Int Tistaʼ Tirbaħ is-​Solitudni

MIN jistaʼ jgħid li qatt ma esperjenza l-​uġigħ li ġġib magħha s-​solitudni? Hemm ħafna fatturi li jistgħu jġagħluna nħossuna waħedna. Iżda, is-​solitudni li jħossu xi nisa li qatt ma żżewġu jew li huma romol jew divorzjati tistaʼ tkun partikolarment kbira.

Per eżempju, żagħżugħa Kristjana li jisimha Frances tirrakkonta: “Sakemm kelli 23 sena, kien donnu li ħbiebi kollha kienu żżewġu, u jien bqajt waħdi.”a Is-​sens taʼ li wieħed iħossu maqtugħ għalih waħdu għandu mnejn jiżdied hekk kif igerbu s-​snin u l-​prospetti għaż-​żwieġ jonqsu iżjed. “Jien qatt ma ridt nibqaʼ waħdi, u għadni nixtieq niżżewweġ jekk tiġini l-​opportunità,” tammetti Sandra, li issa għandha iktar minn 45 sena. Angela, li għandha fuq il-​50 sena, tgħid: “Jien ma ddeċidejtx li nibqaʼ waħdi, imma hekk ġraw l-​affarijiet. Kien hemm ftit ferm aħwa rġiel mhux miżżewġin fl-​inħawi fejn kont intbgħatt naqdi bħala pijuniera speċjali.”

Huwa taʼ min ifaħħarhom lil dawn in-​nisa Kristjani li jagħżlu li ma jiżżewġux għax jobdu lealment il-​parir taʼ Jehovah biex jiżżewġu “basta fil-​Mulej.” (1 Korintin 7:39) Xi wħud jaddattaw ruħhom sew għall-​fatt li jibqgħu waħedhom, imma oħrajn isibu li iktar ma jgħaddi ż-​żmien iktar tikber ix-​xewqa li jiżżewġu u jkollhom it-​tfal. “Jien dejjem inħoss bħal vojt emozzjonali minħabba li m’għandix sieħeb fiż-​żwieġ,” tistqarr Sandra.

Fatturi oħra, bħal li tieħu ħsieb il-​ġenituri taʼ età avanzata jistgħu jġagħluk tħossok iżjed waħdek. “Peress li miniex miżżewġa, il-​familja tiegħi stenniet li jien nieħu ħsieb il-​ġenituri tagħna li kienu avanzati fl-​età,” tgħid Sandra. “Għal 20 sena sħaħ erfajt il-​parti l-​kbira taʼ din ir-​responsabbiltà, minkejja li għandi ħames aħwa oħra. Il-​ħajja kienet tkun ħafna iktar faċli kieku kelli raġel li setaʼ kien t’appoġġ għalija.”

Frances issemmi fattur ieħor li jżidilha iktar is-​solitudni tagħha. Hi tirrakkonta: “Xi drabi n-​nies jistaqsuni direttament, ‘Għaliex ma żżewwiġtx?’ Mistoqsija bħal din iġġagħalni nħoss li b’xi mod jew ieħor huwa t-​tort tiegħi li bqajt waħdi. Kważi f’kull tieġ li mmur, xi ħadd jistaqsini l-​iktar mistoqsija li ma nistax għaliha, ‘Int meta se tiżżewweġ?’ U jien nibda naħseb, ‘Jekk l-​aħwa rġiel spiritwali m’humiex interessati fija, forsi m’għandix il-​kwalitajiet Kristjani meħtieġa jew jistaʼ jkun li sempliċement miniex attraenti.’”

Kif tistaʼ tegħleb is-​sentimenti tas-​solitudni u taʼ li tħossok maqtugħ għalik waħdek? X’jistgħu jagħmlu l-​oħrajn biex jgħinu, jekk kemm-il darba hemm xi ħaġa li tistaʼ ssir?

Strieħ fuq Jehovah

Is-​salmista għanna: “Qiegħed it-​tagħbija tiegħek fuq il-​Mulej, u hu jgħinek: hu qatt ma jħalli l-​ġust jitfixkel.” (Salm 55:​22, KŻ) Il-​kelma “tagħbija” fit-​test Ebrajk letteralment tfisser “sehem,” u tirreferi għar-​responsabbiltajiet u l-​ansjetajiet li jistgħu jġagħluna nsofru minħabba dak li jiġrilna fil-​ħajja. Jehovah huwa iktar konxju taʼ dawn it-​tagħbijiet minn ħaddieħor u jistaʼ jagħtina l-​qawwa biex inkampaw magħhom. Kien il-​fatt li straħet fuq Alla Jehovah li għen lil Angela tkampa mas-​solitudni. Waqt li bdiet tiftakar fil-​ministeru full-time tagħha, hi qalet: “Meta bdejt ix-​xogħol taʼ pijunier, jien u pijuniera oħra konna noqogħdu ’l bogħod mill-​eqreb kongregazzjoni. Tgħallimna nistrieħu kompletament fuq Jehovah, u dan għenni matul ħajti kollha. Meta jkolli ħsibijiet negattivi, nitkellem maʼ Jehovah u hu jgħinni. Salm 23 dejjem kien taʼ faraġ kbir, u naqrah taʼ spiss.”

