Proklamaturi tas-​Saltna Jirrapportaw

Is-​Sabar Iwassal għall-​Barka t’Alla fil-​Malawi

ĠUŻEPPI kien qaddej leali taʼ Jehovah. (Lhud 11:22) Kien ukoll bniedem li kellu sabar impressjonanti. Avolja ġie ttradut minn ħutu stess, darbtejn mibjugħ fil-​jasar, u iktar tard mitfugħ il-​ħabs taħt akkużi foloz, Ġużeppi ma ċediex. Pjuttost, bil-​paċenzja hu ssaporta snin taʼ tribulazzjoni, billi bl-​umiltà stenna l-​barka taʼ Jehovah.—Ġenesi 37:23-28, 36; 39:11-20.

L-istess illum, ix-​Xhieda taʼ Jehovah fil-​Malawi stennew bil-​paċenzja għall-​barka t’Alla. Għal 26 sena, dawn ix-​Xhieda Kristjani ssaportew projbizzjonijiet mill-​gvern, oppożizzjoni ħarxa, u ħafna atroċitajiet. Imma s-​sabar tagħhom ta l-​frott!

Meta faqqgħet il-​persekuzzjoni fil-​Malawi lejn it-​tmiem taʼ l-​1967, kien hemm madwar 18,000 pubblikatur tas-​Saltna. Immaġina l-​ferħ tax-​Xhieda meta saru jafu li s-​sena taʼ servizz 1997 bdiet b’quċċata ġdida taʼ 38,393 pubblikatur​—iktar mid-​doppju taʼ dawk li kien hemm fil-​bidu tal-​projbizzjoni! Iktar minn hekk, l-​attendenza għat-​13-il Konvenzjoni Distrettwali intitolata “Messaġġiera Tal-​Paċi Divina” li nżammu fil-​Malawi telgħet għal iktar minn 117,000. Verament, Jehovah bierek il-​fidi u s-​sabar tagħhom.

Eżempju taʼ din il-​barka hija l-​esperjenza taʼ tifel taʼ 14-il sena jismu Machaka. Meta Machaka aċċetta li jistudja l-​Bibbja max-​Xhieda taʼ Jehovah, il-​ġenituri tiegħu ħaduha bi kbira wisq. Huma qalulu: “Jekk trid issir Xhud, ikollok titlaq mid-​dar.” Din it-​theddida, madankollu, ma skuraġġitux milli jkompli l-​istudju tiegħu. Bħala riżultat, il-​ġenituri taʼ Machaka ħadulu ħwejġu kollha. L-​aħwa aġixxew billi xtrawlu ftit ħwejjeġ oħra. Meta l-​ġenituri taʼ Machaka saru jafu b’dan, qalulu: “Jekk ix-​Xhieda se jmantnuk, tistaʼ titlaq u tmur tgħix magħhom.” Wara li kkunsidra l-​kwistjoni bir-​reqqa, Machaka telaq mid-​dar, u familja tax-​Xhieda fil-​kongregazzjoni lokali żammewh magħhom.

Il-ġenituri taʼ Machaka tant kienu urtati li ddeċidew li jmorru joqogħdu x’imkien ieħor sabiex jevitaw kull kuntatt max-​Xhieda. M’għandniex xi ngħidu, Machaka, kien imnikket ħafna b’dan, imma sab ħafna faraġ meta l-​aħwa ddiskutew miegħu Salm 27:10, li jistqarr: “Għalkemm telquni missieri u ommi, il-​Mulej jilqagħni għandu.”

Maż-żmien, il-​ġenituri taʼ Machaka ma baqgħux b’dik l-​attitudni, u hu ddeċieda li jerġaʼ jmur lura d-​dar. Milli jidher id-​determinazzjoni taʼ binhom biex jaqdi lil Jehovah għamlet impressjoni qawwija fuqhom għaliex anki huma riedu jistudjaw il-​Bibbja max-​Xhieda taʼ Jehovah! Huma attendew ukoll it-​tlett ijiem kollha tal-​Konvenzjoni Distrettwali intitolata “Messaġġiera Tal-​Paċi Divina,” fejn wara ġew imqanqlin biex jiddikjaraw: “Verament, din hi l-​organizzazzjoni t’Alla.”

Iva, l-​oppożizzjoni għandha mnejn tkun taʼ prova, imma l-​messaġġiera leali t’Alla ma jaqtgħux qalbhom. Huma b’kuraġġ jibqgħu jistinkaw, billi jafu li “s-​sofferenza ġġib is-​sabar, is-​sabar irawwem il-​ħila.” (Rumani 5:3, 4) Ix-​Xhieda taʼ Jehovah fil-​Malawi jistgħu bir-​raġun kollu jixhdu li s-​sabar iwassal għall-​barka t’Alla.