Kemm Hija Kbira u Mifruxa Mħabbtek?

“Ħobb lil għajrek bħalek innifsek.”—MATTEW 22:39.

1. Jekk inħobbu lil Jehovah, għala rridu wkoll inħobbu lil għajrna?

META Ġesù ġie mistoqsi liema hu l-​akbar kmandament, hu wieġeb: “Ħobb lill-​Mulej, Alla tiegħek, b’qalbek kollha, b’ruħek kollha, u b’moħħok kollu.” Imbagħad ikkwota t-​tieni kmandament li jixbah lil dak taʼ l-​ewwel: “Ħobb lil għajrek bħalek innifsek.” (Mattew 22:​37, 39) Iva, l-​imħabba tal-​proxxmu hija marka li tidentifika lil Kristjan. Tabilħaqq, jekk inħobbu lil Jehovah rridu nħobbu lil għajrna. Għala? Għaliex nuru li nħobbu lil Alla billi nobdu l-​Kelma tiegħu, u l-​Kelma tiegħu tikkmandana biex inħobbu lil għajrna. Għaldaqstant, jekk ma nħobbux lil ħutna, l-​imħabba tagħna lejn Alla ma tistax tkun ġenwina.—Rumani 13:8; 1 Ġwann 2:5; 4:​20, 21.

2. Liema tip taʼ mħabba għandu jkollna għal għajrna?

² Meta Ġesù qal li għandna nħobbu lil għajrna, hu ma kienx qed jitkellem dwar sempliċi ħbiberija. Kien qed jirreferi għal tip taʼ mħabba li hija differenti mill-​imħabba naturali li teżisti ġewwa l-​familja jew bejn raġel u mara. Hu kien qed jitkellem dwar it-​tip taʼ mħabba li Jehovah għandu għall-​qaddejja dedikati tiegħu u li huma għandhom lejh. (Ġwann 17:26; 1 Ġwann 4:​11, 19) Wieħed skriba Lhudi, li skond Ġesù tkellem b’mod intelliġenti, qabel maʼ Ġesù dwar li wieħed għandu jħobb lil Alla ‘b’qalbu kollha, b’ruħu kollha, b’moħħu kollu, u bil-​qawwa tiegħu kollha.’ (Mark 12:​28-34) Dak l-​iskriba tkellem sewwa. L-​imħabba li Kristjan jikkultiva ġewwa fih għal Alla u għal għajru tinvolvi l-​emozzjonijiet u r-​raġuni. Tinħass fil-​qalb u hija gwidata mill-​moħħ.

3. (a) Lil “wieħed għaref fil-​Liġi” Ġesù kif għallmu li għandu jkollu ħarsa mifruxa dwar min kien il-​proxxmu tiegħu? (b) It-​tixbieha taʼ Ġesù kif tapplika għall-​Kristjani llum?

³ Skond ir-​rakkont taʼ Luqa, meta Ġesù qal li għandna nħobbu lill-​proxxmu, “wieħed għaref fil-​Liġi” staqsieh: “Il-​proxxmu tiegħi min hu?” Ġesù wieġbu b’parabbola. Wieħed raġel safa msawwat, misruq u mħolli nofsu mejjet mal-​ġenb tat-​triq. L-​ewwel għadda qassis, imbagħad Levita. It-​tnejn li huma injorawh. Fl-​aħħar, għadda Samaritan, ra lir-​raġel ferut, u aġixxa b’qalb tajba li ma bħalha lejh. Liema mit-​tlieta kien qed jaġixxi taʼ proxxmu mar-​raġel ferut? It-​tweġiba kienet ovvja. (Luqa 10:​25-37) Ir-​raġel li kien għaref fil-​Liġi għandu mnejn baqaʼ ċċassat meta semaʼ lil Ġesù jgħid li Samaritan kien proxxmu aħjar minn qassis u Levita. Jidher ċar li Ġesù kien qed jgħin lil dan ir-​raġel biex iħobb lill-​għajru b’imħabba akbar u iktar mifruxa. Il-​Kristjani wkoll iħobbu b’dan il-​mod. Ikkunsidra lil dawk kollha li huma jħobbu.

