Thennew f’Jehovah u Kunu Ferħanin

IT-​TLESTIJA b’suċċess taʼ kwalunkwe proġett taʼ siwi dejjem tkun żmien taʼ thennija. Il-​programm taʼ gradwazzjoni li sar fit-​13 taʼ Marzu, 1999, fiċ-​Ċentru Edukattiv tal-​Watchtower f’Patterson, ġewwa New York, ċertament li kien okkażjoni simili għat-​48 student tal-​106 klassi taʼ l-​Iskola taʼ Gilgħad (Watchtower Bible School of Gilead).

Ir-rimarki tal-​ftuħ li saru minn Theodore Jaracz, membru tal-​Ġemgħa li Tiggverna u gradwat tas-​sebaʼ klassi taʼ Gilgħad, li qeda bħala ċermen għall-​programm taʼ gradwazzjoni, enfasizzaw il-​kliem taʼ Salm 32:11: “Ifirħu, twajbin, u thennew fil-​Mulej.” Waqt li spjega għala kien xieraq li kulħadd jithenna f’din l-​okkażjoni, hu qal: “Huwa minħabba dak li Jehovah qiegħed iwettaq maʼ dawk li huma retti f’qalbhom, inkluż l-​istudenti tagħna taʼ Gilgħad, li nithennew f’okkażjonijiet bħal dawn.” Filwaqt li kienu l-​istudenti li ppjanaw li jiġu l-​Iskola taʼ Gilgħad u stinkaw b’mod diliġenti biex jikkwalifikaw għas-​servizz missjunarju, Jehovah hu dak li għamilha possibbli li kollox jiġi fi tmiemu b’suċċess. (Proverbji 21:5; 27:1) Din, enfasizza Ħuna Jaracz, hija r-​raġuni għala għandna ‘nithennew f’Jehovah.’

Fost dawk preżenti fl-​awditorju taʼ Patterson kien hemm il-​familjari u l-​mistidnin taʼ l-​istudenti, li kienu ġew minn 12-il pajjiż differenti biex jassistu għal din il-​ġrajja ferriħija. Hekk kif il-​5,198 li kienu fl-​attendenza​—inkluż membri tal-​familja Betel taʼ Brooklyn, Patterson, u Wallkill, li kienu kollegati permezz taʼ l-​awdjo u l-​vidjo—​antiċipaw il-​programm li kien se jkun hemm, wieħed setaʼ jara li kien qed jirrenja spirtu ferrieħi.

Imħeġġin biex Jibqgħu Jżommu Spirtu Ferrieħi

Hekk kif Ħuna Jaracz ikkonkluda r-​rimarki tal-​ftuħ tiegħu, hu introduċa l-​ewwel minn ħames kelliema, li kienu ppreparaw pariri Skritturali inkuraġġanti mhux biss għall-​gradwati taʼ Gilgħad, imma wkoll għal kulmin kien preżenti.

L-ewwel wieħed li tkellem kien William Malenfant, gradwat taʼ l-​34 klassi taʼ Gilgħad, u li issa qed jaqdi bħala ajjutant għall-​Kumitat tat-​Tagħlim tal-​Ġemgħa li Tiggverna. F’konnessjoni mat-​tema tiegħu “‘Kollox’ M’huwiex Frugħa!” bbażata fuq Koħèlet 1:2, hu qajjem il-​mistoqsija: “Ried Salamun tassew ifisser li kollox, fil-​veru sens tal-​kelma, huwa frugħa?” It-​tweġiba: “Le. Hu kien qed jiġbed għall-​attenzjoni li dawk l-​impriżi umani li jinjoraw x’inhi r-​rieda t’Alla, attivitajiet li m’għandhom xejn x’jaqsmu mar-​rieda divina​—dawk l-​affarijiet kollha huma frugħa.” B’kuntrast, li naduraw lil dak Alla veru, Jehovah, m’huwiex frugħa; lanqas li nistudjaw il-​Kelma t’Alla, il-​Bibbja, u li ngħallmuha lil oħrajn m’huwa frugħa. Alla ma jinsiex sforzi bħal dawn min-​naħa tal-​qaddejja tiegħu. (Lhud 6:10) Fil-​fatt, anki kieku dawk li sabu favur f’għajnejn Alla kellhom jintlaqtu minn xi gwaj, ‘Alla se jerfaʼ l-​ħajja tagħhom fis-​sorra tal-​ħajja.’ (1 Samwel 25:29) Xi ħsieb li jqawwi l-​qalb! Li jiftakru dawn il-​punti jistaʼ jgħin lill-​adoraturi kollha taʼ Jehovah jibqgħu jżommu spirtu ferrieħi.

