Int Għala Taqdih ’l Alla?

Ċertu sultan li kellu l-​biżaʼ t’Alla darba minnhom ta dan il-​parir lil ibnu: “Agħraf ’l Alla taʼ missierek u aqdih b’qalbek sħiħa u b’rieda soda.” (1 Kronaki 28:9) Jidher ċar li Jehovah jrid li l-​qaddejja tiegħu jaqduh b’qalb mimlija gratitudni u apprezzament.

BĦALA Xhieda taʼ Jehovah rridu nammettu li malli sirna nafu bil-​wegħdi Bibliċi, qlubna mill-​ewwel faru bil-​gratitudni. Maʼ kull ġurnata li għaddiet, tgħallimna xi ħaġa ġdida dwar l-​iskopijiet t’Alla. Iktar ma komplejna nitgħallmu dwar Jehovah, ix-​xewqa li naqduh ‘b’qalb sħiħa u b’rieda soda’ saret iktar qawwija.

Ħafna minn dawk li jsiru Xhieda taʼ Jehovah jkomplu jaqduh b’ferħ bla qjies matul ħajjithom kollha. Madankollu, xi Kristjani, għalkemm ikunu bdew tajjeb, jistgħu maż-​żmien jinsew ir-​raġunijiet li jġagħluna nitqanqlu biex naqdu ’l Alla. Hekk ġralek int? Jekk iva, taqtax qalbek. Tistaʼ tikseb lura l-​ferħ li tlift. Kif?

Għodd il-​Barkiet li Għandek

L-​ewwelnett, immedita daqsxejn fuq il-​barkiet li tirċievi kuljum mingħand Alla. Aħseb dwar ir-​rigali mill-​aħjar li tana Jehovah. Għandna l-​ħolqien imżewwaq tiegħu li huwa disponibbli għal kulħadd minkejja l-​pożizzjoni soċjali jew ekonomika taʼ dak li jkun. Għandna wkoll il-​provvedimenti naturali tiegħu għall-​ikel u x-​xorb, is-​saħħa li tgawdi, l-​għarfien li għandek dwar il-​verità tal-​Bibbja, u l-​iktar importanti, l-​għotja taʼ Ibnu. Il-​mewt tiegħu wittiet it-​triq biex int tkun tistaʼ taqdi lil Alla b’kuxjenza nadifa. (Ġwann 3:16; Ġakbu 1:17) Iktar ma timmedita fuq it-​tjubija t’Alla, iktar se jikber l-​apprezzament tiegħek lejh. Imbagħad, qalbek tant se tkun mimlija bi gratitudni għal dak kollu li għamel, li se tqanqlek biex taqdih. Mingħajr l-​ebda dubju se terġaʼ tibda tħossok bħalma ħassu s-​salmista li kiteb: “Bla għadd l-​għemejjel tiegħek, Mulej, Alla tiegħi; taʼ l-​għaġeb il-​ħsibijiet tiegħek għalina; ħadd ma jħabbatha miegħek . . . iżda huma ħafna biex insemmihom.”—Salm 40:6 [40:​5, NW].

Dan il-​kliem inkiteb minn David, raġel li ħajtu żgur ma kinitx ħielsa mill-​inkwiet. David qattaʼ l-​biċċa l-​kbira minn żgħożitu maħrub, hekk kif is-​sultan mill-​agħar Sawl u s-​suldati tiegħu bdew ifittxuh biex joqtluh. (1 Samwel 23:​7, 8, 19-​23) David kellu wkoll taqbida mad-​dgħjufijiet persunali tiegħu. Hu ammetta dan f’Salm 40: “Għax għalquni minn kull naħa ħsarat li ma jingħaddux; ħakmuni ħtijieti u ma nistax nara; huma aktar mix-​xagħar taʼ rasi; għandi qalbi maqtugħa.” (Salm 40:13 [40:​12, NW]) Iva, għalkemm David kellu ħafna inkwiet, hu ma ħalliex dan l-​inkwiet jiddominah għalkollox. Hu ffoka fuq kif Jehovah kien qed ibierku minkejja l-​problemi kollha tiegħu, u ra li dawn il-​barkiet kienu jisbqu n-​niket tiegħu.

Meta tħossok mgħaddas fil-​problemi persunali jew taħseb li m’int tajjeb għal xejn, ikun tajjeb li tieqaf u tgħodd il-​barkiet li għandek, bħalma għamel David. Bla dubju, bħalma l-​apprezzament għal dawn il-​barkiet qanqlek biex tiddedika lilek innifsek lil Jehovah, hekk ukoll ħsibijiet bħal dawn se jgħinuk terġaʼ tkebbes ġewwa fik il-​ferħ li tlift u jgħinuk taqdi lil Jehovah b’qalb mimlija apprezzament.

