Ġieli Wrejt Kif Isir Studju fuq l-​Ewwel Żjara?

Meta jiġu offruti studju tal-​Bibbja, xi inkwilini jgħidu li mhumiex interessati jew li għandhom studju tal-​Bibbja fil-​knisja tagħhom. Ladarba ma jafux li aħna nistudjaw il-​Bibbja b’mod differenti minn gruppi reliġjużi oħrajn, huma m’għandhomx idea dwar kemm din tistaʼ tkun esperjenza informattiva u pjaċevoli. Għalhekk, minflok ma sempliċement toffri l-​istudju, għala ma tiħux żewġ minuti fuq l-​ewwel żjara biex turihom kif isir studju tal-​Bibbja? Biex nagħtu tixbiha: M’għandekx sempliċement tgħidilhom li int kok tajjeb u toffrilhom li tiġi lura b’ikla; dewwaqhom l-​ikel minnufih! Dan hu mod wieħed kif tistaʼ tagħmel dan fi ftit minuti, skont suġġeriment minn paġna 6 tal-​Ministeru tas-​Saltna taʼ Jannar 2006.

“Taħseb li għad jasal jum meta dan il-​kliem se jitwettaq? [Aqra Isaija 33:24, u agħti ċans għal tweġiba.] Ħalli nurik xi ħaġa interessanti dwar is-​suġġett.” Agħti lill-​inkwilin kopja tal-​ktieb Il-​Bibbja X’Tgħallem? u urih paragrafu 22 f’paġna 36. Aqra l-​mistoqsija fil-​parti t’isfel tal-​paġna u staqsi lill-​inkwilin biex ifittex it-​tweġiba int u taqra l-​paragrafu. Imbagħad erġaʼ staqsi l-​mistoqsija u agħti widen għat-​tweġiba tal-​inkwilin. Aqraw skrittura oħra flimkien. Qajjem mistoqsija li tistaʼ tiġi mwieġba fiż-​żjara li jmiss, u rranġa l-​ħin u l-​jum eżatt meta se tmur lura. Għadek kif bdejt studju tal-​Bibbja!