Mistoqsijiet mill-​qarrejja

Meta Satana qal lil Eva li hi ma kinitx se tmut jekk tiekol mis-​siġra tal-​għarfien tat-​tajjeb u l-​ħażin, kien hu qed jintroduċi l-​idea komuni llum tal-​immortalità tar-​ruħ?

Milli jidher le. Ix-​Xitan ma qalx lil Eva li jekk tiekol mill-​frott projbit minn Alla, hi kienet biss se tidher li mietet imma li parti inviżibbli minnha (dik li wħud jirreferu għaliha llum bħala r-​ruħ immortali) kienet se tibqaʼ tgħix xi mkien ieħor. Billi tkellem permezz tas-​serp, Satana qal li jekk Eva tiekol mill-​frott tas-​siġra, ‘hi żgur li ma tmut’ qatt. Hu ried jgħid li hi kienet se tibqaʼ tgħix, tgawdi ħajja aħjar fuq l-​art, indipendenti minn Alla.—Ġen. 2:17; 3:3-5.

Jekk id-​duttrina falza tal-​immortalità tar-​ruħ kif ġiet mgħallma llum ma bdietx fl-​Għeden, meta bdiet? Ma nistgħux ngħidu fiċ-​ċert. Aħna nafu li l-​qima falza kollha ġiet meqruda għalkollox fid-​Dulluvju taʼ żmien Noè. Ladarba Noè u l-​familja tiegħu biss salvaw mid-​Dulluvju u huma kienu kollha qaddejja veri, ma kien hemm ħadd jgħallem ideat reliġjużi foloz.

Allura t-​tagħlim kurrenti tal-​immortalità tar-​ruħ tal-​bniedem milli jidher beda wara d-​Dulluvju. Meta Alla ħawwad il-​lingwi f’Babel u n-​nies xterdu “fuq il-​wiċċ kollu taʼ l-​art,” mingħajr dubju huma ħadu magħhom l-​idea li l-​bnedmin għandhom ruħ immortali. (Ġen. 11:8, 9) Kien meta kien li bdiet din l-​idea falza, nistgħu nkunu ċerti li “missier il-​gidba,” Satana x-​Xitan, kien warajha u kien kuntent jaraha tinxtered maʼ kullimkien.—Ġw. 8:44.