Qiegħed Tapplika Dak li Tgħallimt fil-​Konvenzjoni Distrettwali “Għalliema tal-​Kelma t’Alla”?

¹ Kulmin attenda għall-​konvenzjoni distrettwali taʼ din is-​sena setaʼ jara li n-​nies taʼ Jehovah bi ħsiebhom iwettqu sew l-​inkarigu li jkunu għalliema tal-​Kelma t’Alla. (Mt. 28:19, 20) Hekk kif mort lura lejn id-​dar, liema punti partikulari taʼ tagħlim kont determinat li tapplika f’ħajtek stess u fil-​ministeru taʼ l-​għalqa?

² L-​Iskrittura Mnebbħa Tiswa biex Wieħed Jgħallem: It-​tema taʼ l-​ewwel jum kienet tiffoka fuq it-​2 Timotju 3:16. It-​taħdita prinċipali wriet li biex inkunu “Armati bis-​Sħiħ Bħala Għalliema tal-​Kelma t’Alla,” irridu ngħożżu ferm il-​Kelma t’Alla, nirrispettawha iktar minn kull opinjoni jew tradizzjoni umana, u nużawha dejjem. Irridu wkoll nitolbu kuljum għall-​ispirtu qaddis sabiex jgħinna fil-​ministeru tagħna u jgħinna nikkultivaw il-​frotta primarja tiegħu—l-​imħabba. U għandna nħallu lill-​organizzazzjoni taʼ Jehovah fuq l-​art tħarriġna bħala ministri permezz tal-​laqgħat kollha tal-​kongregazzjoni.

³ Is-​serje taʼ taħditiet tal-​Ġimgħa, “Ngħallmu Lilna Nfusna waqt li Ngħallmu lil Oħrajn,” spjegat li rridu nkunu t’eżempju f’li (1) inkunu fi qbil mal-​liġijiet t’Alla f’kull aspett tal-​moralità Kristjana, (2) inżommu drawwiet tajbin taʼ l-​istudju, u (3) neliminaw l-​attitudnijiet u l-​kundizzjonijiet tal-​qalb u tal-​moħħ li x-​Xitan jistaʼ jinqeda bihom. Imbagħad tgħallimna dwar modi prattiċi kif nipproteġu lill-​familji tagħna mill-​pesta dinjija tal-​pornografija. Il-​ġenituri ġew inkuraġġiti biex jagħtu eżempju f’li jevitaw anki daqqa t’għajn lejn xena sesswali u biex joqogħdu għassa għal dak li t-​tfal tagħhom jaraw fuq l-​Internet u t-​televixin. Liema punti li ħadt mill-​programm tal-​Ġimgħa bdejt tapplika?

⁴ L-​aħħar taħdita tal-​jum saħħet id-​determinazzjoni tagħna biex ngħożżu d-​dawl taʼ Jehovah, nibqgħu qrib tal-​klassi leali tal-​midlukin t’Alla, u nagħtu sehemna biex inżidu l-​paċi tal-​poplu t’Alla. Qrajtha l-​pubblikazzjoni l-​ġdida Il-​Profezija taʼ Isaija—Dawl għall-​Bnedmin Kollha II?

⁵ Kwalifikati Biżżejjed biex Ngħallmu lil Oħrajn: L-​iskrittura bħala tema għat-​tieni jum kienet it-​2 Timotju 2:2, New World Translation. Hekk kif qgħadt tismaʼ s-​serje taʼ taħditiet tas-​Sibt fil-​għodu, ħadt nota tas-​suġġerimenti dwar kif (1) tfittex lil dawk li jixirqilhom, (2) tikkultiva l-​interess tagħhom, u (3) tgħallimhom iħarsu dak kollu li ordnalna Kristu? Qiegħed tapplika dak li tgħallimt—li turi lill-​inkwilini minn taʼ l-​inqas punt wieħed mill-​Iskrittura u tpoġġi pedament għaż-​żjara li jkun imiss?

