Qed Twieġeb għall-Imħabba taʼ Kristu?
1 Hekk kif irrifletta fuq il-ħajja taʼ l-Għalliem tiegħu, l-appostlu Ġwanni kiteb: “Hu, li kien ħabb lil tiegħu li kienu fid-dinja, ħabbhom għall-aħħar.” (Ġw. 13:1) Matul dan l-istaġun tal-Mafkar, nibdew naħsbu dwar l-aqwa mod li bih Kristu wera mħabba. Nistgħu nwieġbu għal din l-imħabba billi neżerċitaw fidi fil-prezz tal-fidwa, billi jkollna sehem bil-ħeġġa fix-xogħol taʼ l-ippridkar u billi, bħal Ġesù, nissaportu “sa l-aħħar.”—Mt. 24:13; 28:19, 20; Ġw. 3:16.
2 Inwieġbu għall-Imħabba taʼ Kristu: Ġesù kien attiv ħafna fl-aħħar ġimgħa taʼ ħajtu fuq l-art. (Mt. 21:23; 23:1; 24:3) Bħala wħud li nimitaw lil Kristu, aħna wkoll niġu mqanqlin mill-imħabba biex ‘nitħabtu’ fis-servizz taʼ Jehovah. (Lq. 13:24) Tistaʼ int tieħu vantaġġ mill-arranġamenti li qed isiru biex tingħata iżjed xiehda matul April billi żżid il-ħin li tqattaʼ fil-ministeru?
3 Din is-sena l-Ikla taʼ Fil-Għaxija taʼ Sidna se taħbat l-Erbgħa fil-għaxija, id-19 t’April. Kemm se jkun hemm preżenti għal din l-okkażjoni mimlija tifsir? Fil-biċċa l-kbira, dan jiddependi minna. Għamilt lista taʼ dawk li bi ħsiebek tistieden—l-istudenti tiegħek tal-Bibbja u wħud interessati oħra, qrabatek, sħabek tax-xogħol, u sħabek taʼ l-iskola? Ikkuntattjajthom u stidinthom mill-qalb? Se terġaʼ tfakkarhom ftit jiem qabel il-Mafkar? Għandhom bżonn l-għajnuna tiegħek biex jiġu? L-anzjani qed jistiednu wkoll lil kulmin sar inattiv fil-ministeru. Il-fatt li l-Mafkar se jinżamm f’nofs il-ġimgħa minflok fi tmiem il-ġimgħa ma jagħmlux inqas importanti għalina lkoll biex nattendu.
4 Ejja Preparat: Huwa vitali għalina li nkunu preparati u li jkollna l-attitudni mentali xierqa meta nattendu għall-Mafkar. Pawlu ħeġġeġ lill-kredenti sħabu biex iżommu f’moħħhom is-serjetà taʼ l-okkażjoni. (1 Kor. 11:20-26) Tistaʼ taqra kapitli 13 sa 17 taʼ l-Evanġelju taʼ Ġwanni waqt l-istudju tal-Bibbja mal-familja tiegħek u mbagħad tqabbad lil kull membru tal-familja jirrakkonta xi jfisser is-sagrifiċċju taʼ Ġesù għalih persunali. Tinsiex ukoll taqra l-qari tal-Bibbja kuljum għall-ġimgħa tal-Mafkar!
5 L-imħabba tagħna għal Kristu ġejja minn qiegħ qalbna, u ma tiqafx fid-19 t’April. Aħna determinati li nuru l-imħabba tagħna lejh għal dejjem! Iċ-ċelebrazzjoni tal-Mafkar taʼ din is-sena se tgħinna nsaħħu din id-deċiżjoni.