Leħħiet taʼ Dawl—Kbar u Żgħar it-​Tieni Parti

“Bid-​dawl minnek nistgħu naraw id-​dawl.”—SALM 36:9.

1. Liema sforz bikri sar biex jiġi mifhum is-​simboliżmu tal-​ktieb taʼ Rivelazzjoni?

IL-​KTIEB Bibliku taʼ Rivelazzjoni qajjem il-​kurżità fil-​Kristjani sa minn żminijiet bikrin. Jipprovdi eżempju mill-​aħjar taʼ kif id-​dawl tal-​verità jsir dejjem iżjed qawwi. Fl-​1917, in-​nies taʼ Jehovah ippubblikaw spegjazzjoni taʼ Rivelazzjoni fil-​ktieb The Finished Mystery. Dan bla biżaʼ kixef lill-​mexxejja reliġjużi u politiċi tal-​Kristjaneżmu, imma ħafna mill-​ispjegazzjonijiet tiegħu kienu mislufin minn diversi sorsi. Xorta waħda, The Finished Mystery serva biex jittestja l-​lealtà taʼ l-​Istudenti tal-​Bibbja lejn il-​mezz viżibbli taʼ komunikazzjoni li Jehovah kien qiegħed juża.

2. L-​artiklu “Birth of the Nation” xeħet liema dawl fuq il-​ktieb taʼ Rivelazzjoni?

² Leħħa taʼ dawl notevoli iddiet fuq il-​ktieb taʼ Rivelazzjoni bl-​ippubblikar taʼ l-​artiklu “Birth of the Nation” f’The Watch Tower taʼ l-​1 taʼ Marzu, 1925. Kien maħsub li Rivelazzjoni kapitlu 12 iddeskriva gwerra bejn Ruma pagana u Ruma papali, bit-​tarbija tifel tirrappreżenta l-​papat. Imma dak l-​artiklu wera li Rivelazzjoni 11:15-18 kellu rabta mat-​tifsir taʼ kapitlu 12, billi indika li għandu x’jaqsam mat-​twelid tas-​Saltna t’Alla.

3. Liema pubblikazzjonijiet xeħtu dawl miżjud fuq Rivelazzjoni?

³ Dan kollu wassal għal fehma bil-​wisq iżjed ċara tar-​Rivelazzjoni li ġiet bl-​ippubblikar taʼ Light, f’żewġ volumi, fl-​1930. Jerġaʼ iżjed irfinar deher f’“Babylon the Great Has Fallen!” God’s Kingdom Rules! (1963) u “Then is Finished the Mystery of God” (1969). Madankollu, kien għad hemm iżjed x’wieħed jitgħallem dwar il-​ktieb profetiku taʼ Rivelazzjoni. Iva, dawl iżjed qawwi idda fuqu fl-​1988, bil-​pubblikazzjoni taʼ Revelation​—Its Grand Climax At Hand! Il-​muftieħ għal dan it-​tidwil progressiv jistaʼ jingħad li huwa l-​fatt li l-​profezija taʼ Rivelazzjoni tapplika f’“jum il-​Mulej,” li beda fl-​1914. (Rivelazzjoni 1:10) Il-​ktieb taʼ Rivelazzjoni għalhekk se jkun mifhum b’mod iżjed ċar hekk kif dak il-​jum jipprogressa.

“Il-​Potenzi Iktar Għoljin” Iċċarati

4, 5. (a) L-​Istudenti tal-​Bibbja kif kienu jqisu Rumani 13:1? (b) X’dehret iktar tard li kienet il-​pożizzjoni Skritturali rigward “il-​potenzi iktar għoljin”?

⁴ Leħħa qawwija taʼ dawl dehret fl-​1962 f’konnessjoni maʼ Rumani 13:1, li jgħid: “Ħalli kull ruħ tkun suġġetta lejn il-​potenzi iktar għoljin [“awtoritajiet superjuri,” New World Translation].” (King James Version) L-​Istudenti tal-​Bibbja bikrin fehmu li “l-​potenzi iktar għoljin” imsemmijin hemmhekk irreferew għal awtoritajiet dinjin. Ħadu din l-​iskrittura li tfisser li jekk Kristjan jiġi ngaġġat fi żmien taʼ gwerra, ikun obbligat li jilbes l-​uniformi, iżomm xkubetta fuq spalltu, u jmur fuq il-​front, lejn it-​trinek. Ħassew li ladarba Kristjan ma setax joqtol bniedem bħalu, ikun imġiegħel jispara fl-​ajru jekk jiġi dahru mal-​ħajt.a