Imħabba fil-​Familja

4. Il-Kristjan fejn juriha l-​ewwel l-​imħabba?

⁴ Il-​Kristjani jħobbu lill-​membri tal-​familja tagħhom. In-​nisa jħobbu lil żwieġhom, l-​irġiel iħobbu lin-​nisa tagħhom u l-​ġenituri jħobbu lil uliedhom. (Koħèlet 9:9; Efesin 5:33; Titu 2:4) Huwa minnu li r-​rabta taʼ l-​imħabba naturali teżisti fil-​biċċa l-​kbira tal-​familji. Madankollu, rapporti dwar żwiġijiet imkissrin, abbużi fuq is-​sieħeb jew sieħba fiż-​żwieġ, u tfal abbużati jew li jiġu traskurati, juru kemm il-​familja għaddejja minn pressjonijiet illum. Minħabba f’hekk, għandu mnejn li s-​sentimenti naturali li l-​membri tal-​familja jkollhom lejn xulxin ma jkunux biżżejjed biex iżommuha magħquda. (2 Timotju 3:​1-3) Biex il-​Kristjani jkollhom suċċess veru fil-​ħajja tal-​familja jeħtieġ li jeżerċitaw it-​tip taʼ mħabba li għandhom Jehovah u Ġesù.—Efesin 5:​21-27.

5. Il-ġenituri lejn min iduru biex jgħinhom irabbu lil uliedhom, u liema riżultati kellhom ħafna minnhom?

⁵ Ġenituri Kristjani jqisu lil uliedhom bħala xi ħaġa prezzjuża li Jehovah fdalhom f’idejhom. Huma jfittxu l-​għajnuna tiegħu biex irabbuhom. (Salm 127:​3-5; Proverbji 22:6) B’dan il-​mod huma jikkultivaw ġewwa fihom l-​imħabba Kristjana, li tgħinhom iħarsu lil uliedhom mill-​influwenzi ħżiena li ż-​żgħażagħ jistgħu jaqgħu vittmi tagħhom. B’riżultat taʼ dan, ħafna ġenituri Kristjani esperjenzaw ferħ bħal dak taʼ omm mill-​Olanda. Wara li rat lil binha jitgħammed, li kien wieħed mill-​575 persuna li tgħammdu fl-​Olanda s-​sena l-​oħra, hi kitbet dan li ġej: “F’dan il-​mument, l-​investiment li għamilt f’dawn l-​aħħar 20 sena qed irendi l-​frott. Il-​ħin u l-​enerġija kollha, kif ukoll l-​uġigħ, l-​isforzi, u n-​niket, issa nsejthom.” Kemm hi ferħana li binha minn jeddu għażel li jaqdi lil Jehovah. Il-​quċċata taʼ 31,089 pubblikatur li rrapportaw fl-​Olanda s-​sena l-​oħra tinkludi lil ħafna li tgħallmu jħobbu lil Jehovah mingħand il-​ġenituri tagħhom.

6. L-imħabba Kristjana kif tistaʼ tkun t’għajnuna biex tissaħħaħ ir-​rabta taż-​żwieġ?

⁶ Pawlu l-​imħabba sejħilha “rabta perfetta li tgħaqqad,” u din tistaʼ żżomm l-​għaqda taż-​żwieġ sħiħa saħansitra meta ż-​żwieġ ikun għaddej minn xi kriżi. (Kolossin 3:​14, 18, 19, NW; 1 Pietru 3:​1-7) Meta raġel fil-​gżira taʼ Rurutu, madwar 700 kilometru ’l bogħod minn Taħiti, beda jistudja l-​Bibbja max-​Xhieda taʼ Jehovah, il-​mara tiegħu tgħidx kemm opponietlu. Wara ftit telqitu, ħadet it-​tfal magħha u marret toqgħod f’Taħiti. Xorta waħda hu baqaʼ juri l-​imħabba tiegħu billi kien jibgħatilha l-​flus regolarment u jċemplilha biex jara jekk hi jew it-​tfal kellhomx bżonn xi ħaġa. B’hekk kien jagħmel kulma jistaʼ biex iwettaq l-​obbligi tiegħu taʼ Kristjan. (1 Timotju 5:8) Kien il-​ħin kollu jitlob lil Alla biex il-​familja tiegħu terġaʼ tingħaqad flimkien, u wara ftit taż-​żmien martu reġgħet lura d-​dar. Meta marret lura ttrattaha ‘bl-​imħabba, bis-​sabar, u bil-​ħlewwa.’ (1 Timotju 6:11) Hu tgħammed fl-​1998 u iktar tard meta martu aċċettat li tistudja l-​Bibbja tgħidx kemm feraħ. Dan kien wieħed mill-​1,351 studju li saru s-​sena l-​oħra fit-​territorju li jaqaʼ taħt il-​fergħa taʼ Taħiti.

