Meta Jaqrawha u Kif Jibbenefikaw
Kmieni Fil-Għodu:
Koppja miżżewġa, li t-tnejn li huma joħorġu għax-xogħol, iddeċidew li jqumu għaxar minuti biss iktar kmieni kull fil-għodu u li jużaw dak il-ħin biex jaqraw il-Bibbja flimkien qabel ma joħorġu jiġru ’l barra mid-dar. Dak li jaqraw jipprovdi bażi għall-konversazzjoni li tibni wara li jitilqu mid-dar.
Anzjan fin-Niġerja juża l-programm fl-iskeda taʼ l-Iskola tal-Ministeru Teokratiku bħala l-bażi għall-qari tal-Bibbja mal-familja fid-dar tiegħu. Huma jaqraw porzjon minnha kuljum wara d-diskussjoni tagħhom tat-test tal-ġurnata, ġeneralment fil-għodu. It-tfal jiġu mitlubin darba kull wieħed biex jaqraw xi ftit mis-sezzjoni assenjata. Imbagħad jiġu mistednin biex jistaqsu mistoqsijiet dwar il-versi li jkunu nqraw.
Mara tad-dar fil-Ġappun qrat il-Bibbja kollha mill-bidu sa l-aħħar darba fis-sena mill-1985 ’l hawn. Il-programm tagħha huwa li taqra għal 20 sa 30 minuta billi tibda fil-5.00 a.m. kuljum. Rigward il-benefiċċji, tgħid: “Il-fidi tiegħi ġiet imsaħħa. Dan jgħinni ninsa l-marda tiegħi u nikkonċentra fuq it-tama tal-Ġenna.”
Oħt li ilha pijuniera għal 30 sena imma li r-raġel tagħha mhux Xhud tqum fil-ħamsa kull fil-għodu biex tagħmel il-qari tagħha tal-Bibbja. Il-programm tagħha jirrikjedi li taqra madwar erbaʼ paġni mill-Iskrittura Ebrajka, kapitlu mill-Iskrittura Griega Kristjana, u vers mill-Proverbji. Hi qrat il-Bibbja kollha kemm hi kull sena mill-1959 ’l hawn. Hi tgħid: “Bħala riżultat tal-qari tiegħi, inħossni maħbuba minn Jehovah . . . Nirċievi inkuraġġiment, faraġ, u korrezzjoni.” Hi żżid: “Li naqra l-Bibbja huwa bħal li kieku Jehovah qiegħed jerġaʼ jagħti l-ħabel lil ħajti kuljum.”
Oħt li saret taf il-verità f’pajjiż fejn l-attività tax-Xhieda taʼ Jehovah kienet ipprojbita wkoll għandha raġel li jopponi t-twemmin tagħha. Hi jirnexxilha tagħmel il-qari tal-Bibbja tagħha mit-Tnejn sal-Ġimgħa, bejn is-6.00 u s-7.00 a.m. Dan taha saħħa ġewwinija. Billi tirrifletti dwar kif effettwaha l-qari tagħha, hi tgħid: “Nitgħallmu nħobbu lil Jehovah u lil Ġesù u biex ngħixu henjin, saħansitra bi problemi u diffikultajiet, billi nafu li l-wegħdi taʼ Jehovah ma jfallux.”
Oħt li attendiet l-Iskola tas-Servizz taʼ Pijunier kienet determinata li taġixxi skond il-parir mogħti hemmhekk biex tagħmel il-qari tal-Bibbja drawwa taʼ kuljum. Għall-ewwel, irnexxielha tagħmlu bejn il-5.00 u s-6.00 a.m. Meta minħabba bidla fl-impjieg ma setgħetx tkompli b’dak, hi bidlet għal bejn id-9.00 u l-10.00 p.m. Meta nqalgħu sitwazzjonijiet oħrajn taʼ sfida, hi tgħid, “Bqajt naġġusta l-iskeda tiegħi skond iċ-ċirkostanzi.”
Iktar Tard Fil-Ġurnata:
Żewġt aħwa nisa li huma wkoll ħut xulxin u li huma membri tal-familja Betel tal-Brażil għandhom id-drawwa li jaqraw il-Bibbja flimkien għal madwar 20 minuta kuljum wara l-ikla taʼ nofs in-nhar. Huma qraw il-Bibbja kollha kemm hi madwar 25 darba; u madankollu jiktbu: “Dejjem insibu xi ħaġa ġdida, u għalhekk il-qari tal-Bibbja qatt ma jsir monotonu.”
Oħt li għadha xebba fil-Ġappun irrealizzat li għalkemm trabbiet bħala Xhud, ma kenitx taf l-Iskrittura sew; meta saret pijuniera, kienet determinata li taqra l-Bibbja regolarment. Issa hi tagħmel il-qari tagħha għall-Iskola tal-Ministeru Teokratiku waqt li tkun qiegħda tivvjaġġa lejn l-isptar għall-kura ġurnata fil-ġimgħa. Iktar tard, id-dar, tagħmel ir-riċerka dwar dan. Lejn it-tmiem tal-ġimgħa, tagħmel iktar qari tal-Bibbja, billi tagħżel il-kotba skond l-ordni kif kienu miktubin.