⁵ The Watchtower tal-​15 taʼ Novembru u taʼ l-​1 taʼ Diċembru, 1962, tefaʼ dawl ċar fuq is-​suġġett waqt li ddiskuta l-​kliem taʼ Ġesù f’Mattew 22:21: “Ħallsu lura . . . għalhekk, l-​affarijiet taʼ Ċesri lil Ċesri, imma l-​affarijiet t’Alla lil Alla.” Relevanti kien il-​kliem taʼ l-​appostli f’Atti 5:29: “Aħna rridu nobdu lil Alla bħala ħakkiem iktar milli lill-​bnedmin.” Il-​Kristjani huma suġġetti lejn Ċesri​—“il-​potenzi iktar għoljin”—​biss dment li dan ma jirrikjedix li l-​Kristjan imur kontra l-​liġi t’Alla. Sottomissjoni lejn Ċesri dehret li kienet relattiva, mhux assoluta. Il-​Kristjani jħallsu lura lil Ċesri biss dak li m’huwiex f’konflitt mal-​ħtiġijiet t’Alla. Kemm kien sodisfaċenti li jkollok dawl ċar fuq dak is-​suġġett!

Leħħiet Taʼ Dawl Fuq Kwistjonijiet Organizzazzjonali

6. (a) Biex iżommu ’l bogħod mill-​istruttura ġerarkika prevalenti fil-​Kristjaneżmu, liema prinċipju ġie addottat? (b) Finalment x’deher li kien il-​mod korrett biex jintgħażlu dawk li għandhom f’idejhom l-​indokrar tal-​kongregazzjoni?

⁶ Kien hemm il-​kwistjoni dwar min għandu jaqdi bħala anzjani u djakni fil-​kongregazzjonijiet. Biex tinżamm ’il bogħod l-​istruttura ġerarkika prevalenti fil-​Kristjaneżmu, ġie konkluż li dawn għandhom jiġu eletti b’mod demokratiku bil-​vot tal-​membri taʼ kull kongregazzjoni. Imma dawl miżjud misjub f’The Watchtower taʼ l-​1 taʼ Settembru u l-​15 t’Ottubru, 1932, wera li l-​Iskrittura ma tipprovdix bażi għal anzjani eletti. Mela dawn ġew mibdulin maʼ kumitat tas-​servizz, u direttur tas-​servizz magħżul mis-​Soċjetà.

7. Leħħiet taʼ dawl irriżultaw f’liema titjib fil-​mod kif qaddejja fil-​kongregazzjoni kienu jinħatru?

⁷ The Watchtower taʼ l-​1 taʼ Ġunju u tal-​15 taʼ Ġunju, 1938, kien fih leħħiet taʼ dawl li juru li l-​qaddejja fil-​kongregazzjoni kellhom ikunu, mhux eletti, imma maħturin, jiġifieri maħturin b’mod teokratiku. Fl-​1971 leħħa oħra taʼ dawl uriet li kull kongregazzjoni ma kellhiex tiġi diretta biss minn qaddej wieħed tal-​kongregazzjoni. Minflok, kull waħda għandha jkollha ġemgħa t’anzjani, jew indokraturi, assenjati mill-​Ġemgħa li Tiggverna tax-​Xhieda taʼ Jehovah. Mela bid-​dawl li dejjem jiżdied matul xi 40 sena, sar evidenti li anzjani kif ukoll djakni, issa magħrufin bħala qaddejja ministerjali, għandhom jinħatru mill-​“irsir leali u diskret,” permezz tal-​Ġemgħa li Tiggverna tiegħu. (Mattew 24:45-47) Dan kien fi qbil maʼ dak li seħħ fi żminijiet appostoliċi. Irġiel bħal Timotew u Titus ġew maħturin bħala indokraturi mill-​ġemgħa li tiggverna taʼ l-​ewwel seklu. (1 Timotew 3:1-7; 5:22; Titus 1:5-9) Dan kollu huwa bi twettieq notevoli taʼ Isaija 60:17: “Minflok ir-​ram se ndaħħal id-​deheb, u minflok il-​ħadid se ndaħħal il-​fidda, u minflok l-​injam, ram, u minflok il-​ġebel, ħadid; u se naħtar il-​paċi bħala indokraturi tiegħek u t-​tjieba bħala dawk li jagħtuk ix-​xogħol.”