7. Raġel fil-​Ġermanja, x’qal li saħħaħlu ż-​żwieġ tiegħu?

⁷ Fil-​Ġermanja wieħed raġel ma tantx ħa gost bl-​interess li martu wriet fil-​verità tal-​Bibbja għax kien konvint li x-​Xhieda taʼ Jehovah riedu jqarrqu biha. Madankollu, ftit żmien wara, lil dik ix-​Xhud li kkuntattjat lil martu l-​ewwel darba kitbilha: “Grazzi talli permezz tiegħek marti saret taf lix-​Xhieda taʼ Jehovah. Għall-​ewwel ħassejtni inkwetat għax smajt ħafna affarijiet koroh fuqkom. Imma issa li attendejt għal-​laqgħat maʼ marti rrealizzajt kemm kont żbaljat. Issa naf li qed nismaʼ l-​verità, u din tant saħħitilna ż-​żwieġ tagħna.” Il-​162,932 Xhud taʼ Jehovah fil-​Ġermanja, kif ukoll l-​1,773 Xhud fil-​gżejjer li jaqgħu taħt il-​fergħa taʼ Taħiti, jinkludu ħafna familji magħqudin fl-​imħabba lejn Alla.

Imħabba għal Ħutna l-​Kristjani

8, 9. (a) Min jgħallimna nħobbu lil ħutna, u l-​imħabba xi tqanqalna nagħmlu? (b) Agħti eżempju taʼ kif l-​imħabba tistaʼ tgħin lill-​aħwa jappoġġaw lil xulxin.

⁸ Pawlu qal lill-​Kristjani f’Tessalonika: “Intom stess tgħallimtu mingħand Alla kif għandkom tħobbu lil xulxin.” (1 Tessalonikin 4:9) Iva, dawk li huma “mgħallma mill-​Mulej” iħobbu lil xulxin. (Isaija 54:13) L-​imħabba tagħhom tintwera bil-​fatti, bħalma wera Pawlu meta qal: “Aqdu lil xulxin fl-​imħabba.” (Galatin 5:13; 1 Ġwann 3:18) Per eżempju, dan jagħmluh meta jżuru lil ħuthom morda, jinkuraġġixxu lil dawk dipressi, u jgħinu lid-​dgħajfin. (1  Tessalonikin 5:14) L-​imħabba Kristjana ġenwina tagħna twassal biex il-​ġenna spiritwali tagħna tkompli tikber.

⁹ Fil-​Kongregazzjoni taʼ Ancón, li hi waħda mill-​544 kongregazzjoni fl-​Ekwador, l-​aħwa wrew l-​imħabba b’mod prattiku. Minħabba kriżi finanzjarja, huma spiċċaw bla xogħol u bla flus. Għalhekk, il-​pubblikaturi ddeċidew li jaqilgħu xi ħaġa tal-​flus billi jbigħu l-​ikel lis-​sajjieda tal-​post meta dawn jidħlu lura wara lejl sħiħ jistadu. Kulħadd ikkoopera, anki t-​tfal. Kellhom jibdew fis-​siegħa taʼ fil-​għodu biex jilħqu jippreparaw l-​ikel sa l-​erbgħa taʼ fil-​għodu, il-​ħin li kienu jidħlu lura s-​sajjieda. Il-​flus li kienu jdaħħlu dawn l-​aħwa kienu jinqasmu bejniethom skond il-​bżonn. Din l-​għajnuna li taw lil xulxin kienet turija taʼ mħabba Kristjana ġenwina.

10, 11. Kif nistgħu nuru mħabba lejn aħwa li ma nafuhomx personalment?

