Ġeħova Dejjem Jagħmel is-​Sewwa

“Ġust il-​Mulej fl-​imġiba tiegħu kollha.”—SALM 145:17.

1. Kif tirreaġixxi meta xi ħadd jasal għal konklużjoni żbaljata dwarek, u liema tagħlima nistgħu nitgħallmu minn esperjenza bħal din?

QATT xi ħadd wasal għal konklużjoni żbaljata dwarek, forsi billi ddubita l-​azzjonijiet jew il-​motivi tiegħek, mingħajr ma kellu l-​fatti kollha? Jekk inhu hekk, x’aktarx li ħassejtek imweġġaʼ​—u bir-​raġun. Minn dan nistgħu nitgħallmu tagħlima importanti: Huwa għaqli li nevitaw li naqbdu u naslu għal konklużjoni meta ma nkunux nafu kollox.

2, 3. Xi wħud kif jirreaġixxu għar-​rakkonti Bibliċi li ma fihomx biżżejjed dettalji biex iwieġbu kull mistoqsija, però l-​Bibbja x’tgħidilna dwar Ġeħova?

² Nagħmlu tajjeb jekk inżommu din it-​tagħlima f’moħħna meta niġu biex nikkonkludu xi ħaġa dwar Alla Ġeħova. Dan għala? Għaliex hemm ċerti rakkonti Bibliċi li għall-​ewwel jistgħu jfixkluna. Dawn ir-​rakkonti​—forsi dwar l-​għemejjel taʼ xi wħud mill-​aduraturi t’Alla jew il-​ġudizzji li għamel Alla fil-​passat​—jistaʼ ma jkunx fihom biżżejjed dettalji biex iwieġbu l-​mistoqsijiet kollha tagħna. B’dispjaċir, xi wħud jikkritikaw dawn ir-​rakkonti, saħansitra jiddubitaw jekk Alla huwiex sewwa u ġust. Però, il-​Bibbja tgħidilna li “ġust il-​Mulej fl-​imġiba tiegħu kollha.” (Salm 145:17) Il-​Kelma tiegħu tiżgurana wkoll li hu “qatt ma jaħdem id-​dnewwa.” (Ġob 34:12; Salm 37:28) Immaġina, allura, kif iħossu meta l-​oħrajn jaslu għal konklużjonijiet żbaljati dwaru!

³ Ejja nikkunsidraw ħames raġunijiet għala għandna naċċettaw il-​ġudizzji taʼ Ġeħova. Imbagħad, b’dawn ir-​raġunijiet f’moħħna, neżaminaw żewġ rakkonti Bibliċi li xi wħud jistgħu jsibuhom diffiċli biex jifhmuhom.

Għala Naċċettaw il-​Ġudizzji taʼ Ġeħova?

4. Għala għandna nkunu modesti meta nikkunsidraw l-​għemejjel t’Alla? Agħti eżempju.

⁴ L-​ewwel, minħabba li Ġeħova jaf il-​fatti kollha involuti u aħna ma nafuhomx, irridu nkunu modesti meta nikkunsidraw lgħemejjel t’Alla. Biex nagħtu eżempju: Immaġina li mħallef magħruf għad-​deċiżjonijiet imparzjali li jieħu, jaqtaʼ sentenza f’każ il-​qorti. X’kont se taħseb dwar xi ħadd li mingħajr ma jaf il-​fatti kollha jew mingħajr ma jifhem sew il-​liġijiet involuti jikkritika d-​deċiżjoni taʼ l-​imħallef? Tkun bluha li xi ħadd jiġġudika l-​kwistjoni mingħajr ma jkun informat għalkollox dwarha. (Proverbji 18:13) Kemm iktar tkun bluha li sempliċi bnedmin jikkritikaw lill-​“imħallef taʼ l-​art kollha”!​—Ġenesi 18:25.

5. X’m’għandniex ninsew meta naqraw rakkonti Bibliċi dwar il-​ġudizzji li Alla esegwixxa fuq ċerti individwi?

⁵ It-​tieni raġuni biex naċċettaw il-​ġudizzji t’Alla hi li, kuntrarju għall-​bnedmin, Alla jistaʼ jara l-​qalb. (1 Samwel 16:7) Il-​Kelma tiegħu tgħid: “Jien hu l-​Mulej, li nifli l-​qalb u ngħarbel il-​ġewwieni, biex nagħti ’l kull wieħed skond imġibtu, skond ma jkun jistħoqq għemilu.” (Ġeremija 17:10) Għalhekk, meta naqraw ir-​rakkonti Bibliċi dwar il-​ġudizzji t’Alla fuq ċerti individwi, ejja ma ninsewx li għajnejh li jaraw kollox qiesu wkoll il-​ħsibijiet, il-​motivi, u l-​intenzjonijiet moħbija li ma ġewx imniżżla fil-​Kelma tiegħu.—1 Kronaki 28:9.