8. (a) Il-​verità li dejjem tiżdied ġabet liema titjib fil-​mod kif is-​Soċjetà kienet topera? (b) X’inhuma l-​kumitati tal-​Ġemgħa li Tiggverna, u liema huma l-​isferi rispettivi tagħhom t’attività jew indokrar?

⁸ Kien hemm ukoll il-​kwistjoni taʼ kif topera l-​Watch Tower Society. Għal ħafna snin il-​Ġemgħa li Tiggverna tax-​Xhieda taʼ Jehovah kienet sinonima mal-​bord tad-​diretturi tal-​Watch Tower Bible and Tract Society of Pennsylvania, u kollox kien fil-​biċċa l-​kbira f’idejn il-​president tagħha. Bħalma huwa muri fin-​1977 Yearbook of Jehovah’s Witnesses (paġni 258-9), fl-​1976 il-​Ġemgħa li Tiggverna bdiet tiffunzjona b’sitt kumitati, kull wieħed assenjat biex jieħu ħsieb ċerti aspetti tax-xogħol dinji. Il-​Kumitat tal-​Personell jittratta maʼ kwistjonijiet tal-​personell, inklużi l-​interessi taʼ dawk kollha li jaqdu fil-​familja dinjija taʼ Betel. Il-​Kumitat taʼ l-​Ippubblikar jieħu ħsieb il-​kwistjonijiet sekulari u legali kollha, bħalma huma propjetà u stampâr. Il-​Kumitat tas-​Servizz jikkonċerna ruħu bix-​xogħol taʼ għoti taʼ xiehda u jissorvelja indokraturi li jivvjaġġaw, pijunieri, u l-​attivitajiet tal-​pubblikaturi tal-​kongregazzjoni. Il-​Kumitat tat-​Tagħlim huwa responsabbli għal-​laqgħat tal-​kongregazzjoni, ġranet speċjali t’assembleat, assembleat tas-​circuit, u konvenzjonijiet distrettwali u internazzjonali kif ukoll l-​iskejjel diversi għat-​tagħlim spiritwali tal-​poplu t’Alla. Il-​Kumitat tal-​Kitba jissorvelja l-​preparazzjoni u t-​traduzzjoni taʼ pubblikazzjonijiet f’kull għamla, billi jkun ċert li kollox huwa fi qbil maʼ l-​Iskrittura. Il-​Kumitat taċ-​Chairman jieħu ħsieb xi emerġenzi u kwistjonijiet urġenti oħrajn. Ukoll fis-​snin sebgħin, uffiċċji tal-​fergħat tal-​Watch Tower Society bdew jiġu ddireġuti minn kumitat minflok minn indokratur.b

Dawl Relatat Maʼ Kondotta Kristjana

9. Id-​dawl tal-​verità kif effettwa r-​relazzjoni taʼ Kristjani mal-​gvernijiet tad-​dinja?

⁹ Ħafna leħħiet taʼ dawl kellhom x’jaqsmu maʼ kondotta Kristjana. Per eżempju, ikkunsidra l-​kwistjoni tan-​newtralità. Leħħa qawwija taʼ dawl b’mod partikulari iddiet fuq dan is-​suġġett fl-​artiklu “Neutrality” li deher f’The Watchtower taʼ l-​1 taʼ Novembru, 1939. Kemm kien f’waqtu, billi ġie eżatt wara l-​bidu tat-​Tieni Gwerra Dinjija! L-​artiklu ddefinixxa n-​newtralità u wera li l-​Kristjani ma jridux jinvolvu ruħhom fi kwistjonijiet politiċi jew konfrontazzjonijiet bejn il-​ġnus. (Mikea 4:3, 5; Ġwann 17:14, 16) Dan huwa fattur għala huma jiġu mibgħudin mill-​ġnus kollha. (Mattew 24:9) Il-​battalji taʼ Iżrael tal-​qedem ma jipprovdu ebda preċedent għall-​Kristjani, bħalma Ġesù jagħmel ċar f’Mattew 26:52. Iktar minn hekk, l-​ebda ġens politiku llum m’huwa teokrazija, maħkum minn Alla, bħalma kien Iżrael tal-​qedem.