¹⁰ Madankollu, l-​imħabba tagħna ma nuruhiex biss lill-​Kristjani li nafuhom personalment. L-​appostlu Pietru qal: “Ħobbu lill-​aħwa [kollha].” (1 Pietru 2:17) Aħna nħobbu lil ħutna kollha għaliex huma kollha adoraturi t’Alla Jehovah bħalna. Żmien taʼ kriżi għandu mnejn jippreżentalna opportunità biex nuru din l-​imħabba. Per eżempju, matul is-​sena taʼ servizz 2000, minħabba l-​għargħar kbir li għamel fil-​Możambik u l-​gwerra ċivili li ma taqtaʼ xejn ġewwa l-​Angola, ħafna aħwa ftaqru. Numru kbir taʼ aħwa mill-​31,725 li hemm fil-​Możambik, u l-​41,222 li hemm f’Angola ġew effettwati minn dawn il-​ġrajjiet. Minħabba f’hekk ix-​Xhieda mill-​Afrika t’Isfel, pajjiż ġirien tagħhom, bagħtu kwantitajiet kbar taʼ provvisti biex itaffu n-​niket taʼ ħuthom f’dawn il-​pajjiżi. Il-​fatt li minn jeddhom taw miż-​“żejjed” tagħhom lil ħuthom fil-​bżonn kien turija taʼ l-​imħabba tagħhom.—2 Korintin 8:​8, 13-15, 24.

¹¹ L-​imħabba tidher ukoll meta l-​aħwa f’ħafna pajjiżi jagħtu kontribuzzjonijiet biex jinbnew Swali tas-​Saltna u Swali taʼ l-​Assembleat f’pajjiżi fil-​bżonn. Eżempju wieħed hu l-​Gżejjer Solomon. Minkejja taqlib kbir, is-​sena l-​oħra l-​Gżejjer Solomon kellhom żjieda taʼ 6 fil-​mija fil-​pubblikaturi, b’quċċata taʼ 1,697. Għalhekk huma ppjanaw li jibnu Sala taʼ l-​Assemblea. Għalkemm ħafna min-​nies tal-​gżira kienu qed jaħarbu mill-​pajjiż, ġew volontieri mill-​Awstralja biex jgħinu fil-​bini. Wara ftit, il-​volontieri kellhom jitilqu, imma mhux qabel ma kienu laħqu ħarrġu lill-​aħwa tal-​post biex ilestu l-​pedament. Il-​qafas taʼ l-​azzar għas-​sala, maħdum u lest, wasal bil-​baħar mill-​Awstralja. Il-​fatt li dan il-​bini għall-​qima tlesta fi żmien meta x-​xogħol tal-​bini kien kważi waqaf għalkollox huwa l-​aqwa xiehda għall-​isem taʼ Jehovah u għall-​imħabba taʼ l-​aħwa.

Bħal Alla, Aħna Nħobbu lid-​Dinja

12. Kif nistgħu nimitaw lil Jehovah fl-​attitudni tagħna lejn dawk li m’humiex taʼ l-​istess twemmin tagħna?

¹² Hija l-​imħabba tagħna limitata għall-​familja tagħna u għal ħutna spiritwali? Le, mhux jekk aħna ‘nixbhu lil Alla.’ Ġesù qal: “Alla hekk ħabb lid-​dinja li ta lil Ibnu l-​waħdieni, biex kull min jemmen fih ma jintilifx, iżda jkollu l-​ħajja taʼ dejjem.” (Efesin 5:1; Ġwann 3:​16, korsiv tagħna.) Aħna, bħal Alla Jehovah, naġixxu b’imħabba lejn kulħadd, inkluż dawk li m’humiex taʼ l-​istess twemmin tagħna. (Luqa 6:​35, 36; Galatin 6:10) Hu speċjalment minħabba f’hekk li aħna nxandru l-​aħbar tajba tas-​Saltna u ngħidu lill-​oħrajn dwar l-​att kbir taʼ mħabba li Alla għamel għalihom. Dan jistaʼ jirriżulta fis-​salvazzjoni taʼ dawk li jisimgħu.—Mark 13:10; 1 Timotju 4:16.

13, 14. Liema esperjenzi jissemmew taʼ aħwa li wrew imħabba lejn uħud li m’humiex Xhieda taʼ Jehovah, saħansitra billi għamlu sagrifiċċji persunali kbar?

