Nilħqu Mseħbin Fiż-​Żwieġ Li M’Humiex Xhieda

¹ Hija ħaġa taʼ ferħ kbir meta koppji miżżewġin jingħaqdu fil-​qima vera. Madankollu, f’ħafna familji jkun wieħed biss mill-​imseħbin fiż-​żwieġ li jaċċetta l-​mogħdija tal-​verità. Kif nistgħu nilħqu lil dawn l-​imseħbin fiż-​żwieġ li m’humiex Xhieda u ninkuraġġuhom biex iqimu lil Jehovah flimkien magħna?​—1 Tim. 2:​1-4.

² Nifhmu Kif Jaħsbuha: Għalkemm xi mseħbin fiż-​żwieġ li m’humiex Xhieda jistgħu forsi jopponu, iktar iva milli le l-​problema tkun waħda taʼ indifferenza jew taʼ li wieħed ikun fehem ħażin. Dak li jkun jistaʼ forsi jħossu injorat jew jibda jgħir għall-​interess spiritwali li tkun għadha kemm sabet is-​sieħba tiegħu. “Waħdi ġewwa d-​dar, ħassejtni abbandunat,” jiftakar wieħed raġel miżżewweġ. “Ħassejtni li qishom marti u wliedi kienu qed jagħtuni daharhom,” jgħid ieħor. Xi rġiel forsi jaħsbu li qegħdin jitilfu l-​familja tagħhom minħabba xi reliġjon. (Ara l-​Watchtower tal-​15 t’Awissu, 1990, paġni 20-3.) Hu għalhekk li jkun aħjar, jekk inhu possibbli, li r-​raġel ikun inkluż mill-​bidu fl-​arranġament taʼ l-​istudju tal-​Bibbja fid-​dar flimkien maʼ martu.

³ Jaħdmu Bħala Tim: Żewġ Xhieda miżżewġin ħadmu flimkien bħala koppja biex b’mod effettiv jgħinu nies miżżewġin jidħlu fil-​verità. Wara li l-​oħt tkun stabbiliet studju mal-​mara, il-​ħu kien imur iżur lir-​raġel tagħha. Taʼ spiss kien jirnexxilu jibda studju mar-​raġel.

⁴ Kunu Dħulin u Ospitabbli: Il-​familji fil-​kongregazzjoni jistgħu jgħinu billi jieħdu interess f’dawk il-​familji li għadhom m’humiex magħqudin fil-​qima vera. Ftit żjajjar bħala ħbieb jistgħu jgħinu lill-​persuna li m’hijiex Xhud tara li x-​Xhieda taʼ Jehovah huma Kristjani dħulin u li jixtiequ l-​ġid lil kull wieħed minnhom.

⁵ Minn żmien għal żmien, l-​anzjani jistgħu jirrevedu l-​isforzi li jkunu saru dan l-​aħħar biex jintlaħqu mseħbin fiż-​żwieġ li m’humiex Xhieda u jiddeterminaw x’jistaʼ jsir iktar bit-​tama li dawn jintrebħu lejn Jehovah.​—1 Pt. 3:​1, ntt. fin-​New World Translation.