10. Leħħiet taʼ dawl x’irrivelaw rigward kif il-​Kristjani għandhom iqisu d-​demm?

¹⁰ Dawl idda wkoll fuq is-​santità tad-​demm. L-​Istudenti tal-​Bibbja ħasbu li l-​projbizzjoni kontra li jittiekel id-​demm, f’Atti 15:28, 29, kienet limitata għal Kristjani Lhud. Madankollu, Atti 21:25 juri li fi żminijiet appostoliċi dan il-​kmand kien applikat ukoll għal dawk mill-​ġnus li saru kredenti. Mela s-​santità tad-​demm tapplika għall-​Kristjani kollha, bħalma huwa muri f’The Watchtower taʼ l-​1 taʼ Lulju, 1945. Dak ifisser mhux biss li tirrifjuta li tiekol demm taʼ l-​annimali, bħal fil-​mazzit, imma wkoll li tastjeni minn demm uman, bħal fil-​każ taʼ trasfużjonijiet tad-​demm.

11. X’ġie mifhum rigward il-​ħarsa tal-​Kristjan dwar l-​użu tat-​tabakk?

¹¹ Bħala riżultat taʼ dawl miżjud, drawwiet li qabel kienu sempliċement jitkerrhulhom iktar tard ġew trattati bi gravità xierqa. Eżempju taʼ dan kien f’konnessjoni maʼ l-​użu tat-​tabakk. F’Zion’s Watch Tower taʼ l-​1 t’Awissu, 1895, Ħuna Russell ġibed l-​attenzjoni lejn 1 Korintin 10:31 u 2 Korintin 7:1 u kiteb: “Ma nistax nara kif se jkun għall-​glorja t’Alla, jew għall-​profitt tiegħu stess, għal kwalunkwe Kristjan li juża t-​tabakk taħt kwalunkwe għamla.” Mill-​1973 ’l hawn ġie mifhum b’mod ċar li l-​ebda bniedem li juża t-​tabakk ma jistaʼ jkun wieħed mix-​Xhieda taʼ Jehovah. Fl-​1976 ġie kkjarifikat li ebda Xhud ma jistaʼ jkun impjegat f’xi stabbiliment tal-​logħob taʼ l-​azzard u jibqaʼ jkollu waqfa tajba fil-​kongregazzjoni.

Irfinar Ieħor

12. (a) Leħħa taʼ dawl x’irrivelat dwar l-​għadd taʼ mfietaħ tas-​Saltna fdati lil Pietru? (b) X’kienu ċ-​ċirkostanzi meta Pietru uża kull wieħed mill-​imfietaħ?

¹² Kien hemm ukoll dawl miżjud fuq l-​għadd taʼ mfietaħ simboliċi li Ġesù ta lil Pietru. L-​Istudenti tal-​Bibbja sostnew li Pietru rċieva żewġt imfietaħ li fetħu t-​triq għan-​nies biex isiru werrieta tas-​Saltna​—wieħed għal-​Lhud użat f’Pentekoste tas-​sena 33 E.K., u l-​ieħor għall-​Ġentili, użat għall-​ewwel darba fis-​sena 36 E.K. meta Pietru ppriedka lil Korneljus. (Atti 2:14-41; 10:34-48) Maż-​żmien, deher li kien hemm it-​tielet grupp involut​—is-​Samaritani. Pietru uża t-​tieni muftieħ meta fetaħ l-​opportunità tas-​Saltna lilhom. (Atti 8:14-17) B’hekk, it-​tielet muftieħ intuża meta Pietru ppriedka lil Korneljus.​—It-​Torri Taʼ L-​Għassa, taʼ l-​1 taʼ Diċembru, 1979, paġni 5-10, 14.

13. Leħħiet taʼ dawl x’irrivelaw dwar l-​imqajel tan-​ngħaġ imsemmijin fi Ġwann kapitlu 10?

¹³ Minn raġġ taʼ dawl ieħor, deher li Ġesù rrefera mhux biss għal żewġ imma għal tlett imqajel tan-​ngħaġ. (Ġwann, kapitlu 10) Dawn kienu (1) il-​maqjel tan-​ngħaġ Lhudi li tiegħu Ġwanni l-​Għammied kien il-​bewwieb, (2) il-​maqjel taʼ werrieta tas-​Saltna midlukin, u (3) il-​maqjel tan-​“ngħaġ oħrajn,” li għandhom tama għall-​art.—Ġwann 10:2, 3, 15, 16; It-​Torri Taʼ L-​Għassa, tal-​15 t’April, 1984, paġni 7-16.