¹³ Ikkunsidra erbaʼ aħwa li jaqdu bħala pijunieri speċjali fin-​Nepal, li ġew inkarigati biex jagħtu xiehda f’belt fil-​lbiċ tal-​pajjiż. Għal dawn l-​aħħar ħames snin urew l-​imħabba tagħhom billi taw xiehda bil-​paċenzja kollha fil-​belt u fl-​irħula ’l bogħod. Biex ikopru t-​territorju tagħhom, ikollhom spiss jivvjaġġaw għal ħafna sigħat bir-​rota f’temperaturi taʼ iktar minn 40 grad Celsius. L-​imħabba u ‘l-​ipperseverar tagħhom fl-​għemil it-​tajjeb’ ipproduċew riżultati mill-​aqwa meta fformaw grupp għall-​istudju tal-​ktieb f’wieħed mill-​irħula. (Rumani 2:7) F’Marzu tas-​sena 2000, kien hemm 32 ruħ biex jisimgħu t-​taħdita pubblika li ngħatat mill-​indokratur li jivvjaġġa. In-​Nepal kellu quċċata taʼ 430 pubblikatur is-​sena l-​oħra, jiġifieri żjieda taʼ 9 fil-​mija. Jidher ċar li Jehovah qed ibierek iż-​żelu u l-​imħabba taʼ l-​aħwa f’dan il-​pajjiż.

¹⁴ Fil-​Kolumbja pijunieri speċjali temporanji marru jippridkaw fost l-​Indjani tat-​tribù tal-​Wayuu. Biex jagħmlu dan kellhom jitgħallmu lingwa ġdida, imma l-​interess li ħadu sforz l-​imħabba tagħhom ġie premjat meta minkejja x-​xita bil-​qliel li niżlet, kien hemm 27 ruħ li attendew għat-​taħdita pubblika. Iż-​żelu kollu mħabba li ntwera minn dawn il-​pijunieri wassal għal żjieda taʼ 5 fil-​mija fil-​Kolombja u quċċata taʼ 107,613-il pubblikatur. Fid-​Danimarka oħt imdaħħla fiż-​żmien riedet taqsam l-​aħbar tajba m’oħrajn, imma ma kinitx tistaʼ minħabba diżabilità li għandha. Ma qatgħetx qalbha, imma kienet tikkuntattja lin-​nies li juru interess billi tiktbilhom ittra. Fil-​preżent, hi tinsab f’kuntatt maʼ 42 persuna u tikkonduċi 11-il studju tal-​Bibbja. Hi tagħmel parti mill-​quċċata taʼ 14,885 pubblikatur li rrapportaw fid-​Danimarka s-​sena l-​oħra.

Ħobbu lill-​Għedewwa Tagħkom

15, 16. (a) Ġesù kemm qal li kellha tkun kbira u mifruxa l-​imħabba tagħna? (b) L-​aħwa responsabbli kif ittrattaw b’imħabba maʼ individwu li għamel akkużi foloz kontra x-​Xhieda taʼ Jehovah?

¹⁵ Ġesù qal lir-​raġel li kien għaref fil-​Liġi li Samaritan setaʼ jitqies bħala proxxmu. Fil-​Priedka tiegħu taʼ fuq il-​Muntanja, Ġesù saħansitra wasal biex qal: “Smajtu x’intqal, ‘Ħobb lil għajrek, u obgħod lill-​għadu tiegħek.’ Imma jiena ngħidilkom: Ħobbu lill-​għedewwa tagħkom, u itolbu għal dawk li jippersegwitawkom, biex tkunu wlied Missierkom li hu fis-​smewwiet.” (Mattew 5:​43-45) Anki meta xi ħadd jiħodha kontrina, aħna nipprovaw nibqgħu ‘nirbħu l-​ħażen bit-​tajjeb.’ (Rumani 12:​19-21) Jekk jistaʼ jkun, naqsmu miegħu l-​iktar ħaġa prezzjuża li għandna, il-​verità.