6, 7. (a) Ġeħova kif wera li jżomm il-​livelli ġusti u sewwa tiegħu anki meta jiswielu ħafna personalment? (b) X’għandna niftakru jekk naqraw xi ħaġa fil-​Bibbja li ġġagħalna nitħassbu dwar jekk Alla aġixxiex b’mod ġust jew sewwa?

⁶ Innota t-​tielet raġuni għala għandna naċċettaw il-​ġudizzji taʼ Ġeħova: Hu jżomm il-​livelli ġusti tiegħu anki meta jiswielu ħafna personalment. Ikkunsidra eżempju. Meta lil Ibnu tah bħala fidwa biex jeħles lill-​umanità ubbidjenti mid-​dnub u l-​mewt, Ġeħova ssodisfa l-​livelli ġusti u sewwa tiegħu. (Rumani 5:​18, 19) Però, meta ra lil Ibnu l-​għażiż ibati u jmut fuq zokk tat-​tortura żgur li Ġeħova ħass l-​akbar uġigħ possibbli. Dan x’jgħidilna dwar Alla? Dwar “il-​fidwa mħallsa minn Kristu Ġesù,” il-​Bibbja tgħid: “Dan kien sabiex juri l-​ġustizzja tiegħu [jiġifieri t’Alla].” (Rumani 3:​24-26) Traduzzjoni oħra taʼ Rumani 3:25 tgħid: “Dan wera li Alla jagħmel dejjem dak li hu sewwa u ġust.” (New Century Version) Iva, dak li kien lest jagħmel Ġeħova sabiex jipprovdi l-​fidwa juri li jagħti importanza kbira lil “dak li hu sewwa u ġust.”

⁷ Mela, allura, jekk naqraw xi ħaġa fil-​Bibbja li ġġiegħel lil xi wħud jitħassbu dwar jekk Alla aġixxiex b’mod ġust jew sewwa, għandna dejjem niftakru dan: Minħabba l-​lealtà tiegħu lejn il-​livelli tiegħu tas-​sewwa u l-​ġustizzja, Ġeħova ma ħelishiex lil Ibnu stess milli jgħaddi minn mewta taʼ wġigħ. Kien hu se jagħmel kompromess f’dawn il-​livelli fi kwistjonijiet oħra? Il-​verità hi li Ġeħova qatt ma jikser il-​livelli sewwa u ġusti tiegħu. Għalhekk, għandna ħafna għalxiex inkunu konvinti li hu dejjem jagħmel dak li hu sewwa u ġust.—Ġob 37:23.

8. Għala ma jkunx konsistenti li l-​bnedmin jimmaġinaw li l-​ġustizzja u s-​sewwa jistgħu b’xi mod ikunu neqsin f’Ġeħova?

⁸ Ikkunsidra r-​rabaʼ raġuni għala għandna naċċettaw il-​ġudizzji taʼ Ġeħova: Ġeħova ħalaq il-​bniedem fuq xbieha Tiegħu. (Ġenesi 1:27) Il-​bnedmin għalhekk huma mżejna bi kwalitajiet bħal t’Alla, li jinkludu s-​sens taʼ ġustizzja u sewwa. Ma jkunx konsistenti kieku s-​sens tagħna taʼ ġustizzja u sewwa jġagħalna nimmaġinaw li dawn l-​istess kwalitajiet jistgħu b’xi mod ikunu neqsin f’Ġeħova. Jekk nitfixklu minħabba xi rakkont partikulari fil-​Bibbja, irridu niftakru li minħabba li writna d-​dnub, is-​sens tagħna taʼ dak li hu ġust u sewwa hu imperfett. Alla Ġeħova, li aħna magħmulin fuq xbieha tiegħu, hu perfett fil-​ġustizzja u s-​sewwa. (Dewteronomju 32:4) Ma jagħmilx sens li saħansitra nimmaġinaw li l-​bnedmin jistgħu jkunu iktar ġusti u sewwa minn Alla!—Rumani 3:​4, 5; 9:14.

