Imxi bil-​Fidi, Mhux b’Dak li Jaraw Għajnejk!

“Aħna nimxu bil-​fidi, mhux b’dak li jaraw għajnejna.”​—2 KORINTIN 5:7.

1. X’juri li l-​appostlu Pawlu mexa bil-​fidi, mhux b’dak li raw għajnejh?

HIJA s-​sena 55 E.K. Għaddew xi 20 sena minn mindu raġel li kien jismu Sawl, persekutur tal-​Kristjani, ħaddan il-​Kristjanità. Ma ħalliex iż-​żmien idgħajjiflu jew inaqqaslu l-​fidi tiegħu f’Alla. Għalkemm ma rax l-​affarijiet fis-​smewwiet b’għajnejn fiżiċi, hu żamm sod fil-​fidi. Meta kiteb lill-​Kristjani midlukin, li kellhom it-​tama għas-​sema, l-​appostlu Pawlu qal: “Aħna nimxu bil-​fidi, mhux b’dak li jaraw għajnejna.”​—2 Korintin 5:7.

2, 3. (a) Kif nuru li qed nimxu bil-​fidi? (b) Xi jfisser li nimxu b’dak li jaraw għajnejna?

² Biex nimxu bil-​fidi hemm bżonn li nafdaw għalkollox fl-​abbiltà t’Alla biex jidderieġi ħajjitna. Għandna nkunu konvinti bis-​sħiħ li hu tassew jaf dak li hu l-​aħjar għalina. (Salm 119:66) Hekk kif nieħdu deċiżjonijiet f’ħajjitna u naġixxu fuqhom, nikkunsidraw “realtajiet li ma nistgħux naraw.” (Ebrej 11:​1, The New English Bible) Dawn jinkludu l-​wegħda għal “smewwiet ġodda u art ġdida.” (2 Pietru 3:​13) Mill-​banda l-​oħra, li nimxu b’dak li jaraw għajnejna jfisser li nfittxu ħajja gwidata biss minn dak li nagħrfu bis-​sensi fiżiċi tagħna. Dan hu perikoluż għax jistaʼ jwassalna biex ninjoraw ir-​rieda t’Alla għalkollox.​—Salm 81:13 (81:​12, NW); Koħèlet 11:9.

³ Kemm jekk aħna parti mill-​“merħla żgħira,” bis-​sejħa għas-​smewwiet, u kemm jekk aħna min-​“nagħaġ oħrajn,” bit-​tama għall-​art, kull wieħed u waħda minna għandu jieħu bis-​serjetà l-​parir biex jimxi bil-​fidi mhux b’dak li jaraw għajnejh. (Luqa 12:32; Ġwanni 10:16) Ejja naraw kif jekk insegwu dan il-​parir ispirat se niġu protetti milli nsiru vittma tat-​“tgawdija temporanja tad-​dnub,” min-​nassa tal-​materjaliżmu, u milli ma nibqgħux inżommu t-​tmiem taʼ din is-​sistema dinjija f’moħħna. Se neżaminaw ukoll il-​perikli taʼ li nimxu b’dak li jaraw għajnejna.​—Ebrej 11:25.

Nirrifjutaw “it-​Tgawdija Temporanja tad-​Dnub”

4. Mosè liema għażla għamel, u għala?

⁴ Immaġina l-​ħajja li Mosè, bin Għamram, setaʼ jgawdi. Imrobbi fost il-​familja rjali fl-​Eġittu tal-​qedem, Mosè kellu l-​potenzjal li jikseb setgħa, għana, u awtorità. Mosè setaʼ jirraġuna: ‘Jien ġejt mgħallem tajjeb fl-​għerf stmat ħafna taʼ l-​Eġittu, u jien setgħan fil-​kliem u fl-​għemil. Jekk nibqaʼ qrib il-​familja rjali, nistaʼ nuża l-​pożizzjoni tiegħi biex ngħin lil ħuti Ebrej li huma maħqurin!’ (Atti 7:​22) Minflok, Mosè għażel li jiġi “trattat ħażin mal-​poplu t’Alla.” Għala? X’qanqal lil Mosè jagħti dahru lil dak kollu li kellu x’joffri l-​Eġittu? Il-​Bibbja twieġeb: “Bil-​fidi [Mosè] telaq mill-​Eġittu u ma beżax mir-​rabja tas-​sultan, imma baqaʼ sod bħallikieku qed jara lil Dak li hu inviżibbli.” (Ebrej 11:​24-​27) Il-​fidi taʼ Mosè fil-​premju ċert taʼ Ġeħova għas-​sewwa għenitu jirreżisti d-​dnub u jżomm lura milli jieħu sehem fil-​pjaċiri temporanji tiegħu.

