Min Huma l-​Messaġġiera Veri tal-​Paċi?

IX-​Xhieda taʼ Jehovah jipproklamaw paċi li se sseħħ biss permezz tas-​Saltna t’Alla. Dan il-​messaġġ ġie mismugħ f’iktar minn 1,900 Konvenzjoni Distrettwali “Messaġġiera tal-​Paċi Divina” li nżammu matul l-​1996/97.

F’dawn il-​konvenzjonijiet intgħamel ċar li l-​ebda gvern uman ma jistaʼ jġib il-​paċi u s-​sigurtà veri. Għala? Għaliex dan ikun jirrikjedi li jinġiebu fi tmiemhom l-​affarijiet li jisirqulna l-​paċi taʼ kuljum. Il-​paċi vera tfisser li tqum kuljum mingħajr it-​theddida taʼ gwerra jew vjolenza. Dan ifisser qatt iżjed kriminalità, qatt iżjed serraturi fil-​bibien tagħna, qatt iżjed biżaʼ biex timxi fit-​toroq, qatt iżjed familji mifrudin. Liema gvern fuq l-​art jistaʼ jwettaq dan kollu? Tabilħaqq, liema gvern fuq l-​art jistaʼ biss jazzarda jwiegħed dan?

Il-Gvern t’Alla, madankollu, jistaʼ u se jwettaq dawn l-​affarijiet. Il-​Bibbja twiegħed: “Din hi l-​għamara taʼ Alla mal-​bnedmin; u hu jgħammar magħhom, u huma jkunu l-​poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.” (Apokalissi 21:3, 4) X’serħan se jġib dan lill-​umanità li qiegħda tbati!

Il-wegħda t’Alla Jehovah m’hijiex waħda vojta. Il-​Bibbja tiżgurana: “Alla m’hux bniedem biex jigdeb; anqas bin Adam biex jibdielu. Forsi jgħid u ma jagħmilx? jitkellem, u ma jżommx kelmtu?” (Numri 23:19) Iva, dak li Alla wiegħed se jseħħ​—bħala barka għall-​dawk kollha li jieħdu l-​waqfa tagħhom fuq in-​naħa tiegħu.

Il-​Messaġġiera T’Alla Tal-​Paċi

Ix-​Xhieda taʼ Jehovah huma magħrufin sew għax-​xandir żeluż tagħhom dwar is-​Saltna t’Alla. Kull sena, huma kollettivament iqattgħu iżjed minn biljun siegħa jaqsmu m’oħrajn il-​messaġġ li jqawwi l-​qalb li fiha l-​Bibbja. Dan huwa bi twettiq tal-​kliem taʼ Ġesù: “Dan l-​Evanġelju [“aħbar tajba,” New World Translation] tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.” (Mattew 24:14) Il-​messaġġ li x-​Xhieda jġibu huwa tabilħaqq ‘aħbar tajba,’ għaliex dan jipproklama lis-​Saltna tas-​sema t’Alla bħala l-​unika tama għall-​umanità. U x’tama solida għall-​futur hija din!

Saħansitra issa s-​Saltna t’Alla qiegħda tipproduċi fis-​sudditi tagħha rabta ġenwina taʼ paċi u mħabba fraterna. Ġesù qal: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwann 13:35) Ix-​Xhieda taʼ Jehovah jistinkaw biex jilħqu din il-​ħtieġa bażika tal-​Kristjanità vera. Bħala riżultat, din tagħhom hija fratellanza meraviljuża li tgħaqqad Lhud u Għarab, Kroati u Serbi, Ħutu u Tutsi. Din il-​paċi li l-​maġġoranza tal-​bnedmin jistgħu biss joħolmu dwarha qiegħda issa fil-​pussess taʼ miljuni taʼ Xhieda taʼ Jehovah madwar id-​dinja.