Mistoqsijiet mill-​Qarrejja

Għandu Kristjan jagħti tipps lil impjegat tal-​gvern jew rigal għas-​servizzi tiegħu, jew jistaʼ dan jitqies bħala tixħim?

Jgħixu fejn jgħixu, il-​Kristjani jipprovaw ikunu għaqlin u prattiċi meta jiffaċċjaw sitwazzjonijiet lokali, billi jiftakru li dak li huwa aċċettat u legali f’pajjiż wieħed, jistaʼ ma jkunx aċċettabbli u jmur kontra l-​liġi f’pajjiż ieħor. (Proverbji 2:​6-9) Ovvjament, Kristjan għandu dejjem iżomm f’moħħu li kulmin jixtieq “jgħammar fid-​dar” taʼ Ġeħova għandu jevita t-​tixħim.​—Salm 15:​1, 5; Proverbji 17:23.

X’inhu t-​tixħim? Skond The World Book Encyclopedia, it-​tixħim ifisser li tagħti jew toffri xi ħaġa taʼ valur lil xi uffiċjal pubbliku magħruf, li għall-​benefiċċju taʼ min ikun ħallsu jikser il-​liġi u ma jaqdix dmiru sew. Għalhekk, tgħix fejn tgħix, il-​fatt li tagħti l-​flus jew rigal lil xi mħallef jew uffiċjal tal-​pulizija biex jikser il-​liġi jew lil spettur biex jagħlaq għajnejh għal nuqqas jew għal ksur tar-​regolamenti hu kunsidrat bħala tixħim. Huwa tixħim ukoll li tuża rigal biex tingħata preferenza, bħal li ismek jitpoġġa fuq quddiem fuq xi lista jew biex taqbeż lil ħaddieħor fil-​kju. Imġiba bħal din turi nuqqas taʼ mħabba.​—Mattew 7:​12; 22:39.

Imma huwa tixħim meta tagħti rigal jew tipps, nagħmlu mod, lil uffiċjal pubbliku sabiex takkwista servizz legali jew biex tevita li tiġi trattat inġustament? Per eżempju, f’ċerti pajjiżi l-​uffiċjali jistgħu ma jkunux iridu jirreġistraw lit-​tfal fl-​iskejjel, idaħħlu persuna fi sptar, jew joħorġu dokumenti taʼ l-​immigrazzjoni jekk ma jaqilgħux tipps. Jew jistgħu joqogħdu jitnikkru biex imexxu l-​applikazzjonijiet għat-​tiġdid tal-​liċenzji u l-​permessi.

Minn pajjiż għall-​ieħor, id-​drawwa tat-​tipps u l-​ħarsa ġenerali lejha jvarjaw. F’pajjiżi fejn dawn il-​pagamenti jkunu drawwa jew xi ħaġa mitluba mill-​individwu, xi Kristjani jistgħu jħossu li dment li m’humiex jiksru l-​liġi ma jkunux qed jiksru l-​prinċipji tal-​Bibbja meta jagħtu tipps lil xi uffiċjal ħalli jwettaq dmiru. F’xi pajjiżi, in-​nies jistgħu saħansitra jqisu dawn il-​pagamenti bħala rigal biex iżidu mal-​paga baxxa li jkollu impjegat tal-​gvern. Żomm f’moħħok li hemm differenza bejn li tagħti rigal għal servizz legali u li tagħmel tixħim għal xi pjaċir li jmur kontra l-​liġi.

Mill-banda l-​oħra, meta xi wħud mix-​Xhieda taʼ Ġeħova jitolbu xi ħaġa legali, huma jirrifjutaw li jagħtu tipps lil spetturi, lil uffiċjali tad-​dwana, jew lil oħrajn anki fejn għoti bħal dan huwa drawwa. Minħabba li x-​Xhieda huma magħrufin lokalment kemm għall-​attenzjoni tagħhom biex jimxu sew u kemm għall-​onestà tagħhom, xi drabi huma jiġu trattati b’tali mod li ħafna nies ikollhom iħallsu biex jiġu trattati bħalhom.​—Proverbji 10:9; Mattew 5:​16.

Fil-qosor, kull qaddej taʼ Ġeħova għandu jiddeċiedi għalih innifsu jekk għandux jagħti tipps biex jieħu servizz legali jew biex jevita li jiġi trattat inġustament. Fuq kollox, għandu jaġixxi b’tali mod li jżomm il-​kuxjenza nadifa, li ma jġib ebda tmaqdir fuq l-​isem taʼ Ġeħova, u li ma jfixkilx lil oħrajn.​—Mattew 6:9; 1 Korintin 10:​31-​33; 2 Korintin 6:3; 1 Timotju 1:5.