Tistaʼ Tafda l-Pariri taʼ l-“Esperti”?
FID-DINJA taʼ llum, in-nies jistgħu jużaw il-kompjuter biex ifittxu pariri għall-ġenituri fuq l-Internet u malajr isibu iktar minn 26 miljun referenza dwar dan is-suġġett. Jekk tieħu biss minuta biex tfittex u taqra kull parir, it-tfal tiegħek jilħqu jikbru u jitilqu mid-dar qabel ma tispiċċa taqrahom kollha.
Qabel ma kien hawn it-tobba, il-psikoloġi tat-tfal, u l-Internet, il-ġenituri fejn kienu jsibu l-pariri? Ġeneralment huma kienu jmorru għand xi ħadd mill-qraba tagħhom. L-ommijiet, il-missirijiet, u z-zijiet kienu lesti u kapaċi joffru gwida, għajnuna finanzjarja, u jieħdu ħsieb it-tfal meta jkun hemm bżonn. Minħabba li għadd kbir taʼ nies ma baqgħux jgħixu fl-irħula u marru jgħixu fil-bliet, dawn ir-rabtiet familjari mill-qrib kważi ntemmu għalkollox. Illum, l-ommijiet u l-missirijiet spiss ikollhom jiffaċċjaw waħedhom l-isfidi tat-trobbija tat-tfal.
Din żgur li hija raġuni waħda għala l-industrija tas-servizzi biex jieħdu ħsieb it-tfal illum qed tikber malajr. Raġuni oħra hi t-twemmin mifrux fix-xjenza. Lejn l-aħħar tas-seklu 19, il-pubbliku Amerikan kien diġà qed isir konvint li x-xjenza tistaʼ ttejjeb kull aspett tal-ħajja tal-bniedem. Għala m’għandhiex din ittejjeb ukoll it-trobbija tat-tfal? Għalhekk, meta fl-1899 il-Kungress Nazzjonali Amerikan taʼ l-Ommijiet ilmenta fil-pubbliku minħabba “n-nuqqas taʼ kapaċità tal-ġenituri,” ħafna “esperti tax-xjenza” malajr bdew joffru l-għajnuna. Huma taw kelmithom li jgħinu lill-ġenituri fl-isfida tagħhom biex irabbu lit-tfal.
Pariri fil-Kotba għall-Ġenituri
Imma x’wettqu dawn l-esperti? Huma l-ġenituri taʼ llum inqas ansjużi u mħejjijin aħjar biex irabbu lil uliedhom iktar minn dawk li ġew qabilhom? Mhux skond stħarriġ reċenti li sar fil-Britannja. Dan kixef li xi 35 fil-mija mill-ġenituri bit-tfal żgħar għadhom qed ifittxu pariri li jistgħu jafdawhom. Oħrajn iħossu li m’għandhomx għażla oħra ħlief li jimxu skond dak li jaħsbu huma.
Ann Hulbert, fil-ktieb tagħha Raising America: Experts, Parents, and a Century of Advice About Children, tistudja r-rekord stabbilit tal-letteratura professjonali għat-trobbija tat-tfal. Hulbert, li hi stess hija omm taʼ żewġt itfal, tgħid li ftit minn dak li sabu l-esperti kien ibbażat fuq xjenza stabbilita fis-sod. Minflok, jidher li l-pariri tagħhom ġew influwenzati mill-esperjenza tagħhom stess iktar milli minn informazzjoni bil-provi. Meta nħarsu lejn il-passat, donnu jidher li ħafna minn dak li kitbu kien ibbażat fuq attitudni tal-mument, kontradittorju, u kultant tassew stramb.
Allura f’liema sitwazzjoni jinsabu l-ġenituri taʼ llum? Sinċerament, ħafna huma konfużi, hekk kif jinsabu ffaċċjati iktar minn qatt qabel b’pariri, opinjonijiet, u kontroversji. Madankollu, mhux il-ġenituri kollha jħossu li m’għandhomx gwida. Xi ġenituri madwar id-dinja kollha qed jibbenefikaw minn sors antik t’għarfien li għadu juri li hu sors taʼ pariri li tistaʼ tafdahom, bħalma se juri l-artiklu li jmiss.