L-appostlu Pawlu kellu tagħbija sinifikanti xi jġorr. F’minn taʼ l-​inqas tliet okkażjonijiet, hu ‘talab il-​Mulej biex ix-​xewka f’ġismu titbiegħed minnu.’ Pawlu ma ġiex megħjun mirakolożament, imma fil-​fatt irċieva wegħda li l-​qalb tajba mhix mistħoqqa t’Alla kienet se tappoġġah. (2 Korintin 12:​7-9) Pawlu skopra wkoll is-​sigriet tal-​kuntentizza. Hu iktar tard kiteb: “Kollox drajt u noqgħod għal kollox; ix-​xabaʼ u l-​ġuħ; il-​ġid u l-​għaks. Għal kollox niflaħ bis-​saħħa taʼ dak li jqawwini.”—Filippin 4:​12, 13.

Kif jistaʼ wieħed jikseb il-​qawwa t’Alla meta jħossu skuraġġit jew waħdu? Pawlu kiteb: “Tħabbtu raskom b’xejn. Fit-​talb kollu tagħkom itolbu u uru lil Alla xi jkollkom bżonn, u iżżuh ħajr. U s-​sliem taʼ Alla, sliem li jgħaddi kull ma l-​moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” (Filippin 4:​6, 7) Sandra tobdih dan il-​parir. Hi tispjega: “Minħabba l-​fatt li miniex miżżewġa nqattaʼ ħafna ħin waħdi. Dan jagħtini ħafna opportunitajiet biex nitlob lil Jehovah. Inħossni ħafna qrib tiegħu u nistaʼ nkellmu bil-​miftuħ dwar il-​problemi u l-​ferħ tiegħi.” U Frances tgħid: “Li niġġieled kontra l-​ħsibijiet negattivi waħdi hija ġlieda kontinwa. Imma li naqsam dak li nħoss bil-​miftuħ maʼ Jehovah jgħinni ferm. Jien konvinta li Jehovah huwa interessat f’kull ħaġa li tistaʼ teffettwa l-​ġid spiritwali kif ukoll emozzjonali tiegħi.”—1 Timotju 5:5.

“Erfgħu t-​Tagħbija taʼ Xulxin”

Fost il-​fratellanza Kristjana, wieħed ma jkollux iġorr it-​tagħbijiet waħdu. “Erfgħu t-​tagħbija taʼ xulxin, u hekk tkunu qegħdin tħarsu l-​liġi taʼ Kristu,” ħeġġeġ l-​appostlu Pawlu. (Galatin 6:2) Permezz tas-​sħubija tagħna mal-​Kristjani sħabna, aħna nistgħu niksbu “kelma tajba” taʼ inkuraġġiment li tistaʼ ttaffilna t-​tagħbija tas-​solitudni.—Proverbji 12:25.

Ikkunsidra wkoll xi tgħid l-​Iskrittura dwar bint Ġeftaħ, l-​Imħallef taʼ Iżrael. Qabel ir-​rebħa tiegħu fuq l-​eżerċti t’Għammon, Ġeftaħ wiegħed li jagħti lil Jehovah l-​ewwel persuna min-​nies taʼ daru li toħroġ tilqgħu biex tifraħ bih. Din il-​persuna inzertat bintu stess. (Mħallfin 11:​30, 31, 34-36) Avolja dan kien ifisser li hi ma setgħetx tiżżewweġ u kellha tiċċaħħad mix-​xewqa normali li jkollha familja, bint Ġeftaħ kienet lesta li tissottometti ruħha għal din il-​wegħda u qdiet fis-​santwarju f’Silo għall-​bqija taʼ ħajjitha. Ħadd ma ta kasu s-​sagrifiċċju li għamlet? Għall-​kuntrarju: “Minn sena għal sena l-​ulied bniet taʼ Iżrael kienu jmorru jfaħħru lil bint Ġeftaħ il-​Gilgħadi, erbat ijiem fis-​sena.” (Mħallfin 11:​40, NW) Iva, it-​tifħir jistaʼ jinkuraġġixxi lil dawk li jirċivuh. Għalhekk, ejja ma nonqsux milli nfaħħru lil dawk li jixirqilhom.