Il-​Laqgħat tal-​Kongregazzjoni Jistgħu Jgħinuk

Barra milli nimmeditaw fil-​privat dwar it-​tjubija taʼ Jehovah, irridu wkoll nassoċjaw maʼ sħabna l-​Kristjani. Il-​fatt li niltaqgħu regolarment maʼ rġiel, nisa, u żgħażagħ li jħobbu ’l Alla u li huma determinati li jaqduh jinkuraġġina ferm. L-​eżempju tagħhom jistaʼ jqanqalna biex nintefgħu b’ruħna u b’ġisimna fis-​servizz taʼ Jehovah. Mill-​banda l-​oħra, il-​preżenza tagħna fis-​Sala tas-​Saltna tistaʼ tinkuraġġihom ukoll.

Irridu nammettu li wara t-​taħbit taʼ ġurnata xogħol jew meta nħossuna skuraġġiti minħabba xi problema jew dgħjufija, ma jkunx daqshekk faċli li naħsbu biex immorru għal-​laqgħa fis-​Sala tas-​Saltna. F’mumenti bħal dawn irridu nkunu sodi magħna nfusna, bħallikieku ‘ngħakksu bl-​aħrax lil ġisimna,’ biex b’hekk nobdu l-​kmand li niltaqgħu maʼ sħabna l-​Kristjani.—1 Korintin 9:​26, 27; Lhud 10:23-25.

Jekk ikollna nagħmlu dan, allura għandna nikkonkludu li aħna ma nħobbuhx verament lil Jehovah? Lanqas xejn. Anki l-​Kristjani maturi tal-​passat, li bla dubju kellhom imħabba kbira għal Alla, riedu jagħmlu sforz kbir biex jagħmlu r-​rieda tiegħu. (Luqa 13:24) L-​appostlu Pawlu kien wieħed minn dawn il-​Kristjani. Hu ddeskriva s-​sentimenti tiegħu bil-​miftuħ billi qal: “Naf li t-​tajjeb ma jgħammarx fija, jiġifieri f’ġismi. Ir-​rieda tajba qiegħda hemm fija, imma li nagħmel it-​tajjeb m’hux hemm. M’iniex nagħmel it-​tajjeb li rrid, imma qiegħed nagħmel il-​ħażen li ma rridx.” (Rumani 7:18, 19) U hu qal lill-​Korintin: “Jekk jiena nxandar l-​Evanġelju ma għandix biex niftaħar; jien obbligat nagħmlu dan. . . . Jekk dan nagħmlu minn rajja, ikolli dritt għall-​ħlas; imma jekk nagħmlu għax obbligat, dan ifisser li qiegħed nagħmel ix-​xogħol li Alla fdali f’idejja.”—1 Korintin 9:​16, 17.

Bħal ħafna minna, Pawlu kellu tendenzi ħżiena li kienu jfixkluh milli jagħmel it-​tajjeb, bħalma tant kien jixtieq. Madankollu, hu ssielet bl-​aħrax kontra dawn it-​tendenzi, u fil-​biċċa l-​kbira tal-​każi rnexxielu jegħlibhom. M’għandniex xi ngħidu, Pawlu m’għamilx dan bis-​saħħa tiegħu stess. Hu kiteb: “Għal kollox niflaħ bis-​saħħa taʼ dak li jqawwini.” (Filippin 4:13) Jehovah, il-​wieħed li ta l-​qawwa lil Pawlu, jistaʼ jsaħħaħ lilek ukoll biex tagħmel it-​tajjeb, jekk int min-​naħa tiegħek titolbu jgħinek. (Filippin 4:​6, 7) Għalhekk, ‘issielet għall-​fidi,’ u Jehovah jbierkek.—Ġuda 3, Saydon.

M’għandekx għalfejn tiġġieled din il-​ġlieda waħdek. Fil-​kongregazzjonijiet tax-​Xhieda taʼ Jehovah, anzjani Kristjani maturi, li huma nfushom qed iżommu sod fil-​ġlieda tagħhom għall-​fidi, huma lesti li jgħinuk. Jekk tavviċina anzjan għall-​għajnuna, hu se jistinka biex ‘jagħmillek il-​qalb.’ (1 Tessalonikin 5:14) Il-​mira tiegħu tkun li “jkun bħal ilqugħ għar-​riħ, u kenn fit-​tempesta.”—Isaija 32:2.

“Alla hu mħabba,” u jrid li l-​qaddejja tiegħu jaqduh għax iħobbuh. (1 Ġwann 4:8) Jekk l-​imħabba tiegħek lejn Alla għandha bżonn titkebbes mill-​ġdid, ħu l-​passi neċessarji biex tagħmel hekk, bħalma spjegajna hawn fuq. Se tithenna li tkun għamilt dan.