Tifel taʼ 13-il sena li diġà qara l-Bibbja kollha kemm hi tliet darbiet qiegħed bħalissa jaqra kapitlu kuljum meta jiġi lura d-dar mill-iskola. Dan, hu jgħid, għenu ‘biex iħoss iktar imħabba għal Jehovah.’
Xhud li għandu skeda mimlija bħala raġel tax-xogħol, anzjan, miżżewweġ, u missier jismaʼ l-cassettes tal-Bibbja waqt li jkun qiegħed jivvjaġġa għax-xogħol fuq il-ferrovija. Imbagħad id-dar jagħmel il-qari persunali tiegħu taʼ l-istess materjal.
Flimkien mal-qari persunali tagħha, pijuniera fi Franza tismaʼ l-cassettes tal-Bibbja meta tkun qiegħda tħejji l-ikel, meta tkun qiegħda ssuq, meta tkun għaddejja minn żminijiet diffiċli, jew sempliċement għall-gost.
Pijunier taʼ 21 sena fil-Ġappun jiftakar li ommu nsistiet li hu jdaħħal fih xi ħaġa spiritwali kull ġurnata, u ilu jaqra l-Bibbja kuljum, għalkemm mhux dejjem fl-istess ħin, mindu kellu tliet snin. Wara li jaqra l-porzjon li jkun għażel għall-ġurnata, jaċċerta ruħu li jerġaʼ jaqra l-versi tal-qofol, u mbagħad jieħu ftit minuti biex mentalment jerġaʼ jgħaddi dak li jkun qara.
Xhud oħra, pijuniera, qrat il-Bibbja kollha kemm hi madwar għaxar darbiet f’dawn l-aħħar 12-il sena. Ir-raġel tagħha m’huwiex xhud, u għalhekk hi għandha skeda li tagħmel il-qari tagħha wara nofs in-nhar.
Fil-Għaxija:
Anzjan li hu pijunier regulari fil-Ġappun u li jaqra mill-Bibbja tiegħu kull fil-għaxija qabel ma jidħol fis-sodda għamel dan għal dawn l-aħħar tmien snin. Hu jgħid: “Jien għandi partikolarment għal qalbi skritturi li jindikaw kif jaħsibha Jehovah, kif iħossu dwar kwistjonijiet, u kif jittratta mas-sitwazzjonijiet. Billi nimmedita fuq dawn l-iskritturi, ġejt mgħejjun biex nagħmel il-mod taʼ ħsieb taʼ Jehovah tiegħi stess u biex ngħin lill-ħuti Kristjani nisa u rġiel u lill-membri tal-familja tiegħi.”
Anzjan fi Franza ilu jaqra l-Bibbja siegħa kull fil-għaxija mill-1979 ’l hawn. Hu taʼ spiss ikollu xi ħames jew sitt traduzzjonijiet quddiemu biex ikun jistaʼ jqabbilhom. Hu jgħid li l-qari bir-reqqa tiegħu għenu biex jinduna “kif japplika l-għarfien tal-Bibbja f’sitwazzjonijiet li jiġu minn jum għal jum.” Dan ukoll għenu biex ikun iktar effettiv meta jagħti parir mill-Iskrittura.
Għal dawn l-aħħar 28 sena, ħu min-Niġerja ħadha drawwa li fil-għaxija jaqra t-test taʼ l-Iskrittura pprovdut fl-Examining the Scriptures Daily għad-diskussjoni l-għada fil-għodu. Flimkien maʼ dak, jaqra l-kapitlu kollu kemm hu mill-Bibbja minfejn ikun meħud it-test. Wara li żżewweġ, kompla din id-drawwa, billi jaqra u jiddiskuti l-materjal maʼ martu.
Tfajla taʼ taħt l-għoxrin sena li l-ġenituri tagħha m’humiex Xhieda ħaditha drawwa li taqra għal ħames jew għaxar minuti kull fil-għaxija qabel torqod. Dawk huma minuti prezzjużi għaliha, u titlob kemm qabel kif ukoll wara l-qari. Il-mira tagħha hija li tkun taf il-messaġġ li Jehovah idderieġa lil kull kittieb tal-Bibbja biex jiddokumentah.
Ħu miżżewweġ, fis-servizz taʼ Betel, jgħid li qara l-Bibbja darba kull sena għal dawn l-aħħar tmien snin. Jaqra għal 20 sa 30 minuta qabel ma jidħol jorqod bil-lejl. Saħansitra meta jkun għajjien ħafna, isib li jekk jidħol fis-sodda mingħajr ma jagħmel il-qari, ma jkunx jistaʼ jorqod. Ikollu jqum u jieħu ħsieb taʼ dak il-bżonn spiritwali. (w95 5/1)