John Barr, membru tal-​Ġemgħa li Tiggverna, inkuraġġixxa lill-​klassi li kienet se tiggradwa bit-​taħdita tiegħu “Sib Għaxqa fl-​Inkarigu Missjunarju Tiegħek.” Hu wera li s-​servizz missjunarju huwa xi ħaġa li dejjem kienet għażiża ferm għal Alla Jehovah. “Kien xi ħaġa li kienet tifforma parti integrali mill-​espressjoni taʼ mħabba taʼ Jehovah għad-​dinja. Hu bagħat lill-​Iben uniġenitu tiegħu fuq din l-​art. Ġesù kien l-​akbar missjunarju, l-​aqwa missjunarju.” Filwaqt li l-​gradwati setgħu jikkontemplaw liema bidliet kellu jagħmel Ġesù sabiex l-​inkarigu tiegħu fuq l-​art ikun wieħed taʼ suċċess, il-​benefiċċji tas-​servizz missjunarju taʼ Ġesù għadhom disponibbli għal dawk kollha li jridu jieħdu vantaġġ minnhom. Dan hu għaliex, bħalma wera Ħuna Barr, Ġesù sab għaxqa f’li jagħmel ix-​xogħol t’Alla, u barra minn hekk, kien iħobb lil ulied il-​bnedmin. (Proverbji 8:30, 31) Ħuna Barr ħeġġeġ lill-​gradwati biex jibqgħu fl-​inkarigu tagħhom, mhux sempliċement bħala kwistjoni taʼ sabar, imma għaliex isibu l-​għaxqa tagħhom f’li jagħmlu dan. “Strieħu fuq Jehovah; hu mhux se jiddiżappuntakom,” talab hu lill-​istudenti.—Salm 55:23 [Salm 55:22, NW].

“Nimxu f’Isem Jehovah għal Dejjem” kienet it-​tema magħżula mill-​kelliemi li kien imiss, Lloyd Barry, membru ieħor tal-​Ġemgħa li Tiggverna. Ħuna Barry, li qeda bħala missjunarju għal 25 sena fil-​Ġappun wara li kien attenda l-​11-il klassi taʼ Gilgħad, irrakkonta xi esperjenzi li għaddew minnhom missjunarji bikrin, u ddeskriva l-​isfidi li kellhom jiffaċċjaw. Liema parir prattiku kellu hu għall-​klassi li kienet se tiggradwa? “Fuq kollox, ibqgħu żommu l-​ispiritwalità tagħkom. Barra minn hekk, tgħallmu l-​lingwa u l-​kultura. Żommu s-​sens taʼ umoriżmu tagħkom. U ibqgħu agħmlu x-​xogħol; tegħjewx, u ċċedux.” Ħuna Barry qal lill-​gradwati li fl-​inkarigi missjunarji tagħhom barra l-​pajjiż, se jiltaqgħu maʼ ħafna nies li jimxu f’isem diversi allat u divinitajiet, u fakkarhom fil-​kliem taʼ Mikea: “Għax il-​popli kollha jimxu kull wieħed f’isem l-​alla tiegħu; imma aħna nimxu f’isem il-​Mulej, Alla tagħna, għal dejjem taʼ dejjem.” (Mikea 4:5) L-​eżempji taʼ wħud li fil-​passat kienu missjunarji żgur li huwa taʼ motivazzjoni qawwija għall-​qaddejja kollha t’Alla Jehovah biex ikomplu mexjin f’isem Jehovah u jaqduh fedelment.

