Nistgħu Nkampaw maʼ Kull Prova!
QIEGĦED int tiffaċċja xi prova f’ħajtek bħalissa? Qiegħed int tħossok skuraġġit, jew ma tistax tkampa magħha? Ġieli tinkwieta li l-problema tiegħek hija unika u li m’hemm ebda soluzzjoni għaliha? Jekk qed tħossok hekk, qawwi qalbek! Minkejja l-provi li għandna mnejn niffaċċjaw, il-Bibbja tassigurana li Alla jistaʼ jgħinna nkampaw magħhom.
Il-Bibbja tirrikonoxxi li l-qaddejja t’Alla se ‘jiltaqgħu maʼ diversi provi.’ (Ġakbu 1:2) Innota l-kelma “diversi” (bil-Grieg pojkilos). Skond kif kienet tintuża fil-qedem, il-kelma oriġinali kienet tfisser “ħafna” jew “b’ħafna kuluri” u tenfasizza “l-varjetà tal-provi.” Għalhekk, il-frażi “diversi provi” tistaʼ titqabbel mal-varjetà taʼ kuluri li jeżistu. Minkejja dan, Ġeħova jappoġġana ħalli nkunu nistgħu nkampaw maʼ kull waħda minnhom. Għala nistgħu nkunu ċerti minn dan?
“Il-Qalb Tajba Mhix Mistħoqqa t’Alla Espressa b’Diversi Modi”
L-appostlu Pietru nnota li l-Kristjani huma ‘mnikktin b’diversi provi.’ (1 Pietru 1:6) Iktar tard fl-ittra ispirata tiegħu, hu qal li “l-qalb tajba mhix mistħoqqa t’Alla” hi “espressa b’diversi modi.” (1 Pietru 4:10) Fil-frażi “b’diversi modi” tintuża forma taʼ l-istess kelma Griega oriġinali. Meta kkummenta fuq din l-espressjoni, studjuż tal-Bibbja qal hekk: “Dan huwa ħsieb profond. . . . Jekk nirreferu għall-grazzja [jew, il-qalb tajba mhix mistħoqqa] t’Alla li hi pojkilos ifisser li m’hemm ebda kulur fis-sitwazzjoni [jew tip taʼ sitwazzjoni] tal-bniedem li l-grazzja t’Alla ma tistax tegħleb.” Hu jkompli jgħid: “M’hemm ebda ċirkustanza possibbli, ebda kriżi, emerġenza jew bżonn possibbli, li l-grazzja t’Alla ma tistax tittratta, u li l-grazzja t’Alla ma tistax tegħleb b’suċċess. M’hemm xejn fil-ħajja li l-grazzja t’Alla ma tistax tkampa miegħu. Din il-kelma deskrittiva pojkilos tfakkarna li l-grazzja t’Alla [bħallikieku] għandha ħafna kuluri u hi suffiċjenti biex tgħinna nkampaw maʼ kollox.”
Il-Qalba Tajba Mhix Mistħoqqa Se Tgħinna Nkampaw mal-Provi
Skond ma qal Pietru, mod wieħed kif Alla jesprimi l-qalb tajba mhix mistħoqqa tiegħu hu permezz tad-diversi wħud li jifformaw il-kongregazzjoni Kristjana. (1 Pietru 4:11) Kull qaddej t’Alla għandu doni spiritwali, jew abbiltajiet, li bihom jistaʼ jinkuraġġixxi lil dawk li jkunu qed jiffaċċjaw xi provi. (Rumani 12:6-8) Per eżempju, xi membri fil-kongregazzjoni huma għalliema tal-Bibbja li jispikkaw. Il-kliem tagħhom mimli dehen jispira u jqanqal lil uħud biex jissaportu. (Neħemija 8:1-4, 8, 12) Oħrajn jagħmlu żjajjar pastorali regulari fid-djar taʼ dawk li għandhom bżonn l-għajnuna. Żjajjar bħal dawn huma okkażjonijiet li jinkuraġġixxu, huma ‘faraġ għall-qalb.’ (Kolossin 2:2) Meta l-indokraturi jagħmlu żjajjar bħal dawn li jsaħħu l-fidi, huma jkunu qed jaqsmu mid-don spiritwali tagħhom. (Ġwanni 21:16) Jerġaʼ oħrajn fil-kongregazzjoni huma magħrufin għall-imħabba, il-mogħdrija, u t-tenerezza li juru meta jittrattaw maʼ sħabhom fit-twemmin li huma mnikktin minn provi. (Atti 4:36; Rumani 12:10; Kolossin 3:10) L-empatija u l-għajnuna li joffru dawn l-aħwa kollhom imħabba huma turija sinifikanti, jew “kulur,” tal-qalb tajba mhix mistħoqqa t’Alla.—Proverbji 12:25; 17:17.
‘L-Alla taʼ Kull Faraġ’
Fuq kollox, Ġeħova jipprovdi l-faraġ. Hu “Alla taʼ kull faraġ, li jfarraġna fit-tribulazzjoni kollha tagħna.” (2 Korintin 1:3, 4) L-għerf li jinsab fil-Kelma ispirata t’Alla u s-saħħa li jipprovdi permezz taʼ l-ispirtu qaddis tiegħu huma modi prinċipali kif Ġeħova jwieġeb it-talb tagħna għall-għajnuna. (Isaija 30:18, 21; Luqa 11:13; Ġwanni 14:16) Nistgħu nagħmlu kuraġġ mill-wegħda ispirata li għamel l-appostlu Pawlu. Hu qal: “Alla hu leali, u ma jħallikomx tiġu ttantati iktar milli tifilħu, imma mat-tentazzjoni jiftħilkom ukoll it-triq sabiex tkunu tistgħu tissaportuha.”—1 Korintin 10:13.
Iva, kwalunkwe tip taʼ prova li niffaċċjaw, dejjem hemm espressjoni tal-qalb tajba mhix mistħoqqa t’Alla li se tgħinna negħlbuha. (Ġakbu 1:17) L-għajnuna xierqa li Ġeħova jagħti fil-ħin lill-qaddejja tiegħu—ikunu kemm ikunu differenti t-tentazzjonijiet jew l-isfidi—hija waħda mill-evidenzi taʼ “l-għerf t’Alla li jintwera b’ħafna modi differenti.” (Efesin 3:10) Taqbel int?
[Stampi f’paġna 31]
Ġeħova jgħinna nkampaw mal-provi tagħna