¹⁶ Fl-​Ukraina, artiklu fil-​gazzetta Kremenchuk Herald, ittimbra lix-​Xhieda taʼ Jehovah bħala setta perikoluża. Din kienet xi ħaġa serja għaliex fl-​Ewropa xi wħud jagħtu dan it-​timbru lix-​Xhieda taʼ Jehovah sabiex jipperswadu lin-​nies li l-​attivitajiet tax-​Xhieda għandhom jiġu ristretti jew projbiti. Għaldaqstant, l-​aħwa avviċinaw lill-​editur u talbuh biex joħroġ stqarrija biex tikkoreġi dan l-​artiklu. Hu aċċetta, imma maʼ l-​istqarrija stampa wkoll stqarrija oħra li tgħid li l-​artiklu oriġinali kien ibbażat fuq il-​fatti. Għalhekk aħwa responsabbli avviċinawh mill-​ġdid b’iktar informazzjoni. Fl-​aħħar, l-​editur irrealizza li l-​artiklu oriġinali kien żbaljat, u ppubblika stqarrija oħra biex jirtira dak li kien qal. Il-​fatt li ttrattawh bl-​onestà u b’qalb tajba kien il-​mod kif titlob l-​imħabba. Dan wassal biex ikollhom riżultati tajbin.

Kif Nistgħu Nikkultivaw l-​Imħabba Ġewwa Fina?

17. Liema ħaġa tindika li jistaʼ ma jkunx dejjem faċli li naġixxu b’imħabba lejn ħaddieħor?

¹⁷ Meta titwieled tarbija, il-​ġenituri tagħha jsiru jħobbuha mill-​ewwel. Però li tittratta b’imħabba lil nies adulti m’hijiex daqshekk naturali. X’aktarx li hu għalhekk li l-​Bibbja kemm-il darba tgħidilna biex inħobbu lil xulxin, għax din hi xi ħaġa li rridu naħdmu fuqha. (1 Pietru 1:22; 4:8; 1 Ġwann 3:11) Ġesù kien jaf li l-​imħabba tagħna kellha tiġi taħt prova meta qal li għandna naħfru lil ħutna “sa sebgħa u sebgħin darba.” (Mattew 18:​21, 22) Anki Pawlu ħeġġiġna biex ‘inkomplu nistabru b’xulxin.’ (Kolossin 3:​12, 13) Mhux taʼ b’xejn li jintqalilna: “Fittxu l-​imħabba!” (1 Korintin 14:1) Dan kif nistgħu nagħmluh?

18. X’se jgħinna nikkultivaw l-​imħabba għal oħrajn ġewwa fina?

¹⁸ L-​ewwel, nistgħu nżommu dejjem f’moħħna l-​imħabba tagħna lejn Alla Jehovah. Din l-​imħabba hija inċentiv qawwi biex inħobbu lill-​proxxmu tagħna. Għala? Għaliex meta nagħmlu hekk, dan jirrifletti tajjeb fuq Missierna tas-​sema u jġib glorja u tifħir lilu. (Ġwann 15:​8-10; Filippin 1:​9-11) It-​tieni, nistgħu nipprovaw naraw l-​affarijiet kif jarahom Jehovah. Kull darba li nidinbu, nidinbu kontra Jehovah; però hu għal darba wara l-​oħra jaħfrilna u jkompli jħobbna. (Salm 86:5; 103:​2, 3; 1 Ġwann 1:9; 4:18) Jekk nikkultivaw ġewwa fina l-​ħarsa taʼ Jehovah, se nkunu lesti li nħobbu lil oħrajn u naħfrulhom meta jonqsuna. (Mattew 6:12) It-​tielet, nistgħu nittrattaw lil oħrajn bħalma nixtiequ li huma jittrattaw lilna. (Mattew 7:12) Minħabba li aħna imperfetti, neħtieġu l-​maħfra. Per eżempju, meta ngħidu xi ħaġa li biha nweġġgħu lil xi ħadd, aħna nittamaw li huma se jiftakru li kulħadd jidneb bl-​ilsien xi kultant. (Ġakbu 3:2) Jekk irridu li oħrajn jittrattaw lilna bl-​imħabba, aħna għandna nittrattaw lilhom bl-​istess mod.