Il-kelliemi li jmiss fil-​programm kien Lawrence Bowen, istruttur taʼ Gilgħad. It-​tema tal-​preżentazzjoni tiegħu qajmet il-​mistoqsija, “X’se Tagħti Prova li Int?” Hu wera li s-​suċċess fis-​servizz t’Alla jiddependi fuq li wieħed ikollu fidi u fiduċja f’Jehovah. Il-​fatt li Asa straħ kompletament fuq Jehovah sewa biex ikollu rebħa kbira fuq armata taʼ l-​għadu li kienet tgħodd mal-​miljun raġel. Madankollu, hu ġie mfakkar mill-​profeta Għażarija dwar il-​bżonn li jkompli jistrieħ fuq Alla: “Il-​Mulej ikun magħkom, meta intom tkunu miegħu.” (2 Kronaki 14:9-12; 15:1, 2) Ladarba l-​isem t’Alla, Jehovah, iġorr il-​ħsieb li hu jagħti prova li jkun dak kollu li jkun hemm bżonn biex iwettaq l-​iskop tiegħu​—sew jekk dan ifisser li jkun Provditur, Protettur, jew saħansitra Esekutur—​missjunarji li jistrieħu fuq Jehovah u li jaħdmu fi qbil maʼ l-​iskop tiegħu se jkollhom suċċess fl-​inkarigi tagħhom. (Eżodu 3:14) “Qatt tinsew,” ikkonkluda Ħuna Bowen, “li dment li tibqgħu tagħmlu l-​iskop taʼ Jehovah l-​iskop tagħkom, hu se jġiegħel li ssiru dak kollu li hemm bżonn biex twettqu l-​inkarigu tagħkom.”

L-aħħar kelliemi f’din il-​parti tal-​programm kien Wallace Liverance, li fil-​passat kien missjunarju u li issa huwa r-​reġistratur taʼ l-​iskola. It-​taħdita tiegħu, intitolata “Żomm il-​Kelma t’Alla Ħajja u Taħdem Fik,” ġibdet l-​attenzjoni lejn il-​messaġġ, jew wegħda, li qatt ma jfalli t’Alla u li dejjem miexi ’l quddiem lejn it-​twettiq komplet tiegħu. (Lhud 4:12) Dan jinfluwenza l-​ħajjiet taʼ dawk li jippermettulu jagħmel hekk. (1 Tessalonikin 2:13) Din il-​kelma kif tistaʼ tibqaʼ ħajja u taħdem fina? Permezz taʼ studju diliġenti tal-​Bibbja. Ħuna Liverance fakkar lill-​gradwati fil-​metodi taʼ studju tal-​Bibbja li tgħallmu f’Gilgħad, li kienu jinkludu qari u espożizzjoni tas-​sens u l-​applikazzjoni tal-​Kelma t’Alla. Hu kkwota l-​kliem t’Albert Schroeder, membru tal-​Ġemgħa li Tiggverna li kien jaqdi bħala ċermen tal-​kumitat li stabbilixxa l-​Iskola taʼ Gilgħad iktar minn 50 sena ilu: “Billi juża l-​kuntest, wieħed jistaʼ jikseb il-​forza spiritwali sħiħa u eżatta li Alla għamel disponibbli permezz tal-​Kelma tiegħu.” Dan il-​mod kif wieħed jistudja l-​Bibbja jżomm il-​Kelma t’Alla ħajja u taħdem.

Esperjenzi u Intervisti taʼ Ferħ

Wara t-​taħditiet, l-​udjenza gawdiet l-​opportunità li tismaʼ xi esperjenzi taʼ ferħ mingħand l-​istudenti. Taħt id-​direzzjoni taʼ Mark Noumair, li fil-​passat kien jaqdi bħala missjunarju u issa huwa istruttur taʼ Gilgħad, grupp taʼ studenti rrakkontaw u wrew permezz taʼ turijiet kif għamlu ħilithom biex jagħtu xiehda f’sitwazzjonijiet differenti. Xi wħud kellhom il-​ħila jibdew u jikkonduċu studji tal-​Bibbja maʼ nies fit-​territorju billi osservaw tajjeb iċ-​ċirkustanzi u l-​espressjonijiet tagħhom u billi wrew interess persunali. B’hekk, l-​istudenti kienu qed ‘jgħassu fuqhom infushom u fuq it-​tagħlim tagħhom’ u kienu verament interessati f’li jgħinu oħrajn jiksbu s-​salvazzjoni.—1 Timotju 4:16.

