma mberkin għax jaċċettaw il-​Bibbja bħala l-​Kelma t’Alla?

◻ Bħala nies li nemmnu fil-​Kelma t’Alla, x’obbligu għandna, u l-​kondotta tagħna kif tistaʼ tgħinna biex inwettqu dan l-​obbligu?

◻ X’jagħmel lill-​pariri għaqlin tal-​Bibbja superjuri għal sempliċi pariri umani?

◻ Liema huma xi eżempji li juru l-​profondità tal-​għerf tal-​Bibbja?