9, 10. Ġeħova għala m’huwiex obbligat jispjega jew jiġġustifika l-​għemejjel tiegħu lill-​bnedmin?

⁹ Il-​ħames raġuni għala għandna naċċettaw il-​ġudizzji taʼ Ġeħova hi li hu “l-​Għoli fuq l-​art kollha.” (Salm 83:19 [83:​18, NW]) Bħala tali, hu m’huwiex obbligat jispjega jew jiġġustifika l-​għemejjel tiegħu lill-​bnedmin. Hu l-​Fuħħari l-​Kbir, u aħna bħal tafal li ġie fformat f’reċipjenti, sabiex hu jaġixxi magħna kif jogħġbu. (Rumani 9:​19-21) Aħna min aħna​—il-​fuħħar f’idejh​—biex niddubitaw id-​deċiżjonijiet jew l-​għemejjel tiegħu? Meta l-​patrijarka Ġob fehem ħażin il-​mod kif Alla jittratta lill-​bnedmin, Ġeħova kkoreġieh, u staqsieh: “Trid int twaqqaʼ s-​sentenza tiegħi, tagħti tort lili biex tieħu raġun int?” Peress li rrealizza li tkellem mingħajr ma fehem, Ġob iktar tard nidem. (Ġob 40:8; 42:6) Jalla qatt ma nagħmlu l-​iżball li nsibu xi difett f’Alla!

¹⁰ Jidher ċar li għandna raġunijiet validi biex nemmnu li Ġeħova dejjem jagħmel dak li hu sewwa. B’din il-​bażi biex nifhmu l-​modi taʼ Ġeħova, ejja neżaminaw żewġ rakkonti Bibliċi li xi wħud jistgħu jitħawdu dwarhom. L-​ewwel wieħed jinvolvi l-​għemil taʼ wieħed mill-​aduraturi t’Alla, u l-​ieħor, l-​esekuzzjoni taʼ ġudizzju minn Alla nnifsu.

Lot Għala Offra lil Uliedu l-​Bniet lil Ġemgħa Rrabjata?

11, 12. (a) Irrakkonta x’ġara meta Alla bagħat żewġ anġli materjalizzati f’Sodoma. (b) Dan ir-​rakkont qajjem liema mistoqsijiet f’moħħ xi wħud?

¹¹ F’Ġenesi kapitlu 19, insibu r-​rakkont taʼ dak li ġara meta Alla bagħat żewġ anġli materjalizzati f’Sodoma. Lot insista li l-​viżitaturi joqogħdu għandu. Però, dak il-​lejl, ġemgħa rġiel mill-​belt daret mad-​dar u ordnatlu joħorġilha lill-​viżitaturi għal skopijiet immorali. Lot ipprova jirraġuna mal-​ġemgħa, imma kien kollu għalxejn. Peress li pprova jipproteġi lill-​mistidnin tiegħu, Lot qal: “Le ħuti, tagħmlux id-​deni. Araw, jien għandi żewġt ibniet li għadu ma għarafhom ħadd, ħa noħroġhomlkom it-​tnejn u għamlulhom kull ma jogħġobkom f’għajnejkom. Imma lil dawn l-​irġiel la tagħmlulhom xejn, la darba daħlu għall-​kenn tas-​saqaf tiegħi.” Il-​ġemgħa ma riditx tismaʼ u kważi faqgħet il-​bieb. Fl-​aħħar, l-​anġli li kienu qed iżuruh laqtu lil dik il-​folla li kienet f’dagħdigħa u għamewha.—Ġenesi 19:​1-11.

¹² Nistgħu nifhmu li dan ir-​rakkont qajjem xi mistoqsijiet fl-​imħuħ taʼ xi wħud. Huma jistaqsu: ‘Kif setaʼ Lot jipprova jipproteġi lill-​mistidnin tiegħu billi joffri lil uliedu l-​bniet lil ġemgħa immorali? M’aġixxiex ħażin, saħansitra kien beżżiegħ?’ Meta tqis dan ir-​rakkont, Alla għala nebbaħ lil Pietru biex isejjaħ lil Lot “raġel sewwa”? Aġixxa Lot bl-​approvazzjoni t’Alla? (2 Pietru 2:​7, 8) Ejja nirraġunaw fuq din il-​kwistjoni ħalli ma naslux għal konklużjoni żbaljata.