Nagħmlu tajjeb ukoll li nikkunsidraw l-​eżempju taʼ Ġesù. Għalkemm ma kinitx id-​drawwa tal-​Lhud li l-​irġiel jitkellmu man-​nisa, Ġesù qattaʼ ħin maʼ Marija u Marta. X’aktarx li huma kienu romol jew ma kinux miżżewġin. Ġesù ried li t-​tnejn li huma jibbenefikaw spiritwalment mill-​ħbiberija tiegħu. (Luqa 10:​38-42) Aħna nistgħu nimitaw l-​eżempju taʼ Ġesù billi ninkludu lil ħutna nisa spiritwali li m’humiex miżżewġin f’okkażjonijiet soċjali u billi nagħmlu xi arranġamenti biex naħdmu magħhom fix-​xogħol taʼ l-​ippridkar. (Rumani 12:13) Japprezzaw huma attenzjoni bħal din? Waħda oħt qalet: “Jien naf li l-​aħwa jħobbuni u japprezzawni, imma tgħidx kemm inkun grata meta juru iktar interess persunali fija.”

“Peress li m’għandniex familja,” tispjega Sandra, “għandna bżonn akbar li nkunu maħbubin, li nħossuna parti mill-​familja taʼ l-​aħwa spiritwali.” Ovvjament, Jehovah jieħu ħsiebhom lil uħud bħal dawn, u aħna nkunu qed nikkooperaw miegħu meta nġagħluhom iħossuhom apprezzati u maħbubin. (1 Pietru 5:​6, 7) Għajnuna bħal din żgur li se tiġi notata, għax “min iħenn għall-​fqir ikun qed jislef lill-​Mulej, u hu jroddhulu bi ħlas tajjeb.”—Proverbji 19:17.

“Kull Wieħed Għandu t-​Tagħbija Tiegħu X’Jerfaʼ”

Għalkemm oħrajn jistgħu jgħinu, u l-​appoġġ tagħhom jistaʼ jkun tassew inkuraġġanti, “kull wieħed għandu t-​tagħbija tiegħu x’jerfaʼ.” (Galatin 6:5) Iżda, meta nkunu qed inġorru t-​tagħbija tas-​solitudni rridu noqogħdu attenti minn ċerti perikli. Per eżempju, is-​solitudni tistaʼ tirbaħna jekk nispiċċaw ningħalqu fina nfusna. Mill-​banda l-​oħra, nistgħu nirbħu s-​solitudni bl-​imħabba. (1 Korintin 13:​7, 8) Li nagħtu u naqsmu m’oħrajn huwa l-​aħjar mod biex insibu l-​hena—huma x’inhuma ċ-​ċirkustanzi tagħna. (Atti 20:35) “M’għandix ħafna ħin biex noqgħod naħseb li jiena waħdi,” tgħid waħda oħt pijuniera li taħdem iebes. “Meta nħossni utli u nżomm ruħi okkupata, ma nħossnix waħdi.”

Irridu noqogħdu attenti wkoll li ma nħallux is-​solitudni ġġagħalna nidħlu f’relazzjoni mhux għaqlija. Per eżempju, x’ħasra tkun jekk minħabba x-​xewqa tagħna biex niżżewġu ngħalqu għajnejna għall-​ħafna problemi li jinqalgħu jekk nintrabtu maʼ xi ħadd li ma jkunx taʼ l-​istess twemmin u speċjalment jekk ma nagħtux kas il-​parir Skritturali biex nevitaw madmad bħal dan! (2 Korintin 6:14) Mara Kristjana divorzjata qalet: “Hemm xi ħaġa ħafna agħar milli wieħed ma jiżżewwiġx. Din hi li jkun miżżewweġ mal-​persuna żbaljata.”

Problema li ma tkunx tistaʼ tissolva għandu mnejn li wieħed ikollu jibqaʼ jissaportiha, għallinqas għalissa. Bl-​għajnuna t’Alla, wieħed jistaʼ jissaporti s-​solitudni. Hekk kif nibqgħu naqdu lil Jehovah, jalla nkunu fiduċjużi li xi darba l-​bżonnijiet kollha tagħna se jiġu sodisfati bl-​aħjar mod possibbli.—Salm 145:16.

[Nota taʼ taħt]

[Stampi f’paġna 28]

Is-​solitudni tistaʼ tintrebaħ billi wieħed jagħti u jaqsam m’oħrajn