14. Dawl miżjud kif ikkjarifika l-​affarijiet rigward il-​bidu tal-​Ġublew antitipiku?

¹⁴ Il-​fehma tal-​Ġublew antitipiku wkoll irċeviet xi kjarifikazzjoni. Taħt il-​Liġi, kull 50 sena kienet tkun Ġublew grandjuż, li fih l-​affarijiet kienu jingħataw lura lis-​sidien oriġinali tagħhom. (Levitiku 25:10) Għal żmien twil kien mifhum li dan kien jiffigura bil-​quddiem ir-​Renju t’Elf Sena taʼ Kristu. Fi żminijiet iżjed riċenti, madankollu, deher li l-​Ġublew antitipiku fil-​fatt beda f’Pentekoste tas-​sena 33 E.K., meta dawk li rċevew l-​ispirtu qaddis imferraʼ ġew meħlusin mill-​jasar għall-​patt tal-​Liġi Mosajka.​—It-​Torri Taʼ L-​Għassa, taʼ l-​1 t’April, 1987, paġni 10-20.

Dawl Miżjud Fuq Terminoloġija

15. Liema dawl ġie mixħut fuq l-​użu tal-​kelma “pjan”?

¹⁵ “Il-​kongregatur fittex li jsib il-​kliem li jgħaxxaq u l-​kitba taʼ kliem korrett tal-​verità.” (Ekkleżjasti 12:10) Dan il-​kliem jistaʼ tassew jiġi applikat għas-​suġġett preżenti tagħna, għax dawl idda mhux biss fuq kwistjonijiet importanti bħalma huma d-​duttrina u l-​kondotta imma wkoll fuq terminoloġija Kristjana u t-​tifsira eżatta tagħha. Per eżempju, fost l-​Istudenti tal-​Bibbja, wieħed mill-​iktar pubblikazzjonijiet maħbubin kien l-​ewwel volum taʼ Studies in the Scriptures, intitolat The Divine Plan of the Ages. Madankollu, maż-​żmien, ġie rrealizzat li l-​Kelma t’Alla titkellem biss dwar il-​bnedmin bħala li jagħmlu pjanijiet. (Proverbji 19:21) L-​Iskrittura qatt ma titkellem dwar Jehovah bħala li jippjana. Hu m’għandux bżonn jippjana. Dak kollu li huwa l-​iskop tiegħu żgur li se jirnexxi minħabba l-​għerf u l-​qawwa infiniti tiegħu, saħansitra bħalma naqraw f’Efesin 1:9, 10: “Huwa skond il-​pjaċir tajjeb tiegħu li hu ħoloq skop fih innifsu għal amministrazzjoni mal-​limitu sħiħ taż-​żminijiet maħturin.” Mela deher bil-​mod il-​mod li t-​terminu “skop” huwa l-​wieħed iżjed addattat meta nirreferu għal Jehovah.

16. Bil-​mod il-​mod x’dehret li kienet il-​fehma korretta taʼ Luqa 2:14?

¹⁶ Imbagħad kien hemm il-​kwistjoni tal-​ksib taʼ fehma iktar ċara taʼ Luqa 2:14. Skond il-​King James Version, dan jaqra: “Glorja ’l Alla fl-​iktar għoli, u fuq l-​art paċi, rieda tajba lejn il-​bnedmin.” Deher li dan ma kienx jesprimi l-​ħsieb korrett, għax ir-​rieda tajba t’Alla m’hijiex espressa lejn dawk mill-​agħar. Ix-​Xhieda għalhekk qiesu dan bħala kwistjoni taʼ paċi lil bnedmin li kienu taʼ rieda tajba lejn Alla. B’hekk baqgħu jirreferu għal dawk interessati fil-​Bibbja bħala persuni taʼ rieda tajba. Imma mbagħad ġie mifhum li dak li kien involut kien rieda tajba, mhux min-​naħa tal-​bnedmin, imma min-​naħa t’Alla. B’hekk, in-​nota taʼ taħt fuq Luqa 2:14 fin-​New World Translation titkellem dwar “bnedmin li lilhom hu [Alla] japprova.” Il-​Kristjani kollha li qegħdin jgħixu fi qbil mal-​wegħda tagħhom taʼ dedikazzjoni għandhom ir-​rieda tajba t’Alla.

