L-Imħabba Hija Essenzjali
MINKEJJA l-età, il-kultura, il-lingwa, jew ir-razza tagħhom, il-bnedmin kollha jixxennqu għall-imħabba. Jekk din ix-xenqa ma tiġix sodisfata, ma jkunux ferħanin. Riċerkatur mediku kiteb: “L-imħabba u l-intimità huma s-sors taʼ dak li jmarradna u dak li jfejjaqna, dak li jikkaġuna n-niket u dak li jġib il-ferħ, dak li jġagħalna nbatu u dak li jwassal għal fejqan. Kieku xi mediċina ġdida kellha l-istess effett, kważi kull tabib fil-pajjiż jirrikkmandaha lill-pazjenti tiegħu. Ma jkunx qed jagħmel xogħlu sew jekk ma jagħtix dan il-parir.”
Madankollu, is-soċjetà moderna, speċjalment il-mezzi tax-xandir tagħha u n-nies li tħobb timita, spiss tpoġġi iktar enfasi fuq l-għana, il-poter, il-fama, u s-sess milli fuq il-bżonn tal-bnedmin għal relazzjonijiet kollhom affezzjoni u mħabba. Ħafna għalliema jagħtu importanza kbira lill-miri sekulari u l-karrieri billi jkejlu s-suċċess taʼ l-individwu primarjament skond dawn l-affarijiet. Veru, huwa importanti li wieħed ikollu l-edukazzjoni u jikkultiva t-talenti tiegħu, imma għandu dak li jkun jagħtihom tant importanza li ma jkollux ħin għall-familja u l-ħbieb? Kittieb tal-qedem, li kellu edukazzjoni tajba u li kien kapaċi josserva tajjeb in-natura umana, qabbel individwu kapaċi imma nieqes mill-imħabba maʼ “strument tar-ram iżarżar jew platti jċekċku.” (1 Korintin 13:1) Nies bħal dawn jistgħu jsiru għonja, saħansitra famużi, imma qatt ma jkunu verament ferħanin.
Ġesù Kristu, li kellu fehma profonda u kien jgħożż lill-bnedmin b’mod speċjali, poġġa l-imħabba għal Alla u għall-ġirien fil-qalba tat-tagħlim tiegħu. Hu qal: “Ħobb lill-Mulej, Alla tiegħek, b’qalbek kollha, b’ruħek kollha, u b’moħħok kollu. . . . Ħobb lil għajrek bħalek innifsek.” (Mattew 22:37-39) Dawk biss li mxew skond dan il-kliem setgħu verament ikunu segwaċi taʼ Ġesù. B’hekk, hu qal: “Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom.”—Ġwanni 13:35.
Però, kif jistaʼ individwu jikkultiva l-imħabba fid-dinja taʼ llum? U l-ġenituri kif jistgħu jgħallmu l-imħabba lil uliedhom? L-artiklu li jmiss se jwieġeb dawn il-mistoqsijiet.
[Stampi f’paġna 3]
Hija taʼ sfida li tikkultiva l-imħabba f’dinja maħkuma mir-regħba