Il-Bieb Kbir Għal Attività Huwa Miftuħ
1 Bħala predikatur żeluż taʼ l-aħbar tajba, Pawlu fittex bil-ħerqa territorji fejn kien hemm iktar bżonn. Il-belt t’Efesu kienet waħda minnhom. Tant mar tajjeb f’li jippriedka hemmhekk li hu kiteb lill-Kristjani sħabu: “Hemm bieb kbir miftuħ għalija.” (1 Kor. 16:9) Pawlu kompla jaqdi f’dak it-territorju u għen lil ħafna Efesin biex isiru jemmnu.—Atti 19:1-20, 26.
2 Illum, hemm miftuħ għalina bieb kbir li jwassal għal attività. Ġejna mistednin biex ngħinu lil dawk il-kongregazzjonijiet li m’humiex jirnexxilhom jaħdmu għalkollox it-territorju kollu tagħhom kull sena. B’hekk l-isforzi tagħna jistgħu jagħmlu tajjeb għall-bżonn li jeżisti f’ċerti nħawi.—Qabbel it-2 Korintin 8:13-15.
3 Tistaʼ Taqdi Fejn Hemm Iktar Bżonn? Ikkunsidrajt int permezz tat-talb il-possibbiltà li tmur taqdi x’imkien ieħor? Forsi tkun tistaʼ tgħin lil xi kongregazzjoni fil-post fejn toqgħod int stess. Għax ma tiddiskutix l-affari maʼ l-indokratur tas-circuit u tara x’jissuġġerilek? Jew jistaʼ jkun li ġewwa t-territorju stess tal-kongregazzjoni tiegħek, hemm għadd kbir taʼ nies neqsin mis-smigħ jew li jitkellmu lingwa barranija u li ħadd għadu ma ħa ħsiebhom. Sabiex tlaħħaq maʼ dan il-bżonn, tistaʼ tagħmel sforz biex titgħallem il-lingwa tagħhom? Barra minn hekk, forsi fil-viċinanza diġà jeżisti xi grupp jew xi kongregazzjoni oħra b’dik il-lingwa li kienu qegħdin ‘jitolbu lis-Sid għal iktar ħaddiema tas-Saltna.’ (Mt. 9:37, 38) Jekk dan hu minnu, kapaċi tgħin?
4 Matul dawn l-aħħar għaxriet taʼ snin, kien hemm eluf taʼ familji Kristjani li marru joqogħdu f’postijiet oħrajn biex ikollhom sehem akbar fix-xogħol tal-ħsad. Tnejn miżżewġin li għamlu dan qalu: “Ridna naqdu lil Jehovah fejn stajna nagħmlu l-iktar ġid.” Jekk għandek din ix-xewqa u ssibha possibbli li tmur toqgħod x’imkien ieħor f’dan il-pajjiż jew jekk tikkwalifika biex taqdi f’xi pajjiż ieħor, l-ewwel iddiskuti l-pjanijiet tiegħek maʼ l-anzjani tal-kongregazzjoni tiegħek.
5 Jekk tixtieq tistaqsi lis-Soċjetà dwar fejn jeżisti xi bżonn, agħti lill-Kumitat tas-Servizz tal-Kongregazzjoni ittra li tispjega x-xewqa speċifika tiegħek. Huma jżidu l-kummenti tagħhom u jibagħtuha lis-Soċjetà. Hu x’inhu l-każ, sakemm jibqaʼ miftuħ il-bieb kbir għal attività, jalla lkoll kemm aħna nibqgħu nħabirku fis-servizz taʼ Jehovah.—1 Kor. 15:58.