Aħna maħluqin bl-iskop li ngħixu għal dejjem

MIN minna ma jixtieqx jgħix ħajja twila u ferħana? Immaġinak tgħix għal dejjem kuntent u mingħajr qatt ma timrad! Inkunu nistgħu nqattgħu iktar ħin maʼ dawk li nħobbu, induru d-dinja, nitgħallmu affarijiet ġodda, u nagħmlu dak kollu li tkun tixtieq qalbna u li jinteressana.

Għala n-nies iridu jgħixu għal dejjem? L-Iskrittura tgħidilna li Alla poġġa din ix-xewqa f’qalbna. (Ekkleżjasti 3:11) Tgħid ukoll li “Alla hu mħabba.” (1 Ġwanni 4:8) Allura, jagħmel sens li Alla kollu mħabba jpoġġi fina xewqa li ngħixu għal dejjem jekk qatt ma nistgħu nagħmlu dan?

Ħadd ma jixtieq imut. Infatti, il-Bibbja tiddeskrivi l-mewt bħala “għadu” mhux mixtieq. (1 Korintin 15:26) Xi wħud imutu żgħar, oħrajn ikunu kbar fl-età, imma eventwalment kulħadd se jmut. Ħafna nies jibżgħu meta jaħsbu dwar il-mewt. Qatt se jingħeleb dan l-għadu? Huwa dan verament possibbli?

EVIDENZA GĦALA JISTAʼ JKOLLNA TAMA

Kont taf li qatt ma kien l-iskop t’Alla li l-bnedmin imutu? Il-ktieb Bibliku tal-Ġenesi fih evidenza li l-iskop t’Alla kien li l-bnedmin jgħixu għal dejjem fuq l-art. Alla Ġeħova ħalaq l-art b’kulma hemm bżonn biex il-bnedmin jgħixu u jkunu ferħanin. Imbagħad ħalaq lill-ewwel raġel, Adam, u poġġieh f’ġenna tal-art, fi ġnien fl-Għeden. Wara dan, “Alla ra kulma kien għamel, u, ara, kien tajjeb ħafna.”—Ġenesi 1:26, 31.

Adam kien maħluq perfett, fuq xbieha t’Alla. (Dewteronomju 32:4) Anki l-mara t’Adam, Eva, kienet maħluqa mingħajr difett u perfetta fiżikament u mentalment. Ġeħova qalilhom: “Nisslu u oktru u imlew l-art u rażżnuha, u ħa jkunu sottomessi lejkom il-ħut tal-baħar u l-ħlejjaq li jtiru fis-smewwiet u kull ħliqa ħajja li titħarrek fuq l-art.”—Ġenesi 1:28.

Biex jimlew l-art bin-nisel tagħhom kien se jieħu ż-żmien. Eva kien se jkollha t-tfal u dawk it-tfal kien se jkollhom it-tfal sakemm l-art timtela bin-nies bħalma ried Alla. (Isaija 45:18) Ikun raġunevoli li taħseb li Ġeħova kien se jagħti din it-tama lil Adam u Eva jekk huma kienu maħluqin biex jgħixu ħajja qasira, sakemm igawdu lil uliedhom u forsi n-neputijiet, u qatt ma jaraw l-art mimlija bid-dixxendenti tagħhom?

Aħseb ukoll dwar l-inkarigu taʼ li jkollhom l-annimali sottomessi lejhom. Adam ġie inkarigat biex jagħti isem lill-annimali, u dan kien se jieħu ż-żmien. (Ġenesi 2:19) Imma biex ikunu sottomessi, kien jinvolvi li jitgħallem dwarhom u jifhem kif jieħu ħsiebhom. Dan kien se jieħu ħafna iktar żmien.

Il-fatt li Alla qalilhom biex jimlew l-art u biex ikollhom l-annimali sottomessi jindika li l-ewwel koppja umana kienu maħluqin bl-iskop li jgħixu ħajja twila. Infatti, Adam għex ħajja twila ħafna.

L-ISKOP T’ALLA GĦALL-BNEDMIN HU LI JGĦIXU GĦAL DEJJEM F’ĠENNA FUQ L-ART

HUMA GĦEXU ĦAJJA TWILA ĦAFNA

Il-Bibbja turi li l-bnedmin xi darba kienu jgħixu ħafna iktar milli ngħixu aħna llum. Tgħid: “Il-jiem kollha li għex Adam kienu disaʼ mija u tletin sena.” Imbagħad issemmi sitt irġiel oħra li għexu iktar minn 900 sena! Dawn kienu Set, Enos, Kenan, Ġared, Metuselaħ, u Noè. Ilkoll għexu qabel id-Dulluvju taʼ żmien Noè, u Noè kellu 600 sena meta ġie d-Dulluvju. (Ġenesi 5:5-27; 7:6; 9:29) Kif kien possibbli li jgħixu daqshekk?

Dawn l-irġiel kollha għexu viċin il-perfezzjoni. X’aktarx li din hi r-raġuni għala setgħu jgħixu daqstant. Imma l-perfezzjoni x’għandha x’taqsam maʼ li l-bniedem jgħix ħajja twila? U l-mewt kif se tiġi eliminata? Biex insiru nafu t-tweġibiet, l-ewwel għandna bżonn nifhmu għala nixjieħu u mmutu.