Ġew offruti ħafna suġġerimenti prattiċi, u għadd taʼ aħwa bl-​esperjenza li kienu qed jirċievu taħriġ fl-​iskola għall-​membri tal-​kumitati tal-​fergħa, li ssir fiċ-​Ċentru Edukattiv tal-​Watchtower, urew ukoll kemm ferħ iġib miegħu s-​servizz missjunarju. Ħutna Samuel Herd u Robert Johnson, li huma membri taʼ l-​istaff tal-​kwartieri ġenerali, ikkonduċew intervisti interessanti maʼ rappreżentanti mill-​uffiċċji tal-​fergħa tas-​Soċjetà fil-​Bolivja, fiż-​Żimbabwe, fin-​Nikaragwa, fir-​Repubblika Afrikana Ċentrali, fir-​Repubblika Dominikana, f’Papwa-Ginea Ġdida, u fil-​Kamerun.

Wara l-​esperjenzi u l-​intervisti, Gerrit Lösch, gradwat tal-​41 klassi taʼ Gilgħad u li fil-​preżent huwa membru tal-​Ġemgħa li Tiggverna, ta t-​taħdita finali li kellha t-​tema li tqanqal il-​ħsieb “Int ‘Persuna Mixtieqa’?” Ħuna Lösch l-​ewwel fakkar lill-​gradwati li Ġesù, l-​Iben perfett t’Alla, ma kienx ikkunsidrat min-​nies bħala persuna mixtieqa, imma “kien imżeblaħ u mwarrab mill-​bnedmin.” (Isaija 53:3) Għalhekk, m’hijiex sorpriża li llum f’ħafna pajjiżi tad-​dinja, il-​missjunarji huma meqjusin bħala persona non grata, mhux aċċettati jew milqugħin personalment. Min-​naħa l-​oħra, matul is-​snin twal taʼ servizz taʼ Danjel f’Babilonja, il-​Ħallieq, permezz t’anġlu, sejjaħlu tliet darbiet “għażiż [“mixtieq ferm,” NW]” lil Danjel. (Danjel 9:23; 10:11, 19) X’kien li għamel lil Danjel dan it-​tip taʼ persuna? Hu qatt ma kkomprometta prinċipji Bibliċi hekk kif aġġusta ruħu għall-​kultura f’Babilonja; kien onest f’kollox, billi qatt ma uża l-​kariga tiegħu għall-​vantaġġ persunali; u kien student żeluż tal-​Kelma t’Alla. (Danjel 1:8, 9; Danjel 6:5 [Danjel 6:4, NW]; Danjel 9:2) Barra minn hekk, hu kien jitlob regolarment lil Jehovah u kien dejjem lest li jagħti l-​glorja lil Alla għal dak li kien iwettaq. (Danjel 2:20) Billi jsegwu l-​eżempju taʼ Danjel, il-​qaddejja t’Alla jistgħu juru li huma persuni mixtiqin, mhux neċessarjament għad-​dinja, imma għal Alla Jehovah.

Biex jikkonkludi l-​programm li kien ferm edifikanti spiritwalment, iċ-​ċermen qara ftit mit-​telegrammi u l-​messaġġi li kienu ntbagħtu minn madwar id-​dinja. Imbagħad, l-​24 koppja rċivew id-​diplomi tagħhom, u tħabbar il-​pajjiż fejn ġew assenjati. Finalment, rappreżentant tal-​klassi qara ittra indirizzata lill-​Ġemgħa li Tiggverna u lill-​familja Betel, li kienet tesprimi l-​apprezzament li ħassew l-​istudenti tal-​klassi għat-​taħriġ u l-​preparazzjoni li kienu ngħataw fl-​aħħar ħames xhur.

Hekk kif il-​programm ġie fi tmiemu, setaʼ jinstemaʼ ‘ferħ u radd il-​ħajr’ fost il-​folla li kienet ħierġa.—Neħemija 12:27, Karm Żammit.

[Kaxxa f’paġna 27]

Statistiċi tal-​Klassi

Numru taʼ pajjiżi rrappreżentati: 10

Numru taʼ pajjiżi li ġew assenjati fihom: 19

Numru taʼ studenti: 48

Numru taʼ koppji miżżewġin: 24

Età medja: 33

Medja taʼ snin fil-​verità: 16

Medja taʼ snin fil-​ministeru full-time: 13

[Stampa f’paġna 25]

Il-​106 Klassi li Ggradwat mill-​Iskola taʼ Gilgħad

Fil-​lista t’hawn taħt, ir-​ringieli huma nnumerati minn quddiem għal wara, u l-​ismijiet f’kull ringiela huma mniżżlin mix-​xellug għal-​lemin.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.