Kif Nibdew Studji tal-​Bibbja maʼ Dawk li Ħallejnielhom ir-​Rivisti

1. X’inhi l-​mira tagħna meta nħallu r-​rivisti?

¹ Ġeneralment kull nhar taʼ Sibt noffru r-​rivisti Torri taʼ l-​Għassa u Awake! fil-​ministeru. Madankollu, dan hu l-​ewwel pass biex nilħqu l-​mira tagħna li ngħallmu l-​verità lil uħud taʼ qalb onesta. Hawn taħt għandek issib suġġerimenti dwar kif tqassam il-​ktieb Il-​Bibbja X’Tgħallem? fuq żjara lura u tibda studju tal-​Bibbja. Dawn jistgħu jiġu adattati għat-​territorju tiegħek u tistaʼ tgħidhom fi kliemek. Tistaʼ tuża metodu ieħor jekk issibu effettiv għalik.

2. Kif nistgħu nużaw il-​paġni taʼ l-​introduzzjoni fil-​ktieb Il-​Bibbja X’Tgħallem? biex nibdew studju tal-​Bibbja?

² Uża l-​Paġni taʼ l-​Introduzzjoni: Meta tmur lura, int tistaʼ tgħid: “Ir-​rivisti li ħallejtlek jidderieġu l-​attenzjoni lejn il-​Bibbja. Innota għala l-​qari tal-​Bibbja hu daqshekk importanti.” Aqra Isaija 48:​17, 18; Ġwanni 17:3; jew skrittura adattata oħra. Imbagħad wara li turi lill-​inkwilin il-​ktieb Il-​Bibbja X’Tgħallem? u tagħtih kopja, tistaʼ tkompli b’dan il-​mod:

◼“Il-​Bibbja tagħtina tama vera għall-​futur.” Uri lill-​inkwilin paġni 4-5 u staqsi, “Liema waħda minn dawn il-​wegħdi tixtieq taraha titwettaq?” Idderiġih lejn il-​kapitlu li jiddiskuti l-​wegħda Skritturali li jkun għażel, u jekk iħallik ikkunsidra fil-​qosor paragrafu jew tnejn.

◼Jew tistaʼ tgħid, “Il-​Bibbja twieġeb l-​iktar mistoqsijiet importanti tal-​ħajja.” Idderieġi l-​attenzjoni tiegħu lejn paġna 6, u staqsih jekk qatt xi darba staqsiex lilu nnifsu xi mistoqsija li hemm fin-​naħa t’isfel tal-​paġna. Mur fil-​kapitlu li jagħti t-​tweġiba, u ddiskuti fil-​qosor paragrafu jew tnejn.

◼Jew tistaʼ tenfasizza xi ftit mit-​titli fil-​werrej u tistaqsih liema suġġett jinteressah. Iftaħ il-​kapitlu li jkun għażel, u uri fil-​qosor kif isir studju tal-​Bibbja.

3. Kif nistgħu nibdew studju tal-​Bibbja wara li nkunu ħallejna r-​rivisti li jittrattaw dwar (a) il-kundizzjonijiet tad-​dinja li sejrin għall-​agħar? (b) il-​familja? (ċ) kif il-​Bibbja hi taʼ min joqgħod fuqha?

³ Qajjem Mistoqsija fl-​Ewwel Żjara: Għażla oħra hi li tħejji l-​pedament għaż-​żjara lura fl-​ewwel żjara. Wara li l-​inkwilin jaċċetta r-​rivisti, qajjem mistoqsija, u wiegħdu li se twiġibha meta terġaʼ żżuru. Stinka biex tagħmel arranġament definit biex tmur lura, u kun żgur li żżomm l-​appuntament. (Mt. 5:​37) Meta tmur lura, fakkar lill-​inkwilin dwar il-​mistoqsija, u aqra fil-​qosor u ddiskuti it-​tweġiba mill-​ktieb Il-​Bibbja X’Tgħallem? Agħtih kopja sabiex ikun jistaʼ jsegwi miegħek. Issa ġejjin ftit eżempji:

◼Jekk ir-​rivista li ħallejt tittratta dwar il-​kundizzjonijiet tad-​dinja li sejrin għall-​agħar, tistaʼ tgħid, “Darb’oħra nistgħu niddiskutu t-​tweġiba tal-​Bibbja għal din il-​mistoqsija, Liema bidliet se jġib Alla fuq din l-​art?” Urih paġni 4-5 meta tmur lura. Jew tistaʼ tqajjem il-​mistoqsija, “Huma t-​traġedji r-​rieda t’Alla?” Fiż-​żjara lura, uri lill-​inkwilin paragrafi 7-8 taʼ kapitlu 1.

◼Jekk ir-​rivista li ħallejt tittratta dwar il-​familja, qabel ma titlaq tistaʼ tqajjem din il-​mistoqsija, “X’jistaʼ jagħmel kull membru tal-​familja biex jagħmel il-​ħajja tal-​familja iktar ferħana?” Meta tmur lura kkunsidra paragrafu 4 taʼ kapitlu 14.

◼Jekk ir-​rivista li ħallejt tittratta dwar kif il-​Bibbja hi taʼ min joqgħod fuqha, tistaʼ tqajjem din il-​mistoqsija għad-​diskussjoni li jmiss tiegħek, “Hija l-​Bibbja eżatta meta tiddiskuti kwistjonijiet xjentifiċi?” Fiż-​żjara lura, ikkunsidra paragrafu 8 taʼ kapitlu 2.

4. X’għandna nagħmlu jekk l-​inkwilin ma jaċċettax il-​ktieb Il-​Bibbja X’Tgħallem?

⁴ Fit-​tmiem taʼ kull diskussjoni, qajjem mistoqsija oħra li tkun se twiġibha fiż-​żjara li jmiss. Ladarba jiġi stabbilit studju regulari, iddiskuti l-​kapitli kollha tal-​ktieb wieħed wara l-​ieħor. Xi ngħidu jekk l-​inkwilin ma jaċċettax il-​ktieb Il-​Bibbja X’Tgħallem? Xorta tistaʼ tibqaʼ tiħodlu r-​rivisti u jkollok diskussjonijiet Skritturali miegħu. Hekk kif tikkultiva l-​interess tiegħu, għandu mnejn li maż-​żmien jaċċetta studju tal-​Bibbja.

5. Għala għandna nistinkaw biex nagħmlu iktar milli sempliċement inħallu r-​rivisti man-​nies?

⁵ It-​Torri taʼ l-​Għassa u l-​Awake! jistgħu jinkuraġġixxu individwu biex jitgħallem dak li tassew tgħallem il-​Bibbja. Għalhekk, agħmel sforz speċjali biex tibda studji tal-​Bibbja maʼ dawk li jaċċettaw ir-​rivisti. B’dan il-​mod, aħna nkunu qed nobdu l-​istruzzjonijiet taʼ Ġesù biex ‘nagħmlu dixxipli u ngħallmuhom.’—Mt. 28:​19, 20.