Ippriedka bla Waqfien

¹ Kultant, forsi nħossu li t-​territorju tagħna nħadem darba wara l-​oħra u bir-​reqqa imma bi ftit riżultati tajbin. Madankollu, għandna għalxiex inkomplu nippridkaw.—Mt. 28:19, 20.

² Bħala Xiehda: Ġesù bassar li l-​ippridkar tas-​Saltna kellu jkun parti sinifikanti mis-​sinjal kompost “tal-​konklużjoni tas-​sistema” u li kellu jsir “bħala xiehda lill-​ġnus kollha.” (Mt. 24:3, 14) Meta n-​nies josservawna nieħdu sehem fl-​ippridkar taʼ l-​aħbar tajba tas-​Saltna, tingħata xiehda qawwija. Wara li nitilqu mill-​inħawi, xi nies forsi jitkellmu dwar iż-​żjara tagħna għal sigħat jew ġranet wara, anki jekk ma semgħux il-​messaġġ. Jekk napprezzaw għala mmorru fuq il-​ministeru se niġu megħjunin biex nipperseveraw. Aħna nogħġbu lil Ġeħova bis-​sehem tagħna fit-​twettiq tal-​profezija Biblika permezz tax-​xiehda li nagħtu u l-​messaġġ taʼ twissija li nwasslu.—2 Tess. 1:6-9.

³ Hemm Bżonn il-​Perseveranza: Minħabba li n-​nies għandhom ħafna aljenazzjonijiet u ħafna affarijiet li jiħdulhom mill-​ħin tagħhom, hemm bżonn il-​perseveranza min-​naħa tagħna meta nistinkaw biex inkabbru l-​interess tagħhom. Ix-​Xhieda kienu jmorru għand waħda mara kull ġimgħa għal sena sħiħa qabel ma ddeċidiet li tistidinhom ġewwa għal diskussjoni minn fuq il-​Bibbja. Tant ħadet gost b’dak li semgħet li aċċettat studju tal-​Bibbja, bdiet tattendi l-​laqgħat, u ma damitx m’esprimiet ix-​xewqa li titgħammed.

⁴ Il-​kundizzjonijiet tad-​dinja qed jinbidlu malajr, u anki n-​nies. Ħafna li m’aċċettawx iż-​żjara tagħna fil-​passat forsi issa jkunu lesti jilqgħu t-​tama rifreskanti li naqsmu magħhom. Jekk persuna waħda biss twieġeb b’mod favorevoli għall-​messaġġ tas-​Saltna, il-​perseveranza tagħna tkun vallapena.

⁵ Madwar id-​dinja, iktar u iktar nies qed “jitniehdu u jitbikkew minħabba l-​qżiżijiet kollha li jsiru.” (Eżek. 9:4) Ir-​riżultati taʼ l-​ippridkar tagħna jagħtu prova li dawk li huma disposti sewwa qed iwieġbu għall-​messaġġ tas-​Saltna. (Is. 2:2, 3) Għalhekk, ejja nkomplu nippridkaw mingħajr waqfien billi bl-​imħabba nipperseveraw f’li ‘nġibu aħbar tajba taʼ xi ħaġa aħjar.’—Is. 52:7, New World Translation; Atti 5:42.