19. Kif nistgħu nfittxu l-​għajnuna taʼ l-​ispirtu qaddis biex nikkultivaw l-​imħabba ġewwa fina?

¹⁹ Ir-​rabaʼ, nistgħu nfittxu l-​għajnuna taʼ l-​ispirtu qaddis għaliex l-​imħabba hija waħda mill-​frott taʼ l-​ispirtu. (Galatin 5:​22, 23) Il-​ħbiberija, is-​sentimenti li l-​membri tal-​familja jkollhom lejn xulxin, u l-​imħabba romantika huma taʼ spiss naturali. Imma neħtieġu l-​għajnuna taʼ l-​ispirtu taʼ Jehovah biex nikkultivaw ġewwa fina l-​imħabba li għandu Hu, l-​imħabba li hi rabta perfetta li tgħaqqad. Nistgħu nfittxu l-​għajnuna taʼ l-​ispirtu qaddis billi naqraw il-​Bibbja ispirata. Per eżempju, jekk nistudjaw il-​ħajja taʼ Ġesù naraw kif hu kien jittratta lin-​nies, u nistgħu nitgħallmu kif nimitawh. (Ġwann 13:​34, 35; 15:12) Iżjed minn hekk, nistgħu nitolbu lil Jehovah għall-​ispirtu qaddis, speċjalment f’sitwazzjonijiet li jagħmluhielna diffiċli li naġixxu b’imħabba. (Luqa 11:13) Fl-​aħħarnett, nistgħu nfittxu l-​imħabba billi nibqgħu qrib tal-​kongregazzjoni Kristjana. Jekk inkunu m’aħwa li jafu jħobbu, dan se jgħinna nikkultivaw l-​imħabba ġewwa fina.—Proverbji 13:20.

20, 21. Ix-Xhieda taʼ Jehovah kif urew imħabba li tispikka matul is-​sena taʼ servizz 2000?

²⁰ Is-​sena l-​oħra, kien hemm quċċata taʼ 6,035,564 pubblikatur taʼ l-​aħbar tajba madwar id-​dinja. Ix-​Xhieda taʼ Jehovah qattgħu total taʼ 1,171,270,425 siegħa jfittxu lil individwi biex jgħidulhom dwar din l-​aħbar tajba. Kienet l-​imħabba li għenithom jissaportu s-​sħana, ix-​xita u l-​kesħa hekk kif huma wettqu dan ix-​xogħol. Kienet l-​imħabba li qanqlithom biex ikellmu lil sħabhom fl-​iskola u fuq il-​post tax-​xogħol, u javviċinaw lil nies li ma jafuhomx fit-​toroq u f’postijiet oħrajn. Ħafna minn dawk li ġew kuntattjati mix-​Xhieda ma wrew ebda interess, ftit minnhom opponewhom. Madankollu, kien hemm min wera interess, tant li saru 433,454,049 żjara lura, u saru 4,766,631 studju tal-​Bibbja.a

²¹ Dan kollu kemm juri l-​imħabba li x-​Xhieda taʼ Jehovah għandhom għal Alla u għall-​proxxmu tagħhom! Din l-​imħabba qatt ma tibred. Aħna fiduċjużi li fis-​sena taʼ servizz 2001 se tingħata saħansitra xiehda akbar lill-​umanità. Jalla l-​barka taʼ Jehovah tkompli tkun maʼ l-​adoraturi leali u żelużi tiegħu hekk kif huma ‘jagħmlu kollox fosthom bl-​imħabba’!—1 Korintin 16:14.

[Noti taʼ taħt]

Tistaʼ Tispjega?

• Lil min inkunu qed nimitaw meta nħobbu lill-​proxxmu tagħna?

• Kemm għandha tkun kbira u mifruxa l-​imħabba tagħna?

• Liema esperjenzi jissemmew li juru l-​imħabba Kristjana?

• Kif nistgħu nikkultivaw l-​imħabba Kristjana ġewwa fina?

[Tabella f’paġna 18-21]

RAPPORT TAS-SENA TA’ SERVIZZ TAX-XHIEDA TA’ JEHOVAH MADWAR ID-DINJA

(Ara rivista)

[Stampi f’paġna 15]

L-​imħabba Kristjana tistaʼ żżomm familja magħquda

[Stampi f’paġna 17]

L-​imħabba tqanqalna biex naqsmu t-​tama tagħna m’oħrajn