X’Inhi s-​Saltna t’Alla?

X’KIENET it-​tema taʼ l-​ippridkar taʼ Ġesù? Skond Ġesù nnifsu kienet is-​Saltna t’Alla. (Luqa 4:43) Meta n-​nies kienu jisimgħuh jitkellem, żgur li semgħuh jagħmel ħafna referenzi għal din is-​Saltna. Kienu huma mħawdin? Staqsewh x’kienet din is-​Saltna? Le. Ir-​rakkonti taʼ l-​Evanġelji ma jsemmux mistoqsijiet bħal dawn. Mela kienet is-​Saltna t’Alla twemmin familjari maʼ dawk in-​nies?

Il-fatt hu li l-​Iskrittura tal-​qedem li l-​Lhud kienu jqisuha bħala qaddisa ddeskriviet dik is-​Saltna, u b’termini ħajjin u reali wriet x’inhi u x’se twettaq. Illum nistgħu nitgħallmu saħansitra iktar dwar is-​Saltna bl-​istess mod bħalma għamlu l-​Lhud—permezz tal-​Bibbja. Ejja nikkunsidraw sebaʼ veritajiet li l-​Bibbja tgħallimna dwar is-​Saltna. L-​ewwel tlieta kienu diġà disponibbli għal-​Lhud kemm qabel u anki fi żmien Ġesù. It-​tlieta taʼ wara ġew rivelati permezz taʼ Kristu jew taʼ l-​appostli tiegħu matul l-​ewwel seklu. L-​aħħar verità saret magħrufa fi żmienna.

1. Is-​Saltna t’Alla hija gvern reali, wieħed li se jibqaʼ għal dejjem. L-​ewwel profezija tal-​Bibbja rrivelat li Alla kellu jibgħat ħellies lill-​umanità leali. Dan il-​Wieħed imsejjaħ in-​‘nisel’ kellu jneħħi l-​problemi kollha li bdew iseħħu permezz tar-​ribelljoni taʼ Adam, Eva, u Satana. (Ġenesi 3:15) Ħafna żmien wara, is-​sultan leali David intqallu xi ħaġa eċċitanti dwar in-​“nisel,” jew il-​Messija. Hu kellu jsir Sultan taʼ Saltna. Dan il-​gvern kellu jkun differenti mill-​gvernijiet l-​oħrajn. Dan kellu jibqaʼ għal dejjem.—2 Samwel 7:12-14.

2. Is-​Saltna t’Alla se ġġib it-​tmiem tal-​gvernijiet umani kollha. Il-​profeta Danjel ngħata viżjoni li fiha ra numru taʼ qawwiet dinjin li kellhom jiġu wara xulxin u li kellhom jibqgħu ġejjin tul l-​istorja sa żmienna. Innota l-​quċċata eċċitanti taʼ din il-​viżjoni: “Fi żmien dawn is-​slaten [umani taʼ l-​aħħar] Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha, waqt li hi tibqaʼ wieqfa għal dejjem.” Għalhekk, is-​saltniet kollha, jew il-​gvernijiet, taʼ din id-​dinja—bil-​gwerer, bl-​oppressjoni, u bil-​korruzzjoni tagħhom—se jiġu meqrudin għal dejjem. Bħalma turi l-​profezija taʼ Danjel, is-​Saltna t’Alla dalwaqt se taħkem fuq l-​art kollha. (Danjel 2:44, 45) Is-​Saltna mhux biss se tkun reali imma se tkun ukoll l-​uniku gvern li se jibqaʼ jeżisti.a

3. Is-​Saltna t’Alla se ttemm il-​gwerer, il-​mard, il-​ġuħ, u saħansitra l-​mewt. Il-​profeziji eċċitanti tal-​Bibbja jirrivelaw x’se twettaq is-​Saltna t’Alla hawn fuq l-​art. Dan il-​gvern se jwettaq dak li ebda organizzazzjoni magħmula mill-​bniedem la qatt wettqet u lanqas qatt ma tistaʼ twettaq. Immaġina—l-​armi kollha tal-​gwerra se jiġu meqrudin għal dejjem! “Iwaqqaf il-​gwerer sa truf l-​art.” (Salm 46:10 [46:9, NW]) Daqshekk tobba, sptarijiet, jew mard taʼ kull tip. “Ħadd minn min jgħammar hemm ma jgħid: ‘Jien marid.’” (Isaija 33:24) Daqshekk ġuħ, nuqqas taʼ ikel, malnutrizzjoni, jew nies imutu bil-​ġuħ. “Ikun kotran il-​qamħ fuq l-​art.” (Salm 72:16) Daqshekk funerali, ċimiterji, kmamar mortwarji, jew is-​sofferenza li dawn iġibu magħhom. Il-​mewt, l-​għadu li ma jgħejja qatt tagħna, se tinqered sa fl-​aħħar. Alla se “jeqred il-​mewt għal dejjem, jixxotta Sidi l-​Mulej id-​dmugħ minn fuq kull wiċċ.”—Isaija 25:8.