13, 14. (a) X’tajjeb li ninnotaw fir-​rakkont tal-​Bibbja dwar l-​għemejjel taʼ Lot? (b) X’juri li Lot ma kienx beżżiegħ bil-​mod kif aġixxa?

¹³ L-​ewwelnett, irridu ninnotaw li minflok ma tapprova jew tikkundanna l-​għemejjel taʼ Lot, il-​Bibbja sempliċement tirrapporta dak li ġara. Ukoll, il-​Bibbja ma tgħidilniex x’kien qed jaħseb Lot jew x’qanqlu jaġixxi kif għamel. La jiġi lura fl-​“irxoxt . . . tan-​nies sewwa,” forsi jkun jistaʼ jagħtina d-​dettalji.—Atti 24:15.

¹⁴ Lot żgur li ma kienx beżżiegħ. Hu sab ruħu f’sitwazzjoni diffiċli. Billi qal li l-​viżitaturi kienu “daħlu għall-​kenn” tas-​saqaf tiegħu, Lot indika li ħassu obbligat jagħtihom protezzjoni u rifuġju. Imma dan ma kienx se jkun faċli. L-​istudjuż taʼ l-​istorja Lhudi Ġużeppi Flavju qal li s-​Sodomin kienu “inġusti mal-​bnedmin, u bla biżaʼ minn Alla . . . Huma kienu jobogħdu l-​barranin, u kienu jabbużaw lilhom infushom bi prattiċi Sodomitiċi.” Però, Lot ma nġibidx lura mill-​ġemgħa mill-​agħar. Minflok, ħareġ u rraġuna maʼ dawk l-​irġiel irrabjati. Hu saħansitra “għalaq il-​bieb warajh.”—Ġenesi 19:6.

15. Għala nistgħu ngħidu li Lot x’aktarx li aġixxa bil-​fidi?

¹⁵ Xi wħud għandhom mnejn jistaqsu, ‘Xorta waħda, Lot għala offra lil uliedu lbniet lill-​ġemgħa?’ Minflok ma nassumu li l-​motivi tiegħu kienu ħżiena, għax ma nikkunsidrawx xi possibbiltajiet? L-​ewwelnett, Lot x’aktarx li aġixxa bil-​fidi. Dan kif? Żgur li Lot kien jaf kif Ġeħova pproteġa lil Sara, mart Abraham, iz-​ziju taʼ Lot. Ftakar li minħabba li Sara kienet tassew sabiħa, Abraham talabha tidentifikah bħala ħuha, li ma jmorrux l-​oħrajn joqtluh sabiex jiħduha.a Imbagħad, Sara ttieħdet fid-​dar tal-​Fargħun. Però, Ġeħova interviena u ma ħalliex lill-​Fargħun ikasbar lil Sara. (Ġenesi 12:​11-20) Jistaʼ jkun li Lot kellu l-​fidi li wliedu l-​bniet setgħu jiġu protetti bl-​istess mod. B’mod sinifikanti, Ġeħova veru interviena permezz taʼ l-​anġli tiegħu, u t-​tfajliet inħelsu mill-​periklu.

16, 17. (a) B’liema mod setaʼ Lot kien qed jipprova jaħsad jew iħawwad lill-​irġiel taʼ Sodoma? (b) Kien x’kien l-​irraġunar taʼ Lot, minn xiex nistgħu nkunu ċerti?

¹⁶ Ikkunsidra possibbiltà oħra. Lot jistaʼ jkun li kien qed jipprova jaħsad jew iħawwad lill-​irġiel. Hu setaʼ ħaseb li l-​ġemgħa ma kinitx se tixxennaq għal uliedu minħabba x-​xewqat omosesswali tas-​Sodomin. (Ġuda 7) Barra minn hekk, it-​tfajliet kienu għarajjes lil żewġt irġiel minn dik il-​belt, u allura l-​qraba, il-​ħbieb, jew uħud imseħbin fin-​negozju maʼ l-​għarajjes taʼ wliedu setgħu kienu fost il-​ġemgħa. (Ġenesi 19:14) Lot setaʼ kien qed jittama li minħabba dawn il-​kuntatti, xi rġiel mill-​ġemgħa kienu se jitkellmu biex jaqbżu għal uliedu. Ġemgħa maqsuma b’dan il-​mod ma kinitx se tkun daqshekk perikoluża.b

