Kif Nistgħu Ngħinu lil Dawk li Jattendu t-​Tifkira?

1. Liema xiehda qawwija se tingħata fit-​22 taʼ Marzu, 2008?

¹ Fit-​22 taʼ Marzu, 2008, miljuni taʼ nies madwar id-​dinja se jingħataw xiehda qawwija. Dawk li jattendu t-​Tifkira se jisimgħu dwar l-​imħabba kbira taʼ Ġeħova f’li jipprovdi fidwa għall-​umanità. (Ġw. 3:16) Se jitgħallmu dwar is-​Saltna u kif Ġeħova se jużaha biex iwettaq ir-​rieda tiegħu għall-​art kollha. (Mt. 6:9, 10) Se jaraw b’għajnejhom stess l-​imħabba u l-​unità tal-​poplu t’Alla u se jesperjenzaw l-​ospitalità mill-​qalb tagħna.—Salm 133:1.

2. Kif nistgħu ngħinu lill-​istudenti tal-​Bibbja li jkunu preżenti?

² Studenti tal-​Bibbja: Fost dawk li se jattendu se jkun hemm uħud li għadhom kif bdew jistudjaw il-​Bibbja magħna. Laqqagħhom maʼ l-​aħwa. Spjega kif isiru l-​laqgħat taʼ kull ġimgħa, u dawwarhom ftit ħalli jaraw is-​Sala tas-​Saltna. Matul it-​taħdita, il-​kelliemi se jinkuraġġixxi lil dawn l-​uħud biex ikomplu jagħmlu progress spiritwali. Tistaʼ tuża l-​kummenti tiegħu bħala bażi biex tinkuraġġixxi lill-​istudenti tiegħek.

3. Kif nistgħu ninkuraġġixxu lill-​pubblikaturi inattivi li jattendu?

³ Uħud Inattivi: Uħud minn dawk li jattendu se jkunu pubblikaturi inattivi. Ħu l-​inizjattiva biex tilqagħhom mill-​qalb. Evita li tistaqsi mistoqsijiet persunali jew li tgħid xi ħaġa li tistaʼ timbarazzahom. Ftit wara t-​Tifkira, l-​anzjani għandhom iżuru lil dawk inattivi li jkunu attendew, ifaħħruhom għall-​isforzi tagħhom biex ġew, u jistidnuhom mill-​qalb biex jattendu l-​laqgħa li jmiss tal-​kongregazzjoni.

4. Kif nistgħu lkoll kemm aħna ngħinu lill-​viżitaturi?

⁴ Viżitaturi: Xi wħud minn dawk li jattendu għandhom mnejn ikunu nies li nafuhom jew membri tal-​familja li nkunu stidinna personalment. Oħrajn forsi jkunu rċivew stedina waqt il-​kampanja speċjali. Jekk tara individwi li ma tafhomx, ħu l-​inizjattiva biex tintroduċi ruħek u biex tagħtihom merħba. Jistaʼ jkun li qed jattendu waħda mil-​laqgħat tagħna għall-​ewwel darba. Fil-​konversazzjoni tiegħek forsi ssir taf kif tistaʼ tikkuntattjahom. Permezz taʼ żjara persunali jew telefonata qasira ftit ġranet wara t-​Tifkira, forsi tistaʼ tipprova tinkuraġġihom jitgħallmu iktar u toffri studju tal-​Bibbja.

5. X’nistgħu ngħidu biex nibdew studju tal-​Bibbja?

⁵ L-​informazzjoni fit-​taħdita tat-​Tifkira tistaʼ tintuża bħala pedament biex tintroduċi l-​ktieb Il-​Bibbja X’Tgħallem? fi żjara lura. Per eżempju, il-​kelliemi tat-​Tifkira se jaqra Isaija 65:21-23. Fiż-​żjara lura, forsi tistaʼ ssemmi t-​taħdita u tgħid, “Ħalli nurik xi barkiet oħrajn li huma possibbli permezz tal-​fidwa.” Imbagħad ikkunsidra paġni 4-5 tal-​ktieb Il-​Bibbja X’Tgħallem? Jew forsi tistaʼ tgħid, “Ħafna jaħsbu dwar meta se nesperjenzaw it-​twettiq tal-​profezija taʼ Isaija.” Imbagħad ikkunsidra paragrafi 1-3 f’kapitlu 9. Mod ieħor kif toffri studju tal-​Bibbja hu li ssemmi xi ħaġa milli qal il-​kelliemi, toffri l-​ktieb Il-​Bibbja X’Tgħallem?, u turi kif isir l-​istudju.

6. Liema opportunitajiet għandna hekk kif nobdu l-​kmand taʼ Ġesù biex nikkommemoraw il-​mewt tiegħu?

⁶ Jalla lkoll kemm aħna nfittxu opportunitajiet biex ngħinu lill-​istudenti tal-​Bibbja, lill-​pubblikaturi inattivi, u lill-​viżitaturi li se jattendu. (Lq. 22:19) Ġeħova żgur se jbierek kwalunkwe żjieda fl-​attività li nistgħu nagħmlu fis-​servizz tagħna tas-​Saltna.