5. L-​eżempju taʼ Mosè kif jinkuraġġina?

⁵ Aħna wkoll spiss ikollna niffaċċjaw il-​bżonn li nieħdu deċiżjonijiet fuq kwistjonijiet bħal: ‘Għandi nieqaf nipprattika ċerti prattiċi jew drawwiet li m’humiex kompletament fi qbil mal-​prinċipji Bibliċi? Għandi naċċetta impjieg li jidher li għandu vantaġġi materjali imma li se jtellef il-​progress spiritwali tiegħi?’ L-​eżempju taʼ Mosè jinkuraġġina biex ma niħdux deċiżjonijiet li jirriflettu l-​ħarsa tad-​dinja li tara l-​affarijiet taʼ dak il-​ħin; minflok, għandna neżerċitaw fidi fl-​għerf li jara bil-​quddiem taʼ “Dak li hu inviżibbli”​—Alla Ġeħova. Bħal Mosè, jalla ngħożżu l-​ħbiberija taʼ Ġeħova iktar minn kwalunkwe ħaġa li din id-​dinja għandha x’toffri.

6, 7. (a) Għesaw kif wera li pprefera jimxi b’dak li raw għajnejh? (b) Liema eżempju taʼ twissija nistgħu naraw f’Għesaw?

⁶ Ara l-​kuntrast bejn Mosè u Għesaw, bin il-​patrijarka Iżakk. Għesaw ipprefera gratifikazzjoni taʼ dak il-​ħin. (Ġenesi 25:​30-​34) Minħabba li ‘m’apprezzax l-​affarijiet sagri,’ Għesaw ċaħad id-​drittijiet tiegħu bħala l-​ewwel imwieled “għal ikla waħda.” (Ebrej 12:16) Hu naqas li jikkunsidra kif id-​deċiżjoni tiegħu biex ibigħ id-​drittijiet tiegħu bħala l-​ewwel imwieled kienet se teffettwa r-​relazzjoni tiegħu maʼ Ġeħova jew x’influwenza kien se jkollhom l-​azzjonijiet tiegħu fuq uliedu. Ma kellux ħarsa spiritwali. Għesaw għalaq għajnejh għall-​wegħdi prezzjużi t’Alla, billi qieshom taʼ valur żgħir. Hu mexa b’dak li raw għajnejh, mhux bil-​fidi.

⁷ Għesaw jipprovdi eżempju taʼ twissija għalina llum. (1 Korintin 10:11) Meta niffaċċjaw deċiżjonijiet, kemm jekk kbar u kemm jekk żgħar, m’għandniex niġu mħajrin mill-​propaganda tad-​dinja taʼ Satana, li tgħid li għandek tieħu dak li trid meta trid. Nagħmlu tajjeb jekk nistaqsu lilna nfusna: ‘Qiegħed nuri tendenzi bħal taʼ Għesaw meta nieħu deċiżjonijiet? Jekk insus wara dak li rrid issa se nispiċċa nwarrab l-​interessi spiritwali? Qegħdin l-​għażliet tiegħi jipperikolaw il-​ħbiberija tiegħi m’Alla u l-​premju li hemm jistennieni fil-​futur? X’tip t’eżempju qed nagħti lil oħrajn?’ Jekk l-​għażliet tagħna jirriflettu apprezzament għall-​affarijiet sagri, Ġeħova se jberikna.​—Proverbji 10:22.