¹⁷ Kienu x’kienu l-​irraġunar u l-​motivi taʼ Lot, nistgħu nkunu ċerti minn dan: Ladarba Ġeħova dejjem jagħmel dak li hu sewwa, żgur li kellu raġunijiet validi għalxiex iħares lejn Lot bħala “raġel sewwa.” U meta niġġudikaw l-​għemejjel tal-​ġemgħa tas-​Sodomin li kienet f’dagħdigħa, jistaʼ jkollna xi dubju li Ġeħova kien ġustifikat għalkollox talli esegwixxa ġudizzju fuq l-​abitanti taʼ dik il-​belt mill-​agħar?​—Ġenesi 19:​23-25.

Ġeħova Għala Laqat lil Għużża għall-​Mewt?

18. (a) X’ġara meta David ipprova jġib l-​Arka lejn Ġerusalemm? (b) Dan ir-​rakkont liema mistoqsijiet iqajjem?

¹⁸ Rakkont ieħor li jistaʼ jħawwad lil xi wħud jinvolvi l-​attentat taʼ David biex iġib l-​arka tal-​patt lejn Ġerusalemm. L-​Arka tqiegħdet fuq karru, li kien qed jitmexxa minn Għużża u ħuh. Il-​Bibbja tgħid: “Xħin waslu ħdejn il-​qiegħa taʼ Nakon, il-​gniedes tfixklu u Għużża medd idu lejn l-​arka taʼ Alla biex iżommha. Il-​Mulej għadab għal Għużża, u Alla laqtu hemm [“għall-​għemil tiegħu nieqes mir-​rispett,” NW] u baqaʼ mejjet tal-​post ħdejn l-​arka taʼ Alla.” Ftit xhur wara, it-​tieni attentat irnexxa meta l-​Arka ttieħdet bil-​mod li ried Alla, billi nġarret fuq spallejn il-​Leviti Keħatin. (2 Samwel 6:​6, 7; Numri 4:​15; 7:9; 1 Kronaki 15:​1-​14) Xi wħud jistgħu jistaqsu: ‘Ġeħova għala ħadha daqshekk bi kbira? Għużża kien sempliċement qed jipprova jsalva l-​Arka.’ Biex ma naslux għal konklużjoni żbaljata, nagħmlu tajjeb jekk ninnotaw ċerti dettalji li jistgħu jgħinuna.

19. Għala hu impossibbli li Ġeħova jaġixxi b’mod inġust?

¹⁹ Irridu niftakru li m’huwiex possibbli għal Ġeħova li jaġixxi b’mod inġust. (Ġob 34:10) Biex hu jagħmel ħaġa bħal din irid ikun nieqes mill-​imħabba, u aħna nafu mill-​istudju tagħna tal-​Bibbja in ġenerali li “Alla hu mħabba.” (1 Ġwanni 4:8) Barra minn hekk, l-​Iskrittura tgħidilna li “fuq id-​dritt u l-​ġustizzja mibni t-​tron [t’Alla].” (Salm 89:15 [18:​14, NW]) Mela, kif jistaʼ qatt Ġeħova jaġixxi b’mod inġust? Kieku kellu jagħmel hekk, hu jkun qed jiċħad il-​bażi stess tas-​sovranità tiegħu.

20. Għal liema raġunijiet Għużża kien imissu jaf bir-​regolamenti dwar l-​Arka?

²⁰ Żomm f’moħħok li Għużża kien imissu jafha sew il-​Liġi. L-​Arka kienet assoċjata mal-​preżenza taʼ Ġeħova. Il-​Liġi kienet tispeċifika li ma kellhiex tintmess minn individwi mhux awtorizzati, u wissiet ċar u tond li min jikser il-​liġi kien jiġi kastigat bil-​mewt. (Numri 4:​18-​20; 7:​89) Għalhekk, il-​biċċa xogħol li tinġarr dik il-​kaxxa sagra ma kellhiex tittieħed biċ-​ċajt. Jidher ċar li Għużża kien Levita (għalkemm mhux qassis), u allura żgur li kien familjari mal-​Liġi. Minbarra dan, xi snin qabel, l-​Arka kienet ittieħdet f’dar missieru biex tiġi mħarsa. (1 Samwel 6:20–​7:1) Damet hemm xi 70 sena, sakemm David għażel li jiħodha xi mkien ieħor. Allura, sa minn tfulitu, Għużża x’aktarx li kien jaf bil-​liġijiet dwar l-​Arka.

