Qiegħda l-​Familja Tiegħek Tipprepara Biex Issalva?

¹ Profeziji Bibliċi mwettqin jagħtu evidenza konvinċenti tat-​tmiem taʼ din id-​dinja mill-​agħar li qed joqrob b’ħeffa. Issa ngħixu fi żminijiet kritiċi li huma simili ħafna għal dawk taʼ qabel id-​Dilluvju. (Mt. 24:37-39) Noè salva mill-​qerda taʼ dik id-​dinja tal-​qedem minħabba li “kien jimxi sewwa maʼ Alla.” (Ġen. 6:9) Noè żgur li għallem lil familtu t-​triqat taʼ Ġeħova għaliex huma wkoll salvaw mid-​Dilluvju. B’liema mod nistgħu nimitaw lil Noè u nippreparaw bħala familja biex insalvaw mit-​tmiem taʼ din is-​sistema mill-​agħar?

²Predikatur tal-​Ġustizzja: Noè ppersevera għal madwar 40 sa 50 sena bħala “predikatur tal-​ġustizzja.” (2 Pt. 2:5) Il-​ġirien tiegħu, kemm jekk taħt l-​influwenza t’anġli ribellużi li ħadu iġsma umani u kemm jekk le, żgur li żżuffjettaw bl-​ippridkar tiegħu. Fil-​ministeru tagħna spiss niltaqgħu m’apatija u twaqqigħ għaċ-​ċajt, u dan jagħti prova li din is-​sistema tinsab fi tmiemha. (2 Pt. 3:3, 4) Madankollu, għall-​kuntrarju tan-​nies fi żmien Noè, ħafna qed iwieġbu għall-​isforzi tagħna u qed ‘jiġru’ lejn il-​qima taʼ Ġeħova. (Is. 2:2) Aħna se nsalvaw ‘lilna nfusna u lil dawk li jisimgħuna’ biss jekk nipperseveraw. (1 Tim. 4: 16) Kemm hu vitali għall-​ġenituri li jgħallmu lil uliedhom dwar l-​urġenza tax-​xogħol taʼ l-​ippridkar kemm bil-​kliem u kemm bl-​eżempju!—2 Tim. 4:2.

³ Għamel “Kull Ma Ordnalu”: Is-​salvazzjoni taʼ Noè u taʼ familtu ddependiet milli jsegwu bir-​reqqa l-​istruzzjonijiet taʼ Ġeħova. (Ġen. 6:22) Huwa importanti wkoll għalina llum li nkunu ‘lesti biex nobdu’ d-​direzzjoni mill-​Bibbja u mill-​ilsir leali. (Ġak. 3:17) Tfal adulti f’familja waħda jiftakru kif missierhom applika s-​suġġerimenti li rċieva mill-​organizzazzjoni taʼ Ġeħova. Per eżempju, hu kkonduċa studju tal-​familja kull ġimgħa u kien jieħu lill-​familja fil-​ministeru fi tmiem il-​ġimgħa kif rikkmandat. Hu stinka biex jaħdem maʼ xi ħadd minn uliedu fil-​ministeru kull ġimgħa. Il-​lealtà tiegħu f’li jagħmel ‘kull ma kien ordnat’ ħalliet impressjoni kbira fuq uliedu, u s-​sitta li huma kibru biex ikunu qaddejja leali taʼ Ġeħova.

⁴ It-​tmiem taʼ din is-​sistema se jiġi f’daqqa. (Lq. 12:40) Billi nimitaw lil Noè u neżerċitaw fidi għas-​salvazzjoni, aħna u l-​familja tagħna żgur li se nkunu lesti!—Ebr. 11:7.