Nevitaw in-​Nassa tal-​Materjaliżmu

8. Liema twissija rċivew il-​Kristjani mil-​Laodiċija, u dan għala hu taʼ interess għalina?

⁸ F’rivelazzjoni lill-​appostlu Ġwanni lejn it-​tmiem taʼ l-​ewwel seklu, Ġesù Kristu glorifikat wassal messaġġ lill-​kongregazzjoni li tinsab fil-​Laodiċija, l-​Asja Minuri. Kien messaġġ taʼ twissija kontra l-​materjaliżmu. Għalkemm kienu għonja materjalment, il-​Kristjani mil-​Laodiċija kienu falluti spiritwalment. Minflok ma komplew jimxu bil-​fidi, huma ħallew l-​affarijiet materjali jagħmuhom spiritwalment. (Rivelazzjoni 3:​14-​18) Il-​materjaliżmu għandu effett simili llum. Idgħajjef il-​fidi tagħna u jġagħalna nieqfu “niġru bis-​sabar it-​tiġrija” għall-​ħajja. (Ebrej 12:1) Jekk ma noqogħdux attenti, il-​“pjaċiri taʼ din il-​ħajja” jistgħu jieħdu post attivitajiet spiritwali sal-​punt li “jinħonqu għalkollox.”​—Luqa 8:​14.

9. Il-​kuntentizza u l-​apprezzament għall-​ikel spiritwali kif jipproteġuna?

⁹ Ċavetta għall-​protezzjoni spiritwali hi l-​kuntentizza minflok l-​użu taʼ din id-​dinja bis-​sħiħ u l-​għana materjali. (1 Korintin 7:​31; 1 Timotju 6:​6-8) Meta nimxu bil-​fidi u mhux b’dak li jaraw għajnejna, insibu ferħ fil-​ġenna spiritwali li ngawdu issa. Hekk kif nieħdu minn ikel spiritwali tant nutrittiv, ma nitqanqlux biex ‘ngħannu bl-​hena [“bil-​kundizzjoni tajba,” NW] taʼ qalbna’? (Isaija 65:​13, 14) Iżjed minn hekk, aħna nitgħaxxqu fis-​sħubija tagħna maʼ dawk li juru l-​frott taʼ l-​ispirtu t’Alla. (Galatin 5:​22, 23) Kemm hu vitali li nsibu sodisfazzjon u serħan f’dak li Ġeħova jipprovdi b’mod spiritwali!

10. Liema mistoqsijiet nagħmlu tajjeb li nistaqsu lilna nfusna?

¹⁰ Xi mistoqsijiet li nagħmlu tajjeb li nistaqsu lilna nfusna huma: ‘X’post għandhom l-​affarijiet materjali f’ħajti? Qed nuża l-​affarijiet materjali li għandi biex ngħix ħajja taʼ pjaċiri jew biex nippromwovi l-​qima vera? Xi jġibli l-​akbar sodisfazzjon? Huwa l-​istudju tal-​Bibbja u s-​sħubija fil-​laqgħat Kristjani, jew is-​Sibtijiet u l-​Ħdud ’il bogħod mir-​responsabbiltajiet Kristjani? Inħalli tmiem il-​ġimgħa għar-​rikreazzjoni minflok ma nuża dan il-​ħin għall-​ministeru taʼ l-​għalqa u għall-​attivitajiet oħra li għandhom x’jaqsmu mal-​qima pura?’ Li nimxu bil-​fidi jfisser li nibqgħu beżlin fix-​xogħol tas-​Saltna, b’fiduċja sħiħa fil-​wegħdi taʼ Ġeħova.​—1 Korintin 15:58.

Żomm it-​Tmiem f’Moħħok

11. Il-​fatt li nimxu bil-​fidi kif jgħinna nżommu t-​tmiem f’moħħna?

¹¹ Jekk nimxu bil-​fidi se niġu megħjunin biex inwarrbu l-​idea li għandha d-​dinja li t-​tmiem jinsab fil-​bogħod jew li mhux ġej. Għall-​kuntrarju taʼ dawk ix-​xettiċi li jmaqdru l-​profeziji tal-​Bibbja, aħna nagħrfu kif il-​ġrajjiet tad-​dinja jwettqu dak li bassret il-​Kelma t’Alla għal żmienna. (2 Pietru 3:​3, 4) Per eżempju, l-​attitudni u l-​imġiba tan-​nies in ġenerali ma jagħtux evidenza li qed ngħixu “fl-​aħħar jiem”? (2 Timotju 3:​1-5) Bl-​għajnejn tal-​fidi, aħna naraw li l-​ġrajjiet dinjin kurrenti m’humiex biss ripetizzjoni tal-​passat. Minflok, huma jifformaw “is-​sinjal tal-​preżenza [taʼ Kristu] u taʼ tmiem is-​sistema.”​—Mattew 24:​1-​14.