21. Fil-​każ taʼ Għużża, għala hu importanti li niftakru li Ġeħova jara l-​motiv tal-​qalb?

²¹ Bħalma semmejna qabel, Ġeħova jistaʼ jara l-​qlub. Peress li l-​Kelma tiegħu ssejjaħ l-​għemil taʼ Għużża bħala ‘għemil nieqes mir-​rispett,’ Ġeħova setaʼ ra xi intenzjoni egoista li ma tissemmiex b’mod speċifiku f’dan ir-​rakkont. Setaʼ Għużża kien raġel prużuntuż jew kburi, li kien lest jaqbeż il-​limiti? (Proverbji 11:2) Setaʼ ħassu minfuħ bih innifsu minħabba li mexxa fil-​pubbliku l-​Arka li l-​familja tiegħu kienet ħarsitha fil-​privat? (Proverbji 8:13) Kien Għużża daqshekk nieqes mill-​fidi li ħaseb li id Ġeħova ma kinitx kapaċi żżomm il-​kaxxa sagra li kienet tissimbolizza l-​preżenza tiegħu? Kien x’kien il-​każ, nistgħu nkunu ċerti li Ġeħova għamel dak li kien sewwa. X’aktarx li Ġeħova ra xi ħaġa f’qalb Għużża li ġagħlitu jagħmel ġudizzju fuqu malajr.​—Proverbji 21:2.

Bażi Soda għall-​Fiduċja

22. Kif nistgħu naraw l-​għerf taʼ Ġeħova mill-​fatt li l-​Kelma tiegħu kultant ma ddaħħalx ċerti dettalji?

²² L-​għerf taʼ Ġeħova li ma jistaʼ jitqabbel maʼ xejn jidher fil-​Kelma tiegħu minħabba li kultant ma ddaħħalx ċerti dettalji. Ġeħova b’dan il-​mod jagħtina l-​opportunità biex nuru kemm nafdaw fih. Minn dak li kkunsidrajna, m’huwiex ċar li għandna raġunijiet sodi biex naċċettaw il-​ġudizzji taʼ Ġeħova? Iva, meta nistudjaw il-​Kelma t’Alla b’qalb sinċiera u b’moħħ miftuħ, nitgħallmu iktar minn kemm hemm bżonn dwar Ġeħova biex inkunu konvinti li hu dejjem jagħmel dak li hu ġust u sewwa. Għalhekk, jekk xi rakkont Bibliku jqajjem mistoqsijiet li ma nistgħux insibu tweġibiet ċari għalihom mill-​ewwel, ejja jkollna fiduċja sħiħa li Ġeħova għamel dak li hu sewwa.

23. Liema fiduċja jistaʼ jkollna dwar l-​għemejjel li se jwettaq Ġeħova fil-​futur?

²³ Jistaʼ jkollna fiduċja simili dwar l-​għemejjel taʼ Ġeħova fil-​futur. Għalhekk, nistgħu nkunu ċerti li meta jiġi biex jesegwixxi ġudizzju fit-​tribulazzjoni l-​kbira li riesqa, hu m’huwiex se ‘jeqred it-​tajjeb mal-​ħażin.’ (Ġenesi 18:23) L-​imħabba tiegħu għas-​sewwa u l-​ġustizzja qatt ma se tħallih jagħmel dan. Jistaʼ wkoll ikollna fiduċja sħiħa li fid-​dinja l-​ġdida li ġejja, hu se jissodisfa l-​bżonnijiet kollha tagħna bl-​aħjar mod possibbli.​—Salm 145:16.

[Noti taʼ taħt]

Tiftakar Int?

• Għal liema raġuni għandna naċċettaw il-​ġudizzji taʼ Ġeħova?

• X’jistaʼ jgħinna nevitaw li naslu għal konklużjoni żbaljata dwar il-​fatt li Lot offra lil uliedu l-​bniet lil ġemgħa rrabjata?

• X’jistaʼ jgħinna nifhmu għala Ġeħova laqat lil Għużża għall-​mewt?

• Liema fiduċja jistaʼ jkollna dwar l-​għemejjel li se jwettaq Ġeħova fil-​futur?