4. Is-​Saltna t’Alla għandha Ħakkiem magħżul minn Alla. Il-​Messija ma ħatarx lilu nnifsu bħala ħakkiem, lanqas ma ġie magħżul mill-​bnedmin imperfetti. Hu ġie magħżul personalment minn Alla Ġeħova. It-​titli Messija u Kristu jindikaw li hu ġie inkarigat minn Alla. Iż-​żewġ titli jfissru “l-​Midluk.” Għalhekk, dan is-​Sultan huwa midluk, jew magħżul għall-​inkarigu speċjali tiegħu minn Ġeħova. Alla jgħid dwaru: “Araw il-​qaddej tiegħi, li jiena nwieżen, il-​maħtur tiegħi li fih qalbi strieħet! Qegħedt l-​ispirtu tiegħi fuqu, biex iġib il-​ġustizzja lill-​ġnus.” (Isaija 42:1; Mattew 12:17, 18) Min jaf aħjar mill-​Ħallieq tagħna x’tip taʼ Ħakkiem għandna bżonn?

5. Il-​Ħakkiem tas-​Saltna t’Alla wera quddiem l-​umanità kollha li jistħoqqlu jkun Sultan. Ġesù taʼ Nazaret wera li kien il-​Messija mbassar. Hu twieled fil-​linja ġenealoġika li Alla kien għażel. (Ġenesi 22:18; 1 Kronaki 17:11; Mattew 1:1) Meta kien fuq l-​art, hu wettaq ħafna profeziji dwar il-​Messija li kienu miktubin sekli qabel. Ukoll, hu ġie identifikat mis-​sema bħala l-​Messija. Dan kif? Sewwa, Alla tkellem mis-​sema u identifika lil Ġesù bħala Ibnu; l-​anġli stqarrew li Ġesù kien il-​Messija mbassar; u Ġesù wettaq il-​mirakli—spiss quddiem mijiet jew saħansitra eluf taʼ xhieda li raw b’għajnejhom stess—li b’mod ċar seħħew bil-​qawwa t’Alla.b Ġesù wera għal darba wara l-​oħra x’tip taʼ Ħakkiem kien se jkun. Hu mhux biss kellu l-​qawwa biex jgħin lin-​nies imma wkoll kellu x-​xewqa. (Mattew 8:1-3) Hu kien altruist, jagħder, kuraġġuż, u umli. Ir-​rakkont dwar ħajtu hawn fuq l-​art qiegħed fil-​Bibbja għal kulħadd biex jaqrah.

6. Is-​Saltna t’Alla għandha 144,000 individwu li se jaħkmu maʼ Kristu. Ġesù qal li oħrajn, inklużi l-​appostli tiegħu, kellhom jaħkmu miegħu fis-​sema. Hu sejjaħ lil dan il-​grupp il-​“merħla żgħira.” (Luqa 12:32) Iktar tard, l-​appostlu Ġwanni ntqallu li din il-​merħla żgħira kienet se tikkonsisti f’144,000 membru. Huma kien se jkollhom inkarigu eċċitanti fis-​sema, li jaħkmu bħala slaten u jaqdu bħala qassisin flimkien maʼ Kristu.—Rivelazzjoni 5:9, 10; 14:1, 3.

7. Is-​Saltna t’Alla, li issa qed taħkem fis-​sema, hija lesta biex tibda l-​ħakma tagħha fuq l-​art kollha. Din taʼ l-​aħħar hija waħda mill-​iktar veritajiet eċċitanti li nistgħu nitgħallmu. Il-​Bibbja tagħti evidenza abbundanti li Ġesù ngħata l-​awtorità tiegħu bħala Sultan fis-​sema. Hu qed jaħkem hemmhekk issa, fi żmienna stess, u dalwaqt se jestendi l-​ħakma tiegħu fuq l-​art kollha u se jwettaq il-​profeziji meraviljużi li diġà semmejna. Imma kif nistgħu nkunu ċerti li s-​Saltna t’Alla qed taħkem issa? U Meta se tibda taħkem fuq l-​art?

[Noti taʼ taħt]