12. Il-​kliem taʼ Ġesù li jinsab f’Luqa 21:​20, 21 kif twettaq fl-​ewwel seklu?

¹² Ikkunsidra ġrajja fl-​ewwel seklu taʼ l-​Era Komuni tagħna li għandha xebh fi żmienna. Meta kien fuq l-​art, Ġesù Kristu wissa lis-​segwaċi tiegħu: “Meta taraw lil Ġerusalemm imdawra bil-​kampijiet taʼ l-​armati, imbagħad kunu afu li qorbot il-​ħerba tagħha. Imbagħad dawk li jkunu fil-​Lhudija ħa jibdew jaħarbu lejn il-​muntanji, u dawk li jkunu f’nofsha ħa joħorġu minnha.” (Luqa 21:​20, 21) Bħala twettiq taʼ din il-​profezija, l-​armati Rumani taħt il-​kmand taʼ Ċestju Gallu assedjaw lil Ġerusalemm fis-​sena 66 E.K. Imma l-​armati rtiraw ħabta u sabta, billi taw is-​sinjal u l-​opportunità lill-​Kristjani hemmhekk biex “jaħarbu lejn il-​muntanji.” Fis-​sena 70 E.K., l-​armati Rumani rritornaw, attakkaw il-​belt taʼ Ġerusalemm, u qerdu t-​tempju tagħha. Ġużeppi Flavju jirrapporta li iktar minn miljun Lhudi nqatlu, u 97,000 ittieħdu bħala lsiera. Dik is-​sistema Lhudija esperjenzat ġudizzju divin. Dawk li mxew bil-​fidi u taw kas it-​twissija taʼ Ġesù skansaw il-​qerda.

13, 14. (a) Liema ġrajjiet dalwaqt se jseħħu? (b) Għala għandna nibqgħu konxji tat-​twettiq tal-​profezija tal-​Bibbja?

¹³ Xi ħaġa simili se sseħħ fi żmienna. Ħa jkun hemm xi elementi fil-​Ġnus Magħquda li se jkunu involuti fl-​esekuzzjoni taʼ ġudizzju divin. Hekk kif l-​armati Rumani taʼ l-​ewwel seklu suppost kienu hemm biex iżommu l-​Pax Romana (Il-Paċi Rumana), il-​Ġnus Magħquda taʼ llum suppost qed iżżomm il-​paċi. Għalkemm l-​armati Rumani pprovaw iżommu sigurtà madwar id-​dinja taʼ dak iż-​żmien, huma kienu l-​uħud li qerdu lil Ġerusalemm. Bl-​istess mod illum, il-​profezija tal-​Bibbja tindika li forzi mħarrġin għal gwerra tal-​Ġnus Magħquda se jaraw ir-​reliġjon bħala element li jqanqal l-​inkwiet u se jieħdu passi biex jeqirdu lil Ġerusalemm taʼ żmienna​—il-​Kristjaneżmu​—flimkien mal-​kumplament taʼ Babilonja l-​Kbira. (Rivelazzjoni 17:​12-​17) Iva, l-​imperu dinji kollu kemm hu tar-​reliġjon falza qed joqrob lejn il-​qerda.

