Tistaʼ Din l-Ikla Jkollha Tifsira Għalik?

QAMAR kwinta jitfaʼ d-​dawl baxx tiegħu fuq l-​art. F’kamra taʼ fuq f’dar f’Ġerusalemm tal-​qedem, 12-il raġel huma miġburin madwar mejda. Ħdax qegħdin mitlufin jisimgħu hekk kif l-​Imgħallem tagħhom jintroduċi osservanza sinjifikanti u jitkellem kliem taʼ importanza kbira. Rakkont wieħed igħid:

“Ġesù [Kristu] ħa ħobża u, wara li qal barka, qasamha u, waqt li taha lid-​dixxipli, qal: ‘Ħudu, kulu. Dan ifisser il-​ġisem tiegħi.’ Ukoll, hu ħa kies u, wara li iżża ħajr, tahulhom, igħid: ‘Ixorbu minnu, intom ilkoll; għax dan ifisser id-​“demm tal-​patt” tiegħi, li għandu jixxerred għal ħafna għall-​maħfra tad-​dnubiet. Imma ngħidilkom, Minn issa b’ebda mod ma jien se nixrob minn dan il-​prodott tad-​dielja sa dak il-​jum meta nixorbu ġdid magħkom fis-​saltna taʼ Missieri.’ Fl-​aħħar, wara li kantaw tifħir, ħarġu lejn il-​Muntanja taż-​Żebbuġ.”—Mattew 26:26-30.

Dan seħħ wara nżul ix-​xemx tal-​14-il jum tax-​xahar Lhudi Nisan fis-​sena 33 tal-​Era Komuni tagħna. Ġesù u l-​appostli tiegħu kienu għadhom kif iċċelebraw il-​Qbiż bħala tifkira tal-​ħelsien taʼ Iżrael mill-​iskjavitù Eġizzjan fis-​seklu 16 Q.E.K. Kristu kien ħallih jitlaq lil Ġuda l-​Iskarjota, li kien wasal biex jittradih. B’hekk, Ġesù u l-​11-il appostlu leali biss kienu preżenti.

Din l-​ikla taʼ fil-​għaxija ma kinetx tkomplija tal-​Qbiż Lhudi. Kienet xi ħaġa ġdida li bdiet tissejjaħ l-​Ikla taʼ fil-​Għaxija tal-​Mulej. Rigward din l-​osservanza, Ġesù kkmanda lis-​segwaċi tiegħu: “Ibqgħu agħmlu dan b’tifkira tiegħi.” (Luqa 22:19, 20; 1 Korintin 11:24-26) Għala qalu dan? U din il-​ġrajja li ilha daqs dawn sekli kif jistaʼ jkun li għandha tifsira għalik?