Faraġ għal Dawk li Qed Ibatu
META rġiel u nisa leali fil-passat kienu jgħaddu minn xi tbatija, huma kienu jitolbu bil-ħerqa lil Alla biex jipprovdilhom gwida. Madankollu, huma kienu wkoll jieħdu l-inizjattiva biex itaffu t-tbatija, billi forsi jħaddmu moħħhom biex jaħarbu lil min kien qed jaħqarhom. Per eżempju, David irnexxielu jissaporti t-tbatija li għadda minnha billi straħ fuq Jehovah kif ukoll billi għamel sforz min-naħa tiegħu. Xi ngħidu għalina llum?
Meta tgħaddi minn xi tip taʼ tbatija, x’aktarx li int tieħu l-inizjattiva biex issolvi lproblema tiegħek. Per eżempju, jekk tispiċċa bla xogħol, ma tagħmilx sforz biex issib impjieg xieraq li bih tkun tistaʼ tmantni lilek innifsek u lill-familja tiegħek? (1 Timotju 5:8) Jew jekk qed tbati minħabba xi marda, ma tfittixx għajnuna medika xierqa? Taʼ interess hu li Ġesù, li kellu l-qawwa mingħand Alla biex ifejjaq kull tip taʼ mard, irrikonoxxa li ‘l-morda jeħtieġu tabib.’ (Mattew 9:12) Madankollu, il-problemi tiegħek mhux dejjem jistgħu jissolvew; jistaʼ jkun li sa ċertu punt ikollok tibqaʼ tissaportihom.
Għala ma titlobx lil Jehovah u tgħidlu bil-problema li għandek? Per eżempju, meta nkunu qed infittxu impjieg, jekk nitolbu lil Alla u nistrieħu fuqu nkunu nistgħu nirreżistu kwalunkwe tentazzjoni biex naċċettaw xi xogħol li jikkontradixxi prinċipji Bibliċi. Se nevitaw ukoll li ‘noħorġu barra mit-triq tal-fidi’ minħabba r-regħba jew l-imħabba għall-flus. (1 Timotju 6:10) Tabilħaqq, meta nieħdu deċiżjonijiet importanti dwar l-impjieg, il-familja jew saħħitna, nistgħu nimxu fuq il-parir taʼ David: “Qiegħed it-tagħbija tiegħek fuq il-Mulej, u hu jgħinek: hu qatt ma jħalli l-ġust jitfixkel.”—Salm 55:22, Karm Żammit.
It-talb mill-qalb se jgħinna wkoll inżommu bilanċ mentali sabiex ma nħossuniex mifnijin minħabba t-tbatija li nkunu għaddejjin minnha. L-appostlu Pawlu, Kristjan ġenwin, kiteb: “Fit-talb kollu tagħkom itolbu u uru lil Alla xi jkollkom bżonn, u iżżuh ħajr.” It-talb sinċier b’liema mod jistaʼ jfarraġna? “Is-sliem taʼ Alla, sliem li jgħaddi kull ma l-moħħ jistaʼ jifhem, iżommilkom qalbkom u moħħkom sħaħ fi Kristu Ġesù.” (Filippin 4:6, 7) Is-sliem t’Alla “jgħaddi kull ma l-moħħ jistaʼ jifhem.” Għaldaqstant, dan jistaʼ jżommna stabbli meta nħossuna mtaqqlin b’emozzjonijiet li jnikktuna. Jistaʼ jgħassilna ‘qalbna u moħħna,’ u b’hekk jgħinna nevitaw aġir mgħaġġel jew mhux għaqli, affarijiet li jistgħu jkomplu jżidulna t-tbatija.
It-talb jistaʼ saħansitra jeffettwa kif tiżvolġi xi sitwazzjoni partikulari. Meta l-appostlu Pawlu nżamm priġunier f’Ruma, hu talab b’umiltà lill-Kristjani sħabu biex jitolbu għalih. Pawlu għala talabhom din il-ħaġa? “Dan wisq aktar nitlobkom tagħmluh,” hu kitbilhom, “biex nerġaʼ nkun magħkom mill-iktar fis.” (Lhud 13:19) Fi kliem ieħor, Pawlu kien jaf li Jehovah jismaʼ t-talb persistenti taʼ sħabu fil-fidi u li dan setaʼ jagħmel differenza dwar meta kien se jiġi meħlus.—Filemon 22.
Jistaʼ t-talb ibiddel ir-riżultat tat-tbatija li ngħaddu minnha? Jistaʼ jkun. Madankollu, għandna nirrealizzaw li Alla Jehovah jistaʼ ma jwiġibx it-talb tagħna kif nixtiequ aħna. Pawlu talab ħafna drabi dwar ix-‘xewka f’ġismu,’ li x’aktarx kienet xi problema fiżika. Madankollu, minflok ma neħħielu l-problema, Alla qal lil Pawlu: “Biżżejjed għalik il-grazzja tiegħi; għax il-qawwa tiegħi tidher fl-aqwa tagħha fejn hemm id-dgħajjef.”—2 Korintin 12:7-9.
Mela, allura, it-tbatija tagħna mhux bilfors tieqaf minnufih. Madankollu, se jkollna l-opportunità li nuru kemm qed nistrieħu fuq Missierna tas-sema. (Ġakbu 1:2-4) Ibqaʼ ċert li anki jekk Alla Jehovah ma jneħħilniex it-tbatija, hu jistaʼ ‘jagħtina l-qawwa u l-għajnuna biex inkunu nifilħu għaliha.’ (1 Korintin 10:13) Taʼ min jinnota li Jehovah jissejjaħ “Alla taʼ kull faraġ” li “jfarraġna fl-hemm kollu tagħna.” (2 Korintin 1:3, 4) Alla jistaʼ jagħtina dak li neħtieġu biex nissaportu, u aħna għandna t-tama taʼ ħajja taʼ dejjem.
Il-Kelma t’Alla, il-Bibbja, twegħedna li Jehovah se “jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed.” (Apokalissi 21:3, 4) Tinstemaʼ impossibbli għalik l-idea taʼ dinja mingħajr tbatija? Forsi hekk taħseb jekk drajt tgħix ħajja mimlija problemi. Madankollu, Alla wegħedna ħelsien mill-biżaʼ u l-problemi, u l-iskop tiegħu se jirnexxi żgur.—Isaija 55:10, 11.
[Stampi f’paġna 9]
Minn diqa kbira għal serħan