¹⁴ Il-​qerda tar-​reliġjon falza se timmarka l-​bidu tat-​tribulazzjoni l-​kbira. Fl-​aħħar parti tat-​tribulazzjoni, l-​aħħar elementi taʼ din is-​sistema mill-​agħar se jinqerdu. (Mattew 24:​29, 30; Rivelazzjoni 16:​14, 16) Il-​fatt li nimxu bil-​fidi jżommna konxji tat-​twettiq tal-​profezija tal-​Bibbja. Aħna ma niġux imqarrqin naħsbu li xi aġenzija magħmula mill-​bniedem bħall-​Ġnus Magħquda hija l-​mezz li se juża Alla biex iġib paċi u sigurtà vera. Għalhekk, m’għandux il-​mod taʼ ħajja tagħna juri l-​konvinzjoni li għandna li “l-​Jum il-​kbir tal-​Mulej fil-​qrib”?​—Sofonija 1:​14.

Kemm Hu Perikoluż li Timxi b’Dak li Jaraw Għajnejk?

15. Minkejja li esperjenza l-​barka t’Alla, liema nassa waqaʼ fiha l-​ġens taʼ Iżrael?

¹⁵ L-​esperjenzi taʼ Iżrael tal-​qedem juru l-​perikli li jiġu jekk timxi b’dak li jaraw għajnejk, u b’hekk tiddgħajjef il-​fidi. Minkejja li raw l-​għaxar kastigi li umiljaw l-​allat foloz taʼ l-​Eġittu u mbagħad esperjenzaw il-​ħelsien spettakolari mill-​Baħar l-​Aħmar, l-​Iżraelin b’diżubbidjenza għamlu għoġol tad-​deheb u bdew jaqduh. Tilfu l-​paċenzja u ddejqu jistennew lil Mosè, li “ddawwar ma niżel minn fuq il-​muntanja.” (Eżodu 32:​1-4) In-​nuqqas taʼ paċenzja qanqalhom jagħtu qima lil idolu li setgħu jaraw b’għajnejhom. Il-​fatt li mxew b’dak li raw b’għajnejhom insulta lil Ġeħova u wassal għall-​mewt taʼ madwar “tlitt elef ruħ.” (Eżodu 32:​25-​29) Kemm hu taʼ niket meta qaddej taʼ Ġeħova llum jieħu deċiżjonijiet li jindikaw nuqqas taʼ fiduċja f’Ġeħova u nuqqas t’assiguranza fl-​abbiltà tiegħu biex iwettaq il-​wegħdi tiegħu!

16. L-​Iżraelin għala ġew effettwati mill-​apparenza taʼ barra?

¹⁶ L-​apparenzi taʼ barra effettwaw lill-​Iżraelin b’mod negattiv f’oqsma oħra. Il-​fatt li mxew b’dak li raw b’għajnejhom ġagħalhom jirtogħdu bil-​biżaʼ minħabba l-​għedewwa tagħhom. (Numri 13:​28, 32; Dewteronomju 1:​28) Ġagħalhom jisfidaw l-​awtorità li Alla ta lil Mosè u jgergru dwar it-​tip taʼ ħajja li kellhom. Dan in-​nuqqas taʼ fidi wassal biex jippreferu iktar l-​Eġittu, kontrollat mid-​demonji, milli l-​Art Imwiegħda. (Numri 14:​1-4; Salm 106:24) Min jaf kemm ħassu mweġġaʼ Ġeħova hekk kif ra d-​diżrispett kbir li wrew niesu lejn is-​Sultan inviżibbli tagħhom!

17. X’ġagħal lill-​Iżraelin jiċħdu l-​gwida taʼ Ġeħova fi żmien Samwel?

¹⁷ Għal darb’oħra lura fi żmien Samwel, il-​ġens magħżul taʼ Iżrael inqabad fin-​nassa li jimxi b’dak li jaraw għajnejh. Il-​poplu beda jixtieq sultan li setaʼ jara. Avolja Ġeħova kien wera li hu kien is-​Sultan tagħhom, dan ma kienx biżżejjed biex iqanqalhom jimxu bil-​fidi. (1 Samwel 8:​4-9) Għall-​ħsara tagħhom stess, huma bi bluha ċaħdu l-​gwida perfetta taʼ Ġeħova, u ppreferew li jkunu bħan-​nazzjonijiet taʼ madwarhom.​—1 Samwel 8:​19, 20.

