Għala Għandna Nagħtu Kontribuzzjonijiet b’Mod Regulari?

¹ In-​nies taʼ Jehovah huma tassew imberkin spiritwalment! Aħna ngawdu pranzijiet spiritwali fl-​assembleat u l-​konvenzjonijiet tagħna, fejn nirċievu pubblikazzjonijiet ġodda, tagħlim mill-​aħjar, u pariri prattiċi. Aħna nistmaw ħafna x-​xogħol taʼ ħutna li jieħdu sehem f’servizz full-time bħala pijunieri, indokraturi li jivvjaġġaw, missjunarji, u volontieri f’Betel. Nieħdu pjaċir naraw uffiċċji sbieħ bħal dawk fil-​Mosta fejn jiġi organizzat ix-​xogħol tas-​Saltna f’Malta, u fejn isir ix-​xogħol tat-​traduzzjoni. M’għandniex xi ngħidu, jinħtieġu l-​flus sabiex jiġu finanzjati dawn il-​provvedimenti kollha.

² Iżda, David talab lil Jehovah: “Jien min jien u min hu dan il-​poplu tiegħi biex stajna nagħtu daqshekk minn rajna? Għax kollox minnek ġej; u minn idejk nagħtuh lilek.” (1 Kron. 29:14) Bħalma qal David, kollox huwa taʼ Jehovah. Għalhekk, kull darba li nikkontribwixxu sabiex navanzaw il-​qima pura, aħna nkunu qegħdin sempliċement nagħtu lil Jehovah dak li diġà huwa tiegħu. (Salm 50:10) B’hekk, tqum din il-​mistoqsija: Fuq kollox, Jehovah għala jridna nagħtu?

³ Parti Vitali mill-​Qima Vera: L-iktar tweġiba sempliċi hija li minn żmien il-​qedem Jehovah għamel l-​għoti parti vitali mill-​qima pura. Għala? L-​ewwelnett, Jehovah jagħmel l-​għoti parti mill-​qima vera għax li nagħtu huwa għall-​ġid tagħna. Dan jenfasizza l-​apprezzament tagħna għat-​tjieba t’Alla. Per eżempju, jekk tifel jixtri jew jagħti rigal lil ġenitur, il-​ġenitur għala jħossu se jtir bil-​ferħ? Taħseb li l-​ġenitur kellu bżonn dak ir-​rigal għax ma setax jgħaddi mingħajru? X’aktarx li le. Pjuttost, il-​ġenitur ikun tgħaxxaq jara lit-​tifel jiżviluppa spirtu t’apprezzament u li lest li jagħti. Għal raġunijiet simili, Jehovah jinkuraġġina biex nagħtu u jitgħaxxaq meta nagħmlu hekk.

⁴ It-​tieni, jekk nagħmluha d-​drawwa li nagħtu, se nitgħallmu nimitaw lil Jehovah u lil Ibnu, Ġesù Kristu, f’fattur importanti ferm. Jehovah dejjem jagħti, dejjem ġeneruż. Bix-​xieraq li nirringrazzjawh għal kull nifs li nieħdu, kull ikla żgħira li ngawdu, kull mument ferrieħi u sodisfaċenti f’ħajjitna. (Atti 14:17) Ġesù, bħal Missieru, wera spirtu taʼ għoti. Hu dejjem offra minnu nnifsu b’mod ġeneruż. Kont taf li meta Ġesù kien iwettaq il-​mirakli, kien irid jagħmel sforz? Iktar minn darba l-​Iskrittura tgħidilna li meta kien ifejjaq lill-​morda, “minnu kienet toħroġ qawwa.”—Lq. 6:19; 8:45, 46.

⁵ It-​tielet, permezz taʼ l-​għoti jiġu provduti bżonnijiet reali u importanti. Veru, Jehovah jistaʼ faċilment jipprovdi dak li hemm bżonn għall-​interessi tas-​Saltna mingħajr l-​għajnuna tagħna, imma hu għażel li jagħtina d-​dinjità b’dawn il-​privileġġi. Għalhekk, meta nagħtu mir-​riżorsi tagħna sabiex navanzaw l-​interessi tas-​Saltna, se jkollna s-​sodisfazzjon kbir li nkunu nafu li qed ikollna parti reali fl-​iktar xogħol importanti li qed isir f’din id-​dinja. (Mt. 24:14) Għandna wkoll il-​privileġġ li nużaw ir-​riżorsi tagħna biex ngħinu lil vittmi taʼ diżastri naturali u lil dawk li jgħixu f’postijiet imtertqin bil-​gwerra.

⁶ Ir-​rabaʼ, Jehovah għamel l-​għoti parti mill-​qima vera għax jekk nagħtu se nkunu ferħanin. Ġesù nnifsu qal: “Min jagħti hu aktar hieni minn min jieħu.” (Atti 20:35) Hekk ġejna magħmulin minn Jehovah. Jekk nagħtu b’mod regulari, u mhux darba kultant, jew meta jfettlilna, se nkunu nistgħu nżommu għajnejna sempliċi u ffokati fuq l-​interessi tas-​Saltna, bħalma rrikkmanda Ġesù. (Lq. 11:34; qabbel l-​1 Korintin 16:1, 2.) Dan se jgħinna wkoll inħossuna eqreb lejn Jehovah u Ġesù bħala ħaddiema flimkien magħhom. (1 Kor. 3:9) U dan se jkompli jżid maʼ l-​ispirtu ġeneruż li diġà jimmarka l-​adoraturi taʼ Jehovah mad-​dinja kollha.

⁷ Minfejn jiġu l-​flus li jappoġġaw din il-​kampanja vasta taʼ tagħlim u xogħol taʼ bini? Mingħand uħud li minn qalbhom iridu jagħtu, saħansitra l-​istess bħal fi żmien il-​bini tat-​tabernaklu. Qegħdin aħna nieħdu sehem b’mod individwali? Juri l-​mod kif aħna nużaw il-​mezzi finanzjarji tagħna li s-​servizz taʼ Jehovah huwa taʼ importanza suprema għalina? Fi kwistjonijiet taʼ flus, ejja nkunu amministraturi leali. Pawlu ħeġġeġ lill-​aħwa biex isegwu arranġament organizzat fl-​għoti tagħhom. “Kull wieħed minnkom,” hu qal, “kull l-​ewwel tal-​ġimgħa, iwarrab xi ħaġa u jfaddalha skond ma jistaʼ.” (1 Kor. 16:1, 2) Dan jistaʼ jservi taʼ eżempju għalina u għal uliedna meta nagħtu l-​kontribuzzjonijiet tagħna, kemm jekk nagħmlu dan permezz tal-​kongregazzjoni jew direttament lill-​eqreb uffiċċju tal-​fergħa tal-​Watch Tower Society. Bi qlub mimlijin apprezzament għall-​barkiet spiritwali tagħna, aħna ma ninsewx il-​privileġġ u r-​responsabbiltà tagħna li nikkontribwixxu fondi biex jintużaw għall-​avvanz taʼ l-​interessi tas-​Saltna t’Alla mad-​dinja kollha. (w96 11/1 28-30; w94 12/1 13-18)