17, 18. Jehovah x’se jivvindika, u x’se jqaddes?

¹⁷ B’mod simili, għal żmien twil, xi Xhieda tkellmu dwar l-​ivvindikar taʼ isem Jehovah. Imma kien Satana xeħet dubju dwar isem Jehovah? Jekk niġu f’dan, qatt xi ħadd mill-​aġenti taʼ Satana għamel dan, bħal li kieku Jehovah ma kellux dritt għal dak l-​isem? Le, xejn affattu. Ma kienx l-​isem taʼ Jehovah li ġie sfidat u li kellu bżonn jiġi vvindikat. Kien għalhekk li l-​pubblikazzjonijiet riċenti tal-​Watch Tower Society ma jitkellmux dwar isem Jehovah bħala li qed jiġi vvindikat. Dawn jitkellmu dwar is-​sovranità taʼ Jehovah bħala li tiġi vvindikata u dwar ismu bħala li jiġi mqaddes. Dan huwa fi qbil maʼ dak li Ġesù qalilna biex nitolbu: “Ħalli ismek ikun imqaddes.” (Mattew 6:9) Għal darba wara l-​oħra, Jehovah qal li hu se jqaddes ismu, li l-​Iżraeliti ma kinux sfidaw imma pprofanaw.—Eżekjel 20:9, 14, 22; 36:23.

¹⁸ Huwa taʼ interess li fl-​1971, il-​ktieb “The Nations Shall Know That I Am Jehovah”​—How? għamel din id-​distinzjoni: “Ġesù Kristu jiġġieled . . . għall-​ivvindikar tas-Sovranità universali taʼ Jehovah u għall-​glorifikazzjoni taʼ isem Jehovah.” (Paġni 364-5) Fl-​1973, God’s Kingdom of a Thousand Years Has Approached qal: “It-​‘tribulazzjoni l-​kbira’ li ġejja hija ż-​żmien biex Alla li Jistaʼ Kollox Jehovah jivvindika s-​sovranità universali tiegħu u biex iqaddes l-​isem denju tiegħu.” (Paġna 409) Imbagħad, fl-​1975, Man’s Salvation Out Of World Distress at Hand! stqarr: “L-​akbar ġrajja taʼ storja universali se tkun imbagħad ġiet imwettqa, l-​ivvindikar tas-​sovranità universali taʼ Jehovah u t-​taqdis taʼ l-​isem sagru tiegħu.”​—Paġna 281.

19, 20. Kif nistgħu nuru l-​apprezzament tagħna għal leħħiet taʼ dawl spiritwali?

¹⁹ Kemm huma mberkin in-​nies taʼ Jehovah li qegħdin jixxamplaw f’dan id-​dawl spiritwali kollu! F’kuntrast qawwi, espressiva tad-​dlam spiritwali li fih il-​mexxejja tal-​Kristjaneżmu jsibu lilhom infushom hija din l-​istqarrija minn membru tal-​kleru: “Għala d-​dnub? Għala t-​tbatija? Għala x-​xitan? Dawn huma mistoqsijiet li rrid nistaqsi lill-​Mulej meta nkun fis-​sema.” Imma x-​Xhieda taʼ Jehovah jistgħu jgħidulu għala: Minħabba l-​kwistjoni dwar is-​sovranità bi dritt taʼ Jehovah u l-​kwistjoni rigward jekk ħlejjaq umani jistgħux iżommu l-​integrità lejn Alla minkejja l-​oppożizzjoni tax-​Xitan.

[Noti ta taħt]

Tiftakar Int?

◻ Liema dawl ġie mixħut fuq sottomissjoni lejn “il-​potenzi iktar għoljin”?

◻ Leħħiet taʼ dawl irriżultaw f’liema żviluppi organizzazzjonali?

◻ Dawl miżjud kif effettwa l-​kondotta Kristjana?

◻ Dawl spiritwali ġab liema rfinar fil-​fehma tagħna taʼ ċerti punti Skritturali?

[Sors taʼ l-​Istampa f’paġna 19]

L-​imfietaħ f’paġna 19: Tpinġija bbażata fuq ritratt meħud fil-​Cooper-Hewitt, National Design Museum, Smithsonian Institution