Tara Int id-Dehra taʼ Barra biss?
1 Hekk kif nieħdu sehem fil-ministeru pubbliku tagħna, l-ewwel impressjoni li jkollna taʼ xi nies tistaʼ ġġagħalna nżommu lura milli naqsmu l-aħbar tajba magħhom. Per eżempju, kif kont tirreaġixxi kieku raġel taʼ xeħta qalila kien iħarislek dejjem b’suspett meta kont iżżur lill-ġar tiegħu li kien wera interess fil-verità? Waħda pijuniera li għaddiet minn din l-esperjenza ddeċidiet li tavviċina lir-raġel u tkellmu. Hu laqagħha b’mod żorr. Imma, ħaġa taʼ l-iskantament, qagħad jismaʼ l-messaġġ tal-Bibbja u bi ftit eċċitament aċċetta li jistudja. Talli l-oħt ma ġġudikatx id-dehra taʼ barra, ir-riżultat kien li t-triq infetħet għal dan ir-raġel u għal martu biex jitgħallmu l-verità.
2 Waħda oħt oħra għall-ewwel beżgħet mid-dehra taʼ raġel żagħżugħ li kellu xagħru twil. Imma hi ppersistiet f’li tagħtih xiehda fil-qosor kulmeta kien imur fil-ħanut fejn kienet taħdem. L-isforzi tagħha pproduċew il-frott, u r-raġel żagħżugħ issa huwa Xhud mgħammed. X’se jżommna lura milli nikkonkludu bl-għaġla li dawn l-uħud m’humiex se jwieġbu?
3 Nimitaw l-Eżempju taʼ Ġesù: Ġesù kien jaf li kellu jagħti ħajtu għal kulħadd. Għaldaqstant, id-dehra esterna taʼ ħaddieħor ma skuraġġitux. Hu rrealizza li saħansitra dawk b’reputazzjonijiet offensivi moralment jistgħu jkunu lesti li jinbidlu jekk jingħataw l-għajnuna u l-inċentiv xierqa. (Mt. 9:9-13) Hu pprova jgħin kemm lill-għonja u kemm lill-foqra bl-istess mod. (Mt. 11:5; Mk. 10:17-22) Jalla ma niġġudikawx lin-nies li niltaqgħu magħhom fil-ministeru mid-dehra tagħhom taʼ barra billi ma narawx dik li tistaʼ tkun kundizzjoni tajba tal-qalb. (Mt. 7:1; Ġw. 7:24) X’jistaʼ jgħinna nimitaw l-eżempju li jispikka taʼ Ġesù?
4 Permezz taʼ l-istudju tagħna tal-Bibbja, sirna napprezzaw li l-Kelma t’Alla għandha l-qawwa li tbiddel il-ħsieb, il-kondotta, u l-personalità taʼ dak li jkun. (Efes. 4:22-24; Lhud 4:12) Għalhekk, waqt li nuru attenzjoni xierqa, għandna nżommu attitudni pożittiva u nħallu l-bqija f’idejn Jehovah, Dak li jaqra l-qlub tal-bnedmin.—1 Sam. 16:7; Atti 10:34, 35.
5 Jalla l-fatt li naqsmu l-aħbar tajba b’mod imparzjali maʼ kull xorta taʼ nies, hi x’inhi d-dehra tagħhom taʼ barra, jikkontribwixxi għax-xogħol kbir tal-ħsad f’dawn l-aħħar jiem.—1 Tim. 2:3, 4.