Mistoqsijiet mill-Qarrejja
Wara d-Dilluvju, Noè bagħat ħamiema mill-arka u ġiet lura ‘b’werqa taż-żebbuġ.’ Il-ħamiema minfejn sabitha din il-werqa?
Il-Bibbja tgħidilna li “tqawwew bis-sħiħ lilmijiet fuq l-art, u għattew il-muntanji għoljin kollha taħt is-sema.” (Ġenesi 7:19) Hekk kif battew l-ilmijiet tad-Dilluvju, Noè bagħat ħamiema ’l barra mill-arka għal tliet darbiet—b’ġimgħa bejn darba u oħra. It-tieni darba, il-ħamiema ġiet lura “b’werqa friska taż-żebbuġ f’munqarha. U Noè ntebaħ li l-ilmijiet kienu naqsu minn fuq wiċċ l-art.”—Ġenesi 8:8-11.
M’għandniex xi ngħidu, illum m’hemm lebda mod eżatt biex inkunu nafu kemm damet mgħarrqa xi parti partikulari mill-art, ladarba l-mod kif kien wiċċ l-art żgur li nbidel bid-Dilluvju. Minkejja dan, x’aktarx li l-ilma dam jgħatti ħafna mill-art biżżejjed biex ħafna siġar mietu. Madankollu, xi wħud irnexxielhom isalvaw, u dan ħalliehom inibbtu friegħi ġodda wara li batta l-ilma.
Dwar is-siġra taż-żebbuġ, The New Bible Dictionary jgħid li jekk din is-siġra tinqataʼ, mill-għeruq joħorġu friegħi ġodda, u b’hekk jistgħu jikbru sa ħames zkuk ġodda. Siġar taż-żebbuġ li jkunu waslu biex imutu ġeneralment jinbtu b’dan il-mod ukoll. The New Schaff-Herzog Encyclopedia of Religious Knowledge jgħid li huwa bħallikieku ħajjitha hija indistruttibbli. L-ebda bniedem illum ma jistaʼ jkun jaf id-dettalji, bħal per eżempju l-livell tal-melħ u t-temperatura, taʼ l-ilmijiet tad-Dilluvju. Għalhekk, ma nistgħux inkunu ċerti dwar l-effett li l-ilmijiet setaʼ kellhom fuq is-siġar taż-żebbuġ u l-ħxejjex l-oħra.
Madankollu, is-siġra taż-żebbuġ salvaġġa ma tistax tgħix f’temperaturi kesħin, bħalma nsibu fuq il-muntanji għoljin. Ġeneralment din tikber f’postijiet li huma għoljin inqas minn 1,000 metru, fejn it-temperatura medja hi taʼ iktar minn 10 gradi Celsius. Għalhekk, il-ktieb The Flood Reconsidered jgħid li mill-werqa friska tas-siġra Noè setaʼ jissopponi li l-widien li kienu iktar fil-baxx bdew ibattu mill-ilma. Meta Noè tajjar il-ħamiema madwar ġimgħa wara, din ma reġgħetx lura, u dan indika li kien hemm iktar ħxejjex u postijiet fejn il-ħamiema setgħet tistrieħ.—Ġenesi 8:12.