⁶ Il-​programm taʼ wara nofsinhar enfasizza l-​importanza taʼ li nimitaw lill-​Għalliem il-​Kbir, Ġesù. B’liema modi qed tistinka biex tkun iktar bħalu? Minn dak li tgħallimt fit-​tieni serje taʼ taħditiet tal-​jum, kif tħoss li tistaʼ ‘Tibbenefika Iktar bis-​Sħiħ mill-​Edukazzjoni Teokratika’? Liema suġġerimenti applikajt sabiex iżżid l-​abbiltà tiegħek ħalli tikkonċentra waqt l-​istudju persunali u l-​laqgħat tal-​kongregazzjoni?

⁷ Mingħajr l-​ebda dubju, il-​provvediment li ġej dalwaqt Benefit From Theocratic Ministry School Education (Ibbenefika mill-​Edukazzjoni taʼ l-​Iskola għall-​Ministeru Teokratiku) se jgħinna ntejbu l-​abbiltajiet tagħna bħala kelliema u għalliema tal-​Kelma t’Alla. Se tingħata attenzjoni akbar lejn il-​kwalitajiet tad-​diskors li kienu magħrufin għalihom xi qaddejja leali t’Alla fi żminijiet Bibliċi. Kull lezzjoni f’dan il-​ktieb taʼ gwida l-​ġdid għandha kaxxi li juru preċiżament x’għandna bżonn nagħmlu, għala huwa importanti, u kif għandna nagħmluh. Jinkludi wkoll eżerċizzji prattiċi. L-​aħwa nisa se jkollhom 29 setting minn fejn jagħżlu meta jwettqu l-​inkarigi tagħhom. Maż-​żmien se jsiru l-​bidliet li tħabbru fil-​mod kif titqassam l-​iskola. Għandek int rutina tajba taʼ studju u preparazzjoni sabiex tibbenefika bis-​sħiħ mill-​Iskola tal-​Ministeru Teokratiku kull ġimgħa?

⁸ Kunu Għalliema Meta Tqisu ż-​Żmien: Ebrej 5:12 (NW) ipprepara moħħ l-​udjenza għall-​Ħadd. Is-​serje taʼ taħditiet taʼ fil-​għodu, “Il-​Profezija taʼ Malakija Tħejjina għall-​Jum taʼ Jehovah,” ħeġġitna biex nagħtu ’l Alla l-​aħjar tagħna u biex nobogħdu kull forma taʼ tradiment sabiex nibqgħu ħajjin fil-​jum il-​kbir taʼ Jehovah li jqanqal il-​biżaʼ. Id-​drama, “Irrispetta l-​Awtorità taʼ Jehovah,” uriet b’mod qawwi li l-​kburija, l-​ambizzjoni, l-​għira, u l-​lealtà mhux f’postha taʼ Koraħ tal-​qedem u taʼ dawk li ssieħbu miegħu wassluhom għal ribelljoni diretta kontra Jehovah innifsu. It-​taħdita taʼ wara kienet tikkonċentra dwar il-​bżonn taʼ żmienna li nissottomettu ruħna lejn l-​awtorità divina kemm fil-​familja kif ukoll fil-​kongregazzjoni. It-​taħdita pubblika, “Min Huma Dawk li Qed Jgħallmu l-​Verità lill-​Ġnus Kollha?,” tat prova li x-​Xhieda taʼ Jehovah qed jagħmlu dan, f’kuntrast mal-​Kristjaneżmu, li jgħid bil-​kliem biss li qed jgħallem il-​verità tal-​Bibbja.

⁹ B’mod ċar, Jehovah qed iħarriġna biex inkunu għalliema aħjar tal-​Kelma tiegħu. Ejja napplikaw dak li tgħallimna, u ‘ngħassu fuqna nfusna u fuq it-​tagħlim tagħna; inżommu sħiħ f’dawn il-​ħwejjeġ, għax, jekk nagħmlu hekk, insalvaw lilna nfusna u lil dawk li jisimgħuna.’—1 Tim. 4:16.