18. Liema lezzjonijiet nistgħu nitgħallmu dwar il-​perikli li nimxu b’dak li jaraw għajnejna?

¹⁸ Bħala l-​qaddejja taʼ Ġeħova llum, aħna ngħożżu r-​relazzjoni tajba tagħna m’Alla. Aħna ħerqanin nitgħallmu u napplikaw lezzjonijiet taʼ valur minn ġrajjiet fil-​passat f’ħajjitna. (Rumani 15:4) Meta l-​Iżraelin imxew b’dak li raw għajnejhom, huma nsew li Alla kien qed jidderiġihom permezz taʼ Mosè. Jekk ma noqogħdux attenti, aħna wkoll nistgħu ninsew li Alla Ġeħova u Ġesù Kristu, Mosè Akbar, qed jidderieġu l-​kongregazzjoni Kristjana taʼ llum. (Rivelazzjoni 1:​12-​16) Għandna noqogħdu attenti li ma nadottawx ħarsa umana lejn il-​parti taʼ l-​organizzazzjoni taʼ Ġeħova li tinsab fuq l-​art. Jekk nagħmlu hekk jistaʼ jkollna spirtu taʼ tgergir u ma napprezzawx ir-​rappreżentanti taʼ Ġeħova flimkien maʼ l-​ikel spiritwali li jipprovdi “l-​ilsir leali u għaqli.”​—Mattew 24:45.

Kun Determinat li Timxi bil-​Fidi

19, 20. X’int determinat li tagħmel, u għala?

¹⁹ Il-​Bibbja tgħid: “Aħna ma nissarawx kontra d-​demm u l-​laħam, imma kontra l-​gvernijiet, kontra l-​awtoritajiet, kontra l-​ħakkiema dinjin taʼ dan id-​dlam, kontra l-​forzi taʼ l-​ispirti mill-​agħar fil-​postijiet tas-​sema.” (Efesin 6:​12) L-​għadu ewlieni tagħna hu Satana x-​Xitan. Il-​mira tiegħu hi li jeqirdilna l-​fidi tagħna f’Ġeħova. Hu se juża kull tip taʼ persważjoni li jistaʼ biex jipprova jġagħalna nbiddlu d-​deċiżjoni tagħna li naqdu lil Alla. (1 Pietru 5:​8) X’se jipproteġina milli niġu mqarrqin mill-​apparenza taʼ barra tas-​sistema taʼ Satana? Il-​fatt li nimxu bil-​fidi, u mhux b’dak li jaraw għajnejna! Fiduċja fil-​wegħdi taʼ Ġeħova se tgħassisna milli nesperjenzaw ‘nawfraġju fil-​fidi tagħna.’ (1 Timotju 1:​19) Għalhekk, ejja nkunu determinati li nkomplu nimxu bil-​fidi, u nkunu fiduċjużi li Ġeħova se jberikna. U jalla nkomplu nitolbu li naħarbu l-​affarijiet kollha li se jseħħu fil-​futur qarib.​—Luqa 21:36.

²⁰ Hekk kif nimxu bil-​fidi, u mhux b’dak li jaraw għajnejna, għandna Xempju mill-​aħjar. Il-​Bibbja tgħid: “Kristu sofra għalikom, u ħallielkom mudell biex timxu mill-​qrib wara l-​passi tiegħu.” (1 Pietru 2:​21) L-​artiklu li jmiss se jiddiskuti kif nistgħu nkomplu nimxu bħalma mexa hu.

Tiftakar Int?

• X’tgħallimt mill-​eżempji taʼ Mosè u Għesaw dwar li timxi bil-​fidi, mhux b’dak li tara b’għajnejk?

• X’inhi ċavetta waħda biex tevita l-​materjaliżmu?

• Il-​fatt li nimxu bil-​fidi kif jgħinna nevitaw il-​ħarsa li t-​tmiem hu fil-​bogħod?

• Għala hu taʼ periklu li nimxu b’dak li jaraw għajnejna?

[Stampa f’paġna 17]

Mosè mexa bil-​fidi

[Stampa f’paġna 18]

Ir-​rikreazzjoni spiss iżżommok milli tagħmel attivitajiet teokratiċi?

[Stampa f’paġna 20]

Il-​fatt li tagħti kas il-​Kelma t’Alla kif jipproteġik?